Read Santali Luk 3 Bible Online

Luk 3 - Santali bible

Luk 3

¹Romren moharaj Tiberius Kạisạre rajokʼkan gel mõṛẽakʼ bochorre Pontus Pilạt do Jihudạren disạm cakʼlaoicʼe tahẽkana. Unre Herod do Gạlilre ar uniren boeha Philip do Jituriạ ar Trakhonitis disạme calaoetʼ tahẽkana. Ar Lusanius do Abileneren disạm cakʼlaoicʼe tahẽkana,

²ar Hannas ar Kaeapha do Jihudikoren maraṅ naekekin tahẽkana. Ona oktere Isor do hahaṅkar jaegare Sakariạ hopon Johan ṭhen acʼakʼ kathae sodorkeda.

³Unre Johan do Jordan gaḍa beṛhaeteakʼ sanam jaegakore senkate porcare ehopʼena jemon hoṛko kại khon monko ạcurte ikạko ńam, ar ona reakʼ cinhạ lekate bạptismako ataṅ.

⁴Jesaea nạbi reakʼ puthire olakan leka, “Hahaṅkarre mitʼṭen hohokạnicʼ reakʼ aṛaṅ, ‘Probhuakʼ hor tear kataepe, uniakʼ suṛucʼ horko sojhe kataepe.

⁵Sanam buru nala bhataokʼa ḍuṅgriko copodokʼa. Konḍeawakʼko sojhekʼa, ar khõedakʼ lopakʼakʼ hor do somanokʼa.

⁶Manwako kại khon bańcaoko lạgitʼ Isor okae ceka akatʼ, ona do sanam hoṛko ńel ńama.’ ”

⁷Unre bạptisokʼ lạgitʼ ạḍi utạr hoṛ do Johan ṭhen hijukʼko ehopʼena. Uniye metatʼkoa, “E biń bõsrenko! Isorakʼ sạjại khon ńir pharakokʼ lạgitʼ do okoeye cetaoketʼpea?

⁸Ar mon jepe ạcurakatʼ ona reakʼ lek leka jo apeakʼ jionre udugtape. Ar Abrahamren bõs kanape mente alope hudisa. Sạrigeń metapekana, Isor do noako dhiri khon Abrahamren bõskoe tear daṛeakoa.

⁹Dare gonḍarege ṭeṅgocʼ do ṭenḍar dohoakana. Oka dare bhage baṅ jokʼ ona do makʼ giḍikʼte seṅgelre khadle ocokʼa.”

¹⁰Unre hoṛko do Johanko kulikedea, “Enḍe khan ale do cetʼle cekaea?”

¹¹Metatʼkoae, “Jãhãeakʼ barea aṅgrop menakʼtae khan, uni do bạnukʼtaeicʼe hạṭińaema. Ar jomakʼ menakʼtaeicʼ hõe onkaema.”

¹²Ado mạsul uṭhạuko bạptisokʼ lạgitʼko hecʼen khan Johanko metadea, “Guru, ale do cetʼle cekaea?”

¹³Uni doe metatʼkoa, “Ạnre oka menakʼ ona khon bạ̃ṛti alope uṭhạua.”

¹⁴Ar palṭonko hõko kulikedea, “Ale do cetʼle cekaea?” Uni doe metatʼkoa, “Jor julumkate se behok lekate dusikate okoe ṭhen khon hõ cetʼge alope hataoa ar apeakʼ kuṛạirege kusi tahenpe.”

¹⁵Hoṛko do ạḍi askate mone monete Johange Jisu kanae menteko hudisedekan tahẽkana.

¹⁶Unre Johan do sanamkoe metatʼkoa, “Iń do dakʼteń bạptisetʼpea, menkhan okoe iń khone daṛegea uni doe darae kana. Iń do uniakʼ panahi reakʼ phitạ raṛaetae lek geń baṅkana. Uni do sonot Jiu ar seṅgelteye bạptispea.

¹⁷Uniakʼ haṭakʼ do tirege menakʼtaea; onate khạrạiye saphaea ar phosol do golareye doho jarwaea, menkhan peṭecʼ do baṅ iṛijokʼ seṅgelreye atar giḍikakʼa.”

¹⁸Johan do arhõ ạḍi utạr sikhạunakote hoṛkoakʼ monre udgạue emakote Isorakʼ bhage sombate porcar akokan tahẽkana.

¹⁹Disạm cakʼlaoicʼ Herod ar bokottetʼren bạhu Herodiạwakʼ bin ganokʼ dulạṛ ar bạṛicʼ kạmiko iạte Johan do uniakʼ doskoe udukʼade tahẽkana.

²⁰Onate uni do hajotre Johane bhorao akade tahẽkana. Ar noate uniakʼ eṭakʼ bạṛicʼ kạmiko sãote noa bạṛicʼ kạmi hõ juṭicʼentaea.

²¹Ado okoeko hoṛ Johan ṭhenko hecʼakan tahẽkan onko bạptismako ataṅetʼ tahẽkanre Jisu hõe bạptis ocoyena. Bạptisma tayom Jisu do tinreye koejoṅkan tahẽkana unre serma do jhicʼena.

²²Ar sonot Jiu do parwa leka uni cetanreye pheḍ hecʼena, ar serma khon noa katha ańjomena, “Amge ińren dulạṛiạ Hopon, iń do amreń kusi akana.”

²³Jisu do pegel serma gan umer tahẽkanre acʼakʼ kạmiye ehopʼkeda. Hoṛko bujhạure uni do Josephren hopone tahẽkana. Joseph do Eliren hopone tahẽkana;

²⁴Eli do Mathatren hopon, Mathat do Lewiren hopon, Lewi do Melkiren hopon, Melki do Jannaeren hopon, Jannae do Josephren hopon;

²⁵Joseph do Matathiạren hopon, Matathiạ do Amosren hopon, Amos do Nạhumren hopon, Nạhum do Esliren hopon, Esli do Nạggạiren hopon;

²⁶Nạggại do Mahatren hopon, Mahat do Matathiạren hopon, Matathiạ do Simạiren hopon, Simại do Josekren hopon, Josek do Jodaren hopon;

²⁷Joda do Johananren hopon, Johanan do Resaren hopon, Resa do Serubabelren hopon, Serubabel do Sealtielren hopon, Sealtiel do Neriren hopon;

²⁸Neri do Melkiren hopon, Melki do Addiren hopon, Addi do Kosamren hopon, Kosam do Elmadamren hopon, Elmadam do Erren hopon;

²⁹Err do Jisuren hopon, Jisu do Elieserren hopon, Elieser do Jorimren hopon, Jorim do Mathatren hopon, Mathat do Lewiren hopon;

³⁰Lewi do Simeonren hopon, Simeon do Jihudạren hopon, Jihudạ do Josephren hopon, Joseph do Jonamren hopon, Jonam do Eliạkimren hopon;

³¹Eliạkim do Melearen hopon, Melea do Mennaren hopon, Menna do Mathatharen hopon, Mathatha do Nathanren hopon, Nathan do Dạudren hopon;

³²Dạud do Jisạiren hopon, Jisại do Obedren hopon, Obed do Boasren hopon, Boas do Solmonren hopon, Solmon do Nahasonren hopon;

³³Nahason do Aminadabren hopon, Aminadab do Adminren hopon, Admin do Arniren hopon, Arnido Hesromren hopon, Hesrom do Pharesren hopon, Phares do Jihudạren hopon;

³⁴Jihudạ do Jakobren hopon, Jakob do Isahakren hopon, Isahak do Abrahamren hopon, Abraham do Thararen hopon, Thara do Nahorren hopon;

³⁵Nahor do Serugren hopon, Serug do Rạgạuren hopon, Rạgạu do Phalegren hopon, Phaleg do Eberren hopon, Eber do Sạlaren hopon;

³⁶Sạla do Kenanren hopon, Kenan do Arpaksadren hopon, Arpaksad do Semren hopon, Sem do Noahren hopon, Noah do Lamekren hopon;

³⁷Lamek do Mạthusalaren hopon, Mạthusala do Enokren hopon, Enok do Jaredren hopon, Jared do Mahalalelren hopon, Mahalalel do Kenanren hopon;

³⁸Kenan do Enosren hopon, Enos do Sethren hopon, Seth do Adamren hopon, Ar Adam do Isorren hopon.