Read Santali Aposkạmi 18 Bible Online

Aposkạmi 18 - Santali bible

Aposkạmi 18

¹Niạ tayom Pạul do Athens khone oḍok senente Korinth nagrahateye calaoena.

²Onḍe do Akuilạ ńutuman mitʼṭen Jihudi sãoteye ńapamena. Nui Akuilạ do Pontus disạmreye janamlena. Maharaj Klạudius do sanam Jihudiko Rom khon oḍok calakʼ lạgitʼe hukumatʼko tahẽkana. Onate thoṛa din lahare Akuilạ do acʼren bạhu Priskillạ soṅgekate Itạliạ khon Korinth nagrahateye hecʼakan tahẽkana. Ar Pạul do unkin ṭhene calaoena.

³Uni do unkin leka tạmbu benao kạmiye baḍaekan tahẽkante unkin sãote tahẽkate kạmiye dhurạuena.

⁴Ar jao jirạukʼ mãhãre Pạul do sunạgogre bolokate Jisu reaṅe galmarao akokan tahẽkana ar Junạni ar Jihudiko Jisuakʼ horte ạguko lạgitʼe kurumuṭuyetʼ tahẽkana.

⁵Silạs ar Timothi Makedoniạ khonkin hecʼen khan Pạul do eken Isorakʼ katha porcarte acʼakʼ okteko khemaoe ehopʼena. Uni do Jihudiko ṭhen Jisuge Mạsi kanae mente gohae emetʼ tahẽkana.

⁶Menkhan Jihudiko do tinre Pạul birudre katha roṛ ar uni opomaneko ehopʼena unre Pạul do onko birudre acʼakʼ kicricʼkoe koṭakeda are metatʼkoa, “Apeakʼ mãyãm do apeakʼ bohokʼrege paṛaokʼma. Noa babotre ińakʼ jãhãn dos do bạnukʼtińạ. Ńit khon iń do boṅgan hoṛ jạtrenko ṭheniń calakʼa.”

⁷Inạ tayom Pạul do sunạgogre bạgikate Titus Jusṭu ńutuman mitʼṭen hoṛakʼ oṛakʼteye boloyena. Uni hoṛakʼ oṛakʼ do sunạgog sorrege tahẽkana ar boṅgan hoṛ jạtrene tahẽkanre hõ uni do Isore sewawaekan tahẽkana.

⁸Sunạgogren mukhiyạ Krispus ar acʼ gharońjren sanamkoge Probhureko pạtiạuena. Ona chaḍa Korinthiko modren ḍherkoge Pạulakʼ katha ańjomkateko pạtiạuena ar bạptismako ataṅkeda.

⁹Mitʼ din ńindạ jokhecʼ Probhu do mitʼṭen dorson hotete Pạul noa kathae metadea, “Alom botorokʼa, katha roroṛtege tahenme, alom thir hapekokʼa;

¹⁰ente iń do am sãote minạńa. Amre jhãp emkate okoe hõ ohoko hạnlema, ente noa nagrahare ạḍi utạr hoṛ menakʼkotińa.”

¹¹Onate Pạul do mitʼ bochor turui cando ona nagrahare tahẽkate hoṛko Isorakʼ kathae cetʼatʼkoa.

¹²Ado Gallio tinre Akhaearen disạm cakʼlaoicʼ tahẽkana unre Jihudiko do jomkao mitʼkate Pạulko sapʼkedea ar bicạre lạgitʼ adalotteko ạgukedea.

¹³Onkoko menkeda, “Nui hoṛ do Isor sewawae lạgitʼ nonkae ạnḍicʼetʼkoa one oka do ạn-ạri birudkan.”

¹⁴Ado Pạul kathae roṛ lạgidokʼkan tahẽkanre Gallio do Jihudikoe metatʼkoa, “E Jihudiko, jãhãn behokakʼ se jãhãn dusiakʼ tahentape khan jạruṛgeń ańjomketapea.

¹⁵Menkhan jãhãnakʼ katha reakʼ, jãhãeakʼ ńutum reakʼ ar apeakʼ ạn-ạriko babot reakʼ kan khan, enḍekhan apetege phanḍaope baṛe. Onako babot reakʼ do bạń bicạrkatapea.”

¹⁶Noa katha menkate uni do adalot khon oḍokko lạgitʼe hukumkeda.

¹⁷Unre Jihudiko do sunạgogren mukhiyạ Sosthenesko sapʼkedete adalot samaṅregeko dalkedea; menkhan Gallio do cetʼge bae mẽtʼ luturada.

¹⁸Pạul do ḍher din Korinthreye khemaoketʼ khan biswạsi boehako ṭhen khon bidạye hataokeda ar Akuilạ ar Priskillạ sãote jahajte Siriạ disạme hecʼena. Pạul do mitʼṭecʼe goṭa dohoakatʼ tahẽkante mohnḍakʼ lahare Kenkhreare uni doe hoyo munḍrạyena.

¹⁹Ar Ephesus nagrahae seṭeren khan Priskillạ ar Akuilạ doe bạgiatʼkinạ. Ar sunạgogre bolokate Jihudiko sãote apnarge Jisu reaṅ galmaraoakoe ehopʼena.

²⁰Unre Jihudiko ako sãote thoṛa din tahen lạgitʼko nehõradea, menkhan uni do tahen bae rebenlena.

²¹Menkhan onḍe khon calakʼ jokhecʼ uni doe metatʼkoa, “Isorakʼ sana hoelen khan iń do arhõń ruạṛ hijukʼa.” Ar ona tayom uni do Ephesus khon jahajteye mohnḍayena.

²²Ado Kạisạriạ nagrahateye seṭeren khan jahaj khon pheḍekate uni do Jerusalemteye calaoena. Ar onḍe manḍerren hoṛkoe joharatʼko tayom uni do Antiokiạteye senena.

²³Antiokiạre thoṛa din khemaokate onḍe khone mohnḍayente Galatiạ ar Phorugiạ Prodesh reakʼ mitʼ jaega khon eṭakʼ jaegae dãṛãketʼte celakoakʼ pạtiạue kajakketʼtakoa.

²⁴Niạ oktere Apollos ńutuman mitʼṭen Jihudi do Ephesusteye hecʼena. Uniakʼ oṛakʼ do Alekasndriạ nagrahare tahẽkana. Uni do katha roroṛe mitʼṭen gạkhuṛ hoṛe tahẽkana ar sonot sostor hõ bes okocʼteye baḍaekan tahẽkana.

²⁵Uni do Probhuakʼ hor reaṅ sikhnạte ńamakatʼ tahẽkana. Ar ạḍi mon lagaokate kathae roṛetʼ tahẽkana ar Jisu reaṅ ṭhiktegeye cetʼakokan tahẽkana, menkhan Johanakʼ bạptisma chaḍa ar eṭakʼ bạptisma reakʼ katha uni do bae baḍaekan tahẽkana.

²⁶Uni do ạḍi dil salakʼ sunạgogre katha roroṛe ehopʼena. Unre Priskilla ar Akuilạ do Apollosakʼ kathakin ańjomketʼ khan ạkinakʼ oṛakʼtekin neota kedea ar Isorakʼ hor reakʼakʼko reaṅ arhõ mońjtekin bujhạuadea.

²⁷Ar Apollos do Akhaeate calakʼe monean khan Ephesusren biswạsi boehako do udgạuko emadea. Ar Akhaearen celako jemon Apollosko ataṅe onate Ephesusren boehako do Akhaeate ciṭhiko olkeda. Isorakʼ dayate Akhaeare okoekoko pạtiạulen onḍe Apollose seṭeren khan uni do ạḍiye goṛowatʼkoa.

²⁸Uni do sonot sostor khone sạbudkeda Jisu kangeae Mạsi do ar sanamko samaṅre ạḍi jothat reakʼe lạiatʼkote Jihudikoe bhagaoketʼkoa.