Read Santali Luk 1 Bible Online

Luk 1 - Santali bible

Luk 1

¹Manotan Thiophil, aboko talare okako ghoṭna hoelen ar pạhil khon okoekoko ńelletʼ ar Isorakʼ bhage sombatko porcarletʼ, onko do ale sanamakʼko baḍae ocoakatʼlea, ar onkoakʼ katha lekage ḍher hoṛ do ona reaṅko ol akada.

³Ar iń do onako reaṅ pạhil khonge mońj okocʼte suṭhik hataokate, mitʼṭen mitʼṭenkate olam do besiń hudiskeda.

⁴Onate am okaṭakʼem ańjomakatʼ ona sạrikana se baṅa, onam baḍae daṛeakʼa.

⁵Herod do tinre Jihudạ Prodesren raje tahẽkana unre Abiạ thokren Sakariạ ńutuman mitʼṭen hoṛ do Jihudikoren naekeye tahẽkana. Uniren bạhutetʼakʼ ńutum do Elisabet. Uni hõ naeke Aron bõsrene tahẽkana.

⁶Isor samaṅre unkin bana hoṛge dhorom kin tahẽkana. Ar Probhuakʼ sanam hukum ar niạmko ṭhik lekakin manaoetʼ tahẽkana.

⁷Unkinren do cele gidrạge bako hoeakan tạkin tahẽkana ente Elisabet do bạńjhigeye tahẽkana. Inạ chaḍa unkinakʼ umer hõ ạḍi aema hoeakan tahẽkana.

⁸Mitʼ dhao Sakariạ do acʼakʼ dol reakʼ pạrire Isor samaṅre naeke reakʼe kạmikan tahẽkana.

⁹Naeke kạmi reakʼ cạli leka gulibãṭ hotete unirege paṛaoena jemon uni do Probhuakʼ mundil reakʼ sonot jaegare dhupe jeretʼ daṛeakʼ.

¹⁰Ar uni dhupe jered oktere bahrere do ạḍi utạr hoṛko koejoṅkan tahẽkana.

¹¹Unre Probhuren mitʼṭen goḍet do ackage hecʼkate dhup pinḍ reakʼ jojomsa aṛere Sakariạ ṭhene ńel ocoyena.

¹²Ar Sakariạ do serma goḍete ńelkede khane torasena ar botor caṛhaoadea.

¹³Serma goḍet do uniye metadea, “Alom botorokʼa, Sakariạ, ente Isor do amakʼ koejoṅe ańjomakada. Amren bạhu Elisabetren do mitʼṭen koṛa gidrại hoyokʼtaea. Ar uniakʼ ńutum do Johanem dohoetaea.

¹⁴Uni do amakʼ jionre maraṅ rạskạwạnicʼe hoyokʼa ar uniakʼ janam khạtirte arhõ ạḍi utạr hoṛko rạskạkʼa.

¹⁵Ente Probhuakʼ mẽtʼãhã samaṅre uni do maraṅe hoyokʼa. Uni do tishõ darkha rasa se eṭakʼ jãhãn bubulakʼko bae ńũiya ar eṅgatakʼ kukhire tahen khonge sonot Jiuteye perejokʼa.

¹⁶Israelko modren ḍherkoge akoren Probhu Isor secʼe ruạṛ ạgukoa.

¹⁷Uni do Eliạ nạbi reakʼ Jiu ar daṛete Probhu lahateye hijukʼa. Ar apatkoakʼ mon hoponko secʼe ruạṛtakoa ar bebatao hoṛkoakʼ mon reakʼ buje pheraotakote Isor sewa hoṛkoakʼ buj lekae hoe ocoetakoa. Nonkate uni do Probhu lạgitʼ mitʼṭen sapṛao akan jạte tearkoa.”

¹⁸Unre Sakariạ do serma goḍete metadea, “Cekateń bujhạu daṛekea? Iń ma coń haṛamge ar ińren bạhuakʼ umer hõ ạḍi ḍher hoe akantaea.”

¹⁹Serma goḍete menkeda, “Iń doń Gabriel kana; iń do Isor samaṅre teṅgo akaniń tahenkana. Am saõte galmarao ar noa bhage sombat emam lạgitʼge Isor doe kolakadińạ.

²⁰Ńelme, ińakʼ katha do okterege purạukʼa, menkhan ińakʼ katha bam pạtiạuatʼte am do guṅgạm tahena. Ar noako ạuri hoyokʼ hạbicʼ katha bam roṛ daṛeakʼa.”

²¹Hoṛko do Sakariạ lạgitʼko koyokʼ horakatʼ tahẽkana. Ar mundil reakʼ sonot jaegareye bilomokʼkan ńelte onko do hahaṛakʼko ehopʼena.

²²Ado Sakariại oḍok hecʼen khan hoṛko sãote katha bae roṛ daṛeada. Ar noateko bujhạukeda, uni do sonot jaegare jãhãn dorsone ńelakada. Uni do hoṛko sãote isạrawate kathae roṛkeda ar guṅgạgeye tahẽyena.

²³Ado naeke kạmi reakʼ pạri mucạtʼentae khan uni do oṛakʼteye calaoena.

²⁴Ar inạ tayom acʼren bạhu Elisabet doe bhạrti hoṛmoyena ar mõṛẽ cando hạbicʼ oṛakʼ khon bahrete bae oḍok baṛalena. Uniye menkeda,

²⁵“Noa do Probhuakʼ kạmi kana. Manwako ṭhen khon ińakʼ lajaoe cabaetiń lạgitʼ uni doe beṅgetʼ akawạdińa.”

²⁶Elisabet turui cando bhạrti hoṛmoe tahẽkanre Gabriel ńutuman mitʼṭen serma goḍet do Isor ṭhen khon Gạlil reakʼ Nasaret atoren Mạriạm ńutuman mitʼṭen kũạ̃ri kuṛi ṭhene kol ocoyena.

²⁷Uni do Dạud bõsren Joseph ńutuman mitʼṭen hoṛ sãote baplakʼ lạgitʼe horokʼ cikhnạ akan tahẽkana.

²⁸Serma goḍet do Mạriạm ṭhen hecʼkate joharadeteye metadea, “Probhu am soṅgere menaea are bhor akatʼmea.”

²⁹Noa katha ańjomkate Mạriạm do monreye ạndukʼ mạndukʼena. Uni do hudisokʼe ehopʼena, noa baṅ cetʼlekan joharkan.

³⁰Serma goḍet do uniye metadea, “Mạriạm, alom botorokʼa, ente Isor do ạḍiye daya akatʼmea.

³¹Ńelme, am dom bhạrti hoṛmokʼa ar mitʼṭen koṛa gidrại hoyokʼtama. Uniakʼ ńutum do Jisum dohoetaea.

³²Uni do maraṅe hoyokʼa. Ar maraṅ Isorren Hopone ńumogokʼa. Probhu Isor do uniren hapṛam Dạudakʼ siṅghạsone emaea.

³³Uni do Jakob bõsrenko cetanre jaejug hạbicʼe rajokʼa. Ar uniakʼ raj do tishõ baṅ mucạdokʼtaea.”

³⁴Mạriạm do serma goḍete metadea, “Noa do cekate hoedaṛekokʼa? Ińakʼ ma baplage coṅ baṅ hoeakan tiń.”

³⁵Serma goḍete menkeda, “Sonot Jiu do am cetanreye hijukʼa ar maraṅ Isorakʼ daṛegeye umulkama. Noa iạte okoeṭakʼ sonot Hopone janamokʼ uni do Isorren Hopone ńumogokʼa.

³⁶Ar ńelme, niạ buḍhi umerre amren peṛa Elisabet hõ hoṛmore koṛa gidrại ńam akawana. Hoṛko menetʼ tahẽkana uniren do gidrạge bako hoyokʼtaea, menkhan ńitokʼ do turui candoreye paṛao akana.

³⁷Isor ṭhen do bin daṛeanakʼ mente cetʼge bạnukʼa.”

³⁸Mạriạme menkeda, “Iń doń Probhuren kạ̃ṛmĩ kana, amakʼ katha lekage ińre jotowakʼ baṛe hoyokʼma.” Ona tayom serma goḍet do Mạriạm ṭhen khone calaoena.

³⁹Inạko din tayom Mạriạm do usạrage Jihudi Prodes reakʼ mitʼṭen atoteye calaoena. Ona ato do buru ṭoṭhare tahẽkana.

⁴⁰Mạriạm do onḍe Sakariạwakʼ oṛakʼre bolokate Elisabete joharadea.

⁴¹Elisabet do Mạriạmakʼ johare ańjomketʼ khan acʼakʼ kukhiren bale gidrạ doe keṭel gotʼena.

⁴²Uni do sonot Jiuteye perecʼente ãṭ aṛaṅteye menkeda, “Sanam maejiuko modre am dom bhạgangea ar amren okoeṭakʼ gidrại hoyokʼ, uni hõe bhạgangea.

⁴³Ińren Probhuren eṅgat iń ṭhene hecʼakana, noa do cekate hoyena?

⁴⁴Ente amakʼ johar kathań ańjomketʼ sãote, ińakʼ kukhiren gidrạ do rạskạteye keṭel gotʼena.

⁴⁵Bhạgan geam am do, ente am dom pạtiạu akana, Probhu okae menakawatʼme ona purạukʼa mente.”

⁴⁶Unre Mạriạme menkeda, “Ińakʼ jiwi do Probhui sarhaoede kana;

⁴⁷ińren babańcaoicʼ Isor iạte, ińakʼ jiwi do rạskạte perecʼ akana,

⁴⁸ente acʼren kạ̃ṛmĩ secʼ uni doe beṅgetʼ akada. Ńitokʼ khon sanam hoṛ do bhạganko mitạńa,

⁴⁹ente daṛeanicʼ Isor do iń lạgitʼ tinạkʼ maraṅakʼkoe kạmi akada. Uni doe sonotgea.

⁵⁰Ar okoe uniko sewawaekan uni do onkoreye dayakʼ kana, piṛhi cetan piṛhige.

⁵¹Uni do ti tiạrkate maraṅ daṛeakʼkoe kạmi akada; ar okoeakʼ mon hiskạte perecʼge onko doe chir chạturakatʼkoa.

⁵²Uni do siṅghạson khon rajkoe ńurhạketʼkoa, menkhan nindhạnko doe tul rakapʼ ketʼkoa.

⁵³Ar okoekoko reṅgecʼge, bhage, bhage jiniskote uni do onkoakʼ reṅgecʼe purun akatʼtakoa, menkhan kisạ̃ṛko do eken tiye bidạkatʼkoa.

⁵⁴Ar aboren hapṛamko ṭhen okae menletʼ tahẽkan, onkage uni do acʼren guti Israelkoe ńel sãohãketʼkoa. Abraham ar uni bõsren hoṛko cetanre jaejug hạbicʼ mãyãwako reakʼ kathae disạ dohoakatʼa.

⁵⁵

⁵⁶Mạriạm do Elisabet ṭhen pe cando tahẽkate acʼakʼ oṛakʼteye ruạṛ calaoena.

⁵⁷Okte purạuen khan Elisabet do mitʼṭen koṛa gidrại janamkedea.

⁵⁸Ar uni cetanre Probhuakʼ aema mãyã reakʼ katha ańjomkate aḍepaserenko ar peṛako do uni sãote rạskạkʼko ehopʼena.

⁵⁹Ado Jihudikoakʼ niạm leka irạl din hilokʼ onko do gidrạ khatnaye lạgitʼko hecʼena. Ar acʼ babawakʼ ńutum leka Sakariạ ńumeko menetʼ tahẽkana,

⁶⁰menkhan uniren eṅgattetʼ doe menkeda, “Ona do baṅ, nuiakʼ ńutum do Johan dohoe hoyokʼa.

⁶¹Onko do Elisabetko metadea, “Amren peṛako modre okoeakʼ hõ coṅ onkan ńutum ma bạnukʼ.”

⁶²Ado gidrạren apattetʼ ṭhen baḍae sanaketʼko khan, onko do isạrawateko kulikedea cetʼ ńutum dohoeyem khojkana.

⁶³Sakariạ do mitʼṭen olokʼ paṭa koekateye olkeda, “Nuiakʼ ńutum do Johan.” Ar ona iạte sanamkoko hahaṛayena,

⁶⁴Ar unrege Sakariạwakʼ moca do jhicʼgotʼena ar alaṅ do ulṭạuentaea ar Isor sarhaoate katha roroṛe ehopʼena.

⁶⁵Noa ńelte aḍepaseren hoṛko do botor caṛhaoatʼkoa, ar Jihudạ reakʼ goṭa buru ṭoṭharen hoṛko noa reaṅ galmaraoko ehopʼena.

⁶⁶Okoe noa kathako ańjomketʼ onko do mone monte hudisokʼko ehopʼena arko menkeda, “Nui gidrạ do enḍekhan cele bhalae hoyokʼa?” Noa kathako menkeda ente Probhuakʼ daṛe do gidrạ sãote tahẽkana.

⁶⁷Tayomte gidrạren apat Sakariạ do sonot Jiuteye perecʼen khan, nạbi lekate noa katha roroṛe ehopʼena,

⁶⁸“Israelkoren Probhu Isorakʼ sarhao hoyokʼtaema, ente uni do acʼren hoṛko secʼe beṅgetʼ akada are chaḍao akatʼkoa.

⁶⁹Uni do abo lạgitʼ acʼren guti Dạudakʼ bõs khon mitʼṭen daṛeanicʼ babańcaoicʼe omonkedea.

⁷⁰Noa katha do acʼren sonot nạbikoakʼ moca hotete uni do ḍher din laharegeye menletʼ tahẽkana.

⁷¹Uni do bạirikoakʼ ti khon ar hirkhạkʼ kankoakʼ ti khon aboe bańcao akatʼ bona.

⁷²Uni do aboren hapṛamko mãyãwako lạgitʼ acʼakʼ sonot bondobos, metakʼme acʼakʼ gokʼakʼ purạu lạgitʼ, aboe rukhiyạ akatʼ bona.

⁷³Ona gokʼakʼ do aboren mare hapṛam Abraham ṭhene kiriyạlena.

⁷⁴Uni do bạirikoakʼ ti khon aboe bańcaoketʼbona jemon tinạkʼ din jiwetʼbon tahen sonot ar dhoromre acʼ samaṅre teṅgo akan begor botor salakʼ bon sewa daṛeae.

⁷⁵

⁷⁶E bachatiń, am do coṭ utạricʼ Isorren nạbim ńumogokʼa, ente am do uniakʼ hor tear lạgitʼ uni laha lahatem calakʼa.

⁷⁷Am do uniren hoṛkom baḍae ocokoa, cetʼ leka aboren Isorakʼ mãyãte kại reakʼ ikạ ńamokʼte kại khon bańcao bon ńama. Uniakʼ mãyãte serma khon mitʼṭen jolokʼkan marsal abo cetanreye pheḍ hijukʼ kana,

⁷⁸

⁷⁹jemon ńut ar gujukʼ umulreko duṛupʼ akan Onko do marsale emako, ar suluk reakʼ horteye ạyur idi bon.”

⁸⁰Ar Johan doe hara idiyente Jiureye daṛe idiyena. Ar Israelko samaṅre ạuriye bahalokʼ hạbicʼ uni do hahaṅkarregeye tahẽyena.