Read Santali Mathae 14 Bible Online

Mathae 14 - Santali bible

Mathae 14

¹Onako oktere Herod do Jisu reaṅe ańjomketʼ khan acʼren kạmiạkoe metatʼkoa, “Nui doe Johan bạbạptisicʼ kana; unige gocʼko khone jiwetʼ beretʼ akana.

²Ar onatege uni do noako hahaṛa kạmiye kạmikana.”

³Herod do acʼren boeha Philipren bạhu Herodiạ iạte Johan tolkate hajotreye bhorao akade tahẽkana,

⁴Ente Johan doe metade tahẽkana, “Herodiạ bạhu mentem dohoye do baṅ ganokʼtama.”

⁵Herod do Johan gojeye menjoṅkan tahẽkana, menkhan uni do hoṛkoe botoratʼkoa, ente Johan do mitʼṭen nạbi menteko manaoede tahẽkana.

⁶Herodakʼ janam din reakʼ rạskạre Herodiạren hoponera do jarwa akanko talareye enecʼente Herode kusi ocokedea.

⁷Onate Herod do kuṛi jãhãnakʼgeye khoj ona emae lạgitʼe kiriạwadea.

⁸Ar kuṛi do eṅgattetʼ ṭhene sikhạu maṛaṅ ocoyenteye menkeda, “Johan bạbạptisicʼakʼ bohokʼ nonḍe thạrire emạńme.”

⁹Onate Herod doe bhabnayena, menkhan acʼ soṅgete jojom duṛupʼ akanko samaṅreye kiriạlen iạte ona emae lạgitʼe hukumkeda.

¹⁰Uni do hoṛ kolkate hajotrege Johanakʼ bohokʼe makʼ ocoketʼtaea.

¹¹Ar thạrire uniakʼ bohokʼ ạgukate kuṛiko calade khan uni do eṅgattetʼe idiadea.

¹²Inạ tayom Johanren celako do hecʼkate mạ̃ṛĩko idikeda arko topakatʼtaea ar senkate ona sombat do Jisuko lạiadea

¹³Johanakʼ gujukʼ reakʼ sombate ańjomketʼ khan Jisu do eskarge onḍe khon lạukạte mitʼṭen nisun jaegateye calaoena. Ar gadel hoṛko onako ańjomketʼ khan eṭakʼ eṭakʼ atoko khon ot otte uniko pańjakedea.

¹⁴Ar lạukạ khone pheḍen khan uni do gadel hoṛko ńelte mãyã hecʼadea ar onko modre tinạkʼ rugiko tahẽkan onkoe bogeketʼkoa.

¹⁵Ado ạyubokʼ jokhecʼ celako do hecʼkateko metadea, “Noa jaega do nisungea ar bela hõ bạnuea. Onate hoṛko bidạkakome jemon onko do atokote senkate jomakʼko kiriń daṛeakʼ.”

¹⁶Menkhan Jisui metatʼkoa, “Onkoakʼ calakʼ reakʼ jạruṛ do bạnukʼa, apege jomakʼ emakope.”

¹⁷Celakoko metadea, “Abo ṭhen do eken mõṛẽ goṭen piṭhạ ar barea hako chaḍa ar cetʼge bạnukʼa.”

¹⁸Uniye metatʼkoa, “Onako iń ṭhen ạguipe.”

¹⁹Tayomte uni do gadel hoṛko ghãsre duṛupʼe hukumatʼkoa, ar ona mõṛẽ goṭen piṭhạ ar barea hako ataṅkate serma secʼ beṅgetʼkateye bhorada. Inạ tayom piṭhại kecakʼketʼte celakoe ematʼkoa ar celako do gadel hoṛkoko calatʼkoa. Ar sanamkoko jomkeda arko biyena.

²⁰Ado jom tayom okako kecakʼ hạricʼ pạsir ńur tahẽyen ona halaṅkate celako do gelbar phạtiạkʼko perecʼkeda.

²¹Ar tinạkʼko jomketʼ onko modre maejiu ar kạṭicʼ gidrạ chaḍa mõṛẽ hajar herel hoponko tahẽkana.

²²Inạ tayom Jisu do celako lạukạre dejokʼte doreão hanasa parom lahakʼ lạgitʼe udgạu gotʼkatʼkoa, ar acʼ do hoṛko bidạkoe ehopʼena.

²³Ado gadel hoṛe bidạketʼko khan koejoṅ lạgitʼ acʼ eskarge buruteye rakapʼena. Ar ńuhumen khan eskarge onḍeye tahẽyena.

²⁴Unre celakoakʼ lạukạ do tala doreãore tahẽkana ar samaṅ secʼ khone hoeyetʼ tahẽkante ḍheokote lạukạ do botorge sokojokʼkan tahẽkana.

²⁵Ado maraṅ sim rakʼ okte Jisu do doreão cetan cetante taṛamate celako ṭhene hijukʼkan tahẽkana.

²⁶Ar dakʼ cetante mitʼ hoṛ taṛamate hijukʼkanko ńelkede khan celako do botorte, “Bhut, bhut” menkateko kikiạukeda.

²⁷Unre Jisui metatʼkoa,” Dil joṅpe, alope botorokʼa, ińkangeạń.”

²⁸Patrase roṛ ruạṛadea, “E Probhu, am kan khanem enḍekhan dakʼ cetante am ṭhen calakʼ hukumạńme.”

²⁹Jisui menkeda, “Dela hijukʼme.” Unre Patras do lạukạ khon pheḍkate dakʼ cetante Jisu ṭhen calakʼe ehopʼena.

³⁰Menkhan hoe ńelteye botoren khan unumokʼe ehopʼena ar kikiạuateye menkeda, “E Probhu, bańcaoiń me.”

³¹Jisu do usạrate tiye tiạrketʼte uniye sapʼgotʼkedea are metadea, “E nase pạtiạukʼicʼ cedakʼem digdhạyena?”

³²Ado Jisu ar Patras lạukạrekin decʼen khan hoe do thirgotʼena.

³³Ar lạukạre okoeko tahẽkan onko do Jisu sewawadeteko menkeda, “Sạrige am dom Isorren Hopon kana.”

³⁴Tayomte doreão paromkate onko do Genesaret elakate hecʼkateko pheḍena.

³⁵Ar onḍenko hoṛ do Jisuko oromkede khan beṛhaeteakʼ jaegakore hoṛko kolketʼkoa.

³⁶Ar joto dukhạliạko uni ṭhen ạguketʼkoteko nehõradea jemon onko do uniakʼ kicricʼ ańcarko joṭetʼ daṛeatae; ar tinạkʼko joṭetʼketʼtae onko jotogeko bogeyena.