Read Santali Johan 15 Bible Online

Johan 15 - Santali bible

Johan 15

¹“Ińge sạri darkha nạ̃ṛĩ ar ińren Baba doe mạli kana.

²Ińre okako ḍạr baṅ jokʼ onako doe getʼ giḍikakʼa, ar oka ḍạrko jokʼkan onako doe kamana jemon arhõ bạ̃ṛti jokʼ.

³Okaṭakʼ kathań galmarao akatʼpe onate ape do laharegepe saphagea.

⁴Ińre tahenpe ar iń hõ apeakʼ ontorreń tahena. Darkha nạ̃ṛĩre ḍạrko joṛao baṅ tahẽlen khan cetʼ leka apnarte baṅ jokʼ onkage ape hõ ińre bape tahẽlen khan apnarte ohope jo daṛelena.

⁵“Ińge darkha nạ̃ṛĩ ar ape do ḍạrko. Okoe ińreye tahenkan ar iń do unire enḍekhan uniakʼ jionre do ạḍi jo jokʼa, ente iń begor ape do cetʼ hõ bape ceka daṛeakʼa.

⁶Jãhãege ińre bae tahen khan uni do getʼ giḍiakatʼ ḍạr leka bahreteye giḍi ocokʼa ar ona do rohoṛokʼa. Unre ona ḍạr jarwakate seṅgelreko khadlekakʼa ar ona do lokʼa.

⁷Ińrepe tahẽlen khan ar ińakʼ kathako apeakʼ ontorre tahẽnlen khan enḍekhan jãhãnakʼge sanape, onage koepe; ar ona do hoeapea.

⁸Apeakʼ jionre ḍherpe jolen khan enḍekhan nonkate ape do ińren celape sạbudokʼa ar ińren Baba doe ṭhonok ocokʼa.

⁹Baba cetʼlekae dulạṛ akadiń ińhõ onkage apeń dulạṛakatʼpea. Ińakʼ dulạṛre tahenpe.

¹⁰Cetʼleka iń do Babawakʼ sanam hukumkoń dohoyetʼkante uniakʼ dulạṛre minạńa, onkage ińakʼ hukumkope dohole khan ape hõ ińakʼ dulạṛrepe tahena.

¹¹Noako kathań menkeda jemon ińakʼ rạskạ do apeakʼ ontorre tahen ar apeakʼ rạskạ purạukʼtape.

¹²Ińakʼ hukum do nõkʼõe, cetʼlekań dulạṛakatʼpe onkage ape hõ dupulạṛpe.

¹³Jãhãege acʼren gateko lạgitʼ acʼakʼ jiwiye alaetae enḍekhan noa khon maraṅ dulạṛ do ar okoeakʼ hõ bạnukʼa.

¹⁴Okako hukumiń emape onakope dohole khan enḍekhan ape do ińren gatepe hoyokʼa.

¹⁵Iń do golam bạń metapekana, ente kisạ̃ṛ cetʼe cekakan golam do ona bae baḍaea; menkhan iń do gateń metapekana, ente Baba ṭhen khon okań ańjomakatʼ onage apeń baḍae ocoakatʼpea.

¹⁶Ape do bape bachao akadińạ, menkhan ińgeń bachao akatʼpete kạmireń dhurạu akatʼpea jemon apeakʼ jionrepe jokʼ ar ona jo do jemon tahẽ akae tahentape. Enḍekhan iń ńutumte Baba ṭhen jãhãnakʼgepe koe uni do onageye emapea.

¹⁷Iń do noa hukumiń emapekana, jemonpe dupulạṛ.

¹⁸“Dhạrtiren hoṛkoko kurudape khan, baḍaepe ape lahare onko do ińgeko kurudạńkana.

¹⁹Ape do noa dhạrtirenpe hoelen khan enḍekhan hoṛko do apnarren menteko dulạṛkepea. Menkhan noa dhạrtiren dope baṅkana, bickom iń do dhạrti khoniń bachao akatʼpete dhạrtiren hoṛko apeko kurudape kana.

²⁰Ińakʼ noa katha do alope hiṛińa, guti do acʼren kisạ̃ṛ khon bae maraṅa. Onate hoṛko iń gojeńko kurumuṭuyetʼ khan ape hõko onkapea; ar ińakʼ kathako ańjom khan apeakʼ katha hõko ańjoma.

²¹Onko do iń iạteko onkapea, ente iń okoeye kolakadiń uni do bako baḍaeyedekana.

²²“Iń aloń hecʼlen khan ar bạń galmaraoako khan onko do ohoko dusikokʼa; menkhan ńitokʼ do kại reakʼ jãhãn ạnḍuṅge bạnukʼtakoa.

²³Okoe ińe kurudạń uni do ińren Babageye kurudae kana.

²⁴Okako kạmi okoe tisge bako kạmiakatʼ onako kạmi onko samaṅre bạń kạmi lekhan onkoakʼ dos do oho hoekokʼa. Menkhan ńitokʼ onko do iń ar ińren Baba hõko ńelakadea arko kurud ạliń kana.

²⁵Noa do hoeakana onkoakʼ ạn-ạrire olakan katha jemon purạukʼ, ‘onko do ạuṛiakʼte ińko kurudạń kana.’

²⁶“Okoe sohotʼicʼ Baba ṭhen khoniń kolape, uniye hecʼlenre unige iń reaṅ gohae ema. Uni doe hoyokʼ kana sạriakʼren Jiu one okoe do Baba ṭhen khone hijukʼkan.

²⁷Ape hõ iń reaṅ gohape ema, ente pạhil khonge ape do iń são sãote menakʼpea.