Read Sangtam Naga 1 SAMUEL 4 Bible Online

1 SAMUEL 4 - Sangtam Naga bible

1 SAMUEL 4

¹Hütsütade, Israelrü mahnung Filistinrü shibülungcho, hütsünü Israelrüsü arüh te khatanung shemüsucho. Israel tsü Ebenezer la ko Filistinrü tsü Afek la müdongcho.

²Filistinrünü mahcho ko dee khee khatapü arühnü Israelrü kohcho ko nyüh hajar müyü kyüsehcho.

³Asünyingrü amüdongji lang thali rode, Israel zirünü yocho, “Tuepü ABÜDONGBAnü chünye Ihsa Filistinrü khyang kohsohcho? Abi Ihsa yola zehnung ko arorüh khehlanü Ihsa khümchonung nengdang Ihsanü Shilo lanü ABÜDONGBA Singdi tsü hironung.”

⁴Hütsüta arühnü Shilo lang riwürü mütheh Cherubim michah pümba Akohba ABÜDONGBA Yuzeng Singdi tsü hirocho. Ko Eli tsurü Hofni ko Finehas nyühsü Yuzeng Singdi yola rocho.

⁵Khode Yuzeng Singdi tsü hiro chihcho, Israelrünü alimih dhi shühchi akünyangnü züdecho.

⁶Züdeba tsü Filistinrünü yuchi yocho, “Ibrirü müdongchah züdeba tsü nyidheng! Tu adüzüo?” Arühnü ABÜDONGBA Singdi hiro arüh müdongchah chihcho müdhede,

⁷arühnü dronü yocho, “Arüh müdongchah tsingrangba roko! Ihsa changko. Ihsa chah hi kyo khodesü mütikehdheng!

⁸Hiri tsingrangti zii lanü sünü Ihsa khümchonung? lipilih la Ijiprü rümsohba tsü hiri tsingrangnüe.

⁹Kuhrahng! Filistinrü! Adhrerü kyo khataang mahkhang arüh yurü kangnung. Hütsüeko adhrerü kyo khataang!”

¹⁰Filistinrünü khütang müküp khatacho ko Israelrü kohcho ko arüh palu müdonglang shang tsicho. Khütang kingthrümcho: Israel rothsarü hajar sangre kyüsehcho.

¹¹Tsingrang Yuzeng Singdi kengchocho ko Eli tsurü Hofni ko Finehas anyüding kyüsehcho.

¹²Hütsü nyümong Benjaminrü nyüh khüdunü khata ngah lanü Shilo chii ajengki rehnah ko athahchah asongsong kangkehpü shang wü chihcho.

¹³Khode abi chihcho, Eli tsü langjüp apu pümji la pümpü dheng yacho, tunüo Yuzeng Singdi nengdang abi müsi mükangkeh licho. Khode nyitsarüba tsü yangdi la tsü züdu atikehcho tsü yocho, yangdi la lirü apümnü khong tracho.

¹⁴Elinü yuva tsü yuchi tsingdhengcho, “Hi tu nengdang khongro?” Nyitsarüba tsünü Eli te yusi tsü yonung shangcho.

¹⁵(Eli tsü adelü kang kuhrepü keh ashirü ko anahnü müngu licho.)

¹⁶Nyitsarüba tsünü yocho, “Ih khata la tsünü tsicheh shang ro chünye chihre.” Elinü tsingdhengcho, “Itso, tu tikehcho?”

¹⁷Yuhiba tsünü lalingcho, “Israelrünü Filistinrü mükohpü shehko, hütsü Ihsa nengdang amükoh dirako. Hütsü du mahpü nü tsurü Hofni ko Finehas nyühsü kyüsehko ko Yuzeng Singdisü kengcho tsiko.”

¹⁸Nyitsarüba tsünü Yuzeng Singdi pü chochehchüde, Eli tsü trahtri te apümji la tsünü akhanglangnü khülucho. Abi shira ko nyühnyehraba tsünü khülude tsü ahong nüpcho ko sücho. Abi Israel la kang yüre anüchirü thsacho.

¹⁹Eli tsunyahtpü, Finehas nitpü tsü afü müdeng licho ko zatbünung becho chihpü licho. Khode Yuzeng Singdi tsü hitsiko ko anii au ko anii sükopü yuchicho, dhrongyengnü mikhung küro azarü tsü surocho.

²⁰Abükyü sotsiyade, abükyü trotpü tsünü yocho, “Müsi mülahng! Adhrerü nümüsuko!” Ta abükyünü hütsü mümüdhecho ko tu mülalingcho.

²¹Abükyünü azaba neng tsü Ikhabod dsijücho, adüzü Israel chahnü Tsingrangba ahechi tsipehko, tunüo Yuzeng Singdi, anii au ko anii sücho khyanglangnü.

²²Abükyünü yocho, “Israel chahnü Tsingrangba ahechi tsipehko, tunüo Tsingrangba Yuzeng Singdi hitsipehko.”