Read Santali Johan 12 Bible Online

Johan 12 - Santali bible

Johan 12

¹Ado sen-parom porob turui din lahare Jisu do Bethaniạ atoteye senena. Ar gocʼko khon okoeye jiwetʼ beretʼlede uni Lasar hõ Bethaniạ atoregeye girobasokʼkan tahẽkana.

²Onḍe onko do Jisu lạgitʼ jomakʼko tearkeda. Ar Martha doe sapʼsorako kan tahẽkana. Ar okoeko Jisu tulucʼ jojomko duṛupʼ akan tahẽkan onko modre Lasar hõe tahẽkana.

³Unre Mạriạm do tala ser gan ạḍi damanakʼ mahkaokʼ sunume ạgukeda ar Jisuakʼ jaṅgareye dulkeda ar acʼakʼ upʼteye jotʼketʼtaea. Ar ona mahkaokʼ sunum reakʼ mohokte goṭa oṛakʼ perecʼena.

⁴Jisuren celako modren mitʼ hoṛ, okoe do bạirikoakʼ tire Jisui soprot ocoye uni Jihudạ Iskariot doe menkeda,

⁵“Noa mahkaokʼ sunum do cedakʼ pe sae Dinarte baṅ ạkhrińlena, ar reṅgecʼ orecʼko baṅ ematʼkoa?”

⁶Jihudạ do reṅgecʼko lạgitʼ dạndikate noa kathae menleda ona do baṅ. Uni do kombṛoe tahẽkana. Ar uni jimạre ṭaka reakʼ baksa tahẽkante dohoakʼko khone kombṛoyetʼkan tahẽkana.

⁷Jisui menkeda, “Alope duk ocoyea. Ente topayiń jokhecʼ sajaoiń iạte uni do noae doholeda.

⁸Reṅgecʼko ma jaoge ape tulucʼ menakʼko, menkhan iń do jao okte bape ńameńạ.”

⁹Ado Jisu Bethaniạre menaea menteko baḍaeketʼ khan Jihudiko mod khon ạḍi utạr hoṛ do onḍeko hecʼena. Onko do eken Jisu lạgitʼ do baṅ, menkhan Jisu gocʼko khone jiwetʼ beretʼ akade uni Lasar ńele lạgitʼ hõko hecʼlena.

¹⁰Unre maraṅ naekeko do Lasar hõ goje lạgitʼko goṭakeda,

¹¹ente Lasar iạte Jihudiko modren ḍher hoṛge mukhiạkoko bạgiatʼkote Jisureko pạtiạuena.

¹²Ado porobre okoeko hoṛko hecʼakan tahẽkan onko do dosar hilokʼko ańjomkeda Jisu do Jerusalemteye hijukʼ kana.

¹³Unre onko do khijur ḍạr sapʼkate daram ạguye lạgitʼko oḍok calaoena ar ãṭ aṛaṅte hohoate memenko ehopʼena, “Hosanna, bhorangeae Probhu ńutumte daraekạnicʼ, Israelkoren raj do.”

¹⁴Sonot sostor reakʼ katha leka Jisu do mitʼṭen gadha hopone ńamkedete unireye decʼena. Sostorre olakan leka,

¹⁵“E Sionren kuṛi, alom botorokʼa. Ńelme, amren raj do gadha hoponre decʼkateye hijukʼ kana.”

¹⁶Jisuren celako do pạhilre noako bako bujhạu daṛeada. Ado tinre Jisuakʼ ṭhonok sodorena unre onko doko disạkeda sonot sostor reakʼ ona katha do Jisu reaṅge olakan tahẽkana mente. Onko do arhõ disạ hecʼatʼkoa hoṛko do Jisu lạgitʼgeko onkaleda.

¹⁷Ado topa dander khon Lasare hoho oḍokkede ar gocʼko khone beretʼkede jokhecʼ okoeko hoṛ Jisu ṭhenko tahẽkan onkoge Lasarakʼ jiwetʼ beredokʼ reaṅ gohako emkeda.

¹⁸Onate gadel hoṛko do Jisu daram ạguye lạgitʼko oḍok calaolena, enteko ańjomakatʼ tahẽkana Jisuge ona hahaṛawakʼ kạmi doe kạmi akada.

¹⁹Noa ńelte Phạrusiko do ako akoreko men joṅana, “Aboakʼ do cetʼ labge baṅ hoyokʼkana. Ente ńelpe, goṭa duniạrenkoge uniakʼ dolreko calaoena.”

²⁰Ona porobre okoeko sewa lạgitʼko hecʼakan tahẽkan onko modre adomko do Junạni hoṛko tahẽkana.

²¹Onko do Philip ṭhen hecʼkate nehõradeteko metadea, “E baba ale do Jisule ńelea.” Philip do Gạlil reakʼ Bethsaeda atoren hoṛe tahẽkana.

²²Ar Philip do senkate Andrease lạiadea Ar Andreas ar Philip do senkate Jisukin metadea.

²³Unre Jisu do Andreas ar Philipe metatʼkinạ, “Manwa Hopon do ṭhonok sodorokʼ reakʼ okte seṭer akanataea.

²⁴Sạrigeń metaben kana, guhum jaṅ hasare ńurkate baṅ gocʼlen khan ona do eskarge tahena, menkhan gocʼlen khan do ạḍi utạr gele belekʼa.

²⁵Okoe acʼakʼ jiwiye dulạṛ uni do acʼakʼ sạriakʼ reakʼ jione khuạutaea, menkhan okoe noa dhạrtire acʼakʼ jiwi bae dulạṛ uni do jaejug jion lạgitʼ acʼakʼ sạriakʼ reakʼ jione rukhiyạitaea.

²⁶Jãhãege ińakʼe kạmikan khan uni do ińe pańjańma. Iń okareń tahena ińren kạmiạko hõ onḍegeko tahena. Jãhãege ińakʼe kạmikan khan Baba do uniye manotea.

²⁷Ińakʼ jiwi do ńitokʼ khad badaokʼkan tińạ. Iń do cetʼ niạ kathageń mena, ‘E Baba, noa ghuṛi khon de bańcaoiń me?’ Menkhan niạ lạgitʼge coṅ noa okte hạbicʼ mań hecʼakana.

²⁸E Baba, amakʼ ṭhonok sodorme baṛe.” Unre serma khon noa katha ańjomena, “Iń do ińakʼ ṭhonokiń sodor akada ar ona do arhõń sodora.”

²⁹Ar okoeko hoṛ onḍeko teṅgo akan tahẽkan onko do ona ańjomkateko menkeda, “Rimil saḍeyena.” Adomko doko menkeda, “Jãhãe serma goḍet uni tulucʼ kathae roṛkeda.”

³⁰Noa iạte Jisui menkeda, “Noa katha iń lạgitʼ do baṅ roṛakana, menkhan ape lạgitʼge roṛakana.

³¹Noa dhạrtiren hoṛkoakʼ bicạr reakʼ okte do seṭer akana, ar dhạrtiren rajakʼ ti khon ńitokʼ do recʼ ocokʼa.

³²Iń do ot khon coṭteń rakapʼ ocokʼre sanamko iń ṭheniń or sorkoa.”

³³Uni do cetʼlekan gujukʼ hoyokʼtaea ona bujhạu ocoko lạgitʼge noa katha doe roṛkeda.

³⁴Unre hoṛko do Jisuko metadea, “Sonot sostor khonle baḍae akada Mạsi do jaejug hạbicʼe tahena. Enḍekhan am do cekatem meneda, Manwa Hopon do coṭte rakapʼ ocokʼ hoyokʼtaea? Enḍekhan nui Manwa Hopon doe okoe kana?”

³⁵Jisui metatʼkoa, ar thoṛa dinge ape talare marsaltetʼ menakʼa. Ape ṭhen marsal menakʼrege dãṛãnpe, jemon apere ńut do aloe jitạu daṛeakʼ.

³⁶Marsal ape ṭhen tahenrege marsalre pạtiạukʼpe jemon ona marsalren hoṛpe hoedaṛeakʼ.” Noako kathae lạiatʼko khan Jisu do onko khon apnartetʼe danaṅenteye calaoena.

³⁷Menkhan onko samaṅre cinhạ lekate unạkʼ hahaṛawakʼkoe kạmiketʼre hõ hoṛko unire bako pạtiạulena.

³⁸Noa do hoyena Jesaea nạbi hotete roṛlenakʼ katha jemon purạukʼ: E Probhu, alele ańjomakatʼakʼ do okoe baṅe pạtiạuatʼ? Ar okoe ṭhen Probhuakʼ daṛeanakʼ ti do sodor akana?

³⁹Onko hoṛ do noa iạtege bako pạtiạu daṛeada, ente Jesaea cetʼ lekae roṛletʼ onkage,

⁴⁰“Isor do onkoakʼ mẽtʼe kãṛã akatʼtakoa ar ontor doe goṛdho akatʼtakoa, jemon onko do mẽtʼte aloko ńeńel ar ontorte aloko bujhạu, ar bogekʼ lạgitʼ uni ṭhen aloko ruạṛ hijukʼ.”

⁴¹Jesaea do Jisuakʼ ṭhonoke ńelletʼte uni reaṅ noa kathae roṛleda.

⁴²Enre hõ mukhiạko modren ḍher hoṛge unireko pạtiạuena, menkhan Phạrusiko ṭhen biṭlạha ocokʼ botorte bako aṅgocleda.

⁴³Onko do Isor ṭhenakʼ man khon hoṛko ṭhenakʼ mange bạ̃ṛtiko kusiyakʼkan tahẽkana.

⁴⁴Jisu do ãṭ aṛaṅteye menkeda, “Okoe ińreye pạtiạukʼkan uni do eken ińre do baṅ bickom okoeye kolakadiń unire hõe pạtiạukʼkana.

⁴⁵Ar okoe ińe ńeleńkan, uni do kol akadinicʼgeye ńelekana.

⁴⁶Iń do noa dhạrtire marsal lekań hecʼakana, jemon ińre okoeye pạtiạukʼ uni do ńutre aloe tahen.

⁴⁷Jãhãege ińakʼ kathae ańjom ar onaleka bae senokʼ enḍekhan uni do bạń bicạrea, ente manwa dusiko lạgitʼ do baṅ, bickom kại khon bańcaoko lạgitʼgeń hecʼ akana.

⁴⁸Okoe iń bae bạsutạń ar ińakʼ katha bae ańjom uni lạgitʼ do bicạricʼ menaea. Oka kathań roṛakatʼ ona kathage mucạtʼ dinre uni do dusi menteye sạbudea;

⁴⁹ente iń do apnarte cetʼge bạń roṛakada, menkhan okoeye kolakadiń uni Babageye hukum akawạdińạ cetʼko roroṛ hoyokʼ tińạ mente.

⁵⁰Ińiń baḍaea uniakʼ hukum do jaejug jion kana. Onate okako kathań roṛetʼkan ona do Babawakʼ hukum lekageń roṛeda.”