Read Santali Johan 6 Bible Online

Johan 6 - Santali bible

Johan 6

¹Ona tayom Jisu do Gạlil doreão hanasae parom calaoena. Noa doreãoge Tiberias doreão hõko metakʼkana.

²Ar ạḍi utạr hoṛ do Jisuko pańja idikedea, ente rugiko cetanre cinhạ kạmi lekate okako hahaṛa kạmiye kạmi akatʼ tahẽkan onko do onakoko ńelakatʼ tahẽkana.

³Ado Jisu ar acʼren celako do mitʼṭen burure rakapʼenteko duṛupʼena.

⁴Unre Jihudikoakʼ sen-parom porob do sor hecʼakan tahẽkana.

⁵Ado Jisui beṅgetʼ rakapʼketʼ khan gadel hoṛ acʼ ṭhen hijukʼkane ńelketʼkoa. Uni do Philipe metadea, “Noko hoṛ jom ocoko lạgitʼ piṭhạ do oka khon bon kiriń ạgukea?”

⁶Uni do Philip biḍạue lạgitʼ noa kathae metadea, ente cetʼe cekaea ona doe baḍaekan tahẽkana.

⁷Philip do Jisui metadea, “Onko mimitʼ hoṛ jauḍicʼkateko ńamlere hõ bar sae Dinar reakʼ piṭhạte hõ ohoko anṭaolena.”

⁸Jisuren celako modre mitʼ hoṛakʼ ńutum do Andreas tahẽkana. Uni do Simon Patrasren boehae tahẽkana.

⁹Uni do Jisui metadea, “Nonḍe mitʼṭen huḍiń koṛa ṭhen barea kạṭicʼ hako ar mõṛẽ goṭen jao reakʼ piṭhạ menakʼa, menkhan noate nunạkʼ hoṛakʼ do cetʼ hoyokʼa?”

¹⁰Jisui menkeda, “Hoṛko duṛupʼ ocokope.” Ona jaegare ḍher ghãs tahẽkana. Onate gadel hoṛ do ona cetanregeko duṛupʼena. Onḍe do mõṛẽ hajar herel hoṛko tahẽkana.

¹¹Ona tayom Jisu do onako piṭhạ ataṅkate Isore gun manao joharadea ar duṛupʼ akankoe hạṭińatʼkoa. Onkage uni do hako reakʼ hõe ematʼkoa. Ar okoe tinạkʼko khojketʼ unạkʼgeko ńamkeda.

¹²Adoko jom biyen khan Jisu do acʼren celakoe metatʼkoa, “Sarecʼakʼ kecakʼko jarwaepe jemon cetʼge alo nosṭokʼ.”

¹³Adoko jomketʼ tayom ona mõṛẽ goṭen piṭhạ reakʼ okako sarecʼ tahẽkan celako do onako halaṅ samṭaoketʼte gelbar khạclạkʼko perecʼkeda.

¹⁴Jisuakʼ noa hahaṛa kạmi ńelte gadel hoṛkoko menkeda, “Dhạrtite okoeṭakʼ nạbi hijukʼ reakʼ katha menakʼtae sạrige uni nạbi doe nuikangea.”

¹⁵Noate Jisui bujhạukeda, hoṛko do raje lạgitʼko jormoṭe lạgidokʼ kana. Onate acʼ eskarge uni do arhõ ona buruteye rakapʼ calaoena.

¹⁶Ạyupʼen khan Jisuren celako do doreão aṛeteko calaoena,

¹⁷ar mitʼṭen lạukạre decʼkate onko do Kapharnạhum nagrahate senokʼ lạgitʼ doreão paromokʼko ehopʼena. Unre do ńut akan tahẽkana, ar unhạbicʼ hõ Jisu do onko ṭhen bae hecʼakan tahẽkana.

¹⁸Ar ạḍi tạpise hoeyetʼ tahẽkante doreãore maraṅ maraṅ ḍheoko rakabokʼ kan tahẽkana.

¹⁹Ado pe se pon mail gan lạukạko calao idiakatʼ tahẽkanre, Jisu do doreão cetante taṛamate lạukạ ṭhen hijukʼkanko ńelkedea. Ar uni ńelte celako do ạḍi bạṛicʼko botorena.

²⁰Unre Jisui metatʼkoa, “Alope botorokʼa, iń kangeạń.”

²¹Celako do lạukạre Jisu deje sanaketʼkoa, ar okateko calakʼkan tahẽkan onḍeko seṭergotʼena.

²²Ado doreão eṭakʼ aṛere okoeko hoṛko teṅgo akan tahẽkan, dosar hilokʼ onko doko bujhạu daṛekeda je, laha hilokʼ onḍe do mitʼṭen chaḍa ar eṭakʼ jãhãn lạukạ do baṅ tahẽkana. Onko do arhõko bujhạukeda je, Jisu do acʼren celako sãote ona lạukạre bae decʼlena bickom cela motogeko sen akan tahẽkana.

²³Menkhan okare Probhu do gun manao joharkate hoṛko piṭhại jom ocoletʼko ona jaegare unre Tibiriạ nagraha khon eṭakʼ lạukạko hecʼena.

²⁴Onate hoṛko do tinreko ńelkeda je, Jisu se uniren cela okoege onḍe bạnukʼkoa unre onko do onako lạukạre decʼkate Jisu ńame lạgitʼ Kapharnạhumteko calaoena.

²⁵Onḍe seṭerkate onko do Jisu sendra ńamkedeteko metadea, “E Guru, tinre nonḍe dom hecʼakana?”

²⁶Jisui roṛ ruạṛatʼkoa, “Sạrigeń metapekana, hahaṛa kạmipe ńelletʼ iạtepe ńam baṛayediń kana ona do baṅ, bickom piṭhạkotepe jom bilen iạtepe ńam baṛayedińa.

²⁷Menkhan oka jomakʼ nosṭo giḍikʼ ona lạgitʼ uduṛ dhupuṛ baṛae reakʼ do cetʼ lab? Okaṭakʼ jomakʼ baṅ nosṭokʼ bickom jaejug jion tahentape ona lạgitʼ kạmipe. Ona do Manwa Hopongeye emapea, ente Isor Baba doe sạbud akada, noa kạmi reakʼ ektiạri do eken uniakʼge menakʼtaea mente.

²⁸Noa iạte Jisuko kulikedea, “Enḍekhan Isorakʼ kạmi lạgitʼ ale do cetʼ cekae hoyokʼ talea?”

²⁹Jisui metatʼkoa, “Isor okoeye kolakade unire pạtiạukʼge hoyokʼ kana Isorakʼ kạmi.”

³⁰Unreko kulikedea, “Enḍekhan cetʼlekan hahaṛa kạmim udukʼ alete amrele pạtiạu daṛekokʼa? Ar am do cetʼem kạmiya?

³¹Aboren hapṛamko ma hahaṅkarre Mannako jomletʼ. Sonot sostorre olakana, ‘Isor do serma khon jom lạgitʼ piṭhại ematʼkoa,’ ”

³²Jisu do onkoe metatʼkoa, “Sạrigeń metapekana, serma khon oka piṭhạpe ńamletʼ ona do Mose hõ bae emakatʼpea, menkhan ińren Babage sạri piṭhạ serma khone emapekana.

³³Serma khon pheḍ hecʼkate manwako okoe jione emakokan unikangeae Isore emokʼkan piṭhạ do.”

³⁴Ado hoṛko uniko metadea, “E Guru, enḍekhan jaoge noa piṭhạ emaleme baṛe.”

³⁵Jisui metatʼkoa, “Ińge ona jion reakʼ piṭhạ do. Okoe iń ṭhene hijukʼ uni do tis hõ baṅ reṅgejea. Ar okoe ińreye pạtiạukʼkan uni do tisge baṅ tetaṅea.

³⁶Iń doń lại akawatʼpea, ńel akadińạpe menkhan enhõ ape do bape pạtiạukʼkana.

³⁷Baba okoekoe emawạń onko jotoge iń ṭhenko hijukʼa. Okoe iń ṭhene hijukʼ uni do oka lekate hõ ohoń oḍok giḍilea,

³⁸ente ińakʼ sanaleka kạmi lạgitʼ do baṅ, bickom okoeye kol akadiń uniakʼ monejoṅ leka kạmi lạgitʼge serma khoniń pheḍ hecʼakana.

³⁹Okoeye kolakadiń uniakʼ sana do noage je, uni okoekoe emakawạdiń onko modre mitʼṭen hõ alo jemoniń atʼko bickom mucạtʼ dinreń jiwetʼ beretʼkoa.

⁴⁰Ińren Babawakʼ sana do nõkʼõe jemon Hoponko beṅgetʼae ar unire pạtiạukʼ mitʼke mitʼko do jaejug jion tahentako. Ińge onko do mucạtʼ dinreń jiwetʼ beretʼkoa.”

⁴¹Unre Jihudi mukhiạko do uni upạrteko karacʼ kurucʼena, ente Jisui metatʼko tahẽkana, “Serma khon oka piṭhạ pheḍ hecʼakan ona piṭhạ doń ińkangea.”

⁴²Khan onko mukhiạko do memenko ehopʼena, “Nũi do cetʼ Josephren hopon Jisu doe baṅkana? Nuiren go-babakin ma coṅ bon oromakatʼ kinge. Enḍekhan cekateye meneda, ‘iń do serma khoniń pheḍ hecʼakana?’ ”

⁴³Jisui metatʼkoa, “Ape apere alope karacʼ kurujokʼa.

⁴⁴Ińren Baba, one okoeye kolakadiń uni bae orle khan okoe hõ iń ṭhen ohoe hecʼ daṛelena. Ar ińge mucạtʼ dinre uniń jiwetʼ beredea.

⁴⁵Nạbikoakʼ puthire ol akana, ‘onko sanamkoge Isor ṭhen sikhạunako ńama.’ Baba ṭhen khon ańjomkate okoeye cetʼakatʼ unige iń ṭhene hijukʼa.

⁴⁶Baba do okoe hõ bako ńel akadea, eken okoe Isor ṭhen khone hecʼakan unigeye ńelakadea.

⁴⁷Sạrigeń metapekana, jãhãege ińreye pạtiạukʼ uni do unrege jaejug jione ńama.”

⁴⁸“Ińge jion reakʼ piṭhạ do.

⁴⁹Aperen hapṛamko do hahaṅkarre Mannako jomleda ar enhõko gocʼena.

⁵⁰Menkhan noa kangea ona piṭhạ do one oka serma khon pheḍ hecʼakan, jemon manwa ona jomkate gujukʼ khon bańcaoko ńam.

⁵¹Ińge ona jiwetʼ reakʼ piṭhạ oka do serma khon pheḍ hecʼakan. Ar okoe noa piṭhại jom uni do jaejug hạbicʼ jione ńama. Ińakʼ hoṛmoge ona piṭhạ do. Manwa jemon jionko ńam ona lạgitʼ iń do ińakʼ hoṛmoń emokʼa.”

⁵²Noa katha ańjomkate Jihudi mukhiạko do reṭe peṭekʼko ehopʼena. Onko doko menkeda, “Cekate nui hoṛ do acʼakʼ hoṛmo jom lạgitʼe em daṛekebona?”

⁵³Jisui metatʼkoa, “Sạrigeń metapekana, Manwa Hoponakʼ jel bape jomle khan ar uniakʼ mãyãm bape ńule khan apere jion do bạnukʼanaṅ.

⁵⁴Jãhãege ińakʼ jele jom ar mãyãme ńũi uni do jaejug jione ńama, ar mucạtʼ dinre uni doń jiwetʼ beredea.

⁵⁵Ińakʼ jel do sạri jomakʼ kana ar ińakʼ mãyãm do sạri ńũiyakʼ kana.

⁵⁶Okoe ińakʼ jele jom ar ińakʼ mãyãme ńũi uni do ińreye tahẽnkana ar iń hõ unire.

⁵⁷Iń do jiwetʼicʼ Babageye kolakadińạ ar uni iạtege jiwetʼ minạńa. Onkage iń jojomicʼ hõ iń hotete jiwetʼe tahena.

⁵⁸Noage serma khon pheḍ hecʼakan piṭhạ do. Aperen hapṛamko okaṭakʼ piṭhạ jomkateko gocʼen onkan piṭhạ noa do baṅkana. Noa okoeye jom uni do jaejug hạbicʼ jione ńama.

⁵⁹Kapharnạhum reakʼ sunạgogreye cetʼako kan tahẽkanre Jisu do noa kathae roṛleda.

⁶⁰Ar uniren celako modre ḍherkoge noa katha ańjomkateko menkeda, “Noa do ạḍi keṭecʼ sikhạuna kana. Ar noa do okoeye ańjom daṛekea?”

⁶¹Jisu do acʼren celako noa reakʼ karacʼ kurujokʼkane bujhạuketʼkoa. Onate uni doe metatʼkoa, “Noa iạte cetʼ monrepe tạkijokʼ kana?

⁶²Enḍekhan Manwa Hopon pạhil okareye tahẽkan onḍe rakapʼ calakʼkanpe ńellere ape do cetʼpe mena?

⁶³Manwa hoṛmo do oka kaj reakʼ hõ baṅkana; sonot Jiuge jione emokʼkana. Okako katha ape ṭheniń roṛakatʼ ona do jiu ar jion kana.

⁶⁴Menkhan ape modre nonkanko menakʼkoa okoe do ińre bako pạtiạukʼkan.” Okoeko Jisure bako pạtiạukʼkan ar okoe hoteteye soprot ocokʼ, ona do Jisu pạhil khongeye baḍaekan tahẽkana.

⁶⁵Ona iạteye menkeda, “Onateń metapekana, Ạpuń daṛe bae emape khan okoe hõ iń ṭhen do ohope hecʼ daṛelena.”

⁶⁶Jisuakʼ noa katha iạte celako modre ḍherkoge pạcena ar uni tulucʼ ar bako dãṛãleda.

⁶⁷Onate Jisu do onko gelbar celakoe metatʼkoa, “Ape hõ cetʼ ruạṛ joṅpe ńamkana?”

⁶⁸Simon Patras do Jisui metadea, “E Probhu, ale do okoe ṭhenle calakʼa? Jaejug jion reakʼ katha ma coṅ am ṭhenge.

⁶⁹Alele biswạs akana arle baḍae akada, am do Isorren uni sonoticʼ kanam.”

⁷⁰Unre Jisu do onkoe metatʼkoa, “Ape gelbar goṭenge cetʼ bạń bachao akatʼpea? Menkhan ape modre mitʼṭen bạiri menaea.”

⁷¹Jisu do Simon Iskariotren hopon Jihudạwakʼ kathae menetʼ tahẽkana, ente unigeye soprote lạgidokʼkan tahẽkana. Ar uni do gelbarko modren mitʼ hoṛe tahẽkana.