Read Santali Aposkạmi 16 Bible Online

Aposkạmi 16 - Santali bible

Aposkạmi 16

¹Tayomte Pạul do Derbe ar Lustrạ nagrahateye calaoena. Onḍe Timothi ńutuman mitʼṭen celae tahẽkana. Uniren eṅgattetʼ hõ Mạsire pạtiạu akan mitʼṭen Jihudi maejiue tahẽkana, menkhan apattetʼ do mitʼṭen Junạni hoṛge.

²Lustrạ ar Ikonium nagraharen pạtiạu akan boehako do Timothi ạḍiko sarhaoedekan tahẽkana.

³Ar Pạul do soṅgete Timothi iditoraye menjoṅante uniye khatna ocokedea, ente onako ṭoṭhare okoe Jihudikoko tahenkan tahẽkan onko doko baḍaekan tahẽkana Timothiren apattetʼ do mitʼṭen Junạni hoṛ kanae.

⁴Ar unkin do onako nagraha talatekin parom calaoena ar Jerusalemren apostolko ar manḍerren mukhiyạko okako ạnko goṭa akatʼ tahẽkan ona do hoṛkokin baḍae ocoketʼkoa ar pańjae lạgitʼkin metatʼkoa.

⁵Nonkate manḍerren hoṛko do biswạsreko keṭecʼ idiyena ar dinke dinko saṅge idiyena.

⁶Pạul ar uni sãotenko do sonot Jiu hoteteko mana ocoyente Asiạre do bako porcarleda. Unre onko do Phrugiạ ar Galatiạ Prodes reakʼ sanam jaegateko calaoena.

⁷Ado Musiạ aṛeteko hecʼen khan onko do Bethaniạ disạmte calakʼko kurumuṭukeda, menkhan Jisuren Jiu do bae sen ocowatʼkoa.

⁸Onate onko do Musiạ talate Troas nagrahateko calaoena.

⁹Ar Pạul do ńindạ mitʼṭecʼ dorsone ńelkeda, Makedoniạ disạmren mitʼṭen hoṛ do teṅgokate nehõr salakʼe meneda, “Makedoniạte parom hijukʼte dela goṛowaleme.”

¹⁰Ado Pạul noa dorsone ńelketʼ khan ale do Makedoniạte calakʼ lạgitʼ unregele sapṛaoena, entele bujhạu daṛeada Makedoniạren hoṛko ṭhen Mạsi reaṅ bhage sombat porcar lạgitʼ Isor doe hohoale kana.

¹¹Tayomte ale do Troas bạgikate jahajte sojhe Samothrake diptele calaoena ar dosar hilokʼ do Neapolis nagrahatele hecʼena.

¹²Ar onḍe khon ale do Philipi nagrahatele calaoena. Noa Philipige Makedoniạ ṭoṭha reakʼ maraṅ nagraha tahẽkana. Ar onḍenko hoṛ do Rom rajren porjako tahẽkana. Ale do thoṛa din ona nagraharele tahẽyena.

¹³Ado jirạukʼ mãhãre ale do nagraha reakʼ phaṭok bahre gaḍa aṛe ṭhenle calaoena; entele hudisetʼ tahẽkana onḍe do Jihudikoakʼ sunạgog menakʼtakoa mente. Ar onḍe okoeko maejiuko jarwa akan tahẽkan onko ṭhen duṛupʼkate galmaraole ehopʼena.

¹⁴Ar okoekoko ańjometʼkan tahẽkan onko modre Thuạtirạ nagraharen Ludiạ ńutuman mitʼṭen maejiue tahẽkana. Uni do beguni roṅ reakʼ kicricʼe kiriń ạkrińetʼ tahẽkana. Ar Jihudi bae tahẽkanre hõ uni do Isore sewawaekan tahẽkana. Probhu do Ludiạwakʼ ontor nonkae jhicʼketʼtaea jemon uni do Pạulakʼ katha monteye ańjom are pạtiạukʼ.

¹⁵Ar noate uni ar acʼ gharońjren sanamkogeko bạptisena. Inạ tayom uni do noa menkateye neotaketʼlea, “Probhure biswạs akanpe hudisedeń khan dela ińakʼ oṛakʼre hijukʼte tahenpe.” Ar noa katha menkate acʼakʼ oṛakʼteye idiketʼlea.

¹⁶Mitʼ din ona koejoṅ jaegatele calakʼkan tahẽkanre mitʼṭen kạ̃ṛmĩ sãotele ńapamena. Uni do mitʼṭen bạṛicʼ jiue ńamakawan tahẽkante darakan dinko reakʼ sanamakʼe lại daṛeakʼkan tahẽkana. Onate acʼren kisạ̃ṛakʼ do ạḍi lab hoyokʼkantae tahẽkana.

¹⁷Uni kạ̃ṛmĩ do Pạul ar ale tayom tayomte hijukʼte hohoateye menetʼ tahẽkana, “Nukin hoṛ do maraṅ Isorren guti kanakin. Ar cetʼlekate kại khon bańcao ńamokʼa onagekin lạiape kana.”

¹⁸Uni do ḍher din hạbicʼe nonka idikeda. Mucạtʼre Pạul doe ạṛisen khan beṅgetʼ ạcurkate uni bạṛicʼ jiue metadea, “Jisu Mạsi ńutumteń hukumam kana, nui khon oḍok calakʼme.” Ar unrege uni bạṛicʼ jiu do uni khone oḍok calaoena.

¹⁹Ado rojgar cabayena menteko ńelketʼ khan uni kuṛiren kisạ̃ṛko do Pạul ar Silạs sapʼkate nagraharen mukhiyạ ṭhenko or idiketʼkinạ.

²⁰Ona tayom disạm cakʼlaoicʼ ṭhen idiketʼkinteko menkeda, “Nukin hoṛ do aboakʼ nagrahare gulmalkin ehopʼakada. Nukin dokin Jihudi kana.

²¹Nukin do nonkan ạri-cạli reaṅ kin cetʼako kana okaṭakʼ do Romiko hoekate abo lạgitʼ ataṅ se batao do ạn birud kạmi kana.”

²²Ado eṭakʼ hoṛko hõ onko sãote mitʼkate Pạul ar Silạs birudreko teṅgoyena. Unre disạm cakʼlaoicʼ doe hukumkeda unkinakʼ kicricʼ jemonko oṛejtạkin arko dalkin.

²³Onko do kajak dalko dalketʼkinte hajotreko bhoraokatʼkinạ, ar kajakte pahrae lạgitʼ hajotren darogako hukumadea.

²⁴Ar daroga do noa hukume ńamketʼ khan hajot reakʼ bhitri kandhareye idiketʼkinạ ar hạṛi paṭate jaṅgae aṭkaokatʼ tạkina.

²⁵Un jokhecʼ do tala ńindạ okte tahẽkana. Pạul ar Silạs do Isorkin sarhaoedekan tahẽkana arkin koejoṅkan tahẽkana. Ar eṭakʼ kạidiko hõ onako ańjomkan tahẽkana.

²⁶Unre ackage ạḍi botor dhạrti laṛaoena onate hajot oṛakʼ reakʼ rehetʼko sudhạ dal dalaoena. Ar hajot oṛakʼ reakʼ sanam silpińko jhicʼtʼena ar kạidikoakʼ sikṛiko hõ raṛayena.

²⁷Unre hajot oṛakʼren daroga doe ebhenena ar hajot oṛakʼ reakʼ silpińko jhicʼgeye ńelketʼ khan tarwaṛe bocʼkate acʼte gujukʼe menana. Uni doe hudiskeda sanam kạidikoko dạṛ cabakeda.

²⁸Unre Pạul do ãṭ aṛaṅte hohoateye metadea, “Thirokʼme, jiwi do alom loksantama; ale sanamkoge nonḍe menakʼlea.”

²⁹Unre daroga do mitʼ hoṛ diuhe ạguye metadea ar acʼ do bhitriteye ńir boloyena ar botorte thar tharaokʼkan tulucʼ Pạul ar Silạs tạkinakʼ jaṅgareye giḍiyena.

³⁰Ona tayom uni do Pạul ar Silạs tạkin bahreteye oḍok ạguketʼkinteye kuliketʼkina, “Ma lạiyạń ben, kại khon bańcao ńam lạgitʼ do cetʼ cekae hoyokʼ tińạ?”

³¹Adokin metadea, “Am ar amakʼ gharońjrenko Probhu Jisure pạtiạukʼpe, enḍekhan kại khon bańcaope ńama.”

³²Unre Pạul ar Silạs do daroga ar uniakʼ oṛakʼren sanamko Probhuakʼ kathakin galmaraoatʼkoa.

³³Ar inạ ńindạge daroga do Pạul ar Silạse idiketʼkinte unkinakʼ hoṛmo reakʼ ghạlkoe ạrupʼketʼ tạkina, ar acʼ gharońjren sanamkoko bạptisena.

³⁴Ona tayom uni do acʼakʼ oṛakʼte Pạul ar Silạse idiketʼkinte unkine jom-ńũ ocoketʼkinạ. Ar acʼ gharońjrenko do Isorreko biswạsente ạḍitetʼko rạskạyena.

³⁵Dosar hilokʼ setakʼ jokhecʼ hạkimko do akoren kạmiyạko hoteteko roṛgotʼkada “Unkin hoṛ do aṛakʼ kạkinpe.”

³⁶Unre daroga do Pạule metadea, “Disạm cakʼlaoicʼ do Silạs ar am aṛakʼ ben lạgitʼe roṛgotʼ akada. Onate ma ńitokʼ do oḍokokʼ ben ar sulukte calao joṅben.”

³⁷Unre Pạul do onko kạmiạkoe metatʼkoa, “Ạliń do Romi hoṛ kanaliń, ar begor bicạr dusite hoṛko samaṅreko dalketʼlińạ ar hajotreko bhoraokatʼlińạ. Ar ńitokʼ disạm cakʼlaoicʼ do hape hapete aṛakʼgotʼ kạlińe menjoṅ kana? Ona do baṅ hoyokʼa; onkoge apnarte hecʼkateko oḍok idi lińma.”

³⁸Unre onko kạmiyạko do noa katha hạkimkoko baḍae ocoketʼkoa. Ar onko hạkimko do Romi hoṛ kanakin menteko baḍaeketʼ khan botor hecʼatʼkoa.

³⁹Onko do Pạul ar Silạs ṭhen senkate ikạko koekeda ar hajot oṛakʼ khonko oḍok ketʼkinte nagraha bạgiyakʼ lạgitʼko nehõratʼkinạ.

⁴⁰Pạul ar Silạs do hajot oṛakʼ khonkin oḍoken khan Ludiạwakʼ oṛakʼtekin senena. Onḍe unkin do biswạsi boehako sãotekin ńapamena. Ar boehakokin udgạuketʼkote onḍe khonkin calaoena.