Read Santali Luk 19 Bible Online

Luk 19 - Santali bible

Luk 19

¹Jisu do Jerikho nagraha talateye parom calakʼkan tahẽkana.

²Ar ńelpe, Sakhae ńutuman mitʼṭen hoṛ onḍeye tahẽkana. Uni do maraṅ mạsul-uṭhạuicʼ ar mitʼṭen kisạ̃ṛ hoṛe tahẽkana.

³Ar Jisu okoeṭakʼ kanae mente ńele lạgitʼe kurumuṭukan tahẽkana, menkhan geḍrageye tahẽkante bhiṛ iạte uni do bae ńel ńam daṛeaekan tahẽkana.

⁴Onate uni do Jisu ńele lạgitʼ samaṅ secʼe ńir lahayente mitʼṭen loa darereye decʼena, ente Jisu do ona hortegeye parom calakʼkan tahẽkana.

⁵Ado Jisu ona loa dare ṭhene seṭeren khan cetan secʼe beṅgetʼ rakapʼkeda ar Sakhaeye metadea, “E Sakhae, ma usạra pheḍ hijukʼme, ente teheń do amakʼ oṛakʼre tahen hoyokʼtińạ.”

⁶Unre Sakhae do usạrateye pheḍena ar rạskạ salakʼ Jisui ataṅkedea.

⁷Ar ona ńelte sanamkoge karacʼ kurujokʼko ehopʼena arko menkeda, “Uni do mitʼṭen kại hoṛ ṭhen peṛakʼ lạgitʼe calakʼ kana.”

⁸Ar Sakhae do onḍege teṅgokate Probhui metadea, “E Probhu, ińakʼ dhon-durib reakʼ adha do reṅgecʼ orecʼkoń emako kana ar jãhãegeń ṭhoka akatʼko khan enḍekhan ona reakʼ pon dobṛań ruạṛkatako kana.”

⁹Unre Jisui menkeda, “Teheń do noa gharońjre bańcao hoeakana, ente nui hõ Abraham bõsren hoṛ kanae.”

¹⁰Ente atʼakan ńamko ar bańcaoko lạgitʼge Manwa Hopon doe hecʼakana.”

¹¹Jisu okareye tahẽkan onḍe khon Jerusalem do ḍher sạṅgiń baṅ tahẽkana, ar okoe uniakʼ kathako ańjometʼkan tahekan onko doko hudisetʼkan tahẽkana Isorakʼ raj do ne nahakʼ sodorokʼ kana. Onate Jisu do cetʼako lạgitʼ noae lạiatʼkoa:

¹²“Mitʼṭen maraṅ bõsren hoṛ do raj hudạwanteye ruạṛ hijukʼa mente sạṅgiń disạmteye calaoena.

¹³Ado calakʼ lahare acʼren gel goṭen gutikoe hohoatʼkoa ar mimitʼ hoṛ mitʼ sae Dinarkate ematʼkoteye metatʼkoa, ‘iń ạuriń ruạṛ hijukʼ hạbicʼ noate bạnij bepar hataṛpe.’

¹⁴“Menkhan acʼakʼ disạmren hoṛko do uniko kurudaekan tahẽkana. Onate onko do uni tayomte hoṛ kolkateko roṛgotʼkada, ‘nui hoṛ ale cetanreye rajokʼ do bale khojkana.’

¹⁵“Enrehõ uni do raj hoekateye ruạṛ hecʼena ar okoeko ṭakae ematʼko tahẽkan onko gel goṭen guti do hoho ạguko lạgitʼe hukumkeda. Ar okoe tinạkʼko lab akada mente baḍae sanakedea.

¹⁶Ado pạhilicʼ hecʼkateye menkeda, ‘E Probhu, amakʼ ṭakate iń do arhõ gel doboṛiń lab akada.’

¹⁷“Raj do uniye metadea, ‘bes akadam. Am do bhage guti kanam. Ar thoṛawakʼkore pạtiạrem tahẽkante gel goṭen nagraha reakʼ dạyikiń emamkana.’

¹⁸“Dosaricʼ hõ hecʼkateye menkeda, ‘E Probhu, amakʼ ṭakate iń do arhõ mõṛẽ doboṛiń lab akada.’

¹⁹“Uni gutiye metadea, ‘am hõ mõṛẽ goṭen ato reakʼ bharem ńama.’

²⁰Ado ona tayom ar mitʼṭen guti hecʼkateye menkeda, ‘E Probhu, amakʼ ṭaka do gamchareń moṭra doho akatʼ tahẽkana.

²¹Am babotre botor tahẽkantińạ ente am do ạḍi kuṭhin hoṛ kanam; ente oka bam dohoakatʼ onam hataoeda ar oka bam erletʼ onam iretʼa.’

²²“Unre raje menkeda, ‘Eya bạṛicʼ golam! Amakʼ moca reakʼ kathatege am doń bicạrmea. Am mam baḍaekan tahẽkange, iń doń kuṭhin hoṛ kana; okaṭakʼ bạń dohoakatʼ onań hataoeda ar okaṭakʼ bạń erletʼ onań ireda.

²³Enḍekhan ińakʼ ṭaka do mahajon ṭhen cedakʼ bam bạisạukada? Enḍekhan iń do hecʼkate ṭaka hõń ńamkea ar soṅgete sud hõń ńamkea.’

²⁴“Khange raj do acʼ ṭhen teṅgo akan hoṛkoe metatʼkoa, ‘uni ṭhen khon ona mitʼ sae Dinar hataope ar okoeakʼ mitʼ hajar Dinar menakʼtae uni emaepe.’

²⁵“Unre onko hoṛ do rajko metadea, ‘E Probhu, uniakʼ ma coṅ mitʼ hajar Dinar menakʼtaege.’

²⁶Raje menkeda, ‘ińiń metapekana, okoeakʼ menakʼtae uni do arhõe em ocokʼa, menkhan okoeakʼ bạnukʼtae uni do oka menakʼtae ona hõe recʼocokʼa.

²⁷Ińren bạiriko one okoe ińakʼ raj reakʼ bako khojkan, onko do nonḍe ạgukope ar iń samaṅre gocʼ giḍikakope.’ ”

²⁸Ado noako menkate Jisu do onko laha lahate Jerusalemteye calao idiyena.

²⁹Ar Jạitun buru ṭhenakʼ Bethaphage ar Bethaniạ nagraha sore hecʼen khan acʼren barea cela noa menkateye kolketʼkinạ,

³⁰“Samaṅ senakʼ atote calakʼben. Ar onḍe bolokʼ jokhecʼ mitʼṭen gadha hopon tolakade ben ńamea. Uni cetanre okoe hoṛ hõ tisge bako decʼakana. Aben do raṛakate nonḍe bene ạguyea.

³¹Ar jãhãye kuliben khan, ‘cedakʼ ben raṛayedea?’ Enḍekhan men ben, ‘Probhu do nui reakʼ jạruṛ menakʼtaea.’ ”

³²Ado okoe celakin kol ocolen unkin do senkate Jisuakʼ katha lekagekin ńamkedea.

³³Arkin raṛayedekan tahẽkanre kisạ̃ṛ do unkine kuliketʼkinạ, “Gadha hopon do cedakʼben raṛayede kana?”

³⁴Unkin dokin menkeda, “Probhu do nui reakʼ jạruṛ menakʼtaea.”

³⁵Ona tayom unkin cela do gadha hopon Jisu ṭhenkin ạgukedea ar unire ạkinakʼ oyonakʼ kin palanketʼte onare Jisukin decʼkedea.

³⁶Ar uniye calakʼkan tahẽkan jokhecʼ gadel hoṛko do akoakʼ kicricʼko hor horteko aṭetʼ idikeda.

³⁷Ado Jerusalem sor reakʼ okaṭakʼ hor do Joitun buru khon pheḍ hecʼakan ona soṛokreye seṭerena. Ar uni sãote uniren ạḍi utạr celako tahẽkana. Onko do uniakʼ hahaṛa kạmiko ńelletʼte rạskạte ãṭ aṛaṅte Isor sarhaoete memenko ehopʼena,

³⁸“Bhorangeae Probhu ńutumte daraekanicʼ raj do; sermare suluk ar coṭ utạrkore ṭhonok.”

³⁹Unre gadelko modren adom Phạrusiko do Jisuko metadea, “E Guru, amren celako thirokʼ metakom.”

⁴⁰Jisu do onkoe metatʼkoa, “Ińiń metapekana, noko thirko tahen khan enḍekhan dhirikoko hohoya.”

⁴¹Ado Jerusalem ṭhenko hecʼen khan Jisu do nagraha ńelteye rakʼkeda.

⁴²Uniye menkeda, “Hae, suluk ńam lạgitʼ oka jạruṛ ona baṛe teheńem baḍaele khan honaṅ! Menkhan ńitokʼ ona do amakʼ mẽtʼãhã khon danaṅ akana.

⁴³Nonkan okte hijukʼkana amren bạiri do am birudreko teṅgona arko gherao ạcurmea ar sanam secʼ khonko cipạmea.

⁴⁴Onko do am ar amre menakʼko sanam hoṛ sapʼkate otreko tawakʼkoa ar amre dhiri cetan dhiri hõ bako dohoea, ente Isore hiriletʼme okte do bam baḍae oromlakʼa.”

⁴⁵Ona tayom Jisu do mundilre bolokate kiriń-ạkhrińkoe laga oḍokketʼkoa.

⁴⁶Uni do beparikoe metatʼkoa, “Sonot sostorre ol menakʼa, ‘ińakʼ oṛakʼ do koejoṅ oṛakʼ hoyokʼa,’ menkhan ape do ḍạkukoakʼ danderpe benao akada.”

⁴⁷Jisu do dinạm hilokʼ mundilre senkate cetʼakoe ehopʼena. Ar Maraṅ naekeko, sostor baḍaeko ar disạm hoṛkoren mukhiyạko do goje lạgitʼ ạtko ńam baṛayetʼ tahẽkana,

⁴⁸menkhan cetʼlekateko cekaea ona reakʼ jãhãn upạige bako ńam totʼ daṛeada, ente hoṛko do mon lagaokate uniakʼ kathako ańjometʼ tahẽkana.