Read Santali Mathae 13 Bible Online

Mathae 13 - Santali bible

Mathae 13

¹Enhilokʼge Jisu do oṛakʼ khon oḍok senkate doreão aṛereye duṛupʼena.

²Ar acʼ ṭhen ạḍi utạr hoṛko jarwayen khan, uni do mitʼṭen lạukạre decʼkateye duṛupʼena, ar sanam hoṛ do ḍhipreko teṅgo tahẽyena.

³Unre uni do phenkote ạḍi lekan sikhnạt emakoe ehopʼena.

⁴Uni doe metatʼkoa, “Mitʼṭen casa hoṛ do itạ erokʼe oḍok calaoena. Ar erokʼ jokhecʼ adomakʼ itạ do hor aṛere ńurena ar cẽṛẽko hecʼkate onako halaṅ jomkeda. Ar adomakʼ itạ do cạṭạni hasare ńurena.

⁵Onḍe do dạriạ hasa baṅ tahẽkana. Ar dạriạ hasa baṅ tahẽkante itạ do usạrage janam rakapʼtʼena,

⁶menkhan siń candoe rakapʼen khan ona do tolmocʼ cabayena ar mońjte rehetʼ baṅ bạisạulente rohoṛ kạrcupʼena.

⁷Arhõ adomakʼ itạ do jạnum jhạwạ talare ńurena. Ar jạnumko hara rakapʼen khan onakoe jhurkeda.

⁸Ar adomakʼ itạ do bhage hasare ńurente adom do mitʼ sae doboṛ, adom do turui gel doboṛ ar adom do pegel doboṛ gele beleyena.”

⁹Ado golpoe lại mucạtʼketʼ khan Jisui menkeda, “Ańjom lạgitʼ lutur menakʼtaeicʼ doe ańjomma.”

¹⁰Tayomte celako do Jisu ṭhen hecʼsorenteko metadea, “Am do golpoko hotete hoṛko cedakʼem cetʼako kana?”

¹¹Uniye roṛ ruạṛatʼkoa, “Ape do serma raj reakʼ okoakʼkope baḍae ocoakana, menkhan onko do baṅ emakatʼkoa.

¹²Ente okoe menakʼtae uni do arhõe em ocokʼa, onate uniakʼ do aema hoyokʼtaea. Menkhan okoeakʼ bạnukʼ uni do oka menakʼtae ona hõe recʼocokʼa.

¹³Noa iạte golpoko hoteteń cetʼako kana, ente onko do ńeńel tulucʼ bako ńeńelkana, ańjom tulucʼ bako ańjomeda ar bujhạu hõ bako bujhạueda.

¹⁴Noko hotetege Jesaea nạbiakʼ katha do purạukʼ kana: Ańjom dope ańjomgea menkhan bape bujhạua; ńeńel dope ńeńelgea menkhan baṅgepe oroma.

¹⁵Noko hoṛkoakʼ ontor do goṛdho akana ar lutur hõ tepetʼakan takoa, onko do mẽtʼko jạpitʼ akada, jemon mẽtʼte aloko ńeńel, luturte aloko ańjom ar ontorte aloko bujhạu, ar bogekʼ lạgitʼ iń ṭhen aloko ruạṛ hijukʼ.

¹⁶“Menkhan ape dope bhạgangea, ente apeakʼ mẽtʼ doe ńeleda, ar apeakʼ lutur doe ańjomeda.

¹⁷Sạrigeń metapekana, okakope ńeletʼ ona do ạḍi utạr nạbi ar dhorom hoṛko ńeńelko gagojlena menkhan bako ńelleda, ar okakope ańjometʼkan ona hõ ańjomko gagojlena menkhan bako ańjomleda.

¹⁸“Nõkʼõe enḍekhan casa hoṛakʼ golpo reakʼ bhed ańjompe.

¹⁹Jãhãege serma rajosṭi reakʼ katha ańjomkatehõ bae bujhạu khan unre Soetan doe hijukʼa ar uniakʼ monre oka katha er akan onae ạtkira. Ona hor aṛere ńurlen itạ reakʼte do nonkan hoṛ reaṅge roṛ akana.

²⁰Ar cạṭạni hasare ńuren itạ reakʼte do onko reaṅ roṛ akana okoe do serma raj reakʼ katha ańjomkate unrege rạskạteko ataṅetʼkan,

²¹menkhan onkore mońjte baṅ rehedokʼ kante thoṛa ghuṛi lạgitʼko ṭarhao tahen kana. Ar ona katha khạtirte tinre santao ar khedreko paṛaokʼkana unre onko doko pạcokʼkana.

²²Jạnum jhạwạre eren itạ reakʼte do nonkanko lạgitʼge roṛ akana okoe do ona kathako ańjomketʼ, menkhan gharońj reakʼ dạndi ar dhon reakʼ mãyãte ona katha doko ten dohokakʼ kana. Onate onkore jãhãn jo do baṅ hoyokʼ kana.

²³Ar bhage hasare ńuren itạ reakʼte do nonkanko lạgitʼ roṛakana okoe do ona katha ańjomkateko bujhạuetʼkan ar joko emokʼkan. Adom do mitʼ sae doboṛ, adom do turui gel doboṛ, ar adom do pegel doboṛ.”

²⁴Uni do cetʼako lạgitʼ arhõ mitʼṭen golpoe lạiatʼkoa. “Serma raj do nonkan mitʼṭen hoṛ lekana, okoe do acʼakʼ goḍare bhage itạye erketʼ.

²⁵Menkhan hoṛko jạpitʼ akatʼ tahẽkanre uni hoṛren bạiri doe hecʼena ar guhum talare sama ghãs reakʼ itạ er oṭokateye calaoena.

²⁶Ado guhum omonkate geleyen khan ona talare sama ghãs hõ ńelena.

²⁷Ona ńelte gutiko do hecʼkate oṛakʼ kisạ̃ṛko metadea, ‘Amakʼ goḍare cetʼ bhage itạ do bam erleda? Enḍekhan sama ghãs do oka khon hecʼena?’

²⁸‘‘Uni doe metatʼkoa, ‘jãhãe bạiriye nonka akada.’ ‘‘Gutikoko metadea, ‘enḍekhan ale do cetʼ senkate onakole totʼ giḍikakʼa?’

²⁹“Uniye metatʼkoa, alo, ‘ente sama ghãspe jarwaere guhum hõpe totʼ boteja.

³⁰Phosol belekʼ hạbicʼ mitʼ dhaote hara ocoakʼpe. Unre samṭao jokhecʼ phosol samṭaokoń metakoa, pạhilre sama ghãs jarwa maṛaṅpe ar ạṭikate begarpe seṅgelre atar giḍi lạgitʼ, menkhan guhum do ińakʼ golare ạgu jarwaepe.’ ”

³¹Jisu do arhõ mitʼṭen phene lạiatʼkoa. “Serma raj do mitʼṭen tuṛi jaṅ lekana, one okaṭakʼ do mitʼ hoṛ idikate acʼakʼ goḍareye erketʼ.

³²Ona itạ do sanam itạko khon kạṭicʼgere hõ, haralen khan joto aṛakʼ sakam khon lạṭuge hoyokʼa; ar nunạkʼ lạṭu harakʼa je, coṭren cẽṛẽko hõ hecʼkate ona reakʼ dạrkore tukạya.”

³³Uni do arhõ mitʼṭen golpoe lạiatʼkoa: “Serma raj do khạmi lekana. Mitʼṭen maejiu do ona idikate gel irạl keji holoṅreye sipi mesalkeda. Onate joto holoṅ do khạmianakʼ hoyena.”

³⁴Jisu do golpoko hotete hoṛko noa sikhnạte ematʼkoa. Ar golpo begor okaṭakʼ cecetʼakʼ hõ uni do bae emakokan tahẽkana.

³⁵Noa do hoyena nạbi hotete roṛlenakʼ katha jemon purạukʼ: Iń do ińakʼ mocate phenkoń lạia; dhạrti etohopʼ khon okako oko tahẽkan, onań lại sodora.

³⁶Ona tayom Jisu do onko gadel hoṛkoe bạgiatʼkote oṛakʼteye boloyena. Unre acʼren celako hecʼkateko metadea, “Goḍa reaṅ ona sama ghãs reakʼ bhed baṛe bhoṅaleme.”

³⁷Jisui roṛ ruạṛatʼkoa, “Okoe bhage itạye eretʼkan uni doe Manwa Hopon kana.

³⁸Goḍa do dhạrti kana ar bhage itạ do serma rajren hoṛ kanako. Ar Soetanren hoṛ doko sama ghãs kana.

³⁹Okoe bạiri onae er oṭoletʼ uni doe Soetan kana, ar phosol samṭao okte do jug reakʼ mucạtʼ kana, ar phosol samṭaoko do sermaren goḍetko kanako.

⁴⁰Sama ghãs jarwakate cetʼ leka seṅgelre atar giḍikʼ, onkage jug reakʼ mucạtʼre hõ hoyokʼa. Manwa Hopon do acʼren serma goḍetkoe kolkoa.

⁴¹Onko do uniakʼ rajosṭi khon sanam tạkicʼakʼ ar sanam bedhorom kạmikan hoṛko jarwa mitʼkoa ar jolokʼkan seṅgelreko khadlekoa.

⁴²Onḍe do rakʼjoṅ ar togocʼ ḍaṭa hoyokʼa.

⁴³Unre dhorom hoṛ do akoren sermaren Babawakʼ rajre siń cando lekako jhak jhakaokʼa. Ańjom lạgitʼ lutur menakʼtaeicʼ hoṛ doe ańjomma.

⁴⁴“Serma raj do goḍare topa okoakatʼ dhon lekana. Mitʼ hoṛ do ona ńamkate arhõe oko dohokada. Inạ tayom uni do rạskạ monteye calaoena ar acʼakʼ oka tahẽkantae ona joto ạkhrińkate ona goḍae kirińkeda.

⁴⁵“Arhõ serma raj do mitʼṭen bepari hoṛ lekana one okoe do bhage mạnike ńam baṛayetʼ.

⁴⁶Ado mitʼṭecʼ damanakʼ mạnike ńamketʼ khan senkate acʼakʼ cetʼko tahẽkantae ona joto ạkhrińkate uni do mạnike kirińkeda.

⁴⁷“Arhõ serma raj do nonkan mitʼṭen lạtu jhạli lekana one okaṭakʼ do doreãoreko oḍaoketʼte onare joto lekan hakoko jhạliyen.

⁴⁸Ado jhạli perecʼen khan ghuṭuteko or rakapʼkeda. Ar duṛupʼkate bhage hakoko bachaoketʼkote jhuṛireko dohoketʼkoa ar bạṛicʼko doko giḍikatʼkoa.

⁴⁹Onkage jug mucạtʼre hõ hoyokʼa. Serma goḍetko do hecʼkate dhorom hoṛ tala khon bedhoromkoko begarkoa ar jolokʼkan seṅgelreko khadlekoa.

⁵⁰Onḍe do rakʼjoṅ ar togocʼ ḍaṭa hoyokʼa.”

⁵¹Inạ tayom Jisu do celakoe kuliketʼkoa, “Ape do cetʼ noakope bujhạuetʼkangea?” Metadeako, “Hẽ, bujhạuetʼgeale.”

⁵²Unre Jisui metatʼkoa, “Serma raj reaṅko cetʼakawan mitʼke mitʼ sostor baḍaeko do mitʼṭen oṛakʼ kisạ̃ṛ lekan kanako one okoe do acʼakʼ gola khon nawanakʼ ar mareakʼkoe oḍokketʼ.”

⁵³Ado Jisu noako golpoe lại mucạtʼketʼ khan onḍe khone uṭhạu calaoena.

⁵⁴Ar inạ tayom do acʼakʼ atote senkate sunạgogre cetʼakoe ehopʼena. Ar uniakʼ katha ańjomkate hoṛko do hahaṛayenteko menkeda, “Noa akel ar hahaṛa kạmiko reakʼ daṛe do oka khone ńamakada?

⁵⁵Nui do cetʼ kaṭmistiriren hopon doe baṅkana? Uniren eṅgat do cetʼ Mạriạm doe baṅkana? Ar uniren boehako do cetʼ Jakob, Joseph, Simon ar Jihudạ, doko baṅkana?

⁵⁶Uniren miserako do cetʼ abo talare bạnukʼkoa? Enḍekhan oka khon noako doe ńamana?”

⁵⁷Nonkate Jisu iạte hoṛko do monre tạkijokʼko ehopʼena. Unre Jisui metatʼkoa, “Nij nagraha ar nij oṛakʼ chaḍa, nạbiko do sanam jaegarege manotko ńama.”

⁵⁸Ar onkoakʼ bepạtiạu iạte onḍe do ḍher hahaṛa kạmiko bae kạmileda.