Read Santali Luk 16 Bible Online

Luk 16 - Santali bible

Luk 16

¹Jisu do acʼren celakoe metatʼkoa, “Mitʼṭen kisạ̃ṛ hoṛren maraṅ lonbonicʼ do noa menteko dusikedea je, uni do acʼren kisạ̃ṛakʼ dhonkoe nosṭoyeda.

²Unre kisạ̃ṛ do uni hoṛ hohoadeteye kulikedea, ‘am birudre cetʼkoń ańjomeda? Onate kạmi reakʼ hisạb imạńme, ente maraṅ lonbonicʼ do ar bam tahẽdaṛeakʼa.’

³“Unre guti do mone moneteye menkeda, ‘ńitokʼ do cetʼ iń cekaea? Ińren kisạ̃ṛ ma kạmi khone ocokʼ idiń. Ar hasa makʼ reakʼ daṛe hõ bạnukʼtiń ar kokoe mań lajaokʼkan.

⁴Jaehok, kạmi khoniń jirạu ocolenre hoṛko jemon akoakʼ oṛakʼreko ataṅiń onate cetʼ cekae lagaoạńạ ona doń baḍaegea.’

⁵“Ar noa menkante uni do acʼren kisạ̃ṛ ṭhen dharaoletʼ tahẽkankoe hohoatʼkoa. Ona tayom pạhilicʼe kulikedea, ‘ińren kisạ̃ṛ ṭhen tinạkʼem dharao akada?’

⁶Uni doe menkeda, ‘bar hajar ponsae liṭar sunum.’ Uniye metadea, ‘oka kagocre amakʼ dharaoakʼ ol menakʼ ona ạguime ar usạra duṛupʼkate ol hodme mitʼ hajar bar sae liṭar.’

⁷Ona tayom eṭagicʼe metadea, ‘am do tinạkʼem dharao akada?’ Uni doe menkeda, ‘gel irạl ṭon guhum.’ Adoe metadea, ‘amakʼ kagocre gel pon tala ṭon olme.’

⁸Ado uni gutiye bedhoromgere hõ bud salakʼe kạmiketʼte kisạ̃ṛ do uniye sarhaokedea. Noate bujhạukʼ kana, noa puriren hoponko do ako bidạlrenko talare marsalren hoponko khon hõ bạ̃ṛtiko budangea.

⁹Ińiń metapekana, bedhorom dhonte gate benao joṅpe, jemon ona dhon cabalenre jaejug tahen reakʼ jaegareko ataṅ darampe.

¹⁰Thoṛa utạrakʼkore pạtiạricʼ do ḍher okocʼakʼkore hõe pạtiạrgea. Okoe thoṛa utạrakʼkore pạtiạricʼe baṅkan, uni do ḍher okocʼakʼkore hõ ohogeye pạtiạu ocolena.

¹¹Noa piṛhi reakʼ dhonko cetanre bape pạtiạu ocokʼkan khan enḍekhan sạri dhon do bhorsakate okoeye jimạwapea?

¹²Eṭakʼ hoṛkoakʼre pạtiạr bape tahen khan, ape apnarakʼ do okoe baṅe emape?

¹³“Okoe hõ barea kisạ̃ṛ ṭhen guti ohoe khaṭao daṛelena, ente mitʼ hoṛ doe kurudaea ar eṭakʼicʼ doe dulạṛea, se mitʼ hoṛ doe manotea ar eṭakʼicʼ doe neṅghaoea. Isor ar dhon ṭhen guti do ohogepe khaṭao daṛelena.”

¹⁴Ado noako katha ańjomkate Phạrusiko do Jisu siṛogaeko ehopʼena, ente onko do ṭaka-poesage bạ̃ṛtiko dulạṛetʼ tahẽkana.

¹⁵Unre Jisui metatʼkoa, “Ape do hoṛko samaṅre dhorompe udugokʼ kana, menkhan Isor do apeakʼ mon reakʼe baḍaegea. Ente manwa ṭhen okaṭakʼ manotakʼkan, Isor samaṅre ona do hirkhạwakʼ kana.

¹⁶“Moseakʼ ạn ar nạbikoakʼ olakʼ do Johan hạbicʼge. Ona tayom khon Isorakʼ raj reakʼ bhage sombat do porcarokʼ kana ar sanamkoge ona rajre jormoṭko bolokʼ kana.

¹⁷Menkhan ạn reakʼ mitʼ ṭuḍạkʼ meṭaokʼ khon bickom serma ar ot cabakʼge algawa.

¹⁸“Okoe acʼren bạhu bạgikate eṭakʼicʼe baplaye, uni doe laṭghaṭeda. Ar jãwãe khon bapag akan maejiu okoeye baplaye, uni hõe laṭghaṭeda.

¹⁹“Mitʼṭen kisạ̃ṛ hoṛe tahẽkana. Uni do beguni roṅakʼ ar eṭakʼ damanakʼ kicricʼkoe horokʼ bandeyetʼ tahẽkana. Ar jaoge hesecʼ sekrejokʼ tulucʼe jom-ńũiyetʼ tahẽkana.

²⁰Ar uni kisạ̃ṛ hoṛakʼ duạr ṭhen Lasar ńutuman mitʼṭen kokoe hoṛ do jaoge ạgukateye doho ocokʼkan tahẽkana. Uni do goṭa hoṛmo ghaote perecʼ tahẽkantaea.

²¹Ar kisạ̃ṛ hoṛakʼ mej khon hiricʼ pạsir okako jomakʼ ńurokʼkan tahẽkan onakote lacʼ perejtaye menetʼ tahẽkana, ar setako hõ uniakʼ ghaokoko jaletʼtae tahẽkana.

²²“Mitʼ din uni kokoe hoṛ doe gocʼena. Ar serma goḍetko hecʼkate Abraham ṭhenko idikedea. Ona tayom uni kisạ̃ṛ hoṛ hõe gocʼena arko topakadea.

²³Ado patalreye sasetokʼkan tahẽkanre coṭ secʼe beṅgetʼ rakapʼketʼ khan sạṅgińre Abraham ar uni sorre Lasare ńelkeda.

²⁴Unre uni do ãṭ aṛaṅte hohoateye menkeda, ‘E baba Abraham, dayawạńme baṛe. Ar Lasar iń ṭhen kolkaeme jemon uni do acʼakʼ coṭ kạṭupʼ dakʼre topokate ińakʼ alaṅe reaṛkạtiń. Ente noa jolokʼ seṅgelreń jal jalaokʼ kana.’

²⁵“Menkhan Abrahame menkeda, ‘disạime, am do jiwetʼem tahẽkanre tinạkʼ sukem jomleda ar Lasar do tinạkʼe sasetlena. Menkhan nonḍe uni do jiwi raṛecʼe ńameda ar am dom sasetokʼkana.

²⁶Ona chaḍa ape ar ale talare nonkan mitʼṭen maraṅ khạndṛuṅ dohoakana jemon jãhãege sanalere nonḍe khon paromkate ape ṭhen aloko calao daṛeakʼ ar onḍe khon paromkate ale ṭhen hõ aloko hecʼ daṛeakʼ.’

²⁷“Unre kisạ̃ṛ hoṛe menkeda, ‘E baba, enḍekhan dayakate iń babawakʼ oṛakʼte Lasar kolkaeme,

²⁸jemon ińren mõṛẽ goṭen boehae sontor daṛeako; ar baṅ khan onko hõ noa sasetokʼ jaegareko hijukʼa.’

²⁹“Menkhan Abrahame menkeda, ‘Mose ar nạbikoakʼ puthi ma coṅ menakʼge. Onko do onkoakʼ kathako luturakʼ ma.’

³⁰“Uni kisạ̃ṛ hoṛe menkeda, ‘baṅa, E baba Abraham, gocʼko khon jãhãege onko ṭhene calaolen khan onko do kại khon monko ạcurtakoa.’

³¹“Unre Abrahame menkeda, ‘Mose ar nạbikoakʼ katha jãhãe bako ańjom khan enḍekhan gocʼko mod khon jãhãegeye beretʼlenre hõ onko do ohoko pạtiạulena.’ ”