Read Santali Mathae 22 Bible Online

Mathae 22 - Santali bible

Mathae 22

¹Jisu do sostor baḍaeko cetʼako lạgitʼ arhõ mitʼṭen phene lạiatʼkoa,

²“Serma raj do nonkan mitʼṭen raj lekana, one okoe do acʼren hopon lạgitʼ bapla bhoje tearketʼ.

³Ado ona bhojre neota akanko hoho ạguko lạgitʼ acʼren gutikoe kolketʼkoa, menkhan neota akanko do hijukʼ bako rebenlena.

⁴Unre uni do arhõ eṭakʼ gutiko noa menkateye kolketʼkoa, ‘ńelpe bhojiń tear akada, ar ińren daṅgra ar posaokoń gur akatʼkoa. Ar ńitokʼ do sanamakʼ sạt akana, ado dela hijukʼ tabonpe.’

⁵“Menkhan neota akan hoṛko do gutikoakʼ katha bako hetawada; calao baṛayenako, okoe do acʼakʼ khette, okoe do acʼakʼ bạnij beparte.

⁶Ar sarecʼko do rajren guti sapʼkateko opomanketʼkoa arko gocʼketʼkoa.

⁷Unre raj doe raṅgaoena ar acʼren palṭonkoe kolketʼkote khũniạhikoe maraoketʼkoa ar onkoakʼ nagrahakoe jeretʼ giḍikatʼtakoa.

⁸Ado acʼren gutikoe metatʼkoa, ‘bhoj do tear ṭhikgea, menkhan neota ocolenko do noaren lek bako tahẽkana.

⁹Onate dobạṭiạkore calakʼpe, ar tinạkʼpe ńamko jotoge bapla bhojte hoho ạgukope.’

¹⁰Unre onko gutiko do horkore oḍok senkate boge bạṛicʼ tinạkʼko ńamketʼko, jotogeko hoho ạguketʼkoa. Ar nonkate bapla oṛakʼ do onko peṛakote perecʼena.

¹¹“Inạ tayom raj do peṛa ńelko lạgitʼ bhitriteye boloyena,

¹²ar bapla bhoj kicricʼ baṅ horokʼ akatʼ mitʼ hoṛe ńel ńamkedea. Raj do uniye kulikedea, ‘henda ho, bapla bhoj kicricʼ begorte cekate nonḍe dom boloyena?’ Khange uni doe keklesetʼena ar cetʼge bae roṛ ruạṛ daṛeada.

¹³Unre raj do acʼren gutikoe metatʼkoa, ‘ti jaṅga toltaete bahre ńutre giḍikaepe. Onḍe do rakʼjoṅ ar togocʼ ḍaṭa hoyokʼa.’ ”

¹⁴Ado mucạtʼre Jisui menkeda, “Ḍherkogeko hoho ocoakana, menkhan bachao ocoakanko doko thoṛagea.”

¹⁵Unre Phạrusiko doko calaoena ar Jisu acʼakʼ kathate cekateko jhạliyea ona reakʼ sopolhako dhurạuena.

¹⁶Onko do Herod secʼrenko sãote akoren celako uni ṭhenko kolketʼkoa. Onko do Jisuko metadea, “E Guru, alele baḍaea am dom sạri hoṛ kana. Ar Isorakʼ hor reaṅ sạritegem cetʼako kana. Am do okoe hõ bam hetawako kana, ente hoṛkoakʼ mẽtãhã do bam beṅgetʼakʼ kana.

¹⁷Ado mase lạialeme, Moseakʼ ạn lekate Romren maharaj do cetʼ khajna emae ganokʼgea? Am do cetʼem menkea?”

¹⁸Jisu do onkoakʼ monsubại baḍaeketʼ khane metatʼkoa, “E phạsiạrako, cedakʼpe biḍạuedeń kana?

¹⁹Oka ṭaka khajnape em ona udukʼạńpe.” Onko do mitʼṭen Dinarko ạguadea.

²⁰Unre Jisui metatʼkoa, “Noa muṭhạn ar noa ńutum do okoeakʼ kana?

²¹Adoko menkeda, “Romren maharajakʼ.” Jisui metatʼkoa, “Enḍekhan okaṭakʼ maharajakʼkan ona do maharajge emaepe, ar okaṭakʼ Isorakʼkan ona do Isorge emaepe.”

²²Noa katha ańjomkate onko doko hahaṛayena ar bạgiyadeteko calaoena.

²³Enhilokʼge adom Sạdukiko do Jisu ṭhenko hecʼena. Sạdukiko ṭhen do gocʼkoakʼ jiwetʼ beredokʼ reakʼ cetʼge bạnukʼa.

²⁴Onate onko do Jisuko kulikedea, “E Guru, Moseye menakada, jãhãe hoṛ ạuri gidrạ joṅreye gocʼlen khan bokottetʼ do hilit erae baplayete dadattetʼ lạgitʼ bõse teṅgokoma.

²⁵Ale nonḍe do eae boehako tahẽkana. Ar pạhilicʼ do baplakateye gocʼena ar begor gidrạwanrege acʼren oṛakʼ hoṛ do bokottetʼ ṭhene bạgi oṭoadea.

²⁶Onkage dosaricʼ, tesaricʼ, ar eaeyicʼ boeha hạbicʼ uni maejiuko baplakedea.

²⁷Ar mucạtʼre uni maejiu hõe gocʼena.

²⁸Enḍekhan gocʼkoko jiwetʼ beretʼlenre onko eae boehako modre uni maejiu do okoeṭakʼren bạhui hoyokʼa? Onko ma jotogeko doholede.”

²⁹Jisui roṛ ruạṛatʼkoa, “Bhuletʼ kanape, ente ape do sostor hõ bape baḍaea, ar Isorakʼ daṛe reaṅ hõ bape baḍaekana.

³⁰Gocʼkoko jiwetʼ beredokʼ tayom do bạhu hõ bako bạhu joṅa ar jãwãe hõ bako jãwãeokʼa; onko do sermaren goḍet lekako hoyokʼa.

³¹Gocʼkoko jiwetʼ beredokʼ reaṅ Isor okae menakatʼ, ona do cetʼ sostorre bape paṛhao akada?

³²Onare olakana, ‘Ińge Abrahamren Isor, Isạhakren Isor, ar Jakobren Isor.’ Menkhan Isor do gocʼkoren Isor doe baṅkana, uni do jiwetʼkoren Isor kanae.”

³³Noa katha ańjomkate hoṛko do uniakʼ cecetʼakʼteko hahaṛayena.

³⁴Jisu do Sạdukikoakʼ mocae bond akatʼtakoa mente Phạrusikoko ańjomketʼ khan onko do mitʼ ṭhenko jarwayena.

³⁵Onko modren mitʼṭen ạn guru do Jisu biḍạuea menteye kulikedea,

³⁶“E Guru, Moseakʼ ạn-ạriko modre joto khon maraṅ hukum do okaṭakʼ kana?”

³⁷Jisu do uniye metadea, “Sanam khon maraṅ ar jạruṛokʼakʼ hukum do hoyokʼ kana,

³⁸‘Probhu amren Isor do, amakʼ goṭa ontorte, goṭa jiwite ar goṭa monte dulạṛem.’

³⁹Ona tayom dosarakʼ do; ‘am aḍe paseren hoṛ apnar leka dulạṛem.’

⁴⁰Moseakʼ ạn ar nạbikoakʼ sanam cecetʼakʼ do noa barea hukumrege ṭehãḍ menakʼa.”

⁴¹Phạrusiko mitʼ ṭhenko jarwa akan tahẽkanre Jisu do onkoe kuliketʼkoa,

⁴²“Ape do Mạsi reaṅ cetʼpe bujhạueda? Uni do okoe bõsren kanae? Onkoko menkeda, “Dạud bõsren.”

⁴³Unre Jisui metatʼkoa, “Enḍekhan Dạud do cekate Mạsi do sonot Jiu reakʼ ạyurte Probhu menteye hohoade tahẽkana? Uniye menleda,

⁴⁴‘Probhu do ińren Probhui metadea, tin hạbicʼ amren bạiriko amakʼ jaṅga latarre ạuriń dohoko, un hạbicʼ am do ińakʼ jojomsa aṛere duṛupʼme.’

⁴⁵Enḍekhan Dạud do Mạsige Probhu menteye hohoade tahẽkan khan enḍekhan Mạsi do cekate Dạudren hopone hoedaṛekokʼa?”

⁴⁶Onko do okoege mitʼṭen katha hõ bako roṛ ruạṛ daṛeadea ar enhilokʼ khon okoege jãhãnakʼ kuliye bako dillakʼa.