Read Santali Mark 6 Bible Online

Mark 6 - Santali bible

Mark 6

¹Ona tayom Jisu do ona jaegae bạgi oṭoatʼte acʼakʼ atoteye calaoena,

²ar uniren celako hõ acʼ soṅgeteko sen torayena. Ado Jirạukʼ mãhã seṭeren khan uni do sunạgogre bolokate cetʼakoe ehopʼena. Ar ḍher hoṛ uniakʼ katha ańjomkate hahaṛayente memenko ehopʼena, “Nui do oka khon noakoe ńamakada? Ar noa akele em ocoakan, noa baṅ cetʼkan? Ar hahaṛa kạmiko hõe kạmi kana.

³Nui do cetʼ uni kaṭmistiri doe baṅkana? Nui do cetʼ Mạriạmren hopon doe baṅkana? Jakob, Joses, Jihudạ ar Simon takoren boeha doe baṅkana? Uniren miserako cetʼ nonḍe abo talare bạnukʼkoa?” Nonkage hoṛko do Jisu iạte monre tạkijokʼko ehopʼena.

⁴Unre Jisui metatʼkoa, “Nij ato, nij peṛa ar nij gharońj chaḍa sanam jaegarege nạbiko do manotko ńama.”

⁵Ona tayom thoṛagan rugikoe capoketʼkote onkoe bogeketʼkoa, menkhan onḍe do jãhãn hahaṛa kạmi bae kạmileda.

⁶Ar hoṛko bako pạtiạuadete uni do ạḍiye hahaṛayena. Ona tayom Jisu do ato ato senkate hoṛko cetʼakoe ehopʼena.

⁷Uni do acʼren gelbar celako acʼ ṭhene hoho sorketʼkoa ar babar hoṛkate porcar lạgitʼe kolkatʼkoa. Ar bạricʼ jiuko cetanre hõ ektiạriye ematʼkoa.

⁸Uni do horte lạgitʼ mitʼṭen ṭheṅga chaḍa cetʼge bae idiocowatʼkoa. Piṭhạ, khuti, gạńjiạre poesa hõ iditorae baronketʼkoa.

⁹Panahi horokʼ doe metatʼkogea, menkhan aṅgrop do mitʼṭen khon bạ̃ṛti idiye manakatʼkoa.

¹⁰Uni do arhõe metatʼkoa, “Jãhãṭakʼ oṛakʼregepe bolokʼ ona ato ạuripe bạgiyakʼ hạbicʼ ona oṛakʼrege tahenpe.

¹¹Ar jãhã jaegaren hoṛ bako ataṅpe se kathako bako ańjom enḍekhan, ona jaegape bạgi oṭowakʼre apeakʼ jaṅga talka reakʼ dhuṛi hõ koṭa oṭokakʼpe jemon onage onko birudre goha hoyokʼ.”

¹²Unre celako do senkate porcarko ehopʼena jemon hoṛko kại khon monko ạcurtako.

¹³Onko do aema bạṛicʼ jiukoko oḍok giḍikatʼkoa ar ạḍi utạr rugikohõ bohokʼre sunumko ojokʼatʼkoteko bogeketʼkoa.

¹⁴Jisuakʼ ńutum goṭa ṭạnḍi pasnao akan tahẽkante Herod raj hõ Jisuakʼ kathae ańjom tiyokʼkeda. Unre adom adom hoṛko menetʼ tahẽkana, “Nui doe Johan bạbạptisicʼ kana. Unige gocʼko khone jiwetʼ beretʼ akante hahaṛawakʼkoe kạmi kana.”

¹⁵Ar adomko doko menetʼ tahẽkana, “Uni doe Eliạ kana” Arhõ adomko doko menetʼ tahẽkana, “Sedaeren nạbiko leka uni hõ mitʼgoṭen nạbi kanae.”

¹⁶Noako katha ańjomkate Herode menkeda, “Uni doe Johan kana, one okoeakʼ bohokʼ iń makʼ ńur ocoletʼtae. Uni do arhõe jiwetʼ ruạṛ akana.”

¹⁷Noa ghoṭna lahare Herod do hoṛ kolkate Johan sapʼkate hajotreye bhorao akade tahẽkana. Uni do acʼren boeha Philipren bạhu Herodiạ iạte noae nonkaleda. Herod do Herodiại baplaledete Johane metaekan tahẽkana, “Boeham rinicʼ dohoye do baṅ ganokʼtama.”

¹⁸

¹⁹Ona iạte Herodiạ do Johan cetanre ạḍi raṅgao tahẽkantaea. Ar uni do Johan gojeye menetʼ tahẽkana,

²⁰menkhan Herod do Johane botoraekan tahẽkana. Ente Johan do mitʼṭen dhorom ar sonot hoṛ menteye baḍae akade tahẽkana, ar onate uni do muskilakʼko khone rukhiạyede tahẽkana. Herod do Johanakʼ kathako ańjomkate monre jut bae ạikạuetʼ tahẽkanre hõ uniakʼ kathako ańjome kusikʼkan tahẽkana.

²¹Mucạtʼre Herodiạ do mitʼṭen ạte ńamkeda. Herod do acʼakʼ janam dinre acʼren napṛakʼ napṛakʼ kạmiạko, subedarko, ar Gạlil Prodeshren mukhiạko lạgitʼ mitʼṭene bhojkeda.

²²Ar ona bhoj reakʼ rạskạre Herodiạren hoponera doe enecʼente Herod ar bhojre neota akankoe kusi ocoketʼkoa. Unre raj do kuṛiye metadea, “Jãhãnakʼgem koyeń onageń emama.”

²³Herod do kuṛi ṭhen kiriạenteye menkeda, “Jãhãnakʼgem koeyeń onageń emama, emon ki ińakʼ adha rajosṭi hõ.”

²⁴Kuṛi do senkate eṅgattetʼe kulikedea, “Iń do cetʼiń khoja? Uniren eṅgattetʼe menkeda, “Johan bạbạptisicʼakʼ bohokʼ koeyeme.”

²⁵Ar kuṛi do senkate raje metadea, “Johan bạbạptisicʼakʼ bohokʼ ńitge mitʼṭen thạrire imạńme.”

²⁶Noa katha ańjomkate Herod do ạḍiye bhabnayena, menkhan bhojre neota akanko samaṅreye kiriạlente kuṛi ruạṛkae bae menwana.

²⁷Ar unrege uni do Johanakʼ bohokʼ makʼkate ạgui lạgitʼ mitʼṭen jollade hukumadea. Ar jollad do hajot oṛakʼte senkate Johanakʼ bohokʼe makʼ ńurketʼte mitʼṭen thạrireye ạgukeda. Ar raj do kuṛiye emade khan uni do idikate eṅgattetʼe caladea.

²⁸

²⁹Ado Johanren celako noa khoborko ańjomketʼ khan hecʼkate uniakʼ mạ̃ṛĩ idikateko topakada.

³⁰Ado Jisu okoe gelbar celakoe kolletʼko onkoko ruạṛ hecʼen khan onko okakoko kạmiletʼ arko cetʼatʼko tahẽkan ona joto do uniko baḍae ocokedea.

³¹Unre onḍe ḍher hoṛko calakʼ hijukʼkan tahẽkante celako do jom reakʼ ạtge bako ńamleda. Onate Jisui metatʼkoa, “Dela, iń tulucʼ mitʼṭen nisun jaegare hecʼkate thoṛa ghạṛicʼ jirạukʼpe.”

³²Ar lạukạre decʼkate onko do mitʼṭen nisun jaegateko senena.

³³Ado calakʼko ńelketʼko khan ḍher hoṛge onkoko oromketʼkoa ar aḍepase ato khonko ńir oḍokente onko laharege onḍeko seṭerena.

³⁴Jisu lạukạ khone pheḍen khan gadel hoṛe ńelketʼkoa. Ar hoṛkore mãyã hecʼadea, ente onko do gupiyicʼ begor bhiḍi lekako tahẽkana. Ar Jisu do ạḍi okocʼakʼko reaṅ cetʼakoe ehopʼena.

³⁵Ado ạyupʼ hijukʼkan tahẽkanre celako do hecʼkate Jisuko metadea, “Noa jaega do nisungea, ar bela hõe hạsurena.

³⁶Onate ma bidạkakome, jemon aḍe pase atote senkate jomakʼko kiriń daṛeakʼ.”

³⁷Jisui metatʼkoa, “Apege jomakʼ emakope.” Celakoko metadea, “Ale do cetʼ senkate barsae Dinarte piṭhạ kiriń ạgukate onkole jomocokoa?”

³⁸Jisui metatʼkoa, “Senkate ńelpe, tinạkʼ piṭhạ menakʼtapea?” Adoko lạiadea, “Mõṛẽ goṭen piṭhạ ar barea hako menakʼkinạ.”

³⁹Unre celakoe hukumatʼkoa jemon onko do gadel hoṛko hạriạ̃ṛ ghãsreko duṛupʼ ocoko.

⁴⁰Khan gadel hoṛ do sae sae, ar mõṛẽgel, mõṛẽgelkate sạr sạrteko duṛupʼena.

⁴¹Jisu do mõṛẽ goṭen piṭhạ ar barea hako hataokate serma secʼ beṅgetʼ rakapʼkate Isor gun manao joharadete piṭhại kecakʼkeda ar hoṛko emako lạgitʼ celakoe calatʼkoa, ar nonkage hako hõe hạṭińatʼkoa.

⁴²Ar sanamkoko jomkeda arko biyena.

⁴³Ona tayom celako do sarecʼakʼ kaṭra kuṭrạ piṭhạ halaṅkate gelbar phạtiạkʼko perecʼkeda.

⁴⁴Ar tinạkʼko jomketʼ onko modre mõṛẽ hajar herel hoponko tahẽkana.

⁴⁵Ona tayom Jisu do celako usạrae lạgitʼe metatʼkoa, jemon onko do lạukạre decʼkate doreão hanasako paromokʼte Bethsaeda atoteko calao hataṛokʼ, ar acʼ do gadel hoṛ bidạkoe ehopʼena.

⁴⁶Ar gadel hoṛkoe bidạ baṛaketʼko khan koejoṅ lạgitʼ buruteye rakapʼena.

⁴⁷Ado ńindạyen khan celakoakʼ lạukạ do tala doreãore tahẽkana ar Jisu do eskarge ghuṭureye tahẽyena.

⁴⁸Jisu do celako ạḍi haronte lạukạ calaoetʼkane ńelketʼkoa, ente onko samaṅ secʼ khone hoyetʼkan tahẽkana. Ado maraṅ simrakʼ jokhecʼ Jisu do doreão cetante taṛamate celako ṭhene hecʼena ar onko paromkoe menjoṅkan tahẽkana.

⁴⁹Menkhan celako do doreão cetante taṛam ạguyetʼko ńelkede khan bhut hudiskedeteko kikiạukeda,

⁵⁰ente uni ńelte jotoge botor caṛhaoatʼkoa. Unre Jisu do celako sãoteye roṛ gotʼkeda. Metatʼkoae, “Dil joṅpe, ińkangeạń, alope botorokʼa.”

⁵¹Ado Jisu lạukạreye decʼen khan hoe do thirgotʼena. Ar celako doko ṭhak utạrena,

⁵²ente niạ lahare piṭhại jom ocoletʼko reakʼ do bako bujhạu akatʼ tahẽkana; ente onkoakʼ mon do goṛdho akan tahẽkantakoa.

⁵³Jisu ar acʼren celako do doreão paromkate Genesaret elakate hecʼkate lạukạko tolkeda.

⁵⁴Ar lạukạ khonko pheḍen khan hoṛko do Jisuko ńel oromkedete ona elaka reakʼ sanam jaegakore ńir baṛaeko ehopʼena.

⁵⁵Inạ tayom jãhãrege menaea menteko baḍaeketʼ onḍege parkomkote uni ṭhen rugikoko gokʼ ạguketʼkoa.

⁵⁶Ar jãhã nagraha, se atoteye calakʼkan tahẽkan onḍege hoṛko do bajarkore rugikoko jarwayetʼko tahẽkana. Ar uniakʼ kicricʼ ańcar joṭetʼtae lạgitʼko nehõrae kan tahẽkana, ar tinạkʼ do uniko joṭetʼede tahẽkan onko doko bogekʼkan tahẽkana.