Read Santali Mathae 7 Bible Online

Mathae 7 - Santali bible

Mathae 7

¹“Eṭakʼkoakʼ dosko alope ńam baṛaea, jemon apeakʼ dos hõ alo sabokʼtape,

²ente cetʼleka eṭakʼkoakʼ doskope saba onkage apeakʼ dos hõ sabokʼtapea, ar cetʼlekape soṅakoa onkage ape lạgitʼ hõ soṅokʼa.

³“Amren boehamakʼ mẽtʼre menakʼ cubạkʼgem ńeletʼkana, menkhan apnar mẽtʼre menakʼ jobra do cekate bam ńel ńameda?

⁴Apnar mẽtʼrege jobra menakʼtam tulucʼ cekate amren boeha dom metaekana, ‘hape se amakʼ mẽtʼ khon cubạkʼ oḍok ocoạńme?’

⁵E phạsiạra! Pạhilre amakʼ mẽtʼ reakʼ jobra oḍok giḍi maṛaṅme, enḍekhan boehamakʼ mẽtʼ khon cubạkʼ oḍokʼ lạgitʼ purṭhạm ńeńela.

⁶“Okaṭakʼ sonotge ona do seta alope emakoa. Ar sukri samaṅre mạnik hõ alope giḍiya. Hoedaṛeakʼa onko do onakoko lebetʼ gasmanḍaoa ar ạcurkate apeko hoṭakʼ cirạpea.

⁷“Koepe, ado emapea; ńam baṛaepe, adope ńama, duạr ṭhopʼ ṭhopʼpe, ado jhicʼapea.

⁸Ente mitʼke mitʼ kokoyicʼ do milạuaea; ar ńam baṛayicʼ doe ńama ar ṭhopʼ ṭhopʼetʼicʼ do jhicʼaea.

⁹Ape modre jãhãe nonkanicʼ menaea, one acʼren gidrạ piṭhại koelere dhiriye calae?

¹⁰Se hakoe koelere bińe calae?

¹¹Apepe bạṛicʼgere hõ aperen gidrạko bhage bhage jinisko emakope baḍaekan khan, enḍekhan sermare menae aperen Baba do tinạkʼ artetʼ acʼ koeye kanko bhageakʼkoe emakoa!

¹²Hoṛko ṭhen khon cetʼleka beoharpe khojkan onkage ape hõ onko tulucʼ beoharpe. Ente noa kangea Moseakʼ ạn-ạri ar nạbikoakʼ cecetʼakʼ reakʼ katha do.

¹³“Sakṛa duạrte bolokʼpe, ente okaṭakʼ hor bạṛicʼ secʼe idipe ona reakʼ duạr do osargea ar hor hõ phaelaogea. Ar ḍher hoṛge onateko bolokʼ kana.

¹⁴Menkhan okaṭakʼ hor jion secʼe ạyur idi ona reakʼ hor do sakṛagea ar duạr hõ suṛucʼgea. Ar thoṛa hoṛge noa doko sendra ńametʼkana.

¹⁵“Eṛe nạbiko khon sontor akae tahenpe. Onko do bhiḍi chinte ape ṭhenko hijukʼa, menkhan bhitri bhitrite onko do jojom hunḍạr kanako.

¹⁶Onkoakʼ jion reakʼ jotege onko dope orom daṛeakoa. Jạnum dare khon darkha jo se kũṛitʼ rama jhạwạ khon cetʼ loa doko godgea?

¹⁷Onkage mimitʼ bhage darere do bhagege jokʼa ar bạṛicʼ darere do bạṛicʼge jokʼa.

¹⁸Bhage darere bạṛicʼ jo ar bạṛicʼ darere bhage jo do baṅ jo daṛeakʼa.

¹⁹Okaṭakʼ darere bhage baṅ jokʼ ona do makʼ giḍikʼte sengelre khadle ocokʼa.

²⁰Onateń mena, bhonḍ nạbikoakʼ jionre oka jo ńelokʼkan onatege onkope orom daṛeakoa.

²¹“Okoe ‘Probhu, Probhuko’ mitạńkan onko joto do serma rajre ohoko bolo daṛelena, menkhan okoe ińren serma Babawakʼ sana leka senokʼe menjoṅ, unigeye bolo daṛeakʼa.

²²Enhilokʼ do ạḍi hoṛko mitạńa, ‘E Probhu, E Probhu, ale do cetʼ am ńutumte bale nạbileda? Am ńutumte cetʼ bạṛicʼ jiuko bale oḍok giḍiletʼkoa? Am ńutumte cetʼ hahaṛa kạmiko bale kạmileda?’

²³Unre pusṭạuteń lạiakoa, ‘ape do tis hõ bạń baḍaeletʼpea. E bedhorom kạmiko, men iń khon sahaṛokʼpe.’

²⁴“Onateń metapekana, jãhãege noako kathae ańjom ar ona lekae calakʼ uni do nonkan budan hoṛ kanae, okoe do dhiri cetanre oṛakʼe benaoketʼ.

²⁵Ado jhar jhare dakʼkeda, are hoekeda, ar ḍubạ dakʼ hecʼena ar ona oṛakʼre bajaoena; menkhan ona oṛakʼ do baṅ bhindạṛlena, ente ona do dhiri cetanre benao akan tahẽkana.

²⁶Ar okoe ińakʼ katha ańjomkate ona leka bae senakʼ uni do lelha hoṛ lekanae, one okoe do gitil cetanre oṛakʼe benaoketʼ.

²⁷Ado jhar jhare dakʼkeda, are hoekeda, ar ḍubạ dakʼ hecʼena ar ona oṛakʼre bajaoena; ar ona do lạnduṛena, ar botorge oborena.”

²⁸Jisu noako kathae mucạtʼketʼ khan gadel hoṛ do uniakʼ cecetʼakʼteko hahaṛa cabayena,

²⁹ente uni do sostor baḍaeko leka do baṅ, bickom ektiạran hoṛ lekae cetʼ akokan tahẽkana.