Read Santali Luk 18 Bible Online

Luk 18 - Santali bible

Luk 18

¹Ado celako sanam ghạṛicʼko koejoṅ ar alo jemonko as chuṭạukʼ onate Jisu do noa phene lạiatʼkoa: “Mitʼ nagrahare mitʼṭen hạkime tahẽkana.

²Uni do Isor bae botoraekan tahẽkana ar hoṛko hõ bae moneyakokan tahẽkana.

³Ona nagrahare mitʼṭen rạnḍi maejiue tahẽkana. Uni do ghane ghạṛicʼ hecʼkateye metaekan tahẽkana, ‘De, hok reakʼ bicạr chinḍạu kạtińme.’

⁴Menkhan hạkim do thoṛa din hạbicʼ cetʼge bae cekawadea. Ado mucạtʼre mone moneteye menkeda, ‘iń do Isor bạń botorae kanre hõ ar manwako bạń moneyako kanre hõ,

⁵enhõ nui rạnḍi maejiu doe ạṛis edeńte hok reakʼ iń bicạrkataea. Ar baṅ khan gahne ghạṛicʼ hecʼkateye ạṛis cabayińạ.’ ”

⁶Noa tayom Probhu do arhõe menkeda, “Uni bedhorom bicạricʼ cetʼe menkeda ona baṛe hudisjoṅpe.

⁷Enḍekhan okoe siń ńindạ Isorko hohoaekan, onko bachao akan acʼren hoṛko lạgitʼ Isor do cetʼ dhorom reakʼ bae bicạra? Uni do cetʼ ona onkae lạgitʼe biloma?

⁸Ińiń metapekana, onkoakʼ dhorom bicạrtako lạgitʼ uni do bae biloma. Menkhan Manwa Hopone hecʼlenre uni do cetʼ dhạrtire biswạse ńamgea?”

⁹Okoe apnarte dhorom menteko hudisokʼkan ar eṭakʼkoko nihạ̃tetʼko onko cetʼako lạgitʼ Jisu do noa kathae lạiatʼkoa:

¹⁰“Barea hoṛ do koejoṅ lạgitʼ mundiltekin rakapʼ calaoena. Unkin modre mitʼ hoṛ do Phạrusi ar eṭagicʼ do mạsul-uṭhạuicʼe tahẽkana.

¹¹Khan uni Phạrusi do teṅgokate acʼ babotre nonkae koekeda, ‘E Isor, gunmanao joharam kạnạń, ente iń do eṭakʼ hoṛko leka luluṭicʼ, bedhoromicʼ, ar laṭghaṭicʼ doń baṅkana, se nui mạsul-uṭhạuicʼ leka hõń baṅkana.

¹²Iń do haptare bar dhaoiń upạsetʼkana ar ińakʼ sanam upjạuakʼ ar rojgarakʼ khon gel hạṭiń reakʼ mitʼ hạṭiń do amiń emamkana.’

¹³Unre uni mạsul-uṭhạuicʼ do thoṛa sạṅgiń ńokʼre teṅgo akane tahẽkana. Uni do serma secʼ beṅgetʼ rakapʼ hõ bae dilleda; ar koṛam ceṭakʼateye menkeda, ‘E Isor, iń doń kại hoṛ kana; ińre mãyãkʼme baṛe.’

¹⁴“Ińiń metapekana, Isor do mạsul-uṭhạuicʼge bin dusi menteye ataṅkedea ar uni do oṛakʼteye ruạṛ calaoena. Menkhan uni Phạrusi doe dusikedea. Okoe acʼteye usulokʼ uni doe copotʼ ocokʼa ar okoeye copotʼ ocokʼ uni doe usul ocokʼa.”

¹⁵Ado kạṭicʼ gidrạko Jisu ṭhenko ạguketʼkoa jemone capoko. Ona ńelte celako do onko hoṛko dhomkaoketʼkoa.

¹⁶Menkhan Jisu do onko gidrạko acʼ ṭhene hohoatʼkoa. Ar inạ tayom do celakoe metatʼkoa, “Gidrạko iń ṭhen hecʼ ocoakope, alope manakoa; ente Isorakʼ raj do nonkankoakʼ kangea.

¹⁷Sạrigeń metapekana, jãhãege kạṭicʼ gidrạko leka Isorakʼ raj bae ataṅ uni do onare ohogeye bolo daṛelena.”

¹⁸Mitʼṭen mukhiyạ hoṛ do Jisui kulikedea, “E Guru, am do mitʼṭen bhage hoṛ kanam. Lạiạńme, cetʼ iń cekalere jaejug jioniń ńamkea?”

¹⁹Jisu do uniye metadea, “Cedakʼ bhage dom mitạń kana? Isor chaḍa ar okoe hõ bhage do bạnukʼkoa.

²⁰Hukumko mam baḍaege, ‘alom laṭghaṭa, alom khũna, alom kombṛoea, eṛe goha alom ema, eṅgam ạpum ganaokinme.’ ”

²¹Uni mukhiyạ hoṛ doe menkeda, “Gidrạ khonge noako joto doń manao ạguakada.”

²²Noa katha ańjomkate Jisu do uniye metadea, “Ńitokʼ hõ mitʼṭen kạmi dom sarecʼ akada. Amakʼ okaṭakʼ menakʼtam onako ạkhrińkate reṅgecʼ orecʼko hạṭińakome, enḍekhan am do sermare dhonem ńama. Ar ona tayom do hecʼkate ińren cela hoyokʼme.”

²³Noa katha ańjomkate mukhiyạ hoṛ do ạḍi ãṭe bhabnayena, ente uni do ạḍi kisạ̃ṛe tahẽkana.

²⁴Ado uni mukhiyạ hoṛ secʼ beṅgetʼkate Jisui menkeda, “Kisạ̃ṛko lạgitʼ Isorakʼ rajte bolokʼ do muskilgea.

²⁵Kisạ̃ṛko Isorakʼ rajte bolokʼ khon, sui bhugạkʼte ũṭe bolo tabokʼge algawa.”

²⁶Jisuakʼ noa katha okoekoko ańjomketʼ onko doko menkeda, “Enḍekhan kại khon do okoeye bańcao daṛekokʼa?”

²⁷Jisui menkeda, “Manwako ṭhen oka leṭejokʼakʼ baṅ kan Isor ṭhen ona do leṭejokʼakʼ kangea.”

²⁸Unre Patrase menkeda, “Ale ma sanamakʼ bạgikate amren celale hoeakan.”

²⁹Jisu do onkoe metatʼkoa, “Sạrigeń metapekana, okoe Isorakʼ raj iạte oṛakʼ-duạr, bạhu, boeha-misera, eṅgat-apat se gidrạkoko bạgi oṭo akatʼko,

³⁰onko mimitʼko do noa piṛhire hõ ḍherko ńama ar darakan piṛhirehõ jaejug jionko hameṭ joṅa.”

³¹Jisu do acʼren gelbar celako mitʼ secʼe hohoatʼkoteye metatʼkoa, “Ńelpe, Jerusalemte bon calakʼ kana. Ar Manwa Hopon reaṅ nạbiko okaṭakʼko ol oṭoakatʼ ona do sanamakʼge purạukʼa.

³²Uni do boṅgan hoṛkoakʼ tireko soprotea. Ar hoṛko do uniko siṛogaea arko bemanotea arko thoaea.

³³Arko cạbukete uni doko gojea, ar pe mãhã hilokʼre uni doe jiwetʼ beredokʼa.”

³⁴Menkhan celako do noako reaṅ cetʼge bako bujhạu daṛeada. Ente ona katha reakʼ bhed onko khon danaṅre tahẽyente Jisu okae roṛketʼ ona do bako bujhạuleda.

³⁵Jisu Jerikho nagrahae seṭerokʼkan tahẽkanre mitʼṭen kãṛã hoṛ do hor aṛere duṛupʼkateye kokoekan tahẽkana.

³⁶Ar gadel hoṛko parom calakʼkan reakʼ saḍeye ańjomketʼ khan cetʼ hoyokʼ kana menteye kuliyana.

³⁷Adoko lạiadea, Nasaretren Jisu noa horteye paromokʼ kana.

³⁸Unre uni do ãṭ aṛaṅte hohoateye menkeda, “E Jisu Dạudren hopon, mãyãwạńme.”

³⁹Ado okoeko hoṛ laha lahateko calakʼkan tahẽkan onko doko dhomkaokedete thir hapekʼko metadea. Menkhan uni do artetʼ ãṭ aṛaṅte hohoateye menkeda, “E Dạudren hopon, mãyãwạńme baṛe.”

⁴⁰Jisu doe teṅgoyena ar uni kãṛã hoṛ acʼ ṭhen ạguye lạgitʼe metatʼkoa. Are hecʼen khane metadea,

⁴¹“Cetʼem khojkana? Am lạgitʼ do cetʼ iń cekaea?” Uni doe menkeda, “E Probhu, jemoniń ńeńel.”

⁴²Jisu do uniye metadea, “Onkage hoyokʼma. Am do amakʼ biswạsgeye bogeketʼmea.”

⁴³Ar unrege uni hoṛ do ńeńele ehopʼena ar Isor sarhao sarhaoate Jisui pańjakedea. Ar noa ńelte gadel hoṛ hõ Isorko sarhaokedea.