Read Santali Aposkạmi 11 Bible Online

Aposkạmi 11 - Santali bible

Aposkạmi 11

¹Boṅgan hoṛ jạtrenko hõ Isorakʼ kathareko pạtiạu akana mente ona katha do apostolko ar goṭa Jihudạren biswạsi boehako hõko ańjomkeda.

²Onate Patras do Jerusalemteye hecʼen khan biswạsiko modren okoekoko khatna ocoakan tahẽkan onko do uni dusikedeteko metadea,

³“Am do begor khatna akan hoṛkoakʼ oṛakʼte senkate onko soṅgem jom-ńũyetʼ kana.”

⁴Unre Patras do pạhil khon ehopʼkate cetʼ cetʼko hoelen ona mitʼ mitʼte bujhạuatʼkoteye metatʼkoa,

⁵“Joppa nagrahareń koejoṅkan tahẽkanre mitʼṭen dorsoniń ńelkeda. Iń doń ńelkeda mitʼṭen cador lekanakʼ pon konare sapʼ akatʼ serma khon iń ṭhen pheḍ hecʼena.

⁶Ar mońjteń ạri bạndhiketʼ khan onare ạḍi lekan janwarko, bir janwarko, leńokʼko ar coṭren cẽṛẽko menakʼkoa menteń ńelkeda.

⁷Ar okoe coṅ memeniń ańjomkedea, ‘E Patras, ma beredokʼme ar gocʼkate jomkom.’

⁸Iń doń menkeda, baṅa, Probhu, ohoge hoedaṛelena. Besapha ar chutakʼ jãhãnakʼge tishõ ińakʼ mocare do baṅ bolo akana.

⁹“Ona tayom serma khon dosar dhao roṛena, ‘Isor okaṭakʼe sapha akatʼ ona do be sonotakʼ alom metakʼa.’

¹⁰Nonkage pe dhao hoyena, ar ona tayom jotowakʼ do arhõ sermate rakapʼ ocoyena.

¹¹“Ar ona são sãote okaṭakʼ oṛakʼreń tahẽkan ona oṛakʼre pe hoṛ do hecʼkateko teṅgoyena. Onko do Kạisạriạ khonko kol ocoakan tahẽkana.

¹²Unre sonot Jiu do begor digdhạte onko sãote calakʼe metadińạ. Ar iń tulucʼ noko turui boeha hõko sen toralena. Ale do uni hoṛakʼ oṛakʼtele boloyena one okoe do ińe hohowạdiń tahẽkan.

¹³Uni do mitʼṭen serma goḍet acʼakʼ oṛakʼre cetʼlekae ńellede onae lạiyatʼlea. Uni serma goḍete metade tahẽkana, ‘Simon, okoe do Patrasko metaekan, uni hoho ạguye lạgitʼ am do Joppa nagrahate hoṛ kolkom.

¹⁴Ar uni okako kathae lạiam, ona kathatege am ar am gharońjren sanam hoṛ kại khon bańcaope ńama.’

¹⁵“Sonot Jiu etohopʼre cetʼleka aboko cetanreye hecʼlen, onkage galmaraoiń ehopʼketʼ khan onko cetanreye hecʼena.

¹⁶Unre Probhui menletʼakʼ katha disạ hecʼạdińạ, ‘Johan do dakʼteye bạtisetʼkokan tahẽkana, menkhan ape do sonot Jiutepe bạptis ocokʼa.’

¹⁷Enḍekhan Probhu Jisu Mạsire bon pạtiạulenre Isor okaṭakʼ dane ematʼbon tahẽkan inạ mitʼ dange uni do onko hõe ematʼko khan iń doń celekante, Isoriń akoṭ daṛekea?”

¹⁸Noa katha ańjomkate Jihudạren biswạsiko do begor ạnḍuṅte Isor sarhaoateko menkeda, “Isor do boṅgan hoṛ jạtrenko hõ kại khon mon ạcurkate jion ńam lạgitʼ ạte em akatʼkoa.”

¹⁹Ado Stephan babot hoyen santao iạte okoekoko chir chạtur akan tahẽkan onko do Phoenikiạ, Kupros ar Siriạ disạm reakʼ Antiokiạ hạbicʼ senkate eken Jihudiko ṭhenge Isorakʼ kathako lạikeda.

²⁰Menkhan onko modre adomko do Antiokiạte senkate Junạni pạrsiren hoṛko ṭhen hõ Probhu Jisu reaṅ bhage sombat porcarko dhurạuena. Noko do Kupros dip ar Kurene nagraharen hoṛko tahẽkana.

²¹Isorakʼ ti onko cetanre tahẽkante ạḍi utạr hoṛ do Probhureko pạtiạuente uni secʼko ạcurena.

²²Ado Jerusalem manḍerren hoṛko noa sombatko ańjomketʼ khan onko do Antiokiạte Barnabasko kolkadea.

²³Ar Antiokiạren hoṛko Isorakʼ dayako ńamakada menteye ńelketʼ khan Barnabas do ạḍiye rạskạyena. Onko jemon goṭa ontorte Probhure biswạsko tahen onate uni do sanamkoe sikhạu paṛhaoketʼkoa.

²⁴Barnabas do mitʼṭen bhage hoṛe tahẽkana uni do sonot Jiu ar biswạste hõ perecʼ akane tahẽkana. Unre Probhu do ḍher hoṛge acʼ apnar ṭhene ạguletʼkoa.

²⁵Noa tayom Barnabas do Sạul ńame lạgitʼ Tạrsus nagrahateye calaoena,

²⁶ar uniye ńamkede khan Antiokiạteye ạgukedea. Barnabas ar Sạul do goṭa bochor manḍerren hoṛko sãotekin tahẽyena ar ạḍi utạr hoṛkin cetʼatʼkoa. Ar noa Antiokiạrege celako do pạhil Khristanko ńumocoyena.

²⁷Onako dinre adom nạbiko do Jerusalem khon Antiokiạteko hecʼena.

²⁸Onko modren Agabus ńutuman mitʼ hoṛ doe teṅgoyente sonot Jiuakʼ ạyurteye lại lahakeda je, goṭa Rom disạmre mitʼṭen maraṅ akal hoyokʼa. (Ona do Klạudius raj oktere hoelena.)

²⁹Unre celako doko goṭakeda, Jihudạ disạmren biswạsi boehako goṛoako lạgitʼ apan ạpin daṛe leka onko do jemon ṭakako kol. Arko onkaletʼgea.

³⁰Onko do Barnabas ar Sạulakʼ tite Jihudạ manḍerren maraṅ mukhiyạko ṭhen ona goṛoko kolleda.