Read Santali Mathae 21 Bible Online

Mathae 21 - Santali bible

Mathae 21

¹Jisu ar uniren celako do Jerusalem sor Jạitun buru ṭhenakʼ Bethaphage ato ṭhenko seṭerena. Unre Jisu do barea cela noa menkateye kolketʼkinạ,

²“Aben do samaṅ reakʼ atote calakʼ ben. Ar onḍe ben senlen khange hopon salakʼ mitʼṭen gadha eṅga tolakade ben ńamea. Ar unkin raṛakate iń ṭhen ben ạgukinạ.

³Ar jãhãege jãhãnakʼe metaben enḍekhan metaeben, ‘Probhu do nukin reakʼ jạruṛ menakʼtaea.’ Ar unrege uni doe aṛakʼabena.”

⁴Noa do hoyena nạbi hotete roṛlenakʼ katha jemon purạukʼ:

⁵“Sionren hoponera metaepe, ńelme amren raj do am ṭhene darae kana; uni do mạ̃hir ar gadhare decʼakan; ar mitʼṭen gadha hopon, ladhna janwar hoponre.”

⁶Ado Jisu cetʼlekae hukumatʼkin tahẽkan onkage unkin do senkatekin kạmikeda.

⁷Unkin do gadha eṅga ar hoponkin ạguketʼkina ar ạkinakʼ kicricʼko unkin cetanrekin aṭetʼketʼ khan Jisu doe decʼena.

⁸Ar gadel hoṛ do hor horte akoakʼ kicricʼkoko aṭetʼkeda. Ar eṭakʼko do dare ḍạrko hese ạguketʼte horteko aṭetʼ idikeda.

⁹Ar Jisu laha lahate calakʼkan ar pańjayedekan gadel hoṛko do ãṭ aṛaṅte hohoate memenko ehopʼena, “Hosanna, Dạudren Hopon! Bhorangeae Probhu ńutumte hijukʼkạnicʼ do. Coṭ utạrre Hosanna!”

¹⁰Ado Jisu Jerusalemteye boloyen khan goṭa nagraha do dal malaoena. Ar sanamkoge kulikʼko ehopʼena, “Okoe kanae nui do?”

¹¹Gadel hoṛko menkeda, “Nui do Gạlil reakʼ Nasaretren nạbi Jisu kanae.”

¹²Ado Jisu mundilteye boloyen khan onḍeko kiriń-ạkhrińkan tahẽkan joto doe laga oḍokketʼkoa. Uni do ṭaka bodolkoakʼ mạciko ar parwa kiriń-ạkhirińkoakʼ duṛupʼakʼkoe ulṭạu giḍikatʼteye metatʼkoa,

¹³“Sonot sostorte Isore menakada, ‘ińakʼ oṛakʼ do koejoṅ oṛakʼ ńumogokʼa,’ menkhan ape do ḍạkukoakʼ danderpe hoeocoakada.”

¹⁴Inạ tayom kãṛã ar leḍhako mundilre Jisu ṭhenko hecʼen khan uni do onkoe bogeketʼkoa.

¹⁵Ado uni okako hahaṛa kạmikoe kạmiketʼ ona do maraṅ naekeko ar sostor baḍaekoko ńelkeda. Onko do mundil bhitrire kạṭicʼ gidrạko, “Hosannawaema, Dạudren Hopon!” Hohokanko ańjomketʼkoa.

¹⁶Ar noako ńelteko ạṛisente onko do Jisuko metadea, “Onko cetʼko menetʼ ona dom ańjometʼkangea?” Jisui metatʼkoa, “Hẽ, ańjometʼgeạń. Sostorre cetʼ tishõ bape paṛhaoakada: Bale gidrạko ar towa nunuko reakʼ moca khon, am do apnar lạgitʼ sarhaoem tear sạbitana?”

¹⁷Inạ tayom Jisu do onkoe bạgiatʼkote nagraha bahre Bethaniạ atoteye calaoena ar onḍegeye tahẽ aṅgayena.

¹⁸Dosar hilokʼ setakʼ okte Jisu do nagrahateye ruạṛokʼ tahẽkanre reṅgecʼkedea.

¹⁹Uni do hor aṛere mitʼṭen loa dareye ńelketʼ khan dare ṭhene calaoena, menkhan onare sakam chaḍa ar cetʼge bae ńel ńamlakʼa. Unre uni do dareye metatʼa, “Amre ar tishõ alo jokʼma.” Ar unrege loa dare do rohoṛ gotʼena.

²⁰Ona ńelte celako doko hahaṛayente uniko metadea, “Cekate loa dare do rohoṛ gotʼena?”

²¹Jisui roṛ ruạṛatʼkoa, “Sạrigeń metapekana, biswạs tahentape ar bape digdhạkʼ enḍekhan loa darere okań cekaketʼ ape hõ onape daṛeakʼa. Eken ona do baṅ, menkhan noa buru hõpe metakʼ, ‘uṭhạukʼte jalapurire khadlekʼme,’ enḍekhan ona hõ hoyokʼgea.

²²Ape do jãhãnakʼge pạtiạukatepe koe enḍekhan ona dope ńamgea.”

²³Jisu do arhõ mundilteye boloyena. Ar tinreye cetʼakokan tahẽkan unre maraṅ naekeko ar Jihudikoren murubiko do uni ṭhen hecʼkateko menkeda, “Cetʼ ektiạrite noako dom kạmi kana? Ar okoe noa ektiạri doe emakatʼmea?”

²⁴Jisui metatʼkoa, “Mitʼṭen kathań kulipea. Arpe lạiạń khan enḍekhan iń hõ apeń lạiapea oka ektiạrite noakoń kạmi kana mente.

²⁵Mase lạipe, Johan do bạptisma emokʼ reakʼ ektiạri oka khone ńamleda? Serma khon se manwako secʼ khon?” Unre onko do ako talare galmaraoketʼteko menkeda, “Menle khan bon ‘serma secʼ khon,’ adoe metabona, ‘cedakʼ enḍekhan Johan do bape pạtiạuadea?’

²⁶Ar bon menle khan ‘manwa secʼ khon,’ enḍekhan ma gadel hoṛ bon botorakokan, ente sanamkoge Johan do mitʼṭen nạbi menteko manaoedea.”

²⁷Onate onko do Jisuko roṛ ruạṛadea, “Ale do bale baḍaea.” Unre Jisui metatʼkoa, “Enḍekhan iń hõ bạń lạiapea oka ektiạrite noakoń kạmi kana.”

²⁸Ona tayom Jisui menkeda, cetʼlekape bujhạuekea? “Mitʼ hoṛren barea hoponkin tahẽkana. Uni do acʼren maraṅicʼ hopon ṭhen senkateye menkeda, ‘E beṭa teheń do darkha bagwante senkate kạmime.’

²⁹Hopontetʼe roṛ ruạṛkeda, ‘Iń do ohoń senlena.’ Menkhan tayomte uni do kastaoenteye calaoena.

³⁰Tayomte uni hoṛ do dosaricʼ hopon ṭhen senkate inạ kathageye menkeda. Dosaricʼ hopon doe roṛ ruạrkeda, ‘calakʼ kangeạń,’ menkhan bae senlena.

³¹Ado nukin bar hoṛ modre okoeṭakʼ do apatakʼ sana lekakin kạmikeda?” Unre sostor baḍaekoko roṛ ruạṛadea, “Pạhilicʼge,” Jisui metatʼkoa, “Sạrigeń metapekana, mạsul uṭhạuko ar kusmbikoge ape khon lahare Isorakʼ rajreko bolokʼkana,

³²ente Johan do Isorakʼ sana leka calakʼ reakʼ hor udukʼape lạgitʼe hecʼlena, ar bape pạtiạuatʼtea. Menkhan mạsul uṭhạuko ar kusmbiko doko pạtiạuatʼtaea. Ona ńelte ape do mon hõ bape ạcurleda ar uniakʼ hõ bape pạtiạuatʼtaea.

³³“Mitʼṭen phen ańjompe. Mitʼṭen oṛakʼ kisạ̃ṛ do mitʼṭen darkha bagwane benaokeda ar ona beṛhaeteye eṭetʼ ạcurkada. Tayomte uni do ona bagwanre lelen kũnḍe la tearketʼte mitʼṭen usul pahra oṛakʼe benaokeda. Ar inạ tayom do casako ṭhen onae bạisạu oṭokatʼte acʼ do eṭakʼ disạmteye calaoena.

³⁴Ado tinre jo belekʼ reakʼ okte hoyena unre uni do acʼakʼ bhag hatao lạgitʼ casako ṭhen acʼren gutikoe kolketʼkoa.

³⁵Ar onko casako do uniren gutikoko sapʼketʼkote mitʼ doko dal urkedea, mitʼ doko gocʼkedea ar mitʼ do dhiriteko tińkedea.

³⁶Inạ tayom uni do pạhil khon arhõ saṅgeńokʼ gutikoe kolketʼkoa, menkhan casako do onko gutiko tulucʼ hõ onkageko beoharkeda.

³⁷Mucạtʼre darkha bagwanren kisạ̃ṛ do acʼren hoponge onko ṭhene kolkedea. Uni doe hudiskeda, acʼren hopon doko manotea.

³⁸Menkhan onko casa do hopontetʼko ńelkede khan akoreko menjoṅana, ‘nuige sompottiren mạlik doe hoyokʼa. Dela bon gojea,

³⁹inạ khan aboge mạlik bon hoyokʼa.’ Ar noa menkate hopontetʼko sapʼkedea ar darkha bagwan bahrete oḍok idikedeteko gocʼkedea.

⁴⁰Enḍekhan mase lạipe, darkha bagwanren kisạ̃ṛe hecʼlenre onko casa doe cekakoa?

⁴¹Sostor baḍaekoko menkeda, “Uni do onko bạṛicʼ hoṛkoe maraokoa ar okoe casako okte nạpitre acʼakʼ jo reakʼ bhagko emae onko ṭhene bạisạu oṭokakʼa.”

⁴²Jisui metatʼkoa, “Sonot sostorkore tis hõ bape paṛhaoakada, ‘raj mistiriko okaṭakʼ dhiriko nihạ̃t giḍiletʼ, onage konac reakʼ asol dhiri hoyena; noa do Probhu khonge hoyena, ar aboakʼ mẽtʼ samaṅre do hahaṛawakʼge?’

⁴³Onateń metapekana, Isorakʼ raj do ape ṭhen khon rejogokʼa ar nonkan hoṛko ṭhen emogokʼa, one okoeakʼ jionre ona rajosṭi reakʼ jo ńelokʼkan.

⁴⁴Ar okoe ona dhirireye ńurokʼ uni doe gejerokʼa ar okoere ona ńurokʼ uni doe holoṅ ḍigir utạrokʼa.”

⁴⁵Maraṅ naekeko ar Phạrusiko do Jisuakʼ cecetʼakʼte perecʼ golpoko ańjomketʼ khan uni do ako reaṅgeye roṛeda menteko bujhạukeda.

⁴⁶Unre onko do Jisu sabeko menwana, menkhan gadel hoṛko botoratʼkote bako onkaleda, ente hoṛko do nạbi menteko bujhạuede kan tahẽkana.