Read Santali Luk 17 Bible Online

Luk 17 - Santali bible

Luk 17

¹Jisu do acʼren celakoe metatʼkoa, “Kại horte idiko lạgitʼ uskạu do hijukʼte hõ hijukʼgea, menkhan hae uni hoṛ do, one okoe hotete ona uskạu hijukʼkan!

²Noko huḍińko modre jãhãege mitʼ goṭen kại horteye idiye enḍekhan uni do hoṭokʼre jante dhiri akawaete doreãore khadle giḍikaege bhage hoyokʼtaea.

³“Men sontorokʼpe. Amren boeha am birudreye kạilere cehaoem. Ar kại khon mone ạcurletae khan uni do ikạkaeme.

⁴Dinre eae dhao am birudreye kại khan ar eae dhaoge hecʼkateye men, ‘kastaokʼ kạnạń,’ enḍekhan uni do ikạkae me.”

⁵Onko gelbar apostolko do Probhuko metadea, “Aleakʼ biswạs baṛe bạ̃ṛti kataleme.”

⁶Probhui menkeda, “Mitʼṭen tuṛi jaṅ inạkʼ pạtiạu tahentape ar noa loa darepe metakʼ, ‘rehetʼ sudhạ todokʼte jalapurire khadlekʼme;’ ar inạtege ona dare do apeakʼ kathae ańjomtapea.

⁷“Ape modre okoe menaea one uni do siokʼ se gupiyicʼ golam menaetae. Ar uni golam maṭ khone hecʼlenre kisạ̃ṛ do cetʼ ‘usạrate jom lạgitʼ duṛubokʼe metaea?’

⁸Onka do baṅa, bickome metaea, ‘jomakʼ tearạńme, ar ạuriń jom ńũi hạbicʼ ḍanḍa paṭhekate sapʼsorạńme. Ar ona tayom do amem joma.’

⁹Ado uni guti oneye hukumade lekae kạmiketʼte kisạ̃ṛ do cetʼ bae sarhaoea?

¹⁰Onkage Isorakʼ hukum leka sanamakʼ kạmi tayom ape do menpe, ‘okạjuạ gutiko kanale; okaṭakʼ kạmi lek tahẽkantale eken inạgele kạmi akada.’ ”

¹¹Ado Jerusalemteko calakʼkan tahẽkanre Jisu do Samariạ ar Gạlil talateye sen paromokʼkan tahẽkana.

¹²Unre mitʼṭen atoteko bolokʼkan tahẽkanre uni do gel goṭen murhucʼ jom rugiye ńel ńamketʼkoa.

¹³Onko do sạṅgińre teṅgokate hohoateko menkeda, “Jisu, Probhu, mãyãwaleme.”

¹⁴Jisu do murhucʼ jom rog hoṛ ńelketʼkoteye metatʼkoa, “Do senkate naekeko ṭhen udugokʼpe.” Ar calakʼ calakʼtege onko doko bogeyena.

¹⁵Ado onko modre mitʼ hoṛ do bogeyene ńelketʼ khan ãṭ aṛaṅte Isor sarhao sarhaoateye ruạṛ hecʼena ar Jisuakʼ jaṅga pheḍre taberenteye gunmanao joharadea.

¹⁶Uni do Samariạ Prodesren hoṛe tahẽkana.

¹⁷Unre Jisui menkeda, “Gel goṭen do cetʼ bako bogelena? Enḍekhan sarecʼ are goṭen doko okayena?

¹⁸Isor gun manao joharae lạgitʼ nui eṭakʼ jạtren chaḍa ar okoe hõ cetʼ bako ruạṛlena?

¹⁹Ona tayom Jisu do uni hoṛe metadea, “Ma beredokʼme ar calao joṅme. Ente pạtiạu akantem bogeyena.”

²⁰Ado Phạrusiko modren adomko do Isorakʼ raj tis hijukʼa menteko kulikedea. Unre Jisui roṛ ruạṛatʼkoa, “Isorakʼ raj hijukʼre jãhãn cinhạ do baṅ ńelokʼa.

²¹Okoe hõ bako mena, ‘Isorakʼ raj do nõkʼõe nonḍe’ se, ‘hane hanḍe,’ ente Isorakʼ raj do aperege menakʼa.”

²²Ona tayom acʼren celakoe metatʼkoa, “Nonkan dinko hijukʼ kana, ape do Manwa Hopon reakʼ mitʼṭen din ńelpe mena, menkhan bape ńelńama.

²³Ar hoṛkoko metapea, ‘hanḍe ńelepe’ se ‘nõkʼõe nonḍe ńelepe.’ Unre bahrete do alope oḍokokʼa se alope pańjakoa.

²⁴Bijli cetʼleka sermare mitʼ nakha khon eṭakʼ nakha hạbicʼ malkaokʼ, onkage Manwa Hopone hijukʼ dinre hõ hoyokʼa.

²⁵Menkhan pạhilre uni do ạḍi utạr duk ar saset jojom hoyokʼtaea. Ona chaḍa noa piṛhiren hoṛko do uniko nihạtea.

²⁶“Noah oktere cetʼleka hoelen onkage Manwa Hopon hijukʼre hõ hoyokʼa.

²⁷Ente Noah do jahajre ạuriye bolokʼ hạbicʼ ar ḍubạ dakʼ hecʼkate sanamko ạuriye maraoko hạbicʼ hoṛko doko jom ńũiyetʼ tahẽkana, bạhu joṅkan tahẽkanako arko jãwãeyokʼkan tahẽkana.

²⁸Loṭ oktere cetʼleka hoelen onkage hoyokʼa. Ona jokhecʼ hoṛko doko jom ńũiyetʼ tahẽkana, kiriń-ạkhrińetʼkan tahẽkanako, cas-basetʼkan tahẽkanako arko oṛakʼ duạretʼkan tahẽkana.

²⁹Menkhan Loṭ Sodom khone oḍok calaoen dinre serma khon seṅgel ar gondhok reakʼ dakʼe jạṛiketʼ khan sanam hoṛkoe ḍahao maraoketʼkoa.

³⁰Oka hilokʼ Manwa Hopone sodorokʼ ona din hõ onkage hoyokʼa.

³¹“Enhilokʼ okoe sạṛim cetanreye tahen uni do jãhãnakʼ hatao lạgitʼ aloe pheḍokʼma. Onkage baṛgere okoeye tahen uni hõ aloe ruạṛ hijukʼma.

³²Loṭren bạhuwakʼ katha disạipe.

³³Jãhãege acʼakʼ jiwi rukhiyạu lạgitʼe kurumuṭui, uni do acʼakʼ jiwiye khuạutaea, ar okoe acʼakʼ jiwiye khuạutae uni do onae bańcaotaea.

³⁴Ińiń metapekana, ona ńindạ mitʼ aṭetʼre bar hoṛkin tahenre; mitʼ hoṛ doe idiocokʼa ar eṭagicʼ doe bạgi oṭokʼa.

³⁵Unre barea maejiu jantekin riritʼre;

³⁶Mitʼ hoṛ doe idiocokʼa ar eṭagicʼ doe bạgi oṭokʼa.”

³⁷Ado celakoko metadea, “Henda Probhu, okare?” Jisui roṛ ruạṛkeda, “Jãhãrege mạ̃ṛĩ onḍege gidi hõko jarwakʼa.”