Read Santali Mark 8 Bible Online

Mark 8 - Santali bible

Mark 8

¹Mitʼ din arhõ ạḍi utạr hoṛko jarwayena. Ar onko hoṛ ṭhen jãhãn jomakʼ baṅ tahẽkante Jisu do acʼren celako hohoatʼkoteye metatʼkoa,

²“Noko hoṛkoreń mãyãkʼ kana, ente teheń pe din hoyokʼ kana iń sãote menakʼkoa; onko ṭhen do jãhãn jomakʼge bạnukʼa.

³Ar niạ halotre oṛakʼiń kolkako khan horkoreko lorao botejokʼa, ente onko modren ḍherkoge ạḍi sạṅgiń khonko hecʼakana.”

⁴Celakoko metadea, “Menkhan noa nisun jaegare noko jom ocoko lạgitʼ piṭhạ do okarele ńamkea?”

⁵Jisui kuliketʼkoa, “Tinạkʼ piṭhạ menakʼtapea?” Menkedako, “Eae goṭen”

⁶Uni do gadel hoṛko otre duṛubokʼe hukumatʼkoa. Ar ona eae goṭen piṭhạ hataokate Isore gun manao joharadeteye kecakʼkeda ar hoṛko emako lạgitʼ celakoakʼ tireye calatʼkoa, ar celako do gadel hoṛkoko ematʼkoa.

⁷Celako ṭhen thoṛa thuṛi kạṭicʼ hako hõko tahẽkana. Jisu do hako hõe bhoratʼkote gadel hoṛko emako lạgitʼe metatʼkoa.

⁸Adoko jomkeda arko biyena. Ar okako kecakʼ kaṭra kuṭrạ ńur tahẽyen celako do onakoko halaṅ jarwaketʼte eae phạtiạkʼko perecʼkeda.

⁹Onḍe do pon hajargan herel hoponko tahẽkana.

¹⁰Ona tayom gadel hoṛe bidạkatʼkote uni do celako sãote mitʼṭen lạukạre decʼkate Dalmanuthạ elakateye calaoena.

¹¹Ado onḍe Phạrusikoko oḍok hecʼen khan Jisu sãote reṭe peṭekʼko ehopʼena, ar biḍạue lạgitʼ serma khon mitʼṭen cinhạko khojkeda.

¹²Noa iạte Jisu do kũhrạuateye menkeda, “Niạ piṛhiren hoṛko do cinhạ reakʼ cedakʼko khojkana? Ińiń metapekana, cetʼ cinhạge noko do baṅ udukʼakoa.”

¹³Ona tayom uni do onkoe bạgiatʼkote arhõ lạukạreye decʼena ar doreão hanasae parom calaoena.

¹⁴Celako soṅgete piṭhạ iditora joṅko hiṛińakatʼ tahẽkana. Ar onkoakʼ do lạukạre eken mitʼṭen piṭhạ tahẽkantakoa.

¹⁵Unre Jisui metatʼkoa, “Phạrusiko ar Herodrenkoakʼ khạmi khon sontor akae tahenpe.”

¹⁶Onate celako do ako akoreko menjoṅana, “Piṭhạ bạnukʼ tabonte noae metabon kana.”

¹⁷Ado celakoko galmaraokan reaṅe baḍaeketʼtako khan Jisui metatʼkoa, “Cedakʼpe meneda piṭhạ bạnukʼtapea? Ape do cetʼ ńit hõ bape baḍae kana se bape bujhạueda? Apeakʼ ontor do cetʼ goṛdho akantapea?

¹⁸Mẽtʼ menakʼ tulucʼ cetʼ bape ńeńelkana? Lutur tahen tulucʼ cetʼ bape ańjomeda? Disạ hõ cetʼ bape disạyeda,

¹⁹mõṛẽ hajar hoṛko lạgitʼ mõṛẽ goṭen piṭhạń kecakʼletʼre ape do tinạkʼ phạtiạkʼpe halaṅ jarwaleda?” Celakoko roṛ ruạṛadea, “Gelbar phạtiạkʼ.”

²⁰Jisu do arhõe metatʼkoa, “Pon hajar hoṛko lạgitʼ eae goṭen piṭhạń kecakʼletʼre tinạkʼ phạtiạkʼpe halaṅ jarwaleda?” Adoko lạiadea, “Eae phạtiạkʼ.”

²¹Unreye metatʼkoa, “Enḍekhan ńitokʼ hõ cetʼ bape bujhạueda?”

²²Jisu ar acʼren celako do Bethsaeda atoteko calaoena. Ar onḍe mitʼṭen kãṛã hoṛ Jisu ṭhenko ạgukedea ar joṭedea menteko nehõradea.

²³Jisu do uni kãṛã hoṛ tire sapʼkate ato bahreteye oḍok idikedea. Ona tayom mẽtʼreye thoadea ar capokedeteye kulikedea, “Jãhãnakʼem ńel ńameda?”

²⁴Uni hoṛ do beṅgetʼ rakapʼkateye menkeda, “Iń do hoṛkoń ńel ńametʼkoa; onko do ńelokʼte dare leka, arko taṛam baṛayeda.”

²⁵Jisu do arhõ uni hoṛakʼ mẽtʼe joṭetʼketʼtaea. Onate uni hoṛakʼ mẽtʼ do jhicʼentaea ar ńeńel daṛeye ńamkeda. Ar pusṭạute jotowakʼ ńeńele ehopʼena.

²⁶Ar noa menkateye kolkadea, “Bethsaeda atote do bolo hõ alom bolokʼa.”

²⁷Ona tayom Jisu ar acʼren celako do Kạisạriạ Philipi reakʼ atoteko oḍok calaoena. Uni do calakʼ jokhecʼ celakoe kuliketʼkoa, “Hoṛko do okoe kạnạń menteko meneda?”

²⁸Celakoko metadea, “Adomko doko meneda Johan bạbạptisicʼ kanam; ar adomko doko meneda Eliạ kanam arhõ adomko doko meneda nạbiko modren mitʼ hoṛ kanam.

²⁹Unre Jisui kuliketʼkoa, “Menkhan ape do okoe kạnạń mentepe meneda?” Patrase roṛ ruạradea, “Am do uni Mạsi kanam.”

³⁰Unre Jisu do onkoe sontorkatʼkoa jemon acʼ reaṅ okoe ṭhen hõ aloko lại baṛae.

³¹Jisu do acʼren celako noa menkate cetʼakoe ehopʼena, Manwa Hopon do ạḍi okocʼ duk jojom hoyokʼtaea. Uni do murubiko, maraṅ naekeko ar sostor baḍaekoko nihạtea. Are gocʼ ocokʼa, ar pe mãhã hilokʼre uni do arhõ gocʼko khon jiwetʼ beredokʼ hoyokʼtaea.

³²Uni do pusṭạute noako kathae lạiatʼkoa. Unre Patras do Jisu mitʼ secʼe begar idikedete nisṛạueye ehopʼkeda.

³³Jisu do ạcurente celako secʼe beṅgetʼkeda ar Patras dhomkaokedeteye metadea, “Eya Soetan, iń khon pharakokʼme. Ente Isor reakʼakʼko do bam moneakʼ kana, menkhan manwa reakʼakʼkogem moneakʼ kana.”

³⁴Noa tayom celako ar gadel hoṛko acʼ ṭhen hoho sorkateye metatʼkoa, “Jãhãege ińakʼ horte hijukʼe monejoṅ uni do acʼakʼ sana leka aloe calakʼma; bickom acʼakʼ krus gokʼkateye pańjayiń ma.

³⁵Okoe acʼ lạgitʼ jiwetʼ tahene menjoṅkan uni do jiwiye khuạutaea; menkhan okoe iń ar Isorakʼ bhage sombat iạte acʼakʼ jiwiye khuạutae, uni do onae rukhiyạitaea.

³⁶Jãhãege goṭa dhạrtiye labte acʼakʼ jiwiye khuạutae enḍekhan cetʼ porho hoyokʼtaea?

³⁷Ente jiwi ńam ruạṛ lạgitʼ uniakʼ do emokʼteakʼ ar cetʼ menakʼtaea?

³⁸Niạ piṛhiren bepạtiạu ar kại hoṛko talare iń ar ińakʼ kathako iạte jãhãegeye lajaokʼ, enḍekhan Manwa Hopon hõ sonot goḍetko soṅgekate acʼren Apatakʼ ṭhonokanteye hijukʼre uni hoṛ iạteye lajaokʼa.”