Read Santali Aposkạmi 17 Bible Online

Aposkạmi 17 - Santali bible

Aposkạmi 17

¹Pạul ar Silạs do Amphipolis ar Appoloniạ nagraha talate Thessalonikiạ nagrahatekin calaoena. Onḍe do Jihudikoakʼ mitʼṭen sunạgog tahẽkana.

²Pạul do acʼakʼ cạli leka ona sunạgogteye boloyena ar pe jirạukʼ mãhãre sonot sostor khon hoṛkoe galmaraoatʼkoa.

³Uni doe bujhạuatʼkoa are sạbudkeda je, Mạsi do duk jojom ar gocʼko khon jiwetʼ beredokʼ reakʼ jạruṛ tahẽkantaea. Uni doe metatʼkoa, “Ape ṭhen okoe Jisu reakʼ kathań lạiyetʼkan uni kangeae Mạsi do.”

⁴Noa katha ańjomkate adom Jihudiko doko pạtiạuente Pạul ar Silạs tạkin sãoteko mitʼena. Ona chaḍa Isor botorae aema Junạniko ar bhodro maejiuko hõ unkin sãoteko mitʼena.

⁵Menkhan Jihudiko do hiskạte bajar khon adom bạṛicʼ hoṛko ńam jarwaketʼkote nagrahare gulmalko ehopʼkeda. Ona tayom Pạul ar Silạs ńamkate hoṛko ṭhen ạgukin lạgitʼ onko do Jasonakʼ oṛakʼre jhapko emkeda,

⁶menkhan unkin do onḍe bako ńamletʼkina. Unre onko do Jason ar adom biswạsi boehako or oḍok idikate nagraha cakʼlaoko ṭhenko idiketʼkoa ar hohoateko menkeda, “Okoe hoṛ goṭa dhạrtiko gulmaletʼ onko do ńitokʼ nonḍe hõko hecʼakana;

⁷ar Jason do acʼakʼ oṛakʼre jaegae emakatʼkoa. Ar onko do sanamkoge Kạisạrakʼ hukum birudko kạmikana, arko meneda, uni chaḍa Jisu ńutumanicʼ ar mitʼṭen raj menaea.”

⁸Noako menketʼte onko Jihudiko do nagraha cakʼlaoko ar hoṛkoko toras ocoketʼkoa.

⁹Menkhan Jason ar eṭakʼko do jạmin reakʼ ṭakako emketʼ khan doko aṛakʼkatʼkoa.

¹⁰Ńindạyen khan biswạsi boehako do Pạul ar Silạs tạkin Beroeateko kolkatʼkinạ. Unkin do onḍe seṭerkate Jihudikoakʼ sunạgogtekin boloyena.

¹¹Thessalonikiạren Jihudi khon Beroea nagraharen Jihudikoakʼ mon do bạ̃ṛti soṛage tahẽkantakoa. Onko do khaṛa monte Isorakʼ katha ańjomkateko ataṅkeda. Ar Pạul okae menakatʼ ona do sạri kana se baṅ ona ńel lạgitʼ dinạm hilokʼ sostorko ḍunḍhạuetʼkan tahẽkana.

¹²Unre ạḍi utạr Jihudiko do Jisureko pạtiạuena; ona chaḍa aema bhodro Junạni maejiuko ar herel hoponko hõko pạtiạuena.

¹³Thessalonikiạren Jihudiko do Pạul Beroeare Isorakʼ kathae porcareda menteko ańjomketʼ khan onko do onḍeko calaoena ar onḍenko hoṛko ạulạuketʼkote gulmalko hoe ocokeda.

¹⁴Unre biswạsi boehako do jalapuri aṛe secʼ Pạulko kolgotʼkadea, menkhan Silạs ar Timothi do Beroea regekin tahẽyena.

¹⁵Ar okoeko hoṛ do soṅgete Pạulko idiyede tahẽkan onko do Athens hạbicʼko ạgu seṭerkadea. Ona tayom onko do Silạs ar Timothi lạgitʼ noa hukumante Beroeateko ruạṛ calaoena je, Silạs ar Timothi do senkate usạra jemon Pạul sãotekin midokʼ.

¹⁶Pạul do Athens nagrahare Silạs ar Timothiye tạṅgiyetʼkin tahẽkanre ona nagraha do boṅga murtikote perecʼ akane ńelkeda. Onate uniakʼ mon do ạḍi jal jalaoentaea.

¹⁷Uni do sunạgogre Jihudiko ar Isor botoraekan Junạniko tulucʼ galmaraoe ehopʼena. Ona chaḍa bajarte okoekoko hijukʼkan tahẽkan, onko tulucʼ hõ din ke dine galmaraokan tahẽkana.

¹⁸Unre Epikuri ar Stoik ponḍitko modren adomko do Pạul tulucʼ reṭepeṭekʼko ehopʼena. Onko modren adomkoko menkeda, “Nui galbạjạriạ do cetʼe menetʼkana?” Arhõ eṭakʼko doko menkeda, “Uni do pasecʼ ạnạṛi boṅgako reakʼ kathae porcareda.” Onko do noa iạtegeko menkeda, ente Pạul do Jisu reaṅ ar gocʼko khon jewetʼ beredokʼ reaṅe porcarako kan tahẽkana.

¹⁹Unre onko guruko do Areopagos reakʼ bạisi samaṅre Pạulko idikedea. Arko kulikedea, “Okaṭakʼ nawa sikhnạtem emokʼkan ona do cetʼ le baḍae daṛekea?

²⁰Ente adomakʼko nonkam galmaraoale kana one oka do ạnạṛigele ańjometʼ. Onate baḍae sanayetʼlea onako reakʼ mane do cetʼkana mente.”

²¹Onko do noa iạtegeko menkeda, ente Athensren sanam hoṛko ar ona nagrahare okoe upriạko tahẽkan onko do nawa nawanakʼ babotre katha roṛ ar ańjomte okteko khemaoetʼ tahẽkana.

²²Unre Pạul do Areopagos reakʼ bạisire teṅgoyenteye menkeda, “E Athens nagraharen hoṛko ańjompe. Iń doń ńeletʼ kana, ape do joto secʼ khonge deb manaoko kanape,

²³ente ińiń dãṛã baṛaekan tahẽkanre apeakʼ sewa jiniskoń ạribạndhiyetʼ tahẽkana ar nonkan mitʼṭen pinḍ hõń ńamkeda one ona cetanre ol akan, ‘Baṅ baḍae akadeicʼ deb lạgitʼ.’ Ar ape do bin baḍaete okoepe sewawaekan uni reaṅge iń doń porcarape kana.

²⁴“Isor, one uni dhạrti ar onare menakʼ jotowakʼe benao akatʼ, unige serma ar dhạrtiren Probhu kanae. Uni do tite benaoakʼ okaṭakʼ mundilre hõ bae tahenkana.

²⁵Uni do jãhãn reṅgecʼ bạnukʼtaea, onate manwakoakʼ tite pujạ hatao hõ baṅ jạruṛaea, ente unige sanam manwako jiwi, sahetʼ ar eṭakʼ jotowakʼkoe danako kana.

²⁶Uni do mitʼṭen manwa khon sanam jạtren hoṛkoe sirjạu akatʼkoa jemon goṭa dhạrtireko girobasokʼ. Onko do tinre okakoreko girobasokʼa ona hõ acʼakʼ sana lekae goṭa dohoakada.

²⁷Isor do noae kạmikeda jemon manwako ṭamḍạuate uniko ńam baṛaye. Menkhan sạrige abo khon sạṅgińre do bạnuia,

²⁸ente uniakʼ daṛetege jion bon khemaoeda arbon dãṛãn kana ar jiwetʼ hõ menakʼ bona. Aperen adom sereń joṛaokoko menakada, ‘abon hõ uniren hoponko kana bon.’

²⁹“Enḍekhan uniren hoponkan khan bon Isor do manwa reakʼ kạrigol ar hudis bundiskote benao akatʼ sona, rupạ se dhiriren murti leka hudise do lek baṅkan tabona.

³⁰Ente sedaeren hoṛ do bako baḍaekan tahẽkante Isor do noako secʼ bae beṅgetʼletʼa. Menkhan ńitokʼ uni do sanam jaegare joto hoṛge kại khon mon ạcur lạgitʼe hukumako kana,

³¹ente uni do nonkan mitʼṭen dine nenḍa akada one ona dinre acʼe bahal akade mitʼṭen hoṛ hotete manwako dhoromteye bicạrko. Uni do gocʼko khone jiwetʼ beretʼ akadete sanam manwako ṭhen noae sạbud akada.”

³²Ado gocʼko arhõko jiwetʼ beredokʼa menteko ańjomketʼ khan onko modren adomko doko cigạriadea, menkhan eṭakʼko doko menkeda, “Ale do noa reaṅ arhõle ańjoma.”

³³Unre Pạul do ona bạisi khone oḍok calaoena.

³⁴Ar unre adomko hoṛ doko Pạul secʼena arko pạtiạuena. Onko biswạsiko modre Areaopagosren Dionusios ar Damaris ńutuman mitʼṭen maejiu hõe tahẽkana, ar unkin sãote arhõko tahẽkana.