Read Santali Luk 9 Bible Online

Luk 9 - Santali bible

Luk 9

¹Niạ tayom Jisu do gelbar celako mitʼ ṭhene hoho jarwaketʼkoa ar sanam bhutko cetanre ektiạriye ematʼkoa. Ar rugiko bogeko reakʼ daṛe hõe danatʼkoa.

²Ona tayom Isorakʼ raj porcar ar rugiko bogeko lạgitʼe kolketʼkoa.

³Uni doe metatʼkoa, “Horte lạgitʼ ṭheṅga, khuti, piṭhạ se ṭaka cetʼge alope iditora joṅa, ar babar goṭen aṅgrop hõ alo.

⁴Ar jãhãṭakʼ oṛakʼregepe bolokʼ onḍegepe tahena ona ato ạuripe bạgiyakʼ hạbicʼ.

⁵Ar hoṛko bako ataṅpe khan, enḍekhan onkoakʼ ato khonpe oḍokʼ hijukʼre apeakʼ jaṅga reakʼ dhuṛi hõ koṭa giḍi oṭokakʼpe, jemon onage onko birudre gohae teṅgokʼ.”

⁶Unre celako do ato ato dãṛãkate Isorakʼ raj reakʼ bhage sombat porcar ar rugiko bogekoko ehopʼena.

⁷Ado Jisui kạmi akatʼakʼko reaṅ ańjomkate disạm cakʼlaoicʼ Herod do cetʼge bae bujhạu daṛeakʼkan tahẽkana. Ente adom hoṛko menetʼ tahẽkana, Johan bạbạptisicʼge gocʼko khone jiwetʼ beretʼ akana;

⁸arhõ adomko doko menetʼ tahẽkana, Eliại sodor akana; arhõ adomko doko menetʼ tahẽkana, ḍher din laharen mitʼṭen nạbigeye jiwetʼ beretʼ akana.

⁹Herode menkeda, “Johanakʼ bohokʼ mań makʼ ńur ocoakatʼtae. Enḍekhan okoe reaṅ iń ańjometʼkan, uni doe okoe kana?” Ar Herod do Jisu ńele reakʼ kurumuṭui ehopʼena.

¹⁰Ado oneye kolletʼko celakoko ruạṛ hecʼen khan cetʼ cetʼko kạmiketʼ ona joto do Jisuko lạiadea. Unre Jisu doe soṅgeketʼkote Bethsaeda sor mitʼṭen nisun jaegateye senena.

¹¹Menkhan gadel hoṛ do ona khoborko baḍaeketʼ khan Jisuko pańjakedea. Uni do onko hoṛkoe ataṅketʼkote Isorakʼ raj reakʼe lạiatʼkoa. Ona chaḍa okoekoakʼ boge ocokʼ reakʼ jạruṛ tahẽkan onkoe bogeketʼkoa.

¹²Ado ber hạsurokʼkan tahẽkan jokhecʼ onko gelbar celako do Jisu ṭhen hecʼkateko menkeda, “Abo okare menakʼ bon noa do mitʼṭen nisun jaegakana. Onate gadel hoṛko bidạkakome jemon onko do sor reakʼ ato ar nagrahate senkate jom ar tahen lạgitʼ jaegako sendra ńam daṛeakʼ.”

¹³Jisui metatʼkoa, “Onko do apege jomakʼ emakope.” Adoko metadea, “Ale ṭhen do eken mõṛẽ goṭen piṭhạ ar barea hako chaḍa ar cetʼge bạnukʼa. Menkhan ale do senkate jomakʼle kiriń ạgule anecʼle jom oco daṛeakoa.”

¹⁴Onḍe do mõṛẽ hajar gan herel hoponko tahẽkana. Jisu do acʼren celakoe metatʼkoa, “Mimitʼ dolre mõṛẽgel mõṛẽgelkate pantete duṛupʼ ocokope.”

¹⁵Ado onkage celako do sanam hoṛko duṛupʼ ocoketʼkoa.

¹⁶Ar Jisu do ona mõṛẽ goṭen piṭhạ ar barea hako ataṅkate serma secʼ beṅgetʼ rakapʼkateye bhorada are kecakʼkeda. Ona tayom gadel hoṛko emako lạgitʼ celakoakʼ tireye calatʼkoa.

¹⁷Ar sanam hoṛko jomkeda arko biyena. Ar okako kecakʼ hiricʼ pạsir ńur tahẽkan onate celako do gelbar phạtiạkʼko halaṅ jarwakeda.

¹⁸Mitʼ dhao Jisu do mitʼṭen nisun jaegareye koejoṅkan tahẽkana. Unre uni soṅgete eken acʼren cela motogeko tahẽkana. Adoe kuliketʼkoa, “Iń doń okoe kana, ar noa reaṅ hoṛko do cetʼko meneda?”

¹⁹Celakoko metadea, “Adomko doko meneda am dom Johan bạbạptisicʼ kana; ar adomko doko meneda Eliạ kanam; arhõ adomko doko meneda sedaeren mitʼṭen nạbigeye jiwetʼ beretʼ akana.”

²⁰Jisui metatʼkoa, “Menkhan ape do okoe kạnạń mentepe meneda?” Patrase menkeda, “Am do Isorren uni Mạsi kanam.”

²¹Unre Jisu doe sontorkatʼkoa are hukumatʼkoa, okoe ṭhen hõ jemon noa katha aloko lại baṛae.

²²Uni do arhõe metatʼkoa, Manwa Hopon do aema duk jojom hoyokʼtaea. Ar murubiko, maraṅ naekeko ar sostor baḍaeko do uniko nihạtea. Are gocʼ ocokʼa ar pe din hilokʼre gocʼko khon jiwetʼ beredokʼ hoyokʼtaea.

²³Ona tayom sanamkoe metatʼkoa, “Jãhãege ińakʼ horte hijukʼe menetʼ khan uni do acʼakʼ kusileka aloe calakʼma; ar dinạmge acʼakʼ krus gokʼkate ińe pańjańma.

²⁴Jãhãe acʼ lạgitʼ bańcao tahene menetʼ khan uni do acʼakʼ jiwiye khuạutaea; menkhan okoe iń lạgitʼ acʼakʼ jiwiye khuạutae, uni do onae bańcaotaea.

²⁵Ar jãhãege goṭa dhạrtiye lab iạte acʼakʼ jiwiye khuạutae enḍekhan uniakʼ do cetʼ porho hoyokʼtaea?

²⁶Jãhãege iń ar ińakʼ katha iạteye lajaokʼ khan, Manwa Hopon hõ tinre acʼ ar acʼren Apatakʼ ar sonot goḍetkoakʼ ṭhonokanteye hijukʼa unre acʼ hõ uni hoṛ iạteye lajaokʼa.

²⁷Sạrigeń metapekana, nonḍe adom hoṛ menakʼkoa, onko do Isorakʼ raj ạuriko ńel hạbicʼ bako gujukʼa.”

²⁸Ado noako kathae roṛketʼ mitʼ hapta tayom Jisu do koejoṅ lạgitʼ Patras, Johan ar Jakobteko soṅgekate mitʼṭen buruteye rakapʼena.

²⁹Are koejoṅkan tahẽkanrege Jisuakʼ mẽtʼãhã do bodolena ar uniakʼ kicricʼko hõ pĩṛĩtʼ pĩṛĩtʼ ponḍentaea,

³⁰ar uni tulucʼ bar hoṛ galmaraokan kin ńelena. Unkin do Mose ar Eliạge.

³¹Onko do ṭhonokanteko ńelena. Ar Jerusalemre purạu lạgidokʼkan Jisuakʼ gujukʼ reaṅko galmarokan tahẽkana.

³²Unre Patras ar uni soṅgeten kin do jhap jhap dudṛumetʼko tahẽkana. Adoko beṅgetʼ pharnoen khan Jisuakʼ ṭhonokko ńelkeda ar soṅgete bar hoṛ teṅgo akan hõko ńelketʼkinạ.

³³Ado unkin hoṛ tinre Jisu ṭhen khonkin calakʼkan tahẽkana unre Patras do Jisui metadea, “E Guru, bhagege hoeakana nonḍe menakʼle iạte. Ale do nonḍe pea kumbạ oṛakʼle benaoa, mitʼṭen do am lạgitʼ, mitʼṭen do Mose lạgitʼ ar mitʼṭen do Eliạ lạgitʼ.” Menkhan uni do bae bujhạuleda acʼ do cetʼe meneda mente.

³⁴Patras kathae roroṛkan tahẽkanrege mitʼṭen rimil do rakapʼ hecʼente onkoe umul esetʼketʼkoa. Ar rimilteko danaṅen khan celako do botor caṛhaowatʼkoa.

³⁵Ona rimil khon noa katha ańjomena, “Nuige ińren Hopon do, one uniń bachao akade; ape do uniakʼ ańjomtaepe.”

³⁶Ado katha roṛ thiren khan eken Jisu eskargeye ńelena. Ar celako do oneko ńelketʼ reaṅ okoe hõ bako lại baṛaletʼte hapegeko tahẽyena.

³⁷Ado dosar hilokʼ Jisu ar pea cela buru khonko pheḍ hecʼen khan ạḍi utạr hoṛ do Jisu sãote ńapamokʼ lạgitʼko hecʼena.

³⁸Unre gadel hoṛ bhitri khon mitʼ hoṛ do ãṭ aṛaṅte hohoate Jisui metadea, “E Guru, dayakate hoponiń baṛe ńeleme. Uni doe sadher hopon kantińạ.

³⁹Uni do mitʼṭen bạṛicʼ jiue sabea ar ackageye kikiạu goda. Are mocṛa mucṛiyea ar uniakʼ moca khon photo photo oḍokokʼa; ar ona tayom do garal garal huruṛ baṛakateye aṛagea.

⁴⁰Iń do amren celako ṭheniń nehõrlena jemon uni jiuko oḍok giḍikae, menkhan bako daṛeada.”

⁴¹Unre Jisui menkeda, “E bepạtiạu ar peṛta piṛhirenko! Ar tinạkʼ din ape tulucʼ iń tahena ar tinạkʼ diniń sahaokatapea? Dini hoponme nonḍe ạguyetam.”

⁴²Ado tinre koṛa do Jisu ṭhene hijukʼkan tahẽkana unre bạṛicʼ jiu do uniye mocṛao bhinḍạṛkedea. Onate Jisu do bạṛicʼ jiue dhomkaokedea ar koṛae bogekedete eṅgat-apat ṭhene jimạkadea.

⁴³Unre sanam hoṛ do Isorakʼ maraṅtetʼ iạteko hahaṛayena. Ado Jisui cekaketʼakʼ babotre hahaṛa tulucʼko hudisokʼkan tahẽkanre, uni do acʼren celakoe metatʼkoa,

⁴⁴“Ińakʼ noako katha monre rebetʼ dohoepe, ente Manwa Hopon do hoṛkoakʼ tireko soprotea.”

⁴⁵Menkhan celako do ona katha bako bujhạuleda. Isor do onko ṭhen khone danaṅ akatʼ tahẽkana jemon onko do ona aloko bujhạu daṛeakʼ. Ar celako hõ noa reakʼ jãhãnakʼ katha kuliyeko botorokʼ kan tahẽkana.

⁴⁶Ado celako modre okoeṭakʼ sanamko khone maraṅa ona reaṅ ako talareko reṭepeṭekʼkan tahẽkana.

⁴⁷Jisu do onkoko hudisokʼkan reakʼe bujhạuketʼtako khan mitʼṭen kạṭicʼ gidrạ ạgukate acʼ ṭhene teṅgokedea.

⁴⁸Ona tayome metatʼkoa, “Jãhãege iń ńutumte nui gidrại ataṅe, uni do ińgeye ataṅińạ. Ar okoe ińe ataṅiń, uni do kol akadińicʼgeye ataṅea. Apeko modre okoe sanamko khone huḍiń utạricʼkan, unigeye maraṅa.”

⁴⁹Johane menkeda, “E Guru, am ńutumte mitʼṭen hoṛ do bạṛicʼ jiukoe oḍok giḍikanle ńṭoṭhadea. Ar abo dolrene baṅkante uni dole mana akadea.”

⁵⁰Jisu do uniye metadea, “Alope manaea, ente okoe ape birudrene baṅ kan uni do ape secʼren kangeae.”

⁵¹Ado sermate calakʼ reakʼ okte hoyentae khan uni do Jerusalemte calakʼ lạgitʼe mon murukkeda.

⁵²Uni do laharege onḍe hoṛkoe kolketʼkoa. Onko do Jisu sanamakʼ tearae lạgitʼ Samariạkoakʼ mitʼṭen atoteko boloyena.

⁵³Menkhan Jisu do Jerusalemteye calakʼkante ona atoren hoṛko do bako ataṅledea.

⁵⁴Ona ńelte acʼren cela Jakob ar Johan dokin menkeda, “E Probhu, Eliạ leka serma khon seṅgel ńurakote marao giḍikako lạgitʼ hukum liń emamem khojkana?’’

⁵⁵Jisu do unkin secʼ ạcurkate dhomkao ketʼkinteye metatʼkinạ, ‘‘Abenre cetʼlekan jiu menaea baben baḍaea, ente Manwa Hopon do manwa nosṭoko lạgitʼ do bae hecʼakana, bickom bańcaoko lạgitʼge.’’

⁵⁶Ona tayom onko do eṭakʼ atoteko calaoena.

⁵⁷Ar horteko calakʼkan tahẽkanre mitʼ hoṛ do Jisui metadea, “Jãhãtegem calakʼ iń hõ am sãote onḍegeń calakʼa.”

⁵⁸Jisu do uniye metadea, “Toyoko do bhugạkʼ menakʼtakoa ar cẽṛẽkoakʼ do tukạ menakʼa, menkhan Manwa Hopon do bohokʼ dohoetae reakʼ jaega hõ bạnukʼtaea.”

⁵⁹Ado eṭakʼ mitʼ hoṛe metadea, “Dela iń soṅgete hijukʼme.” Menkhan uni hoṛ doe menkeda, “E Guru, ạpuń baṛe topa maṛaṅ ocoạńme.”

⁶⁰Jisu do uniye metadea, “Gocʼko do akoren gocʼko topa ocoakome, menkhan am do hijukʼte Isorakʼ raj lại pasnaome.”

⁶¹Ado arhõ eṭakʼ mitʼ hoṛe menkeda, “E Guru, iń do am sãoteń calakʼgea, menkhan iń oṛakʼrenko ṭhen bidạ hatao maṛaṅ ocowạńme.

⁶²Jisu do uniye metadea, “Nahel kãṛbare ti capokate tayom secʼ beṅgetʼicʼ do Isorakʼ raj lạgitʼ lek doe baṅkana.”