Read Santali Luk 11 Bible Online

Luk 11 - Santali bible

Luk 11

¹Mitʼ jokhecʼ Jisu do mitʼṭen jaegareye koejoṅkan tahẽkana. Ado koejoṅe mucạtʼketʼ khan acʼren mitʼṭen cela doe menkeda, “E Probhu, Johan bạbạptisicʼ cetʼleka acʼren celako koejoṅe cetʼatʼko tahẽkan onkage ale hõ cetʼaleme.”

²Jisu do onkoe metatʼkoa, “Apepe koejoṅre nonka menpe, ‘E aleren sermaren Baba, amakʼ ńutum sonotokʼma, amakʼ raj hijukʼma;

³aleakʼ din hilokʼ reakʼ jạruṛ jomakʼ dinạmge emaleme baṛe;

⁴ar aleakʼ kạiko ikạkataleme ente okoe ale birudreko kạiyetʼ ale hõ onkole ikạkatako kana. Ar biḍạute alom aderlea.’ ”

⁵Ona tayom Jisu do acʼren celakoe metatʼkoa, “Ape modre mitʼ hoṛ tala ńindạ jokhecʼ acʼren gateakʼ oṛakʼte senkateye metae, ‘E gate, pea piṭhạ pańcate den em hataṛạńme.

⁶Ente hortenicʼ mitʼṭen gateye hecʼ akawạdińa. Ar uni jom ocoye lạgitʼ cetʼge bạnukʼtińạ.’

⁷Unre oṛakʼ bhitri khon acʼren gateye roṛ ruạṛadea, ‘alom ạṛisińạ. Ente ńitokʼ do duạr sińgea ar ińren gidrạko hõ iń sãote aṭetʼreko giticʼ akana. Ar beretʼkate cetʼge ohoń em daṛelema.’

⁸Sạrigeń metapekana, uni do gate iạte jãhãnakʼ emae bae beretʼrehõ, enhõ ạḍiye nehõrokʼkante uni do beretʼkate tinạkʼ jạruṛae onae emaea.

⁹“Onateń metapekana, koepe ado emapea; ńam baṛaepe adope ńama; ṭhopʼ ṭhobpe ado jhicʼapea.

¹⁰Ente mitʼke mitʼ kokoyicʼ do milạuaea; ar ńam baṛayicʼ doe ńama; ar ṭhopʼ ṭhopʼetʼkạnicʼ do jhicʼaea.

¹¹Ape modre nonkan okoeṭakʼ apat hoṛ menaea, one hopontetʼ piṭhại koelere dhiriye calae, se hakoe koelere hako bodolte bińe calae,

¹²se beleye koelere kidińkaṭkome calae?

¹³Enḍekhan apepe bạṛicʼgere hõ aperen gidrạko bhage bhage jinisko emakope baḍaekan khan, sermaren Baba do acʼ koeyekanko tinạkʼ artetʼ sonot Jiue emakoa!”

¹⁴Eṭakʼ mitʼ jokhecʼ Jisu do mitʼṭen guṅgạ bhute oḍok giḍiyedekan tahẽkana. Ado bhute oḍok calaoen khan, guṅgạ hoṛ do katha roroṛe ehopʼena. Ar noate hoṛko do ạḍiko hahaṛayena,

¹⁵menkhan adomko doko menkeda, “Bhutkoren sordar Beelsebul hotete uni do bhutkoe oḍok giḍiyetʼkoa.”

¹⁶Ar eṭakʼ hoṛko do Jisu biḍạue lạgitʼ serma khon mitʼṭen cinhạ udukʼako lạgitʼko metadea.

¹⁷Menkhan uni do onkoakʼ mon reakʼ kathae bujhạuketʼtako khane metatʼkoa, “Okaṭakʼ rajosṭi acʼ talare hạṭińokʼ, ona do maraokʼa, ar onate rajosṭi reakʼ gharońjko hõ hạṭińokʼa.

¹⁸Soetan hõ acʼ birudreye teṅgon khan, enḍekhan rajosṭi do cekate ṭikạu tahentaea? Apepe meneda Beelsebul hotete bhutkoń oḍok giḍiyetʼkoa.

¹⁹Ar ińge, Beelsebul hoteteń oḍok giḍiyetʼko khan aperen hoṛko do okoe hotete bhutkoko oḍok giḍiyetʼkoa? Ar ṭhik kathape roṛeda se baṅ ona do aperen hoṛkoge bicạra.

²⁰Menkhan Isorakʼ daṛete bhutkoń oḍok giḍiyetʼko khan enḍekhan Isorakʼ raj do ape ṭhen seṭer akana.

²¹“Mitʼṭen daṛe hoṛ do sanam lekan khanḍa bhanḍawate acʼakʼ oṛakʼe horhotae khan uniakʼ jinisko do nirạige tahentaea.

²²Menkhan uni khon ḍher daṛeanicʼ jãhãe hecʼkate uniye bhagao lekhan enḍekhan okako khanḍa bhanḍareye bhorsakʼkan tahẽkan, uni eṭakʼ hoṛ do onakoe rejea ar luṭakʼ jiniskoe hạṭińtaea.

²³“Jãhãege iń secʼrene baṅkan khan uni do iń birudren kanae. Okoe iń sãote bae halaṅ uni doe chiṭạua.

²⁴“Bạṛicʼ jiu do mitʼṭen hoṛ khone oḍokʼ calaolenre jirạukʼ lạgitʼ hahaṅkar jaegakoreye ạcur baṛaea. Ar bae ńamle khan uni doe mena, ‘oka oṛakʼ khoniń oḍok hecʼakan ona oṛakʼtege arhõń ruạṛ calakʼa.’

²⁵Ar ruạṛ hecʼkate uni do ona oṛakʼ sapha ar sajao akatʼe ńama.

²⁶Unre uni do senkate acʼ khon artetʼ bạṛicʼ eṭakʼ eae goṭen jiue soṅge darajoṅa ar onḍeye girobasokʼa. Onate uni hoṛakʼ dosa do pạhilakʼ khon artetʼ bạṛicʼ hoyokʼtaea.”

²⁷Ado Jisu kathae roroṛkan tahẽkanrege gadel hoṛko modren mitʼṭen maejiu do hohoateye menkeda, “Bhạgangeae uni maejiu, one okoe do kukhireye doholetʼme ar toae nunuatʼme tahekan.”

²⁸Menkhan Jisui menkeda, “Onkogeko bhạgana one okoe do Isorakʼ kathako ańjometʼkan ar ona lekako kạmikan.”

²⁹Arhõ aema hoṛ do Jisu beṛhaete lad lad jarwakʼko ehopʼena. Unre Jisui menkeda, “Niạ piṛhiren hoṛ doko bạṛicʼgea. Onko do cinhạko khojkana menkhan Jona reakʼ chaḍa eṭakʼ ar cetʼ cinhạ hõ baṅ udukʼakoa.

³⁰Jona do Ninwi nagraharen hoṛko lạgitʼ cetʼleka cinhại hoelen ṭhik onkage Manwa Hopon hõ noa piṛhirenko lạgitʼ cinhại hoyokʼa.

³¹Bicạr dinre dạkhin disạmren rạni doe rakapʼ hijukʼte niạ piṛhiren hoṛko doskoe udukʼakoa, ente Solomon reakʼ ạkilan kathako ańjom lạgitʼ uni do dhạrti reakʼ mitʼ mucạtʼ khone rakapʼ hecʼlena; ar ńelpe, nonḍe do Solomon khon hõ maraṅicʼ mitʼṭen menaea.

³²Menkhan bicạr dinre Ninwi nagraharen hoṛko do beretʼkate niạ piṛhiren hoṛko doskoko udukʼakoa, ente Ninwiren hoṛ do Jonawakʼ porcarte kại khon monko ạcurletʼtakoa; ar ńelpe, nonḍe do Jona khon hõ maraṅicʼ mitʼṭen menaea.

³³“Okoe hõ diuhe jeretʼkate do danaṅre bako dohoea se khạclạkʼte hõ bako hạrupʼ esetʼkakʼa bickom diuhe dohowakʼ cetanregeko dohoea, jemon bhitrite bolokʼko do marsalko ńelńam.

³⁴Amakʼ mẽtʼ do hoṛmo reakʼ diuhe kana. Ar amakʼ mẽtʼ mońjgetam khan enḍekhan amakʼ goṭa hoṛmo hõ marsalte perecʼgea, menkhan mẽtʼ bạṛicʼge khan amakʼ hoṛmo hõ ńutte perecʼgetama.

³⁵Amre menakʼ marsal jemon alo ńutokʼ onate sontor akae tahenme.

³⁶Amakʼ goṭa hoṛmo marsalte perecʼgetam khan ar thoṛa hõ ńut bạnukʼ khan enḍekhan ona do goṭage marsalokʼa, cetʼleka diuhe reakʼ marsal amre paṛaolenre amakʼ hoṛmo marsalokʼtam.”

³⁷Ado Jisu katha roṛe mucạtʼketʼ khan mitʼṭen Phạrusi hoṛ do jom ocoye lạgitʼe neotakedea. Unre Jisu do bhitrite bolokate jojome duṛupʼena.

³⁸Dhorom reakʼ niạm lekate Jisu do jom lahare ti ạrubokʼ bae ńelledete uni Phạrusi doe hahaṛayena.

³⁹Unre Probhu do uniye metadea, “Ape Phạrusiko do thạri ar bạṭi reakʼ bahre secʼgepe saphayetʼ kana, menkhan apeakʼ bhitritetʼ do laloc ar bạṛicʼte perecʼgetapea.

⁴⁰E bebujko! Bahre secʼ benaoicʼ do cetʼ bhitri secʼ hõ bae benao akada?

⁴¹Ape do thạri ar bạṭi reakʼ bhitrire oka menakʼ onage boroṅ dan emokʼpe; enḍekhan sanamakʼ saphakʼtapea.

⁴²“Hae ape Phạrusiko do! Ape do eken podina, tejpat ar mitʼke mitʼ aṛakʼ sakam reakʼ gel hạṭiń reakʼ mitʼ hạṭińge Isorpe emae kana, menkhan dhorom bicạr ar Isorakʼ dulạṛ secʼ do bape moneakʼkana. Onate sedaeakʼko pańjae são sãote tayom reakʼakʼko hõ pańjae lek tapea.

⁴³“Hae ape Phạrusiko do! Ape do sunạgog reakʼ asol asol duṛupʼakʼkore duṛubokʼ ar hạṭiạ bajarkore johar ocokʼgepe kusiyakʼ kana.

⁴⁴Hae ape do! Ente ape do begor cinhạ akatʼ topa lekanko kanape. One hoṛko do begor baḍaete ona cetanteko taṛam paromokʼ kan.”

⁴⁵Unre sostor baḍaeko modre mitʼ hoṛ do Jisui metadea, “E Guru, am do noa kathate ale hõm bemanotetʼlea.”

⁴⁶Jisui menkeda, “Hae ape sostor baḍaeko do! Ape do hoṛko hamal hamal bojhape ladeako kana, menkhan goṛowako lạgitʼ ape do mitʼṭen kạṭupʼte hõ bape joṭetʼ legayeda.

⁴⁷“Hae ape do! Ape do nạbikoakʼ topako nawatepe tol aroyeda, ente aperen hapṛamkoge onko doko gocʼletʼkoa.

⁴⁸Onate aperen hapṛamkoren gohako do apege ar onkoakʼ ona kạmiko hõ apegepe aṅgoceda. Ente onko do nạbikoko gocʼletʼkoa ar ape do onkoakʼ topakope benao aroyeda.

⁴⁹Onate Isor do acʼakʼ akel lekage noa kathae menakada, ‘iń do onko ṭhen nạbiko ar apostolkoń kolkoa. Onko modre adom doko khũnkoa ar adom doko santaokoa.’

⁵⁰Ar nonkate, dhạrti sirjạu reakʼ ehopʼ khon tinạkʼgan nạbikoko gocʼ ocoakana, onkoakʼ mãyãm reakʼ dạyik do niạ piṛhiren hoṛko cetanrege paṛaokʼa.

⁵¹Hẽ, sạrigeń metapekana, Habel reakʼ mãyãm khon ehopʼkate Sakariạ hạbicʼ, one okoe do pinḍ ar sonot jaegareye gocʼ ocolen uni Sakariạ khũn hạbicʼ sanamkoakʼ mãyãm reakʼ dạyik do niạ piṛhiren hoṛgeko hoyokʼa.

⁵²“Hae ape sostor baḍaeko do! Ape do akel reakʼ choṛanpe iditora akada. Ape hõ bape bolokʼkana ar bhitrite bolokʼko hõ bape bolo ocoako kana.”

⁵³Ado ona jaegae bạgi oṭoatʼkan tahẽkanre sostor baḍaeko ar Phạrusiko do uni birudre emanteakʼ roroṛko ehopʼena.

⁵⁴Ar ạḍi lekan kuklikote jhạlire paṛaoe lạgitʼ ạt ńam baṛaeko ehopʼena.