Read Santali Johan 8 Bible Online

Johan 8 - Santali bible

Johan 8

¹Inạ tayom hoṛko do apan ạpin oṛakʼteko senbaṛayena, menkhan Jisu do Jạitun buruteye rakapʼ calaoena.

²Dosar hilokʼ Jisu do ạḍi setakʼre arhõ mundilteye hecʼen khan sanam hoṛ uni ṭhenko hecʼena. Unre Jisu do duṛupʼkate onko cetʼakoe ehopʼena.

³Adoe cetʼakokan tahẽkanre sostor baḍaeko ar Phạrusiko do mitʼṭen maejiuko ạgukedea. Uni maejiu do laṭghaṭreye sapʼ ocoakan tahẽkana. Onko do uni maejiu talareko teṅgokedete Jisuko metadea, “E Guru, nui maejiu do laṭghaṭreye sapʼ akana onkae tulucʼge.

⁴

⁵Ạn-ạrire Mose do nonkan maejiu dhirite tiń gocʼko reakʼe hukum akatʼbona. Menkhan am do cetʼem meneda?”

⁶Onko do Jisu biḍạue lạgitʼ noa kathako menkeda, jemon dusire paṛaoe lạgitʼ mitʼṭen karonko ńam daṛeakʼ. Unre Jisu do tumbutʼkate kạṭupʼte otre olokʼe ehopʼena.

⁷Ado kulitegeko tahẽyen khan uni do sojheyenteye metatʼkoa, “Apeko modre okoe bae kại akatʼ unige pạhilre dhiriteye tiń maṛaṅema.”

⁸Noa tayom uni do arhõe tumbutʼente otre olokʼe ehopʼena.

⁹Noa katha ańjomkate onko mukhiạko modre haṛam khon ehopʼkate mitʼ mitʼte jotoko calao cabayena. Eken Jisu eskargeye sarecʼ tahẽyena, ar acʼ samaṅre do uni maejiuge teṅgo akan.

¹⁰Jisu doe sojheyente uni maejiue metadea, “Okayenako onko do? Okoege cetʼ sạjại ńam lek mente bako bicạr dusiletʼmea?”

¹¹Uni maejiue roṛ ruạṛkeda, “Okoe hõ baṅ Probhu.” Unre Jisui menkeda, “Iń hõ bạń dusiyetʼmea. Do calakʼme ar kạire jion alom khemaoa.”

¹²Jisu do arhõ hoṛkoe metatʼkoa, “Ińge dhạrti reakʼ marsal. Okoe ińakʼ horteye calakʼ uni do tis hõ ńutre bae taṛama, bickom jion reakʼ marsale ńama.”

¹³Onate Phạrusiko do Jisuko metadea, “Amakʼ goha do sạriakʼ do baṅkana, ente am do apnar reaṅ goham emeda.”

¹⁴Jisui roṛ ruạṛatʼkoa, “Iń do apnarte gohań emetʼkanre hõ ińakʼ goha do sạrigea, ente oka khoniń hecʼakana ar okateń calakʼkan ona doń baḍaegea. Menkhan ape do bape baḍaea oka khoniń hecʼakana ar okateń calakʼa mente.

¹⁵Manwa cetʼlekako bicạretʼkan onkage ape hõpe bicạretʼ kana, menkhan iń do okoe hõ bạń bicạretʼkoa.

¹⁶Ar jãhãtis iń bicạrlere hõ ińakʼ bicạr do sạrigea, ente iń do bạń eskara. Iń ma minạńge ar okoeye kolakadiń uni ińren Baba hõ soṅgete menaea.

¹⁷Apeakʼ ạnre ol menakʼa, bar hoṛ mitʼ gohakin emlekhan ona do sạrigea.

¹⁸Iń do iń reakʼ gohań emeda, ar ińe kolakadiń Baba hõ iń reakʼ gohae emeda.”

¹⁹Phạrusikoko metadea, “Amren Baba do okare menaea?” Jisui roṛ ruạṛatʼkoa, “Ape do iń hõ bape baḍae akadińạ ar ińren Baba hõ bape baḍae akadea. Ente ińpe baḍaeliń khan honaṅ ińren Baba hõpe baḍaekea.”

²⁰Jisu do mundilreye cetʼakokan tahẽkan jokhecʼ dan samaṅokʼ jaegare noa doe metatʼkoa. Menkhan un hạbicʼ uniakʼ okte baṅ hoeakantae tahẽkante okoe hõ bako sapʼledea.

²¹Jisu do arhõ Phạrusikoe metatʼkoa, “Iń doń calakʼkana. Arpe ńam baṛańa, menkhan ape do apeakʼ kạirepe gujukʼa. Ar okateń calakʼkan onḍe do ohope sen daṛelena.”

²²Unre Jihudi mukhiạko menkeda, “Acʼtegeye gujukʼa se cetʼ? Enteye meneda, ‘iń okateń calakʼkan onḍe do bape sen daṛeakʼa.’ ”

²³Jisui metatʼkoa, “Iń do coṭ khoniń hecʼ akana ar ape do latar khonpe hecʼakana. Ape do noa dhạrtiren kanape, menkhan iń do noa dhạrtiren doń baṅkana.

²⁴Onateń metapekana, ape do apeakʼ kạirepe gujukʼa. Ar ińkangeạń mente bape pạtiạukʼ kan khan apeakʼ kạiregepe gujukʼa.”

²⁵Noa iạte mukhiạko do Jisuko kulikedea, “Am dom okoe kana?” Jisui metatʼkoa, “Pạhil khon okań metapekan iń doń uni kangea.

²⁶Ape roṛpe reaṅ ar bicạrpe lạgitʼ ạḍi okocʼge menakʼtińạ. Menkhan okoeye kolakadiń unire eṛeteakʼ do bạnukʼa; ar uni ṭhen khon okań ańjomakatʼ onage manwakoń lạiako kana.”

²⁷Onko do bako bujhạleda Jisu do Baba reaṅgeye lạiako kana mente.

²⁸Onate Jisui metatʼkoa, “Manwa Hopon tinre coṭtepe rakabea unrepe baḍae daṛeakʼa, iń doń uni kangea. Ar noa hõpe bujhạu daṛeakʼa iń do ińte cetʼge bạń kạmikana, bickom Baba okae cetʼ akawạdiń onageń roṛeda.

²⁹Okoe ińe kolakadiń unige iń sãote menaea. Uni do eskar bae bạgi akawạdińạ, ente okaṭakʼ kạmiye kusiyakʼkan onage siń sạṭupʼ iń kạmiyeda.”

³⁰Jisu do noakoe galmarao akokan tahẽkanre ḍher hoṛge unireko pạtiạuena.

³¹Ado okoe Jihudikoko pạtiạuade Jisu do onkoe metatʼkoa, “Ińakʼ katha lekape senlen khan sạrige ińren celako kanape.

³²Ona chaḍa ape do sạriakʼtetʼpe baḍae daṛeakʼa, ar ona sạriakʼtetʼge ape doe sạdhinpea.”

³³Unre Jihudi mukhiạko do Jisuko metadea, “Ale do Abrahamren bõs kanale; ar tisge okoeren golam hõ bale hoeakana. Am do cekatem meneda, ale dole sạdhin ocokʼa?”

³⁴Jisui roṛ ruạṛatʼkoa, “Sạrigeń metapekana, okoe kạireko tahenkan onko sanamkoge kạiren golam kanako.

³⁵Golam do oṛakʼre jaejug bae tahena menkhan Hopon do jaejug hạbicʼe tahena.

³⁶Onate Isorren Hopone sạdhinlepere sạrige ape do sạdhinpe hoyokʼa.

³⁷Baḍaegeạń Abrahamren bõsko kanape, menkhan enhõ ape do gojeńpe menjoṅkana, ente ińakʼ katha do apeakʼ ontorre jaega bae ńameda.

³⁸Iń do ińren Baba ṭhen okań ńelakatʼ onageń roṛeda, ar ape do aperen baba ṭhen khon okape ańjomakatʼ onagepe kạmi kana.”

³⁹Onate onko Jihudi mukhiạko do Jisuko metadea, “Abraham doe aleren baba kana.” Jisui metatʼkoa, “Ape do Abrahamren hoponkope hoelen khan Abraham lekagepe kạmikea.

⁴⁰Isor ṭhen khon oka sạriakʼtetʼ iń baḍae akatʼ onage ape doń lạiape kana, ar enhõ gojeńpe menetʼkana; menkhan Abraham do nonka bae kạmileda.

⁴¹Ape do aperen baba okae kạmikan ape hõ onagepe kạmikana.” Onko do Jisuko metadea, “Loṭghuṭire do bale janam akana. Aleren do mitʼ goṭenge baba menae talea, uni do Isorge.”

⁴²Jisui metatʼkoa, “Isor do sạrige aperen babae hoelentape khan ińpe dulạṛkińạ, ente iń do Isor khoniń hecʼ akana ar ńitokʼ do ape talare minạńạ. Iń apnarte do bạń hecʼakana, menkhan unigeye kolakadińạ.

⁴³Cetʼ iạte ińakʼ kathako bape bujhạueda? Ente ape do ińakʼ roṛ bape sahao daṛeakʼ kana.

⁴⁴Soetange aperen baba do, ar ape do uniren hoponko kanape; onate uniakʼ sana purạupe menjoṅ kana. Soetan do pạhil khongeye khũniạhi kana. Uni do tisge sạriakʼre bae teṅgo akana, ente unire do sạriakʼtetʼge bạnukʼa. Uni do eṛe kathae roṛre acʼ khongeye roṛa, ente uni doe eṛeyicʼ kana ar sanam lekan eṛeakʼ do uni khonge janam akana.

⁴⁵Menkhan sạri kathań roṛetʼte ape do bape pạtiạuạń kana.

⁴⁶Ape modre kại hoṛ kạnạń mente jãhãeye sạbud daṛekińạ? Ar sạriakʼ iń roṛetʼ khan cedakʼ bape pạtiạuạń kana?

⁴⁷Okoe hoṛ doe Isorren kan, uni do Isorakʼ kathageye ańjoma. Ape dope baṅkante Isorakʼ katha bape ańjomeda.”

⁴⁸Unre Jihudi mukhiạko do Jisuko metadea, “Ale do cetʼ ṭhik kathage bale meneda baṅma, am dom Samariạ kana ar amre do bhut menaea mente?”

⁴⁹Jisui roṛ ruạṛatʼkoa, “Ińre bhut do bạnuea. Iń do ińren Babań manot edekana, menkhan ape dope be manot edeńkana.

⁵⁰Iń do apnarakʼ sabasi ńam lạgitʼ do bạń kurumuṭu kana, menkhan mitʼ goṭen menaea one okoe do manote emạńkan, ar uni kangea bicạricʼ do.

⁵¹Sạrigeń metapekana, jãhãege ińakʼ katha leka senokʼe menjoṅ enḍekhan uni do tis hõ bae gujukʼa.”

⁵²Jihudi mukhiạko do uniko metadea, “Ale do ńitokʼ sạrigele bujhạueda je, amre do bhut menaea. Abraham ar nạbiko hõko gocʼena, ar am dom meneda, ‘jãhãege ińakʼ katha lekae senokʼ uni do tis hõ bae gujukʼa.’ Am do cetʼ baba Abraham khon hõm maraṅgea?

⁵³Uni mae gocʼenge ar nạbiko hõko gocʼena. Am do apnarte celeyem benaokʼ kana?”

⁵⁴Jisui roṛ ruạṛatʼkoa, “Iń do ińtegeń sabasikʼkan khan ona reakʼ do cetʼ damge bạnukʼa. Ińren Baba, one okoe do aperen Isor mentepe dạbiyetʼkan unige iń do manote emạń kana.

⁵⁵Ape do tis hõ bape baḍae akadea, menkhan iń doń baḍae edekana. Ar bạń baḍae akadea menteń menlekan, ape leka eṛeyicʼgeń hoyokʼa. Menkhan iń doń baḍaeyede kana ar uniakʼ katha lekageń calakʼ kana.

⁵⁶Aperen baba Abraham hõ ińakʼ dinko ńel lạgitʼe hulạslena. Menkhan uni doe ńelleda ar kusi hõe kusilena.”

⁵⁷Jihudi mukhiạko do Jisuko metadea, “Amakʼ umer ma mõṛẽgel bochor hõ baṅ hoeakan, ar am do cetʼ Abrahamem ńelakadea?”

⁵⁸Menkhan Jisui metatʼkoa, “Sạrigeń metapekana, iń do Abraham ạuriye janamokʼ khonge minạńạ.” Noa katha ańjomkate mukhiạko do Jisu tińe lạgitʼ dhiriko halaṅkeda. Menkhan Jisu do apnartetʼe danaṅente mundil khone oḍok calaoena.