Read Santali Johan 1 Bible Online

Johan 1 - Santali bible

Johan 1

¹Etohopʼrege kathatetʼ tahẽkana, ar kathatetʼ do Isor ṭhen tahẽkana ar kathatetʼ do acʼge Isore tahẽkana.

²Etohopʼrege uni do Isor sãoteye tahẽkana.

³Sanamakʼge ona katha hotete sirjạu akana, ar oka sirjạu akan onako modre okaṭakʼ hõ uni begor do baṅ sirjạu akana.

⁴Onare jion tahẽkana ar ona jionge manwakoakʼ marsal tahẽkana.

⁵Ona marsal do ńutre jolokʼ kana ar ńut do marsal bae bhagao daṛeada.

⁶Isor do Johan ńutuman mitʼṭen hoṛe kolledea.

⁷Uni do marsal reaṅ goha emokʼ lạgitʼe hecʼlena jemon jotoko uniakʼ goha ańjomkateko pạtiạukʼ.

⁸Johan acʼtetʼ do ona marsal bae tahẽkana menkhan ona marsal reakʼ goha emokʼe hecʼlena.

⁹Unige sạri marsal do, one okoe mimitʼ manwako marsale emakokan, uni do dhạrtiteye hecʼlena.

¹⁰Uni do dhạrtireye tahẽkana ar dhạrti do uni hotetege sirjạu akana, enhõ dhạrtiren manwa do bako oromledea.

¹¹Uni do acʼrenko ṭhene hecʼlena, menkhan acʼren hoṛge bako ataṅledea.

¹²Menkhan tinạkʼ do unireko pạtiạuen arko ataṅkede onko mimitʼko do Isorren gidrạ hoyokʼ reakʼ ektiạriye ematʼkoa.

¹³Noko hoṛkoakʼ janam do mãyãm khonakʼ do baṅ hoeakana, ar jel reakʼ sana se herel hoṛakʼ sana khon hõ baṅ, bickom Isor khonge hoeakana.

¹⁴Ar ona kathatetʼge manwa jạt lekateye janamena ar aboko talareye girobasena. Isor Babaren sadher Hopon lekate uniakʼ oka ṭhonok menakʼ ona do alele ńelakada. Uni do daya ar sạriakʼteye perecʼgea.

¹⁵Johan do uni reaṅ ãṭ aṛaṅte goha emetʼteye meneda, “Nui kangeae uni do one okoe reaṅ iń menletʼ, iń tayomteye daraekan ar iń khone maraṅge, ente uni do iń ạuri khonge menaea.”

¹⁶Abo jotokoge uniakʼ ona perecʼakʼ khon daya cetan daya bon ńam akada.

¹⁷Mose hotete ạn-ạriko em hoelena, menkhan daya ar sạritetʼ do Jisu Mạsi hotetege hecʼakana.

¹⁸Isor do okoe hõ tisge bako ńelakadea. Ar acʼ sãote menae uni sadher Hopon, one okoe do acʼtetʼgeye Isorkan, unige uni doe sodor akadea.

¹⁹Jihudi mukhiạko do Jerusalem nagraha khon naekeko ar Liwiko Johan ṭhenko kolketʼko khan Johan do onko ṭhen gohae emkeda. Onko doko kulikedea, “Am dom okoe kana?”

²⁰Johan do bae baṅleda bickom aṅgocketʼteye menkeda, “Iń do Mạsi doń baṅkana.”

²¹Unre onko do Johanko kulikedea, “Okoe enḍekhan? Eliạ kanam?” Uni doe menkeda, “Baṅ, iń do Eliạ hõń baṅkana.” Onkoko metadea, “Enḍekhan am do cetʼ uni nạbi kanam?” Uniye roṛ ruạrkeda, “Baṅ.”

²²Adoko metadea, “Enḍekhan am dom okoe kana? Ente ale okoeko kolakatʼle sen ruạṛkate onko lạiako hoyokʼtalea. Ar am reaṅ do cetʼem menkea?”

²³Johane menkeda, “Ińge ona hohokạnicʼ reakʼ aṛaṅ do, one okoe reaṅ Jesaea nạbiye menakatʼ, Hahaṅkarre mitʼṭen hohokạnicʼ reakʼ aṛaṅe baḍae ocokʼkana, Probhuakʼ hor sojhekataepe.”

²⁴Johan ṭhen okoeko kol ocolen onko do Phạrusiko tahẽkana. Onko do Johanko kulikedea,

²⁵“Am do Mạsi hõ baṅ, Eliạ hõ baṅ, ar uni nạbi hõm baṅkan khan enḍekhan cedakʼem bạptisetʼkoa?”

²⁶Johan do onko Phạrusikoe metatʼkoa, “Iń ma dakʼteń bạptisetʼpe, menkhan apeko modre nonkan mitʼ goṭene teṅgo akana okoe do bape oromede.

²⁷Unikangea uni hoṛ do, one okoe iń tayomte hijukʼ reakʼ katha tahẽkantae. Iń do uniakʼ panahe reakʼ phitạ raṛaetae lekgeń baṅkana.”

²⁸Noa do Jordan gaḍa eṭakʼ aṛe reakʼ Bethaniạ atore hoelena one okare Johan doe bạptisetʼko tahẽkan.

²⁹Dosar hilokʼ Johan do Jisu acʼ ṭhen hijukʼkane ńelkede khane menkeda, “Hạni ńelepe Isorren Bheḍa Hopon, one uni manwakoakʼ sanam kạiye gokʼ idiyetʼkan.

³⁰Nui kangea uni do one okoe reakʼ iń lạiletʼ okoe do iń tayomteye daraekan ar iń khon hõe maraṅge, ente uni do iń ạuri khonge menaea.

³¹Iń do bạń oromakade tahẽkana, menkhan uni do Israelko ṭhen jemone sodor ocokʼ onate iń do hecʼkate dakʼteń bạptisetʼpea.”

³²Ona tayom Johan do noa gohae emkeda, “Iń do serma khon sonot Jiu parwa leka pheḍ hijukʼte uni cetanre apʼakaniń ńelkedea.

³³Uni do bạń oromakade tahẽkana, menkhan okoe dakʼte bạptisko lạgitʼe kolakadiń unigeye men akadińa, ‘okoe cetanre sonot Jiu pheḍ hijukʼkanem ńelea, unige sonot Jiuteye bạptispea.’

³⁴Iń do onań ńelakada ar gohań emetʼkana nui kangeae Isorren Hopon.”

³⁵Dosar hilokʼ Johan ar acʼren barea cela do arhõ onḍekin tahẽkana.

³⁶Unre Jisui dãṛã baṛaekan tahẽkanre Johane menkeda, “Hạni ńele ben, Isorren Bheḍa Hopon.”

³⁷Ado Johan noa katha roroṛkin ańjomkede khan unkin banar cela do Jisukin pańjakedea.

³⁸Jisu do ạcurente pańjakane ńelketʼkinteye metatʼkinạ, “Cetʼben ńam kana?” Johanren cela dokin kulikedea, “E Rabbi, (torjomate) E Guru, am do okarem tahen kana?”

³⁹Jisui metatʼkinạ, “Dela hijukʼte ńel idiben.” Unre unkin do senkate Jisui tahenkan jaegakin ńelkeda ar enhilokʼ do uni sãotegekin tahẽyena. Unre okte do pon baja gan hoeakan tahẽkana.

⁴⁰Johanakʼ katha ańjomkate okoekin cela Jisukin pańjalede unkin modre mitʼ hoṛakʼ ńutum do tahẽkana Andreas. Uni do Simon Patrasren boehae tahẽkana.

⁴¹Andreas do pạhilre acʼren boeha Simone sendra ńamkedeteye metadea, “Ạliń do Mạsi liń (torjomate do Krisṭ) ńam akadea.”

⁴²Ar Andreas do Jisu ṭhen Simone ạgukedea. Jisu do Simon beṅgetʼ adeteye metadea, “Am do Johan hopon Simon kanam, menkhan am do kephasem hoho ocokʼa.” Noa ńutum reakʼ mane do Patras, metakʼme dhiri.

⁴³Dosar hilokʼ Jisu do Gạlil Prodeshte calakʼe goṭawana. Un jokhecʼ Philipe ńelkede khan uniye metadea, “Dela pańjayińme ar ińren cela hoyokʼme.”

⁴⁴Philip do Bethsaeda atoren hoṛe tahẽkana, Andreas ar Patras hõ ona atorengekin tahẽkana.

⁴⁵Philip do Nathanaele sendra ńamkedeteye metadea, “Mose do okoeakʼ katha ạn-ạrikoreye ol oṭo akatʼ ar nạbiko hõ okoe reaṅko olakatʼ uni do alele ńam akadea. Uni do Nasareth atoren Josephren hopon Jisu kanae.”

⁴⁶Nathanael do Philipe metadea, “Nasaret khon do cetʼ jãhãn bhageakʼ hecʼ daṛekokʼa? Philip do uniye metadea, “Dela hijukʼte ńeleme.”

⁴⁷Jisu do Nathanael acʼ ṭhen hijukʼkane ńelkede khane menkeda, “Hạni ńelepe, mitʼṭen sạri Israel. Uniakʼ monre jãhãn phạsiạratetʼge bạnukʼ anaṅ.”

⁴⁸Nathanael do Jisui kulikedea, “Cekate iń dom oromkedińa?” Jisui roṛ ruạṛadea, “Philip ạuriye hohoamre, loa dare buṭạrem tahẽkanreń ńelletʼmea.”

⁴⁹Noate Nathanael do Jisui metadea, “E Guru, am do Isorren Hopon kanam ar amge Israelkoren raj do.”

⁵⁰Jisu do uniye metadea, “Loa dare buṭạreń ńelletʼme reakʼ kathań metatʼme iạtem pạtiạukʼ kana? Noa khon arhõ aema daṛeakʼkom ńela.”

⁵¹Jisui menkeda, “Sạrigeń metapekana, serma jhicʼ akanpe ńela ar Isorren goḍetko do Manwa Hopon ṭhen pheḍ hijukʼ ar rakapʼ calakʼkanpe ńelkoa.”