Read Sangtam Naga 1 SAMUEL 31 Bible Online

1 SAMUEL 31 - Sangtam Naga bible

1 SAMUEL 31

¹Filistinrünü Gilboa zong la Israelrü te chitacho. Hütsüla Israelrü adrong kyüsehcho ko anyingcho Yangthsaba Saul ko atsurüti zeh tsishocho.

²Ta Filistinrünü arüh bhucho ko Saul tsurü Jonathan, Abinadab ko Malkishua arüh asang kyüsehcho.

³Ko mongchii tsü Saul nengdang dee amülah thsacho ko Saul apu mii arorüh tbüdengnü kyacho ko dee khe lerohpehcho.

⁴Abinü abi thsunohrü biba dhrezaba te yocho, “Hiri müyudsirü Filistinrü khyang Ih müthsamünyü mükyüsehsohnung, nü nohsheng khyücheh Ih kyüsehng.” Ta hütsüta nguchinung dhrezabanü dee drücho. Achotsü Saulnü apu jangjang apu nohsheng tohcheh thraseh sücho.

⁵Dhrezaba tsünü Saul sücho tsü ngu abisü apu jangjang anohsheng tohcheh Saul yola hütsüla thraseh sücho.

⁶Hütsüta Saul, atsurü asang ko dhrezaba tsü sücho; hütsü nyümong Saul nyitsarü apüm sücho.

⁷Khode Jezrel Ngah kihkeh khüulang lirü ko Jordan Yongkhi nyüchüro lang lirünü Israelrü rothsarü shehko ko Saul ko atsurü asang zeh sükopü yuchicho, arühnü arüh yangditi pehjüpü tsipehcho. Hütsüpü Filistinrünü ro hütsüri la licho.

⁸Khataba nyümong khüu Filistinrü asürü fü lanü jengki khoh khyünung rode, arühnü Gilboa zong la Saul ko atsurü asang me ngucho.

⁹Achotsü arühnü Saul ku dengcho, ajengki khoh khyücho ko Filistia lih apümlang arüh tsingrang ko müyurü te hiba yusi atsa tsü sobho müthehcho.

¹⁰Hütsüpü arühnü abi thsunohrü tsü arüh tsingrang Astarte tsingranglarü amübükuh la yohpücho ko abi fü tsü Beth Shan yangdi tbükhüm chah hamkehpücho.

¹¹Khode Gilead la Jabeshrünü Filistinrünü Saul chah nguchicho tsü yuchicho,

¹²akurahrütinü Beth Shan lang müyüp shemüsucho. Arühnü Saul ko atsurüti me tsü tbükhüm chah tsünü khyüchocho ko Jabesh lang hiro hütsüla tahpehcho.

¹³Hütsüpü arühnü arühlungrü tsü khyo yangdi la tamarisk singdong pohki dhrürangcho ko nyümong dhünyeh kongcho.