Read Santali Luk 20 Bible Online

Luk 20 - Santali bible

Luk 20

¹Mitʼ din Jisu do mundilre hoṛkoe cetʼakokan are porcarako kan tahẽkana.

²Unre maraṅ naekeko, sostor baḍaeko ar murubiko do hecʼkate Jisuko metadea, “Lạialeme, oka ektiạrite noakom kạmi kana, ar okoe noa ektiạri doe emakatʼmea?”

³Jisui roṛ ruạṛatʼkoa, “Iń hõ mitʼṭen kathań kulipea. Mase lạiạńpe,

⁴Oka khon Johan do bạptisma emokʼ reakʼ ektiạriye ńamleda, serma secʼ khon se manwako secʼ khon?”

⁵Unre onko do ako akore galmaraoanteko menana, “Menle khan bon, ‘Isor secʼ khon,’ enḍekhane metabona, ‘tobe cedakʼ uni do bape pạtiạuadea?’

⁶Ar bon menle khan, ‘manwa secʼ khon,’ enḍekhan disạm hoṛko dhiriteko tińbona, ente Johan do nạbi kanae menteko khạṭi akawana.”

⁷Onate onko doko menkeda, “Ale do bale baḍaea oka khon ona ektiạriye ńamleda.”

⁸Jisui metatʼkoa, “Enḍekhan iń hõ bạń lại apea oka ektiạrite noakoń kạmi kana mente.”

⁹Ona tayom Jisu do disom hoṛko cetʼako lạgitʼ noae lạiatʼkoa: “Mitʼ hoṛ do mitʼṭen darkha bagwane benaokeda ar casako ṭhen bạisạu oṭokate ḍher din lạgitʼ eṭakʼ disạmteye calaoena.

¹⁰Ado okte hoyen khan uni do darkha jo reakʼ bhag hatao lạgitʼ casako ṭhen mitʼṭen golame kolkedea. Menkhan casako do uniko dalkedea ar eken tiko kol ruạṛkadea.

¹¹Unre uni do ar mitʼṭen golame kolkedea, menkhan casako do uni hõko dalkedea arko bemanot kedete eken tiko kolgotʼkadea.

¹²Tayomte uni do tesaricʼ golame kolkedea, menkhan casako do uni hõ ạḍi bạṛicʼko dalkedea arko laga oḍokkedea.

¹³“Unre darkha bagwanren kisạ̃ṛe menkeda, ‘cetʼ iń cekaea? Iń do ińren sadher hopongeń kolea. Hoedaṛeakʼa onko do uniko manotea.’

¹⁴“Menkhan casako do uniko ńelkede khan ako akoreko menana, ‘nuige nahakʼ sompottiren mạlik doe hoyokʼa. Onate delabon gojea, jemon aboge onaren ạidạriko bon hoyokʼ.’

¹⁵Noa menkate uniko sapʼkedea ar bagwan bahrete idikateko gocʼkedea. “Ńitokʼ darkha bagwanren kisạ̃ṛ do onko casakoe cekakoa?

¹⁶Uni do hecʼkate onkoe gocʼkoa ar bagwan do eṭakʼko ṭhene bạisạu oṭokakʼa.” Hoṛko do Jisuakʼ noa katha ańjomkateko menkeda, “Nonka do alo baṛe hoyokʼ ma.”

¹⁷Unre Jisu do onko secʼ beṅgetʼkateye menkeda, “Enḍekhan sonot sostorre noa katha olakan reakʼ mane do cetʼkana, ‘raj mistiriko okaṭakʼ dhiriko bad giḍiletʼ tahẽkan, onage konac reakʼ asol dhiri hoyena.’

¹⁸Ar jãhãege ona dhiri cetanreye ńurokʼ uni doe gejerokʼa ar okoe cetanre ona dhiri ńurokʼ uni doe holoṅ ḍigir utạrokʼa.”

¹⁹Unre sostor baḍaeko ar maraṅ naekeko do Jisu sabeko menwana, enteko bujhạu daṛeada, Jisu do ako birudrege noako kathae roṛetʼ kana; menkhan onko do hoṛkoko botoratʼkoa.

²⁰Sostor baḍaeko ar maraṅ naekeko do Jisu akoakʼ nojorreko dohokedea ar guptocorko kolketʼkoa. Onko guptocor do Jisu acʼakʼ kathate jhạliye lạgitʼ dhorom hoṛ leka udugokʼko ehopʼena, jemon onko do disạm cakʼlaoicʼ gobolreko soprot daṛeae.

²¹Onateko metadea, “E Guru, alele baḍaea am do ṭhik ṭhikem roṛeda arem cetʼako kana. Ar okoeakʼ mẽtʼãhã hõ bam beṅgetʼakʼ kana ar Isorakʼ hor reaṅ sạri sạriakʼgem cetʼakokana.

²²Ado Moseakʼ ạn lekate Romren maharaj do cetʼ khajna emae lek gea?”

²³Jisu do onkoakʼ phundi baḍaeketʼteye metatʼkoa,

²⁴“Mitʼṭen Dinar udukʼạńpe. Noare okoeakʼ muṭhạn ar okoeakʼ ńutum ol menakʼa?” Onkoko menkeda, “Romren maharajakʼ.”

²⁵Adoe metatʼkoa, “Enḍekhan okaṭakʼ maharajakʼkan ona do maharajge emkataepe ar okaṭakʼ Isorakʼkan ona do Isorge emaepe.”

²⁶Hoṛko samaṅre Jisu okae menketʼ onate onko guptocor do bako jhạli daṛeadea. Ar uniakʼ roṛ ruạṛteko hahaṛayente hapegeko tahẽyena.

²⁷Sạdukiko modren adomko do Jisu ṭhenko hecʼena. Sạdukiko ṭhen do gocʼkoakʼ jiwetʼ beredokʼ reakʼ do cetʼge bạnukʼa. Onate onko do Jisuko kulikedea,

²⁸“E Guru, Mose do noae ol oṭoakatʼ bona, begor gidrạwante jãhãe acʼren bạhui gocʼ bạgi oṭoae khan, enḍekhan bokottetʼ do uniren bạhui baplayema ar dadattetʼ lạgitʼ bõse teṅgokoma.

²⁹Ado eae boehako tahẽkana. Ar pạhilicʼ do baplakate begor gidrạwanteye gocʼena.

³⁰Tayomte dosaricʼ ar tesaricʼ boeha hõ uni rạnḍi maejiukin baplakedea,

³¹ar onkaleka eae boehage begor gidrạwanteko gocʼena.

³²Ado mucạtʼre uni maejiu hõe gocʼena.

³³Enḍekhan gocʼkoko jiwetʼ beredokʼre uni do okoeṭakʼren bạhui hoyokʼa? Ente eae boehage coṅ uni mako baplalede.”

³⁴Jisu do onkoe metatʼkoa, “Niạ jugren hoṛko doko bạhujoṅ kana arko jãwãyokʼ kana.

³⁵Menkhan gocʼko khon beretʼkate darakan jugre parom calakʼ lạgitʼ lek kanako menteko lekhakʼte onko do bạhu hõ bako bạhu joṅa ar jãwãe hõ bako jãwãyokʼa.

³⁶Onko do ar bako gujukʼa, ente onko do serma goḍet lekako hoyokʼa. Onko do Isoren hoponko hoyokʼa ente gocʼko khonko jiwetʼ beretʼ ocoakana.

³⁷Jolokʼkan jhạwạ reaṅ okare olakan onḍe Moseye sodorakatʼa, gocʼko do sạrigeko jiwetʼ beredokʼa. Onḍe Mose do Probhuge, ‘Abrahamren Isor, Isạhakren Isor, ar Jakobren Isor’ menteye hohoaekana.

³⁸Menkhan Isor do gocʼkoren Isor doe baṅkana, uni do jiwetʼkoren Isorge. Uni lạgitʼge sanam hoṛ do jiwetʼko tahena.”

³⁹Unre adom sostor baḍaeko doko menkeda, “E Guru, am do bhagegem menakada.”

⁴⁰Onko do jãhãnakʼge Jisu kuliye ar bako dilleda.

⁴¹Jisu do onko sostor baḍaekoe metatʼkoa, “Hoṛko do cekateko meneda, Mạsi do Dạud bõsren kanae?

⁴²Sonot sostorre sereńko reakʼ puthire Dạud ma acʼge coṅ noa kathae menakatʼ, ‘Probhu do ińren Probhui metadea, tin hạbicʼ amren bạiriko amakʼ jaṅga latarre bạń dohoko, un hạbicʼ ińakʼ jojomsa aṛere duṛupʼme.’

⁴³

⁴⁴Dạud ma Mạsige Probhu menteye hohoade tahẽkan; enḍekhan cekate Mạsi do Dạudren hopone hoedaṛekokʼa?”

⁴⁵Ado sanam hoṛ uniakʼ kathako ańjometʼkan tahẽkanre Jisu do acʼren celakoe metatʼkoa,

⁴⁶sostor baḍaeko khon sontor akae tahenpe. Onko do jhạl jhạl aṅgrop horokʼkate dãṛã bãṛãe ar hạṭiạ bajarkore johar ocokʼko kusiyakʼa. Onko do sunạgogkore laha duṛupʼakʼ ar bhojre laha jaegako kusiyakʼ kana.

⁴⁷Hoṛko ṭhen ńel ocokʼ lạgitʼ onko do jeleń jeleńko koejoṅa, ar eṭakʼ secʼ do rạnḍi maejiukoakʼ dhonko luṭ joṅkana. Noko hoṛ do ạḍi bạ̃ṛti sạjạyokʼ hukumko ńama.”