Read Santali Johan 13 Bible Online

Johan 13 - Santali bible

Johan 13

¹Sen-parom porob thoṛa laha reakʼ ghoṭna. Jisu do noa dhạrti bạgikate Baba ṭhen calakʼ reakʼ okte seṭer akana menteye bujhạu daṛeatʼ tahẽkana. Ar dhạrtire okoeko acʼren hoṛko tahẽkan onkoe dulạṛetʼko tahẽkana ar mucạtʼ hạbicʼe dulạṛketʼkoa.

²Unre kedokʼ jokhecʼ. Soetan do Simon hopon Jihudạ Iskariotakʼ monre bạirikoakʼ tire Jisu soprote lạgitʼ sanae rakapʼ ocoletʼtaea.

³Jisu doe baḍaekan tahẽkana, Isor Baba do acʼakʼ tire jotowakʼe jimạ akada. Ar noa hõe baḍaekan tahẽkana, acʼ do Isor ṭhen khone hecʼakana ar uni ṭhengeye ruạṛ calao lạgidokʼ kana.

⁴Onate kedokʼ khone beretʼena ar oyonakʼe dohokeda ar mitʼṭen gamcha hataokate ḍanḍareye paṭheyena.

⁵Ona tayom gamlare dakʼe dulketʼte celako jaṅgae ạbuk ketʼkoa ar ḍanḍareye paṭhe akan tahẽkan gamchate jojotʼe ehopʼena.

⁶Ado Simon Patras ṭhene hecʼen khan Patras do uniye metadea, “E Probhu, am do cetʼ ińakʼ jaṅgam ạbuktińạ?”

⁷Jisui roṛ ruạṛadea, “Okań cekayetʼkan ona do ńitokʼ bam baḍaeyeda menkhan tayomtem bujhạua.”

⁸Patras do uniye metadea, “Ińakʼ jaṅga do tis hõ bam ạbuk ńama.” Jisu do Patrase metadea, “Bạń ạbukletam khan iń tulucʼ amakʼ bakhra do bạnukʼ tama.”

⁹Unre Simon Patrase menkeda, “E Probhu, enḍekhan eken jaṅga moto do alo, ińakʼ ti ar bohokʼ hõ ạbuk tińme.”

¹⁰Jisu do uniye metadea, “Um akanicʼ do jaṅga chaḍa ar cetʼge ạbukokʼ reakʼ jạruṛ bạnukʼtaea, ente uni do jotoge saphagetaea.

¹¹Ape dope saphagea, menkhan sanamko do baṅ.” Okoe acʼe soprote uni doe baḍae akade tahẽkana. Onate uni doe menkeda, “Ape joto do bape saphawa.”

¹²Ado joto hoṛe ạbuk sạtketʼko khan Jisu do acʼakʼ oyonakʼ hataokate arhõ duṛupʼenteye metatʼkoa, “Iń cetʼ iń cekaketʼ ona dope bujhạuletʼgea?

¹³Ape do Guru ar Probhu mentepe hohowạńkana, ar ona do ṭhikgepe meneda, ente uni kangeạń.

¹⁴Menkhan iń do Probhu ar Guru hũyạte hõ cetʼ lekań ạbukketʼpe onkage ape hõ eṭakʼkoakʼ jaṅga ạbuk lek tapea.

¹⁵Iń do noań udukʼ atʼpea jemon apere cetʼlekań cekaketʼ ape hõpe onkae.

¹⁶Sạrigeń metapekana, guti do acʼren kisạ̃ṛ khon bae maraṅa. Ar kol ocoyicʼ hõ kokolicʼ khon bae maraṅa.

¹⁷Noako baḍaekate onako lekape kạmile khan enḍekhan ape dope bhạgangea.

¹⁸Ape sanamkoakʼ katha do bạń meneda. Iń okoeyiń bachao akatʼko onko doń baḍae akatʼkogea. Menkhan sonot sostor reakʼ noa katha do purạukʼtege hoyokʼa, ‘okoe iń tulucʼ piṭhại jojomkan unige iń birudre jaṅgae tulketʼtaea.’

¹⁹Iń do noa hoyokʼ laharegeń lạiape kana, jemon hoelenrepe pạtiạukʼ baṅma, iń kangeạń.

²⁰Sạrigeń metapekana, iń okoeyin kole, ar uni okoeye ataṅe, uni do ińgeye ataṅedińạ ar iń okoeye ataṅiń uni do kolakadińcʼgeye ataṅedekana.”

²¹Ado noako katha menkate Jisu do jiwireye khad badaoena. Uni do pusṭạuteye menkeda, “Sạrigeń metapekana, ape modren mitʼ hoṛ bạirikoakʼ tireye soprotińạ.”

²²Jisu okoeakʼ kathae meneda ona bako bujhạu daṛeatʼte celako do ako akoreko beṅgetʼ baṛawana.

²³Onko modren Jisu okoeye dulạṛede tahẽkan uni do Jisuakʼ koṛam pheḍreye ṭenḍar akan tahẽkana.

²⁴Simon Patras do uni isạrawadeteye metadea, “Kuliyeme uni do okoe reaṅe roṛeda.”

²⁵Unre uni cela do Jisure ṭenḍarenteye menkeda, “Henda Probhu, uni doe okoe kana?”

²⁶Jisui roṛ ruạṛkeda, “Noa piṭhạ kecakʼ bạṭire topokate okoeyiń emae unikangeae uni hoṛ do.” Ado piṭhạ kecakʼ bạṭire topokate Simon Iskariotren hopon Jihudại emadea.

²⁷Piṭhạ kecakʼe ńamketʼ khan Soetan do Jihudạreye boloyena. Jisu do uniye metadea, “Okaṭakʼ cekayem menetʼkan ma usạraeme.”

²⁸Jisu sãote okoeko jojomkan tahẽkan onko do bako bujhạuleda cedakʼ Jisu do Jihudạ noa kathae metadea.

²⁹Adomko doko bujhạukeda, porobre lạgitʼ jạruṛokʼakʼko kiriń ạgui se reṅgecʼ orecʼko jãhãnakʼ emako lạgitʼ Jisu do Jihudại metadea, ente ṭaka reakʼ baksa do Jihudạ ṭhenge tahẽkana.

³⁰Ado piṭhạ kecakʼe hataoketʼ torage Jihudạ do bahreteye oḍok calaoena. Unre do ńindạ tahẽkana.

³¹Ado Jihudạ bahreteye calaoen khan Jisui menkeda, “Manwa Hoponakʼ ṭhonokokʼ reakʼ okte do seṭerena ar unire Isorakʼ ṭhonok do sodorokʼa.

³²Isorakʼ ṭhonok tinre unire sodorokʼa unre Isor hõ Manwa Hoponakʼ ṭhonok acʼreye sodora ar usạrageye ṭhonok ocoyea.

³³“E bachako, iń do ape tulucʼ ar thoṛa ghạṛicʼ minạńa. Ape do ińpe ńam baṛańạ, menkhan Jihudi mukhiạko cetʼlekań metatʼko tahẽkan, ‘okateń calakʼkan onḍe do ohope sen daṛelena,’ onkage ape hõ ńitiń metapekana.

³⁴Mitʼṭen nawa hukumiń emape kana dupulạṛpe. Cetʼleka iń do apeń dulạṛakatʼpe onkage ape hõ dupulạṛpe.

³⁵Nonkage ape apere dulạṛ tahen khan sanamkoko bujhạu daṛeakʼa ape do ińren celako kanape mente.”

³⁶Simon Patras do Jisui metadea, “E Probhu am do okatem calakʼ kana?” Jisui roṛ ruạṛkeda, “Iń okateń calakʼkan, onḍe do ńitokʼ iń sãote ohope sen daṛelena, menkhan tayomtepe hijukʼa.”

³⁷Patras do uniye metadea, “E Probhu, cedakʼ ńitokʼ do am sãote bạń calao daṛeakʼa? Am lạgitʼ ińakʼ jiwi hõń emokʼa.”

³⁸Unre Jisui menkeda, “Iń lạgitʼ cetʼ jiwim alaetama? Sạrigeń metam kana, sim sạnḍi ạuriye ragre am do pe dhaoem baṅeńa.