Read Santali Luk 12 Bible Online

Luk 12 - Santali bible

Luk 12

¹Ar inạkʼtege hajar hajar hoṛ nonkako jarwayena je, onko do ṭhela ṭhili iạte bhindạṛokʼko ehopʼena. Unre Jisu do pạhilre acʼren celakoe metatʼkoa, “Phạrusikoakʼ khạmi khon sontor akae tahenpe. Ona khạmi do hoyokʼ kana onkoakʼ phạsiạratetʼ.

²Oko reakʼ sanamakʼ do sodorokʼa ar danaṅre menakʼ jotowakʼ do baḍaeyokʼa.

³Onate ńutre jãhãnakʼgepe roṛakatʼ ona do marsalreko ańjoma. Ar bhitri oṛakʼre jãhãnakʼge khae khoepe roṛakatʼ ona do sạṛim cetan khon lại saḍekʼa.

⁴“E gateko, ińiń metapekana, hoṛmo gogocʼko ar ona tayom bạ̃ṛti jãhãnakʼ baṅ ceka daṛeakʼko do alope botorakoa.

⁵Menkhan ińiń udukʼapea okoeṭakʼpe botoraea mente. Ape gocʼpe tayom okoe do norokre khadlepe reakʼ ektiạri menakʼtae unige botoraepe. Hẽ ińiń metapekana, ape do unige botoraepe.

⁶“Mõṛẽ goṭen ghaṛwa cẽṛẽ do cetʼ thoṛa damte bako ạkhirińokʼ kana? Enrehõ Isor do onkoren mitʼṭen hõ bae hiṛińetʼkoa.

⁷Menkhan apeakʼ ma bohokʼ reakʼ upʼ hõ lekha akantape. Alope botorokʼa, ente aema aema ghaṛwa cẽṛẽko khon hõ ape do bạ̃ṛtipe damangea.

⁸“Ińiń metapekana, jãhãege hoṛko samaṅreye aṅgociń Manwa Hopon hõ uni do Isorren goḍetko samaṅreye aṅgocea.

⁹Menkhan jãhãege hoṛko samaṅreye baṅeń, uni do Isorren goḍetko samaṅreye baṅ ocokʼa.

¹⁰Manwa Hopon birudre jãhãege jãhãnakʼe roṛ uni do ikạkʼtaea, menkhan sonot Jiu birudre jãhãege opoman reakʼ kathae roṛ uni do baṅ ikạkʼtaea.

¹¹Sunạgogkore ar disạm cakʼlaoko ar ektiạrianko samaṅreko idilepere cetʼ leka se cetʼpe roṛ ruạṛa ona reaṅ do alope bhabnakʼa.

¹²Ente unre cetʼ roroṛ hoyokʼa ona do sonot Jiugeye cetʼapea.”

¹³Ado gadel hoṛko modren mitʼ hoṛ do Jisui metadea, “E Guru, ạlińren baba okaṭakʼ sompottiye doho oṭoakatʼ ona do boehań iń sãote hạṭiń lạgitʼ metaeme.”

¹⁴Jisu do uniye metadea, “Henda ho abenakʼ bicạr lạgitʼ se aben talare sompotti hạṭińaben lạgitʼ ektiạri do okoeye emakawạdińạ?”

¹⁵Ona tayom Jisu do gadel hoṛkoe metatʼkoa, “Men cehaokʼpe! Ar sanam lekan lob-laloc khon sontor akae tahenpe, ente manwakoakʼ jionre ḍher sompotti tahen do sanam khon jạruṛteakʼ do baṅkana.”

¹⁶Ado gadel hoṛko cetʼako lạgitʼ mitʼṭen phene lạiatʼkoa: “Mitʼṭen kisạ̃ṛ hoṛakʼ jumire aema phosol upjạuena.

¹⁷Onate uni do mone monteye hudisana, ‘nunạkʼ phosol dohoe reakʼ jaega ma bạnukʼtiń; ńitokʼ do cetʼ iń cekaea?

¹⁸Adoe menkeda ińakʼ murạikoń rạpuda, ar lạṭu lạṭu murạikoń benaoa ar onare ińakʼ sanam phosolko ar dhonkoń dohoetińạ.

¹⁹Ar ińakʼ jiwiń metawakʼa, E jiwi ḍher bochor lạgitʼ baeakan acel pacel dhon menakʼtama. Onate ma jirạukʼte, jomme, ńũiyme ar hesecʼ sekrecʼjokʼte din ṭalaome.’

²⁰Menkhan Isor do uniye metadea, ‘E bebuj, teheń ńindạge am dom gujukʼa. Enḍekhan onem doho jarwa akatʼ dhon do okoeakʼ hoyokʼa?’ ”

²¹Ado mucạtʼre Jisui menkeda, “Okoe hoṛ apnar lạgitʼ dhone jarwae ar Isor samaṅre kisạ̃ṛicʼe baṅkan, enḍekhan uniakʼ dosa hõ onkage hoyokʼtaea.”

²²Ona tayom Jisu do acʼren celakoe metatʼkoa, “Noa iạtegeń metapekana, jiwi lạgitʼ do alope dandokʼa cetʼpe joma; ar hoṛmo lạgitʼ hõ alope dạndikʼa cetʼpe bandea mente.

²³Ente jiwi do eken jom ar ńũi lạgitʼ do baṅkana, ar hoṛmo hõ eken kicricʼ khạnḍwạkʼ lạgitʼ do baṅa.

²⁴Kạhũko beṅgetʼakope, onko do itạ hõ bako era ar phosol hõ bako ira. Ar kuṭhi se murại hõ bạnukʼtakoa, enrehõ Isor do onkoe jom ocoyetʼkoa. Menkhan ape do noko cẽṛẽko khon hõ artetʼ bạ̃ṛtipe damangea.

²⁵Ape modre okoe dạndikate acʼakʼ jiwi mitʼ ghonṭa gan bạ̃ṛtiye doho daṛeataea?

²⁶Ar niạ huḍiń utạrakʼ kạmi hõ bape daṛeakʼ khan enḍekhan eṭakʼakʼko lạgitʼ do cedakʼpe dandokʼ kana?

²⁷“Bahako secʼ beṅgedpe, cetʼlekate harakʼ kana mente. Onko do kạmi hõ bako kạmiya ar sutạm hõ bako takoea ar bako tińa. Menkhan ińiń metapekana, Solomon raj do nunạkʼ ṭhonokreye tahẽkanre hõ onako reakʼ mitʼṭecʼ leka hõ bae sajao daṛeada.

²⁸Ṭạnḍire okaṭakʼ ghãs teheń menakʼ ar gapa culhạre khadle ocokʼrehõ Isor do ona nonkae sajaoetʼ khan E nase pạtiạukʼko, uni do tinạkʼ artetʼge bae sajaopea!

²⁹Cetʼpe joma ar cetʼpe ńũiya mente hudiskate alope uduṛ dhupuṛ baṛaea.

³⁰Ente dhạrtiren eṭakʼ jạtkoge onako reaṅ doko ńam baṛakana; ona chaḍa aperen Baba doe baḍaegea, apeakʼ do noako jạruṛ menakʼtapea mente.

³¹Ona khon boroṅ Isorakʼ rajko reakʼ dạndikʼpe, enḍekhan noako hõpe ńama.

³²“Alope botorokʼa, E huḍiń palrenko, ente aperen Baba do apege acʼakʼ rajosṭi emapeye menjoṅkana.

³³Ape do menakʼ tapeakʼko ạkhrińkate dan emokʼpe. Ar oka baṅ marekʼ ona ṭaka reakʼ thạilạkʼ tear joṅpe, metakʼme okaṭakʼ dhon jaejug hạbicʼ ṭikạu tahen onage sermare jarwaepe. Onḍe do kombṛo hõ bako hijukʼa ar tejoko hõ bako bạṛija.

³⁴Ente okare apeakʼ dhon menakʼ onḍege apeakʼ mon hõ tahena.

³⁵“Ape do ḍanḍare kicricʼ paṭhe akatʼ ar diuhe do jol akae tahentape ma.

³⁶Ar nonkan hoṛko leka hoyokʼpe okoe do akoren kisạ̃ṛ lạgitʼ koyokʼ horre menakʼko, jemon uni do bapla bhoj khon ruạr hecʼkate duạre ṭhopʼ ṭhopʼlere duạrko jhicʼae.

³⁷Bhạgangeako onko guti do, one okoe do jagwar tahene hecʼ ńamko. Sạrigeń metapekana, uni kisạ̃ṛ do ḍanḍare kicricʼe paṭhekʼte onkoe duṛupʼ ocokoa ar hecʼkate acʼgeye jom ocokoa.

³⁸Bhạgangeako onko gutiko do, one uni do tala ńindạ se aṅgakʼ jokhecʼ hecʼkate jagwar tahene ńamko.

³⁹Oṛakʼ kisạ̃ṛe baḍae khan oka ghuṛi kombṛoe hijukʼa, enḍekhan uni do jagware tahẽkokʼa ar acʼakʼ oṛakʼre kombṛo ohoe bolo ocolea.

⁴⁰Onkage ape hõ sapṛao akae tahenpe, ente bape hudisakatʼ ghuṛirege Manwa Hopon doe hijukʼa.”

⁴¹Unre Patrase menkeda, “Henda Probhu, noa cecetʼakʼ do eken ale lạgitʼ se sanamko lạgitʼem emokʼkana?”

⁴²Probhui menkeda, “Uni pạtiạricʼ ar budanicʼ kạmiyạ hoṛ doe okoe kana, one uniren kisạ̃ṛtetʼ do gutiko cetanre sordare dohoyete ṭhik oktere ser sidhạ emako lạgitʼ bhare emaekan?

⁴³Bhạgangeae uni guti, one okoe do kisạ̃ṛtae pạtiạu salakʼ kạmireye hecʼńame.

⁴⁴Sạrigeń metapekana, uni kisạ̃ṛ do acʼakʼ sanam menakʼtaeakʼko cetanre sordare dohokaea.

⁴⁵Menkhan uni sordar acʼakʼ monreye menle khan, ‘ińren kisạ̃ṛ do hijukʼe bilomeda.’ Ar unre uni do sãoten guti ar kạ̃ṛmĩkoe dal baṛakote jom-ńũkate bulokʼe ehobokʼ.

⁴⁶Enḍekhan okaṭakʼ din ar okaṭakʼ ghuṛi reakʼ katha bae hudisetʼkan, ona din ar ona ghuṛirege acʼren kisạ̃ṛ doe hijukʼa. Are makʼ paṛagea ar bepạtiạrko tulucʼ jaegae ṭhikaea.

⁴⁷“Ar okoeṭakʼ guti do acʼren kisạ̃ṛakʼ sana baḍaekatehõ sapṛao bae tahen se kisạ̃ṛ okae khojkan ona bae onkae enḍekhan uni do bebạṛicʼe dal ocokʼa.

⁴⁸Menkhan okoe begor baḍaete sạjại ńam reakʼe kạmi akatʼ uni do thoṛageye sạjại ocokʼa. Ar ḍhere em ocoakanicʼ ṭhen khon do ḍhergeko hataoa ar ḍhere jimạ ocoakan hoṛ hõ bạ̃ṛtiko koeyea.

⁴⁹“Iń do dhạrtite seṅgel lagaoiń hecʼakana; ar ona do laharege jollen khan bhage hoekokʼa!

⁵⁰Iń do mitʼṭen bạptisma ataṅ hoyokʼtińạ ar ona ạuri purạukʼ hạbicʼ ińakʼ duk do baṅ cabakʼtińạ.

⁵¹Ape do cetʼpe meneda, dhạrtire suluk emokʼiń hecʼakana? Onka do baṅa. Iń do suluk emokʼ do bạń hecʼakana, bickom manwa birudre manwa teṅgoye lạgitʼgeń hecʼakana.

⁵²Ńit khon mitʼ oṛakʼren do mõṛẽ ṭhenko hạṭińokʼa, ar pe hoṛ do bar hoṛ birudre ar bar hoṛ do pe hoṛ birudreko teṅgona.

⁵³Onko do nonka lekako hạṭińokʼa, Apat do hopon birudre ar hopon do apat birudre, eṅgat do hoponera birudre ar hoponera do eṅgat birudre, hanhartetʼ do kimintetʼ birudre ar kimintetʼ do hanhartetʼ birudre.”

⁵⁴Ona tayom Jisu do gadel hoṛkoe metatʼkoa, ‘‘Pạchimre rimil rakabokʼpe ńelle khangepe mena, ‘hoe dakʼ do darae kana,’ ar onkage hoyokʼ kana.

⁵⁵Ar dạkhin secʼ khone hoele khan dope mena, ‘jharla jhạrliye setoṅa,’ ar onkage hoyokʼ kana.

⁵⁶E phạsiạrako, ot ar serma reakʼ cinhạ dope baḍae orometʼ kangea, menkhan ńitokʼ reakʼ okteko do cekate bape oromeda?

⁵⁷“Ar okaṭakʼ ṭhikakʼkan ona do cedakʼ bape bicạreda?

⁵⁸Amren bạdi tulucʼ Hạkim ṭhenem calakʼre horrege phanḍao lạgitʼ kurumuṭuime. Ar baṅkhan uni do Hạkim ṭhene or ghac ghacao idimea. Unre Hạkim do daroga ṭhene jimạkama ar daroga do hajotreye bhoraokama.

⁵⁹Ińiń metamkana, kạuḍi kạuḍi ạurim hala cabae hạbicʼ hajot khon ohogem oḍok daṛelena.”