Read Santali Johan 10 Bible Online

Johan 10 - Santali bible

Johan 10

¹“Sạrigeń metape kana, jãhãege bhiḍi khạṛ reakʼ duạrte baṅ bolokate eṭakʼ secʼteye bolokʼ uni do kombṛo are ḍạku kana.

²Menkhan okoe duạr secʼte bhitriteye bolokʼkan unige bhiḍikoren gupiyicʼ do.

³Bhiḍikoakʼ khạṛ okoeye horhoyetʼkan uni do gupiyicʼge duạre jhicʼaea. Bhiḍiko do uniakʼ aṛaṅko ańjomtaea, ar gupiyicʼ do acʼren bhiḍiko ńutum ńumkateye hohoakote bahreteye oḍok idikoa.

⁴Ar acʼren sanam bhiḍikoe oḍokleko tayom onko laha lahateye calakʼa ar bhiḍiko do uniko pańja idiyea ente onko do uniakʼ aṛaṅko oromakatʼtaea.

⁵Onko do tis hõ ạnạṛi hoṛ ohoko pańjalea bickom uni khonko ńir pharakokʼa, ente ạnạṛi hoṛakʼ aṛaṅ do bako oromakada.”

⁶Onko Phạrusiko cetʼako lạgitʼ Jisu do noa kathae menkeda menkhan cetʼe lạiatʼkoa ona do bako bujhạuleda.

⁷Onate Jisu do arhõe metatʼkoa, “Sạrigeń metape kana, ińkangeạń bhiḍiko reakʼ duạr do.

⁸Iń lahate okoeko hecʼlen onko sanamkoge kombṛo arko ḍạku kana, menkhan bhiḍiko onkoakʼ katha do bako ańjomleda.

⁹Duạr do ińge. Ente jãhãege iń secʼte bhitriteye bolokʼ uni do bańcaoe ńama. Uni do bhitriteye bolokʼa ar bahreteye oḍokokʼa ar ạtiń lạgitʼ jaegae ńama.

¹⁰Kombṛo do eken kombṛo, khũn ar nonosṭo lạgitʼe hijukʼa. Iń doń hecʼakana jemon jionko ńam, ar ona jion jemon sareṛokʼtako.

¹¹“Boge gupiyicʼ do ińge. Boge gupiyicʼ do acʼren bhiḍiko lạgitʼ acʼakʼ jiwiye alaetaea.

¹²Eken din ṭalao lạgitʼ okoe gupi kạmiye kạmikan uni do gupiyicʼe baṅkana ar bhiḍiko hõ acʼren doko baṅkana. Uni do hunḍạr hijukʼe ńellere bhiḍikoe ńir bạgiakoa, ente uni do eken din ṭalaotae lạgitʼ noae kạmikana ar bhiḍiko lạgitʼ hõ jãhãnakʼ bae dạndikʼa. Ar hunḍạr do onkoe ạtkirkoa ar bhiḍiko doko chir chạturokʼa.

¹⁴“Ińge boge gupiyicʼ. Baba do cetʼleka ińe baḍaeyediń onkage iń hõ Babań baḍaeyedea ar ińren bhiḍiko hõń baḍaeyetʼkoa ar onko hõ ińko baḍaeyediń kana. Iń do ińren bhiḍiko lạgitʼ ińakʼ jiwiyiń alayetʼtińạ.

¹⁶Arhõ bhiḍiko menakʼkotińạ one okoe do noa khạṛrenko baṅkan; onko hõ ạguko hoyokʼtińạ. Onko do ińakʼ aṛaṅko ańjoma ar onate mitʼ khạṛ bhiḍiko hoyokʼa ar gupiyicʼ hõ mitʼṭenge.

¹⁷Baba do noa iạteye dulạṛedeń kana, ente iń do ińakʼ jiwiyiń alayetʼtińa jemon arhõ onań ruạṛ ạgu daṛeakʼ.

¹⁸Okoe hõ ińakʼ jiwi iń khon do bako rejeńa, menkhan iń do ińtegeń alaeyeda. Iń do jiwi alae reakʼ ektiạri menakʼtiń arhõ jiwi hatao ruạṛ reakʼ hõ ektiạri menakʼtińạ. Noa dạyik do ińren Baba ṭhen khoniń ńamakada.”

¹⁹Jisuakʼ noa katha iạte Jihudiko talare arhõ bhinạ bhini hoyena.

²⁰Onko modren ḍher hoṛko menkeda, “Unire do bhut menaea, uni doe bạulạha akana; cedakʼ uniakʼ katha dope ańjometʼtaea?”

²¹Eṭakʼko doko menkeda, “Noa do bhut capaṛ hoṛakʼ katha do baṅkana. Bhut do cetʼ kãṛã hoṛakʼ mẽtʼe beṅgetʼ oco daṛekea?”

²²Noa tayom Jerusalemre mundil dhorom aroe reakʼ porob seṭerena. Unre rabaṅ din tahẽkana.

²³Jisu do mundilre Solomonakʼ pinḍạreye dãṛã bãṛãekan tahẽkana.

²⁴Unre Jihudi mukhiạko do Jisu esetʼ ạcurkedeteko metadea, “Ar tinạkʼ din digdhạrem dohokalea? Mạsi kanam menkhan enḍekhan pusṭạute lạialeme.”

²⁵Jisui roṛ ruạṛatʼkoa, “Ape mań lại akawatʼpe, menkhan bape pạtiạukʼ kana. Ińren Baba ńutumte okakoń kạmikan onakoge iń reaṅ gohaye emeda.

²⁶Menkhan ape do bape pạtiạukʼkana, ente ińren bhiḍiko dope baṅkana.

²⁷Ińren bhiḍiko do ińakʼ aṛaṅko ańjomeda. Ar iń doń baḍae oromakatʼkoa ar onko do ińko pańjayediń kana.

²⁸Iń do jaejug jioniń emakokana. Onko do tishõ ohoko nosṭolena ar okoe hõ iń khon ohoko recʼidi daṛelekoa.

²⁹Ińren Baba, one okoe do onkoe emakawạdiń, uni do sanam khone maraṅa. Okoe hõ Babawakʼ ti khon do bako recʼ idi daṛeakoa.

³⁰“Iń ar Baba doliń mitʼgea.”

³¹Unre Jihudi mukhiạko do tińe lạgitʼ dhiriko halaṅkeda.

³²Jisu do onkoe metatʼkoa, “Babawakʼ hukumleka ạḍi okocʼ bhage kạmikoń udukʼ akawatʼpea Onako modre okalekanakʼ kạmi iạte dhirite tińińpe menetʼ kana?”

³³Mukhiyạkoko menkeda, “Bhage kạmi iạte tińme do bale meneda, menkhan Isor birudre bemanot katham roṛetʼ iạtege. Ente am do manwa hoekate hõ Isorem benaokʼkana.”

³⁴Jisui menkeda, “Apeakʼ ạnre cetʼ baṅ olakana, ‘Ińiń menakada, ape do Deb kanape?’

³⁵Isorakʼ katha okoe ṭhen hecʼlen onkoge coṅ uni ma Deb menteye metatʼko tahẽkan. Sonot sostor reakʼ katha do cetʼ mạutạ daṛekokʼa? Tis hõ baṅa.

³⁶Enḍekhan Baba okoeye sonot akade ar dhạrtiteye kolkede uni ińge tinreń metapekana ‘Iń doń Isorren Hopon kana,’ unre cekatepe meneda, ‘am do Isor birudre bemanot katham roṛeda?’

³⁷Ińren Babawakʼ kạmiko bạń kạmiyetʼ khan alope pạtiạuạńạ.

³⁸Menkhan ińiń kạmikan khan iń bape pạtiạuạńre hõ ińakʼ kạmiko baṛe pạtiạuakʼpe. Onatepe baḍaea arpe bujhạu daṛeakʼa, Baba do ińre menaea ar iń do Babare minạńa.”

³⁹Unre Jihudi mukhiạko do Jisu sabe lạgitʼko kurumuṭukeda, menkhan uni do onkoakʼ ti khone paskao calaoena.

⁴⁰Ona tayom uni do arhõ Jordan gaḍa hanasa senkateye tahẽyena. Johan do nonḍege pạhile bạptisetʼko kan tahẽkana.

⁴¹Ar ḍher hoṛ Jisu ṭhenko hecʼena arko menkeda, “Johan do jãhãn hahaṛa kạmi bae kạmileda, menkhan enhõ nui hoṛ reaṅ cetʼkoe lạiletʼ ona joto do sạrigea.”

⁴²Ar onḍe ạḍi utạr hoṛ Jisureko pạtiạuena.