Read Santali Mark 11 Bible Online

Mark 11 - Santali bible

Mark 11

¹Ado Jerusalem sorko seṭeren khan onko do Jạitun buru ṭhenakʼ Bethaphage ar Bethaniạ ato ṭhenko hecʼena. Onḍe seṭerkate Jisu do acʼren barea cela noa menkateye kolkatʼkina,

²“Aben do samaṅ senakʼ atote calakʼben. Ar atote bolokʼ jokhecʼ mitʼṭen gadha hopon onḍe tol akadeben ńamea. Unire do okoege tishõ bako decʼakana.

³Aben do raṛakate nonḍe ạguye ben. Ar jãhãegeye kuli ben, ‘cedakʼ ben nonkayeda?’ Enḍekhan metaeben, ‘Probhu do nui reakʼ jạruṛ menakʼtaea; ar uni do usạrateye aṛakʼ abena.’ ”

⁴Unre unkin dokin senena ar gadha hopon chaṭka duạrre tolakade kin ńamkedea. Ar tinre kin raṛayedekan tahẽkana,

⁵unre onḍe okoeko teṅgo akan tahẽkan onko doko metatʼkinạ, “Cetʼ ben cekayeda? Gadha hopon do cedakʼ ben raṛayedea?’’

⁶Unkin cela do Jisu okaleka roroṛe metatʼkin tahẽkan onkagekin metatʼkoa. Unre onko do gadha hoponko idiocowatʼkinạ.

⁷Ado Jisu ṭhenkin ạgukede khan uni cetanre ạkinakʼ oyonakʼkin aṭetʼkeda. Ar Jisu do unireye decʼena.

⁸Ar ạḍi utạr hoṛ do akoakʼ oyonakʼko hor horteko aṭetʼkeda ar eṭakʼko do goḍa khon ḍạrko hese ạguketʼte horteko aṭetʼ idikeda.

⁹Ar Jisu laha lahate calakʼkanko ar uni pańjayekanko do ãṭ aṛaṅteko hoho idiyetʼkan tahẽkana, “Hosanna! Bhorangeae Probhu ńutumte darae kanicʼ do.

¹⁰Bhorangea aboren baba Dạudakʼ darakan raj do. Coṭ utạrre Hosanna!”

¹¹Jisu do Jerusalemre senkate mundilteye boloyena ar beṛhaete jotowakʼe ạri bạndhiketʼa, menkhan bela khaṭogeye tahẽkante acʼren gelbar celakoante Bethaniạteye calaoena.

¹²Ado dosar hilokʼ onko do Bethaniạ ato khonko oḍokʼ hijukʼkan tahẽkanre Jisu do reṅgecʼ kedea.

¹³Unre loa belekʼ okte do baṅ tahẽkana, menkhan enrehõ uni do sạṅgiń khon mitʼṭen loa dareye ńel ńamketʼte onare jo ńam lạgitʼe sen sorena. Ar ona dare sore senen khan onare sakam chaḍa ar cetʼge bae ńel ńamleda.

¹⁴Onate dareye metatʼa, “Okoege tishõ amakʼ jo aloko jom ńamma.” Celako do Jisuakʼ noa kathako ańjom tiyokʼkeda.

¹⁵Ado Jerusalemteko seṭeren khan Jisu do mundilteye boloyena ar onḍe kiriń-ạkhrińkoe laga oḍokketʼkoa. Uni do ṭaka-poesa bodoletʼkan hoṛkoakʼ ṭebilko ar parwa kiriń-ạkhrińkoakʼ mạcikoe ulṭạu giḍikatʼtakoa.

¹⁶Uni do mundil talate kiriń ạkhirińkoakʼ oka jinis hõ bae parom idiocoatʼkoa.

¹⁷Ado cetʼako jokhecʼ onko hoṛkoe metatʼkoa, “Sostorre cetʼ nonka baṅ olakana, ‘ińakʼ oṛakʼ do sanam jạtko lạgitʼ koejoṅ oṛakʼ ńumogokʼa mente?’ Menkhan ape do ḍạkukoakʼ danderpe benao akada!”

¹⁸Maraṅ naekeko ar sostor baḍaeko do noa katha ańjomkate Jisu goje lạgitʼ ạt ńam baṛaeko ehopʼena. Onko do Jisuko botoraekan tahẽkana, ente hoṛko do Jisuakʼ cecetʼakʼteko bhaṛo caba akan tahẽkana.

¹⁹Ar ạyupʼen khan uni do celakowante nagraha bahreteye oḍok calaoena.

²⁰Ado setakʼ jokhecʼ ona horteko parom calakʼkan tahẽkanre celako do rehetʼ sudhạ loa dare rohoṛ akanko ńelkeda.

²¹Patras do Jisuakʼ katha disạketʼteye menkeda, “E Guru, ńelme okaṭakʼ darem sarapatʼ tahẽkan ona do rohoṛ akana.”

²²Unre Jisui metatʼkoa, “Isorre biswạs tahentapema.

²³Sạrigeń metapekana, jãhãege begor digdhạte noa burui metakʼ, ‘nonḍe khon uṭhạukʼte jalapurire khadlekʼme,’ are pạtiạukʼ baṅma, okae menetʼ ona do hoyokʼa mente, enḍekhan uni lạgitʼ do hoyokʼgea.

²⁴Onateń metapekana, jãhãnakʼgepe koe arpe khoj, pạtiạukʼpe ape do onape ńam akada, ar ape lạgitʼ ona do hoyokʼtapea.

²⁵Apepe koejoṅre jãhãe birudre jãhãnakʼ tahentape khan uni do ikạyepe,

²⁶jemon aperen sermaren Baba hõ apeakʼ kạikoe ikạitape.”

²⁷Ona tayom Jisu ar acʼren celako do arhõ Jerusalemteko hecʼena, ar mundilreye dãṛã bãṛãkan tahẽkanre maraṅ naekeko, sostor baḍaeko ar murubiko uni ṭhen hecʼenteko kulikedea,

²⁸“Oka ektiạrite noakom kạmi kana? Ar okoe noa ektiạriạ doe emakatʼmea?”

²⁹Jisui roṛ ruạṛatʼkoa, “Iń do mitʼṭen kathań kulipea. Adope roṛ ruạṛ daṛeạń khan iń hõń lạiapea oka ektiạrite noakoń kạmi kana mente.

³⁰Johan do bạptisma emokʼ reakʼ ektiạri oka khone ńamleda, Isor khon se manwako secʼ khon?”

³¹Unre onko do ako talare noako galmaraoana, “Menle khan bon ‘Isor ṭhen khon,’ enḍekhane metabona, ‘cedakʼ tobe bape pạtiạuadea?’

³²Arhõ bon men lekhan, ‘manwa secʼ khon,’ enḍekhan?” Onko do hoṛkoko botorakokan tahẽkana, ente sanamkoge Johan do mitʼṭen nạbi menteko manaoede tahẽkana.

³³Onateko menkeda, “Ale do bale baḍaea.” Unre Jisui metatʼkoa, “Enḍekhan iń hõ bạń lạiapea oka ektiạrite noakoń kạmi kana.”