Read Santali Aposkạmi 1 Bible Online

Aposkạmi 1 - Santali bible

Aposkạmi 1

¹Manotan Theophil, Jisu sermate ạuriye rakapʼ ocokʼ hạbicʼ okakoe kạmiletʼ are cetʼkokan tahẽkan ona reakʼ sanamakʼge ińakʼ lahateakʼ puthireń ol akada. Uni do okoeko celakoe bachaowan tahẽkan, onko do acʼ sermate ạuriye rakapʼ ocokʼre sonot Jiu hoteteye hukumatʼko tahẽkana.

³Uni do acʼakʼ duk jom tayom nokoko hoṛ ṭhengeye ńel ocolena ar uni je jiwetʼge menae ona reakʼ ạḍi utạr biswạsteakʼ pormane emakada. Uni do pon gel din hạbicʼ celako ṭhene ńel ocoyente Isorakʼ raj reaṅe lạiatʼko tahẽkana.

⁴Onako oktere mitʼ din Jisu do celako sãoteye tahẽkanre noae hukumatʼko tahẽkana, “Ape do Jerusalem alope bạgiakʼa, bickom ińren Babawakʼ gokʼa oka dan reakʼ katha iń ṭhenpe ańjomakatʼ ona lạgitʼ koyokʼ hor akae tahenpe.

⁵Johan do dakʼteye bạptisetʼko tahẽkana, menkhan thoṛa din khange ape do Babawakʼ ona gokʼakʼ lekate sonot Jiutepe bạptis ocokʼa.”

⁶Ado celako hecʼ jarwakate Jisuko kulikedea, “E Probhu, niạ jokhecʼ am do cetʼ Israelko rajosṭim teṅgo ruạṛakoa?”

⁷Jisui metatʼkoa, “Okaṭakʼ din se okte Baba do acʼakʼ ektiạrireye dohoakatʼ ona do bape baḍae ocoakana.

⁸Menkhan sonot Jiu apereye hecʼlenre ape do daṛepe ńama, ar Jerusalem, goṭa Jihudạ, Samariạre, hẽ, dhạrti reakʼ mucạtʼ simạ hạbicʼge ińren gohakope hoyokʼa.”

⁹Noa kathae lạiatʼko khan celako samaṅrege Jisu doe rakapʼ ocoyena ar mitʼṭen rimil reakʼ danaṅteye calaoena.

¹⁰Ado Jisu coṭ secʼe rakapʼ calakʼkan tahẽkanre celako do serma secʼko koyokʼ uricʼ akatʼ tahẽkana. Ar unre ponḍ kicricʼ horokʼ akatʼ bar hoṛ do celako ṭhen teṅgoyentekin menkeda,

¹¹E Gạlilren hoṛko nonḍe teṅgokate serma secʼ do cedakʼpe beṅgetʼ akada? Okoe ape ṭhen khone rakapʼ ocoyen ar cetʼleka sermate calakʼkanpe ńelkede onkage uni doe ruạṛ hijukʼa.”

¹²Unre celako do jạitun buru khon Jerusalemteko ruạṛ hecʼena. Jerusalem nagraha khon noa buru do mitʼ kilomiṭar saṅgińre tahẽkana.

¹³Ado nagrahateko boloyen khan onko do oka koṭha kandhareko tahẽkan onḍeko rakapʼena. Noko celakoakʼ ńutum do Patras, Johan, Jakob ar Andreas, Philip ar Thoma, Bartholomae ar Mathae, Alphaeren hopon Jakob ar moulobadi Simon ar Jakobren hopon Jihudạ.

¹⁴Onko jotoge biswạsi maejiuko ar Jisu eṅgat Mạriạm ar uniren boehako tulucʼ mitʼ monte koejoṅre jamaṛ akanko tahẽkana.

¹⁵Onako dinre Patras do Mạsire pạtiạu akan mitʼ sae bargel hoṛko talare teṅgoyente menkeda,

¹⁶“E boehako, ḍher din lahare sonot Jiu do Dạud rajakʼ mocate Jihudạ reaṅ oka kathae roṛletʼ, sonot sostor reakʼ ona katha do purạukʼ reakʼ jạruṛ tahẽkana. Ar okoeko Jisuko sapʼlede, onko do uni Jihudạge hore udukʼatʼko tahẽkana.

¹⁷Uni do alerenge mitʼ hoṛe tahẽkana ar ale sãote kạmi lạgitʼe bachao ocolena.”

¹⁸Bạṛicʼ kạmi iạte oka ṭakae ńamletʼ onate thoṛa hasae kirińkeda, ar onḍe uni doe tupucʼ ńũrenteye ṭhu oṛecʼena, ar uniakʼ lacʼko posakʼ oḍokentaea.

¹⁹Jerusalemren sanamkoge ona katha doko ańjomleda. Onate onkoakʼ pạrsite noa jumi do Akeldama se mãyãm reakʼ goḍako metakʼkana.

²⁰Patrase menkeda “Sonot sostorre sereńko reakʼ puthire olakana, uniakʼ oṛakʼ do ujạṛokʼma; onare okoe hõ aloko tahenma, ar uniakʼ cetan hudạ do eṭakʼ hoṛe hataoma.

²¹“Onate Jisu je gocʼko khone jiwetʼ beretʼ akan ona reakʼ goha lekate eṭakʼ ar mitʼ hoṛ aboren, metakʼme apostol hudạre hataoe hoyokʼa. Johane bạptisetʼkokan tahẽkan khon ehopʼkate abo ṭhen khon ạuriye rakapʼ ocokʼ hạbicʼ, Probhu Jisu tinạkʼ din abo talareye tahẽkan unạkʼ din okoe hoṛ do aboakʼ dolreko tahẽkan, uni hoṛ do jemon onko modren mitʼ hoṛe hoyokʼ.”

²³Unre celako do bar hoṛko teṅgoketʼkina, Barsabako metae Joseph, one okoe do Justuse bahnayen ar Mạthiạ.

²⁴Ona tayom onko do noa menkateko koekeda, “E Probhu am do joto hoṛakʼ ontorem baḍaea. Jihudạ hõ acʼakʼ sạjại iạte apostol kạmiye aṛakʼ giḍikeda. Onate ńitokʼ nukin bar hoṛ mod khon ona hudạ lạgitʼ okoeṭakʼem bachao akawan uni baṛe udukʼ aleme.”

²⁶Adoko gulibãṭketʼ khan Mạthiạ ńutum rakapʼena. Onate Mạthiạ do onko gelmitʼ apostolko sãoteye lekha mitʼena.