Read Santali Aposkạmi 10 Bible Online

Aposkạmi 10 - Santali bible

Aposkạmi 10

¹Kạisạriạ nagrahare Kornelius ńutuman mitʼṭen hoṛ do Itạliạ Palṭon dolren subedare tahẽkana.

²Uni do Jihudi hoṛe baṅkanre hõ Isor bhokti hoṛe tahẽkana ar acʼ gharońjren sanamkoge Isorko sewawaekan tahẽkana. Uni do reṅgecʼ orecʼko ṭaka-poesakoe dan akokan tahẽkana ar Isor ṭhen jaogeye koejoṅkan tahẽkana.

³Mitʼ din pe baja okte uni do mitʼṭen dorsone ńelkeda. Uni do pusṭạuteye ńelkeda Isorren mitʼṭen goḍet do hecʼkateye metaekana, “E Kornelius.”

⁴Kornelius doe botorente serma goḍet secʼ beṅgetʼkateye menkeda, “Roṛme, Probhu.” Serma goḍete menkeda, “Amakʼ koejoṅ ar reṅgecʼ orecʼkom dan akokan reakʼ katha do sermate seṭer akana ar Isor do onae disạ dohoakada.

⁵Ńitokʼ am do Joppa nagrahate hoṛ kolkom, ar Simon, one okoe do Patrasko metae uni hoho ạguyem. Onḍe jalapuri aṛere ar mitʼṭen Simon menaea.

⁶Uni do harta reakʼe kạmiya. Patras do uni Simonakʼ oṛakʼrege menaea.”

⁷Ado okoeṭakʼ serma goḍet sãoteye galmaraokan tahẽkan uniye calaoen khan Kornelius do barea guti ar mitʼṭen goṛoyicʼ palṭone hohoadea. Nui palṭon hõ Isor bhokti hoṛe tahẽkana.

⁸Ar sanamakʼe lại bujhạuatʼko khan uni do Joppateye kolkatʼkoa.

⁹Dosar hilokʼ onko hoṛ tinre Joppa nagraha secʼko hijukʼkan tahẽkana unre tikin okte tahẽkana. Un jokhecʼ Patras do koejoṅ lạgitʼ chatteye rakapʼena.

¹⁰Unre Patras do ạḍi reṅgecʼkedea ar thoṛa jojome menana. Ar tinre jomakʼ tearokʼkan tahẽkana unre mitʼṭen dorson paṛaoadea.

¹¹Unre uni do serma jhicʼakan ar maraṅ mitʼṭen cador leka pon konare sapʼakatʼ otre pheḍ hijukʼkane ńelkeda.

¹²Onare joto lekan janwarko, ar otren leńokʼko ar coṭren uḍạukʼkoko tahẽkana.

¹³Inạ tayom okoe coṅ roroṛkane ańjomkedea, “E Patras, ma beredokʼme, ar gocʼkate jomkom.”

¹⁴Patrase menkeda, “Baṅa, Probhu, ohoge hoelena. Besapha ar chutakʼ jãhãnakʼge tis hõ bạń jomakada.”

¹⁵Unre arhõe ańjomkeda, “Isor okakoe sapha akatʼ ona do chutakʼ alom metakʼa.”

¹⁶Onkage pe dhao hoyen tayom ona cador do sermate rakapʼ ocoyena.

¹⁷Patras do okaṭakʼ dorsone ńelketʼ ona reakʼ cetʼ mane hoedaṛekokʼa menteye hudisokʼkan tahẽkanrege, Korneliuse kolakatʼko hoṛ do Simonakʼ oṛakʼ sendra ńamkate duạr ṭhenko teṅgoyena.

¹⁸Onko do hohokateko kuliyana, “Simon, okoe do Patrashõko metaekan, uni do cetʼ nonḍeye tahenkana?”

¹⁹Patras do unhõ dorson reakʼ kathae hudiskan tahẽkana, unre sonot Jiu do uniye metadea, “Ńelme, pe hoṛ amko khojetʼmea.

²⁰Ma beretʼkate latarte pheḍokʼme. Ar jãhãnakʼ begor digdhạte onko soṅgete calakʼme, ente ińge onko doń kolakatʼkoa.”

²¹Unre Patras doe pheḍ hecʼente onko hoṛkoe metatʼkoa, “Ape okoepe ńam baṛayede uni hoṛ doń ińkangea. Ape do cetʼ lạgitʼpe hecʼakana?”

²²Onko hoṛko menkeda, “Subedar Korneliusge ale doe kolakatʼlea. Uni do mitʼṭen dhorom ar Isor bhokti hoṛ kanae. Ar sanam Jihudikoge uniko sarhaoede kana. Isorren mitʼṭen goḍet do uniye hukumade tahẽkana jemon acʼakʼ oṛakʼte ame hoho idi ocomete amakʼ kathakoe ańjomtam.”

²³Unre Patras do oṛakʼ bhitrite onko hoṛe hoho aderketʼkoa ar onkoakʼ tahen jaega ar jom-ńu reakʼe bebostawatʼkoa. Ado dosar hilokʼ Patras do onko tulucʼe senena. Ar Joppa nagraharen adom biswạsi boehako hõ uni sãoteko sen torayena.

²⁴Ar tesar hilokʼ do Kạisạriateko seṭerena. Unre Kornelius do acʼren peṛa ar gateko hoho jarwakate onko lạgitʼe koyokʼ horakatʼ tahẽkana.

²⁵Ado Patras oṛakʼteye boloyen khan Kornelius do uniakʼ ti jaṅgare giḍiyente uniye ḍobokʼadea.

²⁶Menkhan Patras do uni beretʼkedeteye metadea, “Ma beretʼme, iń hõ coń manwakange.”

²⁷Kornelius tulucʼ galmarao galmaraote Patras do bhitriteye boloyen khan onḍe aema hoṛ jarwa akane ńelketʼkoa.

²⁸Uni doe metatʼkoa, “Ape mape baḍaege je, mitʼṭen Jihudi hoṛ do mitʼṭen boṅgan hoṛ sãote gatekʼ se uni sãote ńapamokʼ hõ aleakʼ dhorom reakʼ ạn-ạri birudkana. Menkhan Isor do ińe udukʼ akawạdińạ, okoe hõ besapha se chut mente metako do lek baṅkan tińạ.

²⁹Onate tinre ińpe hohowạdińa unre begor ạnḍuṅte nonḍeń hecʼakana. Ar ńitokʼ iń kuliyetʼpea, cedakʼ iń dope hoho akadińạ?”

³⁰Unre Korneliuse menkeda, “Pon din lahare ṭhik niạ jokhecʼ pe baja okte iń do ińakʼ oṛakʼreń koejoṅkan tahẽkana. Unre ackage pĩṛĩtʼ pĩṛĩtʼ ponḍ kicricʼ horokʼ akatʼ mitʼṭen hoṛ iń samaṅre hecʼenteye metadińạ,

³¹‘Kornelius, Isor do amakʼ koejoṅe ańjom akada ar reṅgecʼ orecʼkom danakokan reakʼ katha hõ uni doe disạ akada.

³²Ado ńitokʼ Joppate hoṛ kolkom, ar Simon, okoe do Patrasko metaekan uni hoho ạguyem. Uni do jalapuri aṛere Simon camarakʼ oṛakʼreye ḍera akana.’

³³Onate iń do am hoho ạgume lạgitʼ unrege hoṛiń kolketʼkoa, ar amem hecʼente dom bhageakatʼgea. Nonḍe ale do ńitokʼ sanamkoge Isor samaṅre menakʼlea. Ar Probhu okaṭakʼ ale ṭhen galmarao lạgitʼe hukum akatʼme ona jotowakʼgele ańjoma.”

³⁴Unre Patras do roroṛe ehopʼena, “Iń do ńitokʼ sạrigeń bujhạu daṛeakʼ kana, Isorakʼ mẽtʼãhã samaṅre do jotogeko somangea.

³⁵Ar mimitʼ jạtko mod khon okoe do uniko botoraekan ar uniakʼ mẽtʼãhã samaṅre dhoromko kạmikan uni do onkoe ataṅkoa.

³⁶Isor do Israelko ṭhen noa bhage sombate kolletʼ tahẽkana je, Jisu Mạsi, one okoe do sanamkoren Probhu kane, uni hotetege suluk do ńamokʼa mente.

³⁷Ar Johan do hoṛkoakʼ bạptisma ataṅ jạruṛa menteye porcarketʼ khan Gạlil khon ehopʼkate goṭa Jihudạre okako hoelen ona katha mape baḍaege.

³⁸Ar noa hõpe baḍaegea je, Isor do Nasaretren Jisuge sonot Jiu ar daṛeteye ojokʼlede tahẽkana. Isor do uni tulucʼe tahẽkante bhageakʼkoe kạmiyetʼ tahẽkana ar Soetanakʼ tire okoeko kosṭoko ńametʼkan tahẽkan onko sanamkoe bogeyetʼko tahẽkana.

³⁹“Jihudikoakʼ disạmre ar Jerusalemre uni okakoe kạmiletʼ onaren gohako do ale kangeale. Hoṛko do krusre akakate uniko gocʼkedea.

⁴⁰Menkhan Isor do pe din hilokʼre gocʼko khon uniye jiwetʼ beretʼkedea ar sodorokʼ reakʼe danadea.

⁴¹Menkhan sanamko do bako ńelledea, eken okoe gohako Isor do lahareye bachao dohoakatʼko tahẽkan onkogeko ńelledea, metakʼme gocʼko khon jiwetʼ beretʼ tayom ale do uni sãotele jom-ńũleda ar alege unile ńelledea.

⁴²Uni doe hukum akawatʼlea jemon Jihudiko ṭhenle porcar ar gohale em baṅma, Isor do unige jiwetʼko ar gocʼko bicạrko lạgitʼe niṭ akadea mente.

⁴³Ar sanam nạbikoge uni reaṅ noa gohako emetʼkana, unire pạtiạukʼ mitʼke mitʼ hoṛ do uniakʼ ńutumte kại reakʼ ikạko ńama.”

⁴⁴Patras do unhõ kathae roroṛkan tahẽkanre okoe kathako ańjomkan tahẽkan onko sanamkore sonot Jiu doe hecʼena.

⁴⁵Ar okoe Jihudi biswạsiko Patras sãoteko hecʼlen onko do be-Jihudiko cetanrehõ sonot Jiu reakʼ dan dul oḍoken ńelteko hahaṛayena.

⁴⁶Onko do onako bujhạu daṛeada ente noko be-Jihudiko hõ eṭakʼ eṭakʼ pạrsite roroṛkan ar Isor sabasiaekanko ańjomketʼkoa. Unre Patrase menkeda,

⁴⁷“Dakʼte bạptisokʼ lạgitʼ noko hoṛ do cetʼ jãhãeye akoṭ daṛekea? Onko hõ coṅ abo leka sonot Jiuko ńamakade.”

⁴⁸Unre uni do onko hoṛko Jisu Mạsi ńutumte bạptisokʼ lạgitʼe hukumatʼkoa. Ar ona tayom onko do ako ṭhen thoṛa din tahen lạgitʼ Patrasko nehõradea.