Read Santali Mathae 24 Bible Online

Mathae 24 - Santali bible

Mathae 24

¹Jisu mundil khone oḍok calakʼkan tahẽkanre celako do mundil reakʼ bhitko udukʼae lạgitʼ uni ṭhenko hecʼ sorena.

²Unre Jisui metatʼkoa, “Ape ma noakope ńeletʼ, menkhan ińiń metapekana, nonḍe do mitʼṭen dhiri hõ eṭakʼ dhiri cetanre baṅ tahena, joto do rạputʼ giḍikʼa”

³Jisu Joitun burureye duṛupʼ akan tahẽkanre celako uni ṭhen hape hapete hecʼkateko metadea, “Lạialeme, noako do tis hoyokʼa ar oka lekan cinhạko hotetele bujhạu daṛeakʼa amakʼ hijukʼ ar jug mucạdokʼ reakʼ okte do seṭer akana mente?”

⁴Jisui roṛ ruạṛatʼkoa, “Men sontorokʼpe, okoe hõ jemon aloko bulạupe,

⁵ente ạḍi hoṛ in ńutumte hecʼkateko mena, ‘Iń doń Mạsi kana,’ ar ạḍi hoṛko bulạukoa.

⁶Ape do lạṛhại reakʼ saḍekope ańjomma. Menkhan sontorokʼpe! Noate alope botorokʼa, ente noako do hoyokʼgea; menkhan unre hõ mucạtʼtetʼ do ạuriakʼa.

⁷Mitʼ jạt eṭakʼ jạt upạrte ar mitʼ rajosṭi eṭakʼ rajosṭi upạrteko lạṛhạiya. Jaega jaegakore akal hoyokʼa ar dhạrti laṛaokʼa.

⁸Menkhan noako do eken bedon reakʼ ehopʼkana.

⁹“Unre santaope lạgitʼko soprotʼpea arko gocʼpea. Iń iạte sanam hoṛko hirkhạwapea.

¹⁰Unre ạḍi hoṛko tạkijokʼa ar mitʼ hoṛ do eṭakʼ hoṛe soprotea are hirkhạwaea.

¹¹Ạḍi utạr eṛe nạbikoko hijukʼa ar aema hoṛko bulạukoa.

¹²Ar bedhoromge ḍherokʼte ḍher hoṛkoakʼ dulạṛ do reaṛokʼa.

¹³Menkhan mucạtʼ hạbicʼ okoeye ṭarhao tahen uni do bańcaoe ńama.

¹⁴Sanam jạtko ṭhen goha emokʼ lạgitʼ serma raj reakʼ bhage sombat do goṭa dhạrtire porcarokʼa ar ona tayom do mucạtʼ hoyokʼa.

¹⁵“Daniel nạbi hotete ujạṛ reakʼ hirkhạwakʼ reaṅ oka roṛ akan ona sonot jaegare teṅgo akanpe ńellere (okoeye paṛhaoetʼkan uni doe bujhạuma),

¹⁶Unre Jihudạre tahenko do buruteko dạṛma.

¹⁷Ar sạṛimre menaeicʼ do oṛakʼ khon jãhãnakʼ hatao lạgitʼ latarte aloe pheḍokʼma.

¹⁸Okoe khetreye tahen uni hõ acʼakʼ oyonakʼ ạgui lạgitʼ aloe ruạṛma.

¹⁹Unre bhạrti hoṛmoko ar gidrạ nunuako kankore do hae hae!

²⁰Koejoṅpe jemon rabaṅ din se jirạukʼ mãhãre dạdạṛ alo hoyokʼtape.

²¹Unre nunạkʼ bạṛicʼ kosṭo hoyokʼa one oka do dhạrti etohopʼ khon ńit hạbicʼ baṅ hoeakan ar tisge baṅ hoyokʼa.

²²Ona saset reakʼ dinko Isor bae khaṭo lekhan okoe hõ ohoko bańcaolena. Menkhan acʼren bachao hoṛko lạgitʼ Isor do onako dine khaṭoea.

²³“Unre jãhãegeko metape, ‘ńelpe, Mạsi do nonḍe menaea,’ se ‘hanḍe menaea,’ alope pạtiạuakʼa;

²⁴ente aema eṛe Mạsi ar eṛe nạbikoko hijukʼa ar maraṅ maraṅ hahaṛa kạmi ar cinhạkoko uduga jemon Isorren bachao akan hoṛkoko bulạu daṛeako.

²⁵Ńelpe, iń do laharege noakoń lại dohowatʼpea.

²⁶“Onate hoṛko metape khan, ‘ńelpe, uni do hahaṅkarre menaea,’ alope oḍok calakʼa. Se ‘uni do bhitri oṛakʼre menaea,’ alope pạtiạukʼa.

²⁷Cetʼleka bijli do purub khon oḍokokʼte pạchim hạbicʼ malkao calakʼ, onkage Manwa Hopon reakʼ seṭerokʼ hõ hoyokʼa.

²⁸Jãhãrege mạ̃ṛĩ tahen onḍege gidi hõko jarwakʼa.

²⁹“Onako din reakʼ santao tayomge siń cando doe ńutokʼa, ar ńindạ cando do bae terdeja, ipilko hõ coṭ khonko ńurokʼa ar siń cando, ńindạ cando, ar ipilko do bako ṭarhao tahena.

³⁰Unre Manwa Hopon reakʼ cinhạ do sermare ńelokʼa. Ar dhạrtiren sanam gusṭirenko dukte koṛamko ceṭagokʼa. Onko do Manwa Hopon daṛe ar ṭhonokante rimilte hijukʼkanko ńelea.

³¹Ar murukte siṅgạ saḍekʼa ar ona são sãote Manwa Hopon do acʼren goḍetkoe kolkoa. Onko do dhạrti reakʼ mitʼ mucạtʼ khon eṭakʼ mucạtʼ hạbicʼ ar ponon secʼ khon acʼren bachao akan hoṛkoko jarwakoa.

³²“Loa dare ńelte cetʼjoṅpe. Ona reakʼ ḍạrko bale ruạṛkate sakam sagen len khangepe baḍae daṛeakʼ kana je setoṅ din do seṭerakana.

³³Onkage ape hõ noako sanamakʼpe ńellere baḍaepe, Manwa Hopon doe seṭer akana, hẽ duạr ṭhenge menaea.

³⁴Sạrigeń metapekana, tinre noako joto hoyokʼa unre niạ bidạlren thoṛa hoṛ do bańcaoko tahena.

³⁵Serma ar dhạrti do cabakʼa, menkhan ińakʼ katha do jaejug hạbicʼ tahena.

³⁶“Menkhan okoe hõ ona din ar ona okte reakʼ do bako baḍaea, sermaren goḍetko hõ baṅ, Hopon hõ baṅ, eken Babageye baḍaea.

³⁷“Noah oktere cetʼleka hoelen onkage Manwa Hopone seṭerokʼre hõ hoyokʼa.

³⁸Ente ḍubạ laha dinkore Noah do jahajre ạuriye bolokʼ hạbicʼ hoṛko doko jom ńũyetʼ tahẽkana, bạhu joṅkan tahẽkana ko arko jãwãyokʼkan tahẽkana.

³⁹Ar ḍubạ dakʼ hecʼkate sanamko ạuriye ạtu idiko hạbicʼ onko do cetʼge bako bujhạu daṛeada. Manwa Hoponakʼ hijukʼ hõ ṭhik onkage hoyokʼa.

⁴⁰Unre bar hoṛ do goḍarekin tahena; mitʼ hoṛ doe idiocokʼa, ar eṭagicʼ doe bạgi oṭokʼa.

⁴¹Barea maejiu do jantekin riritʼa; mitʼṭen doe idi ocokʼa, ar eṭagicʼ doe bạgi oṭokʼa.

⁴²“Onate ape do jagwar akae tahenpe, ente bape baḍae hilokʼrege aperen Probhu doe hijukʼa.

⁴³Menkhan noa baḍaepe, oṛakʼ kisạ̃ṛe baḍaele khan oka pohor kombṛoe hijukʼa, enḍekhan uni do ebhengeye tahẽkokʼa, ar acʼakʼ oṛakʼ do ohogeye bhugạkʼ ocolea.

⁴⁴Onate ape hõ sapṛao akan tahenpe, ente bape hudisetʼkan ghuṛirege Manwa Hopon doe hijukʼa.

⁴⁵“Uni pạtiạricʼ ar budanicʼ guti doe okoe kana, one okoe acʼren kisạ̃ṛ do guti ar kạ̃ṛmĩko okte oktere jomakʼ emakoa mente acʼ gharońjrenko cetanreye dohokede?

⁴⁶Bhạgangeae uni guti do, one uni kisạ̃ṛtetʼ onkayetʼkane hecʼ ńame.

⁴⁷Sạrigeń metapekana, unige acʼakʼ menakʼtaeakʼ sanamakʼko cetanreye dohoyea.

⁴⁸Menkhan, uni bạṛicʼ golam do acʼakʼ monreye menle khan, ‘ińren kisạ̃ṛ do hijukʼe bilomeda.’

⁴⁹Ar acʼ sãoten gutiko dadale ehob, ar bulokʼko tulucʼe jom ńũi;

⁵⁰Enḍekhan guti bae ńel horakatʼ dinre ar bae baḍae akatʼ ghuṛire uni kisạ̃ṛ doe hijukʼa.

⁵¹Ar unre uni doe makʼ paṛagea ar phạsiạrako tulucʼ bakhrae niṭaea. Onḍe do rakʼjoṅ ar togocʼ ḍaṭa hoyokʼa.