Read Santali Mathae 11 Bible Online

Mathae 11 - Santali bible

Mathae 11

¹Jisu do acʼren gelbar celako hukumakoe mucạtʼketʼ khan, uni do ato ato cetʼako ar porcar lạgitʼ onḍe khone oḍok calaoena.

²Johan do hajotre tahenrege Mạsiakʼ kạmiko reaṅe ańjomketʼ khan acʼren celako kolketʼkoteye kulikedea,

³“Okoeakʼ hijukʼ reakʼ katha menakʼtae uni dom am kangea, se eṭakʼgicʼle ńel horea?”

⁴Jisui roṛ ruạṛatʼkoa, “Okakope ńeletʼ arpe ańjometʼ onako senkate Johan lạiaepe.

⁵Kãṛã hoṛko ńeńelkana, leḍha hoṛko taṛameda, murhucʼ jom hoṛko bogekʼkana ar kala hoṛko ańjomeda; gocʼ hoṛko jiwetʼ beredokʼkana ar reṅgecʼ orecʼko ṭhen do bhage sombat reakʼ katha lạiạgokʼ kana.

⁶Bhạgangeae uni do okoe ińre bae tạkijokʼkan.”

⁷Ado Johanren celakoko ruạṛ calakʼkan tahẽkanre, Jisu do gadel hoṛko Johan reaṅ lạiakoe ehopʼena, “Hahaṅkarte do cetʼ ńeńelpe oḍok senlena? Hoete hilạukʼkan chuchi?

⁸Se, cetʼ ńeńelpe oḍok calaolena? Mońj kicricʼe horokʼ akatʼ mitʼhoṛ ńeńel? Sạrige okoe mońj kicricʼko horokʼetʼkan onko do rajakʼ oṛakʼreko tahenkana.

⁹Se cetʼ ńeńelpe oḍok senlena? Jãhãe nạbi? Hẽ, metapekạnạń, uni do nạbi khon hõe maraṅgea.

¹⁰Johan doe uni kana one okoe reaṅ sostorre olakan: Ńelme, ińren goḍet do am lahateń kolekana, uni do am lahate senkate amakʼ hore teara.

¹¹Sạrigeń metapekana, maejiuko khon janam akan modre Johan bạbạptisicʼ khon maraṅ do okoe hõ bạnukʼkoa. Menkhan serma rajre okoe do joto khone huḍińge uni hõ Johan khon doe maraṅgea.

¹²Johan bạbạptisicʼakʼ okte khon ńit hạbicʼ serma raj doko jormoṭetʼ kana, ar okoeko jormoṭetʼkan onkoge ona doko recʼjoṅ kana.

¹³Ente joto nạbi ar ạn do Johan hạbicʼgeko nạbileda.

¹⁴Noa kathape pạtiạuakʼkan khan enḍekhan ańjompe okoeakʼ hijukʼ reakʼ katha tahẽkan uni Eliạ doe nui Johan kangea.

¹⁵Ańjom lạgitʼ lutur menakʼtaeicʼ doe ańjomma.”

¹⁶“Niạ piṛhiren hoṛ do okoe tulucʼ iń jurikekoa? Onko do nonkan gidrạko lekanako okoe do bajarre duṛupʼkate eṭakʼ gidrạko hohoateko metakokan,

¹⁷‘ale do ape lạgitʼ tiriole oroṅkeda, menkhan bape enecʼlena; homor halaṅ kedale, ar koṛam hõ bape ceṭakʼlena.’

¹⁸Johan do hecʼkate jom hõ bae jometʼ tahẽkana ar ńũ hõ bae ńũyetʼ tahẽkana, onate hoṛko meneda unire do bhut menaea.

¹⁹Ar Manwa Hopon do hecʼkateye jom-ńũyetʼte hoṛkoko meneda, ‘hạni ńelepe, mitʼṭen lebṛa ar darkha rasa hoṅgoricʼ, mạsul uṭhạuko ar bạṛicʼ hoṛkoren gate.’ Menkhan ạkil je khạṭige ona reakʼ porman do acʼakʼ kạmikorege menakʼa.”

²⁰Ado Jisu okako ato ar nagrahakore ḍher hahaṛa kạmikoe kạmiletʼ onako jaegaren hoṛko do mon bako ạcurletʼtakoa. Onate uni do onako jaega nisṛạue ehopʼena,

²¹“Hae amre, E Khorashin, hae amre E Bethsaeda! Aben talare oka hahaṛa kạmiko hoeakan, ona do Tur ar Sidon reakʼ nagrahare hoelen khan ḍher din laharege onko do gõṛẽ kicricʼ horokʼkate ar torocʼre duṛupʼkate kại khon monko ạcurketakoa.

²²Sạrigeń metaben kana, bicạr dinre abenakʼ khon Tur ar Sidon reakʼge boroṅ sahaokʼa.

²³Ar E am Kaparnạhum! Baṅ do serma hạbicʼem usul ocokokʼ? Tishõ baṅa, am do patal puri hạbicʼem ńurhạ ocokʼa. Okako hahaṛa kạmi amre hoeakan, ona Sodomre hoelen khan enḍekhan teheń hạbicʼ tahẽkokʼa honaṅ.

²⁴Sạrigeń metaben kana, bicạr dinre abenakʼ khon boroṅ Sodom reakʼge ḍher sahaokʼa.”

²⁵Ona tayom Jisui menkeda, “E Baba, ot ar sermaren Probhu. Amiń sarhaoetʼmea, ente am do ạkilan ar budanko ṭhen khon noako reaṅ dom oko dohoakada, menkhan kạṭicʼ gidrạ lekanko ṭhen dom sodor akada.

²⁶Hẽ Baba, amakʼ sana lekage noa do hoeakana.

²⁷“Ińren Baba do sanamakʼge ińakʼ tireye jimạ akada. Baba chaḍa Hopon do okoe hõ bako baḍaeyede kana ar Hopon chaḍa Baba hõ okoege bako baḍaeyedea, Hopon okoe ṭhen Baba sodoreye menjoṅkan unige uni doe baḍaeyea.

²⁸“Ape okoe do laṅga ar bojhatepe ten akan, dela iń ṭhen hijukʼpe, ińgeń jirạu ocopea.

²⁹Ińakʼ ãrãṛ gogpe ar iń ṭhen khon cetʼ joṅpe, ente iń do mạ̃hir ariń nindhạngea.

³⁰Onate ontorre jirạupe ńama, ente ińakʼ ãrãṛ do algagea ar ińakʼ bojha do rawalgea.”