Read Santali Mathae 25 Bible Online

Mathae 25 - Santali bible

Mathae 25

¹“Unre serma raj do nonkan gel tetre kuṛiko leka hoyokʼa one okoe do gate kuṛiren Jãwãe daram ạguye lạgitʼ diuhewante bahreteko oḍok calaoen.

²Onko modre mõṛẽ goṭen do lilhi ar mõṛẽ goṭen do budanko tahẽkana.

³Lilhi kuṛiko do diuheko idiletʼgea menkhan soṅgete sunum do bako idi toraleda.

⁴Ar budan kuṛiko do akoakʼ diuhe sãote cukạkʼre sunum hõko iditorawana.

⁵Ado Jãwãe beṭa hijukʼe bilomokʼkante onko do dudṛum sapketʼkoa ar jotogeko jạpitʼkeda.

⁶“Khan tala ńindạ jokhecʼ hoho ańjomena, ‘hạni ńelepe, Jãwãe beṭa doe hijukʼ kana! Ma oḍokokʼpe ar ataṅ daramepe.’

⁷Unre onko tetre kuṛi do beretʼkate diuheko jutketʼtakoa.

⁸Ar lilhi kuṛiko do budan kuṛikoko metatʼkoa, ‘apeakʼ sunum khon den thoṛa emalepe, ente diuhe do ĩṛĩjokʼ kantalea.’

⁹Unre budan kuṛikoko roṛ ruạṛkeda, ‘bale emokʼa, ente oka menakʼtale onate ape ar ale lạgitʼ do ohoge kulạulena. Ape do boroṅ ạkhrińko ṭhen senkate kiriń ạgujoṅpe.’

¹⁰Ado onko lilhi kuṛi sunum kirińko sen akan tahẽkanrege Jãwãe beṭa doe hecʼena. Ar unre sapṛao akan tahẽkan kuṛiko do Jãwãe beṭa sãote bapla oṛakʼteko boloyena. Ar sanamkoko boloyen khan silpiń do sińena.

¹¹“Tayomte onko lilhi kuṛiko do hecʼkateko menkeda, E Probhu, E Probhu, ‘duạr jhicʼaleme.’

¹²Unre Jãwãe beṭa doe roṛ ruạṛatʼkoa, ‘sạrigeń metapekana, iń do bạń orom akatʼpea.’”

¹³“Onate jagwar akae tahenpe, ente ona din se ona okte reakʼ katha do bape baḍaea.”

¹⁴“Serma raj do nonkan mitʼṭen hoṛ lekana, one okoe do eṭakʼ disạmte calakʼ lahare acʼren gutiko hoho jarwakate acʼakʼ sanam sompotti reakʼ bhar onkoakʼ tireye jimạ oṭokatʼ.

¹⁵Uni do gutikoakʼ daṛe leka mitʼ hoṛ do mõṛẽ hajar, ar mitʼ hoṛ do bar hajar ar eṭakʼicʼ do mitʼ hajar ṭakae emadea.

¹⁶Ado okoe mõṛẽ hajar ṭakae ńamletʼ uni do onateye bạnij beparketʼte arhõ mõṛẽ hajar ṭakae labkeda.

¹⁷Ar okoe bar hajar ṭakae ńamletʼ uni hõ onkakate arhõ bar hajar ṭakae labkeda.

¹⁸Menkhan okoe mitʼ hajar ṭaka ńamletʼ uni do senkate ote lakeda ar acʼren kisạ̃ṛakʼ ṭakae topa okokada.

¹⁹“Ado ḍher din tayom kisạ̃ṛ do hecʼkate onko gutiko ṭhen khon hisạbe khojkeda.

²⁰Khange okoe mõṛẽ hajar ṭakae ńamletʼ uni do arhõ mõṛẽ hajar ṭaka ạgu darakateye menkeda, ‘E Probhu, am do mõṛẽ hajar ṭakam jimạwạdiń tahẽkana.

²¹Ńelme, iń do arhõ mõṛẽ hajar ṭakań lab akada.’ Unre acʼren kisạ̃ṛe menkeda, ‘bes akadam. E bhage ar pạtiạr golam. Am do thoṛawakʼre pạtiạrem tahẽkante ḍher okocʼakʼko cetanreń dohokama. Ar dela hijukʼte iń sãote rạskạ seledokʼme.’

²²“Ar okoe bar hajar ṭakae ńamletʼ uni hõ hecʼkateye menkeda, ‘E Probhu, am do bar hajar ṭakam jimạwạdiń tahẽkana. Ar nõkʼõe ńelme, ona khon arhõ bar hajar ṭakań lab akada.’

²³Unre uniren kisạ̃ṛ doe menkeda, ‘bes akadam, E bhage ar pạtiạr golam. Am do thoṛawakʼre pạtiạrem tahẽkante ạḍi okocʼakʼko cetanreń dohokama. Ar dela hijukʼte, iń sãote rạskạ seledokʼme.’

²⁴“Menkhan okoe mitʼ hajar ṭakae ńamletʼ uni do hecʼkateye menkeda, ‘E Probhu, baḍae akatʼme tahẽkạnạń am dom kuṭhin hoṛ kana. Ente am do okare itạ bam erakatʼ onḍe khonem ireda ar okare bam chiṭạu akatʼ onḍe khon dom halaṅeda.

²⁵Onate iń do botorte amakʼ ṭaka otreń topa dohoakatʼ tahẽkana. Ar ńelme, amakʼ jinis do amakʼge menakʼa.’

²⁶Khange acʼren kisạ̃ṛ doe roṛ ruạṛadea, ‘E bạṛicʼ ar asaṅpoḍa golam! Baḍaekan tahẽkange com okare bạń er akatʼ onḍe khoniń ireda ar okare bạń chiṭạu akatʼ onḍe khoniń halaṅeda.

²⁷Enḍekhan ińakʼ ṭaka do cedakʼ mahajon ṭhen bam doholeda? Inạ khan hecʼkate iń do ṭaka ar ona reakʼ sud hoń ńamkea.’

²⁸Ona tayom uni do eṭakʼkoe metatʼkoa, ‘uni ṭhen khon ṭaka hataope ar okoeakʼ gel hajar ṭaka menakʼtae uni emaepe.

²⁹Ente okoeakʼ menakʼtae uni do arhõe emocokʼa ar onate uniakʼ do aema hoyokʼtaea. Menkhan okoeakʼ bạnukʼ uni do oka menakʼtae ona hõe recʼ ocokʼa.

³⁰Uni okoḍa guti do bahre ńutre gidikaepe; onḍe do rakʼjoṅ ar togocʼ ḍaṭa hoyokʼa.’

³¹“Manwa Hopon do acʼren serma goḍetko sãote acʼakʼ ṭhonokanteye hecʼlenre uni do ṭhonok reakʼ siṅghạsonreye duṛupʼa.

³²Ar sanam jạtren hoṛko do uni samaṅreko jarwa ocokʼa. Cetʼleka gupiyicʼ do bhiḍi ar meromkoe begarko onkage uni do sanam hoṛkoe begarkoa.

³³Uni do acʼakʼ jojom secʼre bhiḍiko ar leṅga secʼre meromkoe dohokoa.

³⁴“Inạ tayom raj do acʼakʼ jojom secʼrenkoe metakoa, ‘Okoe ińren Babawakʼ bhorpe ńamakatʼ, dela hijukʼpe. Dhạrti reakʼ rehetʼ khon okaṭakʼ rajosṭiye tear akatʼpe ona baṛe ạidạrijoṅpe.

³⁵Ente reṅgecʼiń tahẽkanre jomakʼpe emadiń tahẽkana; tetaṅ ledińa arpe ńũ ocoledińa; upriạń tahẽkana arpe ataṅ sãohãledińa;

³⁶laṅgaṭiń tahẽkana arpe kicricʼledińa; ruạreń paṛaolena arpe jotonledińa; ar hajotreń tahẽkana arpe hiriledińa.’

³⁷“Unre dhoromkoko roṛ ruạṛaea, ‘E Probhu, tis baṅ reṅgecʼletʼme ńeltele jom ocoletʼme se tetaṅeletʼme ńeltele ńũ ocoletʼme?

³⁸Tis baṅ upriạm tahẽkantele ataṅ sãohãletʼme, se laṅgaṭem tahẽkantele kicricʼletʼme?

³⁹Ar tis baṅ ruạkʼ se hajotrem tahẽkanrele hiriletʼme?’

⁴⁰“Ado raje roṛ ruạṛakoa, ‘sạrigeń metapekana, ińren noko huḍiń utạr boehako modre jãhãe mitʼ hoṛpe nonkawade enḍekhan unre ińgepe onkawạdiń tahẽkana.’

⁴¹“Tayomte uni do acʼakʼ leṅga secʼren hoṛkoe metakoa, ‘E sarapanko, iń ṭhen khon sạṅgińokʼpe. Soetan ar uniren celako lạgitʼ tearakan jaejug seṅgelre calakʼpe.

⁴²Tinre reṅgecʼledińa unre ape do jomakʼ bape emadińạ; tetaṅ ledińa ar bape ńũ ocoledińa;

⁴³Upriạń tahẽkana ar bape ataṅ sãohãledińạ; laṅgaṭiń tahẽkana ar bape kicricʼledińa; ruạ haso ar hajotreń tahẽkana ar bape hiriledińa.’

⁴⁴“Unreko metaea, ‘E Probhu, tis baṅ reṅgecʼletʼme, se tetaṅletʼme, se upriạ, se laṅgaṭ, se ruạ, se hajotre ńelkate bale sapʼ soratʼme?’

⁴⁵“Uni do roṛ ruạṛ akoteye metakoa, ‘sạrigeń metapekana, noko ińren huḍiń utạrko modre jãhãe mitʼ hoṛ tinạkʼ bape nonkawade, unạkʼge iń hõ bape onkawạdińa.’ ”

⁴⁶Ona tayom Jisui menkeda, “Noko hoṛ do jaejug sạjạiteko calakʼa, menkhan dhoromko do jaejug jionko ńama.”