Read Santali Johan 18 Bible Online

Johan 18 - Santali bible

Johan 18

¹Ado noakoe roṛ sạtketʼ khan Jisu do acʼren celako sãote kedronko metakʼ mitʼṭen nala hanasae parom calaoena. Onḍe do mitʼṭen bagwan tahẽkana. Jisu ar acʼren celako do ona bagwanteko oḍok calaoena.

²Ar bạirikoakʼ tire okoeye soprotlede uni Jihudạ hõ ona jaega doe baḍaeakatʼ tahẽkana, ente ạḍi dhao Jisu do acʼren celako sãote onḍeye senokʼkan tahẽkana.

³Ar maraṅ naekeko ar Phạrusiko do Jihudạ soṅgete mitʼ dol palṭon ar kạmiạko kolketʼkoa. Unre Jihudạ do onko sãote diuhe, mosal ar khanḍa banḍawante onḍeye seṭerena.

⁴Jisu do acʼre hoe lạgidokʼkan jotowakʼ doe baḍaekan tahẽkana. Onate uni do oḍok hecʼkate onkoe metatʼkoa, “Okoepe ńam baṛayede kana?”

⁵Onkoko menkeda, “Nasaretren Jisu.” Jisui metatʼkoa, “Iń kangeạń uni do.” Ar bạirikoakʼ tire okoeye soprotlede uni Jihudạ hõ onko sãoteye teṅgo akan tahẽkana.

⁶Ado “Ińkangeạń,” menteye metatʼko khan onko doko pạcgotʼena ar otreko bhindạṛena.

⁷Jisu do arhõe kuliketʼkoa, “Okoepe ńam baṛayede kana?” Metadeako, “Nasaretren Jisu.”

⁸Unre Jisui metatʼkoa, “Iń ma coń metapekange uni kangeạń. Ar ińgepe ńam baṛayediń khan noko do sen ocoakope.”

⁹Noa do hoyena Jisui menletʼ katha jemon purạukʼ, “Okoekom emakawạdiń onko modre mitʼ hoṛ hõ bạń atʼakadea.”

¹⁰Simon Patras ṭhen mitʼṭen tarwaṛe tahẽkana. Patras do tarwaṛe bocʼkate maraṅ naekeren gutiakʼ jojom luture heseketʼtaea. Uni gutiakʼ ńutum do Malkus tahẽkana.

¹¹Noa iạte Jisu do Patrase metadea, “Tarwaṛe do khapre bhoraokakʼme. Baba oka duk reakʼ bạ̃ṭiye emakawạdiń ona do cetʼ bạń ataṅa?”

¹²Unre palṭonko ar onkoren subedarko ar Jihudi mukhiạkoren kạmiạko do Jisu sapʼkedeteko tolkedea.

¹³Ar Hannas ṭhenko idi maṛaṅkedea, ente Hannas do ona bochorren maraṅ naeke Kaeapharen hońhartetʼe tahẽkana.

¹⁴Nui Kaeaphage Jihudi mukhiyạkoe solhawatʼko tahẽkana je, goṭa jạt bodolte mitʼ hoṛ gujukʼge boroṅ bhagea.

¹⁵Simon Patras ar eṭakʼ mitʼṭen cela do Jisukin pańja idikedea. Uni eṭakʼ cela do maraṅ naekeren oprom hoṛe tahẽkana. Uni cela do Jisu sãote maraṅ naekeakʼ bahre raca hạbicʼe bolo calaoena,

¹⁶menkhan Patras do bahre duạr ṭhene teṅgo tahẽyena. Unre maraṅ naekeren opromicʼ cela do bahrete senkate duạr horhoyicʼ kạ̃ṛmĩye galmaraoade khan bhitrite Patrase aderkedea.

¹⁷Uni kạ̃ṛmĩ do Patrase metadea, “Am hõ cetʼ uniren celako modren kanam?” Patrase menkeda, “Baṅ kạnạń.”

¹⁸Unre bes rabaṅ paṛao akan tahẽkana. Ona iạte golamko ar kạmiạko do koela seṅgel jolkate teṅgokateko jorogokʼkan tahẽkana. Ar Patras hõ onko sãote teṅgokate jorogokʼe ehopʼena.

¹⁹Unre maraṅ naeke do Jisu acʼren celako reaṅ ar acʼakʼ cecetʼakʼ reaṅe kulikedea.

²⁰Jisui roṛ ruạṛkeda, “Iń do hoṛko ṭhen sodortegeń galmarao akada. Ar Jihudiko mitʼ sãote okareko jarwakʼ ona sunạgogkore ar mundilre iń do jaogeń cetʼ akatʼkoa. Ar danaṅre do cetʼge bạń roṛakada;

²¹enḍekhan cedakʼ iń dom kuliyediń kana? Ińakʼ katha okoeko ańjomakatʼ onkoge kulikom cetʼiń men akatʼkoa mente. Ar okań roṛakatʼ ona doko baḍaegea.

²²Jisu noa kathae roṛketʼ khan sorre teṅgo akan tahẽkan kạmiạko modren mitʼ hoṛ do uniye thapakedeteye metadea, “Maraṅ naeke nonkam roṛ ruạṛae kana?”

²³Jisu do uniye metadea, “Bạṛicʼ iń roṛketʼ khan udukʼạń me. Menkhan bhageakʼ iń menakatʼ khan cedakʼem daleńkana?”

²⁴Unre Hannas do maraṅ naeke Kaeapha ṭhen tolgeye kolkadea.

²⁵Ado Simon patras teṅgokate tinreye jorogokʼ kan tahẽkana unre hoṛko do uniko metadea, “Am hõ cetʼ uniren celako modren mitʼ hoṛ kanam?” Patras do baṅketʼteye menkeda, “Baṅ iń doń baṅkana.”

²⁶Patras okoeakʼ luture heseletʼtae uniren mitʼ peṛa do maraṅ naekeren golame tahẽkana. Khan uniye menkeda, “Iń do bagwanre uni tulucʼ cetʼ bạń ńeletʼmea?”

²⁷Patras do arhõe baṅkeda, ar unrege mitʼṭen sim sạnḍi doe rakʼgotʼkeda.

²⁸Jihudi mukhiạko do ạḍi setakʼre Kaeapha ṭhen khon Romren disạm cakʼlaoicʼ Pilạtakʼ doṅgolte Jisuko idikedea. Menkhan onko do ona doṅgol bhitrite bako bololena jemon saphako tahente sen-parom porob reakʼ bhojko jom daṛeakʼ.

²⁹Unre Pilạt do onko ṭhen bahrete oḍok hecʼenteye metatʼkoa, “Nui hoṛ do cetʼe dos akatʼtepe dusiyede kana?”

³⁰Jihudi mukhiạkoko menkeda, “Bạṛicʼakʼ bae kạmile khan am ṭhen do ohole ạgukea.”

³¹Pilạte metatʼkoa, “Nui do idiyepe ar apeakʼ ạn leka bicạrepe.” Onate Jihudi mukhiạko do Pilạtko metadea, “Menkhan jãhãege gujukʼ sạjại emae reakʼ ektiạri aleakʼ do bạnukʼtalea.”

³²Jisu do cetʼleka gujukʼ hoyokʼtaea ona do laharegeye lạiletʼa. Noa do hoyena uniakʼ ona katha jemon purạukʼ.

³³Unre Pilạt do arhõ oṛakʼ bhitriteye boloyena ar Jisu hohoadeteye metadea, “Am do cetʼ Jihudikoren raj kanam?”

³⁴Jisui menkeda, “Am do cetʼ apnarte noa katham roṛeda, se eṭakʼ hoṛ iń reaṅko lại akawatʼmea?”

³⁵Pilạte roṛ ruạṛkeda, “Iń do cetʼ Jihudi kạnạń? Am jạtren hoṛ ar maraṅ naekekoge coṅ iń ṭhenko soprot akatʼme. Am do cetʼem ceka akada?”

³⁶Jisui menkeda, “Ińakʼ raj do noa dhạrti reakʼ do baṅkana. Ente noa dhạrti reakʼ tahẽlen khan enḍekhan ińren hoṛko lạṛhạikokʼa jemon Jihudi mukhiạkoakʼ tire aloń paṛaokokʼ; menkhan ińakʼ raj do nonḍenakʼ do baṅkana.”

³⁷Pilạt do Jisui metadea, “Enḍekhan am do cetʼ raj kanam?” Jisui roṛ ruạṛkeda, “Am do ṭhikgem menakada, iń doń raj kana. Iń do sạri goha emokʼ lạgitʼgeń janam akana ar ona lạgitʼge dhạrtiteń hecʼakana. Ar okoeye sạriakʼren kan uni do ińakʼ kathae ańjoma.”

³⁸Pilạt do uniye metadea, “Sạriakʼ do cetʼ kana? Noa katha menkate uni do arhõ bahrete senkate Jihudi mukhiyạkoe metatʼkoa, “Iń do nuiakʼ cetʼ dosge bạń ńametʼtaea.

³⁹Menkhan apeakʼ mitʼṭen niạm menakʼa, sen-parom porobre mitʼṭen kạidiń aṛakʼape. Ape do cetʼ Jihudikoren rajiń aṛakʼapepe khojkana?”

⁴⁰Noa iạte sanamko ãṭ aṛaṅte hohoateko menkeda, “Uni do baṅ, Barabbage.” Uni Barabba do mitʼṭen ḍạkui tahẽkana.