Read Santali Mark 9 Bible Online

Mark 9 - Santali bible

Mark 9

¹Ona tayom Jisu do celakoe metatʼkoa, “Sạrigeń metapekana, nonḍe teṅgo akanko modre nonkan hoṛ menakʼkoa one onko do Isorakʼ raj daṛe salakʼ hijukʼ ạuriko ńel hạbicʼ okalekate hõ bako gujukʼa.”

²Noa turui din tayom Jisu do Patras, Jakob ar Johan soṅgekate mitʼṭen usul buruteye rakapʼ calaoena. Ar onko samaṅreye eṭakʼ boronena.

³Uniakʼ kicricʼko do nonka pĩṛĩtʼ pĩṛĩtʼ ponḍ hoyena je, dhạrtiren okoe dhubi hõ onka do ohoe ponḍ oco daṛekea.

⁴Onko do Eliạ ar Mose onḍeko ńelketʼkinạ. Unkin do Jisu sãotekin galmaraokan tahẽkana.

⁵Unre Patras do Jisui metadea, “E Guru, ale nonḍe menakʼle do, bhagege hoeakana. Nonḍe pea kumbạ oṛakʼle benaoa, mitʼṭen do am lạgitʼ, mitʼṭen do Mose lạgitʼ ar mitʼṭen do Eliạ lạgitʼ.”

⁶Patras do cetʼe mena mente bae bujhạulakʼa, ente onko do ạḍi botor caṛhaoatʼko tahẽkana.

⁷Ar ona jokhecʼ mitʼṭen rimil do rakapʼ hecʼente onkoe umul esetʼketʼkoa, ar ona rimil khon noa katha ańjomena, “Nuige ińren dulạṛiạ Hopon, nuiakʼ ańjomtaepe.”

⁸Celako do beṛhaeteko beṅgetʼ ạcurketʼ khan eken Jisu eskargeko ńel ńamkedea.

⁹Ado buru khonko pheḍ hijukʼkan tahẽkanre Jisu do onkoe hukumatʼkoa, “Okape ńelketʼ, ona do Manwa Hopon gocʼko khon ạuriye jiwetʼ beredokʼ hạbicʼ okoe hõ alope lại akoa.”

¹⁰Celako do Jisuakʼ hukumko bataoketʼtaea, menkhan gocʼko khon jiwetʼ beredokʼ reakʼ mane cetʼ kana mente ona do ako akore galmaraoko ehopʼena.

¹¹Onko do Jisuko kulikedea, “Sostor baḍaeko do cekateko meneda, pạhilre Eliạ hijukʼ reakʼ jạruṛ menakʼtaea mente?

¹²Jisui roṛ ruạṛatʼkoa, “Noa katha do sạrikangea je, pạhilre Eliại hijukʼa ar sanamakʼ do lahate lekae teṅgo aroea. Menkhan Manwa Hopon reaṅ sonot sostorre cekate baṅ olakan, uni do ạḍi okocʼ duk jojom hoyokʼtaea ar hoṛko do uniko nihạtea?

¹³Menkhan ińiń metapekana, Eliạ reaṅ sonot sostorre okaleka olakan onkage uni doe hecʼlena, ar hoṛko do unire akoakʼ sana lekako kạmikeda.”

¹⁴Jisu ar onko pea cela do eṭakʼ celako ṭhenko ruạṛ hecʼen khan, beṛhaete gadel hoṛ jarwa akan ar adom sostor baḍaeko do onko tulucʼ reṭe peṭekʼ kanko ńelketʼkoa.

¹⁵Ar hoṛko do Jisuko ńelkede khan ạḍitetʼko hahaṛayena ar ńir senkateko joharadea.

¹⁶Jisu do sostor baḍaekoe kuliketʼkoa, “Onko tulucʼ cetʼ reaṅpe reṭepeṭekʼ kana?”

¹⁷Gadel hoṛ bhitri khon mitʼ hoṛe roṛ ruạṛkeda, “E Guru, ińren koṛa am ṭheniń ạgu akadea. Unire do mitʼṭen guṅgạ jiu menaea.

¹⁸Tinreye sabea unre uni do otreye tawakʼ bhindạṛea. Ar moca do photo photokʼtaea are togocʼ ḍaṭaea. Iń do amren celako uni jiu oḍok giḍiye lạgitʼ iń metatʼkoa, menkhan bako daṛeada.”

¹⁹Unre Jisui metatʼkoa, “E bepạtiạuko! Ar tinạkʼ din ape sãoteń tahena? Ar tinạkʼ iń sahaokatapea? Dini iń ṭhen ạguyepe.”

²⁰Ado uni ṭhenko ạgukedea. Unre bạṛicʼ jiu do Jisui ńelkede khan koṛaye mocṛa mucṛikedea. Ar otreye bhindạṛkedete moca do photo photoyentaea ar guṛdạukʼe ehopʼena.

²¹Jisu do uniren apattetʼe kulikedea, “Tinạkʼ din khone nonka akana?” Uni doe menkeda, “Gidrạ khonge.

²²Bạṛicʼ jiu do goje lạgitʼ jaoge seṅgel ar dakʼreye khadle akadea. Ado jãhãnakʼem daṛeakʼ khan dayakate onkaeme.”

²³Jisui menkeda, “ ‘Daṛeakʼ khan,’ noa katha reakʼ mane do cetʼkana? Okoeye pạtiạukʼ uni lạgitʼ do jotoge hoedaṛeakʼa.”

²⁴Unre gidrạren apat do ãṭ aṛaṅateye menkeda, “Iń doń pạtiạukʼ kangea; ar ńit hõ ińre oka bepạtiạu menakʼ ona baṛe ocokʼ kạtińme.”

²⁵Ado gadel hoṛ ńir hijukʼkane ńelketʼko khan Jisu do bạṛicʼ jiu dhomkao kedeteye metadea, “E kala ar guṅgạ jiu, hukumam kạnạń uni khon oḍok calakʼme; ar tis hõ unire alom bolo ruạṛokʼa.”

²⁶Unre bạṛicʼ jiu do kikiạuate koṛae mocṛa mucṛikedea ar uni khone oḍok calaoena. Onate koṛa do gocʼicʼ lekae ńelente ḍher hoṛgeko menkeda, “Uni doe gocʼena.”

²⁷Menkhan Jisu do ti sapʼkateye beretʼkede khane teṅgoyena.

²⁸Inạ tayom Jisu do oṛakʼ bhitriteye boloyena. Unre celako do hape hapete hecʼkateko kulikedea, “Cekate ale do bale oḍok daṛeadea?”

²⁹Jisui metatʼkoa, “Nui jạtrenko do koejoṅ begor ar cetʼte hõ ohoko oḍoklena.”

³⁰Tayomte onko do ona jaegako bạgiatʼe Gạlil Prodesh talateko parom calaoena. Uni doe menjoṅkan tahẽkana okoe hõ jemon aloko baḍaeye okateye calakʼkana mente,

³¹ente unre uni do acʼren celakoe cetʼakokan tahẽkana, are lại akokan tahẽkana, “Manwa Hopon do hoṛkoakʼ tireko soprotea. Arko gojea ar pe din hilokʼre uni do arhõe jiwetʼ beredokʼa.”

³²Menkhan celako do Jisuakʼ katha reakʼ mane bako bujhạu daṛeada ar kuliye hõko botorena.

³³Ona tayom Jisu ar acʼren celako do Kapharnạhumteko calaoena. Ar Jisu oṛakʼ bhitriteye boloyen khan celakoe kuliketʼkoa, “Horre cetʼ iạtepe reṭe peṭekʼkan tahẽkana?”

³⁴Celako do thirgeko tahẽyena, ente joto khon maraṅicʼ doe okoe kana menteko reṭe peṭekʼkan tahẽkana.

³⁵Jisu doe duṛupʼena ar onko gelbar celako acʼ ṭhen hohoatʼkoteye metatʼkoa, “Jãhãe pạhilicʼ hoyokʼe menetʼ khan uni do jotoko khon tayomre tahen hoyokʼtaea ar jotokoren sapʼdapʼicʼ hoyokʼ jạruṛtaea.”

³⁶Uni do mitʼṭen gidrạ onko samaṅreye teṅgokedea. Ar hoborkedeteye metatʼkoa,

³⁷“Jãhãege nonkan kạṭicʼ gidrạ iń ńutumteye ataṅe uni do ińgeye ataṅińạ, ar okoe ińe ataṅiń uni do eken iń do baṅ, menkhan kol akadińicʼgeye ataṅede kana.”

³⁸Johan do Jisui metadea, “E Guru, mitʼṭen hoṛ do am ńutumte bạṛicʼ jiukoe oḍok giḍikakole ńelkede khan uni dole manakadea, ente uni do abo dolrene baṅkana.”

³⁹Jisui menkeda, “Alope manayea. Jãhãege iń ńutumte hahaṛawakʼko kạmi tayom iń upạrte bạṛicʼ do ohoe roṛ daṛelea,

⁴⁰ente okoe abo birudrene baṅkan, uni do abo secʼren kangeae.

⁴¹Sạrigeń metapekana, Mạsiren hoṛpe hoeakante jãhãege iń ńutumte mitʼ bạṭi dakʼe ńu ocope, uni do okalekate hõ acʼakʼ kuṛại ohoe atʼletaea.

⁴²“Ińreko pạtiạu akan noko kạṭicʼko modre mitʼ goṭen jãhãege kại horteye idiye enḍekhan uni do hoṭokʼre jante dhiri tolaete doreãore khadle giḍikaege uni lạgitʼ bhage hoyokʼa.

⁴³Amakʼ ti kại horteye or idime khan ona do samakʼ giḍikakʼme.

⁴⁴Ente banar ti tahentam tulucʼ noroktem calakʼ khon boroṅ ṭhunṭạge jionte bolokʼ do am lạgitʼ bhagea.

⁴⁵Ona norok reakʼ seṅgel do tishõ baṅ ĩṛĩjokʼa.

⁴⁶Amakʼ jaṅga kại horteye ạyur idime khan ona do samakʼ giḍikakʼme. Ente banar jaṅga tahentam tulucʼ noroktem calakʼ khon leḍhage jiontem bolokʼ do am lạgitʼ bhagea.

⁴⁷Amakʼ mẽtʼ kại horteye ạyur idime khan ona hõ hoṭor totʼ giḍikakʼme. Ente banar mẽtʼ tahentam tulucʼ norokte bolokʼ khon mitʼ mẽtʼante Isorakʼ rajre bolokʼge am lạgitʼ bhagea.

⁴⁸Ona norokre gocʼ hoṛkoakʼ jel jojom tejo do tishõ bako gujukʼa, ar onḍenakʼ seṅgel hõ baṅge ĩṛĩjokʼa.

⁴⁹“Ar buluṅ emakʼ leka sanamko cetanre seṅgel emocokʼa.

⁵⁰“Buluṅ ma bogege, menkhan sabakʼlen khan cekate ona do arhõ rahamkokʼa? Apeakʼ ontorre buluṅ tahentapema ar sanamko tulucʼ sulukte tahenpe.”