Read Santali Mark 10 Bible Online

Mark 10 - Santali bible

Mark 10

¹Jisu do ona jaega khon uṭhạukate Jihudạ Prodesh ar Jordan gaḍa hanasakoteye parom calaoena. Ar gadel hoṛ do arhõ uni ṭhen hecʼkateko jarwayena. Unre uni do acʼakʼ cạli leka cetʼakoe ehopʼena.

²Un jokhecʼ adom Phạrusiko do hecʼkate Jisu biḍạue lạgitʼko kulikedea, “Moseakʼ ạn lekate jãhãe hoṛ rinicʼtetʼe bạgiye do ganokʼtaea se baṅ?”

³Jisui metatʼkoa, “Mose do cetʼ hukume em akawatʼpea?”

⁴Onkoko menkeda, “Bapag dolel olaete bạgiye reakʼe hukum akada.”

⁵Jisui metatʼkoa, “Apeakʼ keṭecʼ mon iạte Mose do noa hukume olatʼpe tahẽkana.

⁶Menkhan noa hõ ol menakʼa, sirjon reakʼ etohopʼre ‘Isor do herel ar maejiue benaoketʼkinạ.

⁷Onate manwa do eṅgat-apat bạgikate acʼren bạhu tulucʼ mitʼakane tahena,

⁸ar unkin do mitʼ hoṛmokin hoyokʼa.’ Onate ar barea dokin baṅkana menkhan mitʼ hoṛmo kanakin.

⁹Onate Isor okaṭakʼe joṛao mitʼ akatʼ manwa do ona aloe topagma.”

¹⁰Ona tayom oṛakʼteko boloyen khan celako do arhõ ona reaṅko kulikedea.

¹¹Unreye metatʼkoa, “Jãhãege acʼren bạhu bạgikate eṭakʼ maejiue baplaye uni do acʼren bạhuttetʼ birudreye laṭghaṭeda.

¹²Ar bạhu hõ hereltetʼ bạgikate eṭakʼ hoṛ ṭhene jãwãelen khan enḍekhan uni hõe laṭghaṭa.”

¹³Ado kạṭicʼ gidrạko Jisu ṭhenko ạguketʼkoa jemon uni do capokateye bhorako. Menkhan celako do onkoko dhomkaoketʼkoa.

¹⁴Jisu do ona ńelkate bae kusilente celakoe metatʼkoa, “Kạṭicʼ gidrạko iń ṭhen hecʼ ocoakope, alope manakoa; ente Isorakʼ raj do nonkankoakʼ kangea.

¹⁵Sạrigeń metapekana, okoe kạticʼ gidrạko leka Isorakʼ raj bae ataṅ, uni do okalekate hõ, Isorakʼ rajre bae bolo daṛeakʼa.”

¹⁶Ona tayom Jisu do onko kạṭicʼ gidrạkoe hoborketʼkoa ar bohokʼre capokateye bhoratʼkoa.

¹⁷Jisu do arhõ horteye oḍok calakʼ kan tahẽkanre mitʼṭen hoṛ do uni ṭhene ńir hecʼena ar ikhuṛumenteye menkeda, “E Guru, am do mitʼṭen bhage hoṛ kanam. Lạiạńme, jaejug jion ńam lạgitʼ cetʼiń cekaea?”

¹⁸Jisu do uniye metadea, “Cedakʼ bhage dom mitạńkana? Isor chaḍa ar okoe hõ bhage do bạnukʼkoa.

¹⁹Hukumko mam baḍaege, ‘alom khũna, alom loṭghuṭia, alom kombṛoea, eṛe goha alom ema, alom ṭhokakoa, ar gogo-babam manotkinạ.’ ”

²⁰Uni hoṛe menkeda, “E Guru, gidrạ khonge noako joto doń manao ạguyeda.”

²¹Jisu do uniye beṅgetʼadea ar dulạṛ salakʼe metadea, “Mitʼṭen jinis dom bạki akada. Do calakʼme, ar oka menakʼtam ona ạkhrińkate reṅgecʼ orecʼko dan akome. Onate sermare dhonem ńama. Ar inạ tayom do hecʼkate ińren cela hoyokʼme.”

²²Noa katha ańjomkate uni hoṛ doe mirluṅena. Uni do ạḍi utạr dhon tahẽkantaete bhabnakateye ruạṛ calaoena.

²³Unre Jisu do beṛhaete beṅgetʼ ạcurkate acʼren celakoe metatʼkoa, “Kisạ̃ṛko lạgitʼ serma rajte bolokʼ do muskilgea!”

²⁴Khan celako do Jisuakʼ noa katha ańjomteko hahaṛayena. Jisu do arhõe metatʼkoa, “E bachako, okoe dhon-duribreko bhorsakʼkan onko lạgitʼ Isorakʼ rajte bolokʼ do muskilgea.

²⁵Kisạ̃ṛ hoṛ Isorakʼ rajte bolokʼ khon sũi bhugạkʼte ũṭe bolo tabokʼ do algagea.”

²⁶Noa iạte celako do arhõko bhaṛoyente ako talare memenko ehopʼena, “Enḍekhan kại khon do okoeye bańcao daṛekokʼa?”

²⁷Jisu do beṅgetʼatʼkoteye metatʼkoa, “Manwa hotete baṅ hoe daṛeakʼre hõ, Isor ṭhen bin leṭejokʼakʼ do bạnukʼa; uni ṭhen do sanamakʼge hoedaṛeakʼa.”

²⁸Patras do uniye metadea, “Ńelme, ale do jotowakʼ bạgikate amren celale hoeakana,”

²⁹Jisui roṛ ruạṛatʼkoa, “Sạrigeń metapekana, jãhãege iń ar Isorakʼ bhage sombat iạte oṛakʼ duạr se boehako se miserako se eṅgat se apat se gidrạko se ot baṛgekoe bạgi oṭoakatʼ,

³⁰uni do niạ purire mitʼ sae doboṛ ḍher oṛakʼ-duạr, boeha-misera, eṅgat-apat, gidrạko ar ot-baṛgekoe ńama ar ona são sãote uni doe santao ocokʼa; ar hana purire jaejug jione ạidạri joṅa.

³¹Menkhan okoe lahare menakʼko onko modren ḍherkogeko tayomokʼa ar okoe tayomre menakʼko onko modren ḍherkogeko lahakʼa.

³²Inạ tayom Jisu ar acʼren celako do Jerusalem horteko rakapʼ calaoena. Ar Jisu do onko laha lahateye calakʼkan tahẽkana; ar celako do hahaṛakʼ tulucʼ uni sãoteko calakʼkan tahẽkana ar okoeko hoṛ uniko pańja idiyede tahẽkan onko doko botorokʼkan tahẽkana. Jisu do acʼren gelbar celako mitʼ secʼe hoho begarketʼkote acʼre hoyokʼ lạgidokʼ reakʼ katha lại akoe ehopʼkeda.

³³Uni doe metatʼkoa, “Ńelpe, Jerusalemte bon calakʼ kana. Onḍe Manwa Hopon do maraṅ naekeko ar sostor baḍaeko ṭhenko soprotea. Onko do gujukʼ lek kanae menteko bicạr dusiyea ar boṅgan hoṛ jạtrenkoakʼ tireko soprotea.

³⁴Ar boṅgan hoṛ jạtrenko do uniko nisṛạuea ar hoṛmoreko thoaea ar cạbuk baṛakateko gojea. Ar pe mãhã hilokʼre uni do arhõe jiwetʼ beredokʼa.”

³⁵Ado Sabdaeren hopon Jakob ar Johan do Jisu ṭhen hecʼkatekin menkeda, “E Guru, ạlińakʼ menjoṅakʼ do noage, ạliń okaliń koeme am do onagem onkawạlińa.”

³⁶Jisui metatʼkinạ, “Iń do aben lạgitʼ cetʼiń cekaea? Ar cetʼben khojkana?”

³⁷Unkinkin menkeda, “Am do tinre ṭhonokantem rajokʼa unre ạliń modre mitʼ hoṛ do amakʼ jojomsa aṛere ar mitʼ hoṛ do amakʼ leṅgasa aṛere jemon liń duṛupʼ daṛeakʼ.”

³⁸Jisui metatʼkinạ, “Okaṭakʼ ben khojkan, ona do baben baḍaea. Oka duk reakʼ bạṭireń ńũi lạgidokʼ kan ona do cetʼ ben ńũ daṛeakʼgea? Se oka bạptismateń bạptis lạgidokʼkan ona do cetʼ ben ataṅ daṛeakʼgea?

³⁹Metadeakin, “Hẽ daṛeakʼgea liń.” Unre Jisui metatʼkinạ, “Iń oka duk reakʼ bạṭireń ńũi aben hõ ona reaṅ ben ńũiya, ar oka bạptismań ataṅ, aben hõ ona ben ataṅa,

⁴⁰menkhan ińakʼ jojomsa ar leṅgasare duṛupʼ ben reakʼ ektiạri do bạnukʼtińa. Onako jaega do okoe lạgitʼ tear akan eken onkogeko ńama.”

⁴¹Ar onko gel goṭen cela do noa katha ańjomkate Jakob ar Johan upạrteko edreyena.

⁴²Unre Jisu do sanamko mitʼ sãote hohoatʼkoteye metatʼkoa, “Baḍaegeape, boṅgan hoṛ jạtkoren do disạm cakʼlaokoge onkoren Probhuko hoyokʼ kana ar onkoren mukhiyạkoge onko cetanre ektiạriko calaoeda.

⁴³Menkhan apeko talare onka hoyokʼ do lek baṅkana, bickom ape modre jãhãege maraṅ hoyokʼe menjoṅkan khan uni do aperen sapʼdapʼicʼe hoyokʼma,

⁴⁴Ar jãhãe pạhilicʼ hoyokʼe menetʼ khan uni do jotokoren golame hoyokʼma.

⁴⁵Disạipe, Manwa Hopon do sapʼsor ocokʼ lạgitʼ do baṅ bickom sapʼ sosorgeye hecʼakana ar ạḍi utạr hoṛkoakʼ chaḍaokʼ reakʼ dam lekate onkoakʼ jiwi bodolte acʼakʼ jiwi emokʼgeye hecʼakana.”

⁴⁶Ado Jisu ar uniren celako Jerikho nagrahateko calaoena. Ar celako ar gadel hoṛko sãote nagraha khone oḍok calakʼkan tahẽkanre Timạiren hopon Bạrtimại ńutuman mitʼṭen kãṛã kokoe hoṛ do hor aṛereye duṛupʼ akan tahẽkana.

⁴⁷“Ar Nasaretren Jisu,” kanae menteye ańjomketʼ khan ãṭ aṛaṅte hohoye ehopʼena, “E Dạudren hopon Jisu, dayawạńme.”

⁴⁸Noate ḍher hoṛge uniko dhomkaokedete thir hapekokʼko metadea, menkhan uni do artetʼge ãṭ aṛaṅte hohoateye menkeda, “E Dạudren hopon Jisu mãyãwạńme baṛe.”

⁴⁹Jisu do teṅgoyenteye metatʼkoa, “Uni hohowaepe.” Khan uni kãṛã hoṛ hohoadeteko metadea, “Alom botorokʼa ma beretʼme. Uni do ame hohowam kana.”

⁵⁰Unre uni do acʼakʼ oyon kicricʼ capatʼ giḍikatʼteye don beretʼena ar Jisu ṭhene hecʼena.

⁵¹Jisu do uniye kulikedea, “Am lạgitʼ cetʼ iń cekaea? Ar cetʼem khojkana?” Kãṛã hoṛe menkeda, “E Guru, jemoniń ńeńel.”

⁵²Jisui menkeda, “Do calakʼme, am do pạtiạu akantem bogeyena.” Uni hoṛ do unrege ńeńele ehopʼena ar horteye pańja idikedea.