Read Santali Aposkạmi 20 Bible Online

Aposkạmi 20 - Santali bible

Aposkạmi 20

¹Gulmalko thiren khan Pạul do celakoe hoho ạguketʼkoa. Ar onkoe udgạuketʼko khan onko ṭhen khon bidạ hataokate uni do Makedoniạ secʼe mohnḍayena.

²Makedoniạ talateye parom calakʼkan tahẽkan jokhecʼ uni do ạḍi okocʼ kathakote hoṛkoe udgạuketʼkoa. Ar tayom uni do Junạni, metakʼme Akhaea Prodesteye seṭerena ar onḍe pe candoe tahẽyena. Inạ tayom uni do jahajte Siriạ disạmteye calakʼ lạgidokʼkan tahẽkanreye baḍaekeda je, Jihudiko do acʼ birudreko soṛojontro kana. Unre uni do arhõ Makedoniạ talate ruạṛ calakʼe goṭawana.

⁴Ado Beroearen Puros hopon Sopatros, Thessoloniki khon Aristarkhos ar Sekundus, Derberen Gaius, Timothi ar Asiạ khon Tukhikus ar Trophimus noko hõ Pạul sãoteko calaoena.

⁵Nokoko hoṛ do lahare senkate Troas nagrahare ale lạgitʼko tạṅgi akatʼ tahẽkana.

⁶Ar bin khamianakʼ piṭhạ porob tayom ale do Philipi khon jahajtele mohnḍayena ar mõṛẽ din tayom onko sãote Troasrele ńapamena. Ar Troasre ale do eae dinle tahẽkana.

⁷Ado hapta reakʼ pạhil din Probhuakʼ bhoj ataṅ lạgitʼ ale do mitʼ ṭhenle jarwayena. Unre Pạul do hoṛko porcarakoe ehopʼena. Uni do dosar hilokʼ calakʼ reakʼ katha tahẽkantaete tala ńindạ hạbicʼe galmarao idikeda.

⁸Ale do cetan koṭha reakʼ oka kandharele jarwa akan tahẽkan onḍe do ạḍi utạr diuhe tahẽkana.

⁹Ar Euthukus ńutuman mitʼṭen juạn koṛa do ona oṛakʼ reakʼ khiṛki cetanreye duṛupʼ akan tahẽkana. Ado Pạul ạḍi ghạṛicʼe galmaraoetʼ kan tahẽkante uni do dudṛumkedeteye jạpitʼkeda. Are jạpitʼ lạthiạuen khan pe tala khon latarteye ńurhạyena ar gocʼgeko tul rakapʼkedea.

¹⁰Unre Pạul do latarteye pheḍena ar uni koṛa taber loṭomkedeteye metatʼkoa, “Alope botorokʼa, uni do jiwetʼge menaea.”

¹¹Inạ tayom Pạul do arhõ cetan kandhate rakapʼkate Probhuakʼ bhoje ataṅkeda ar ạḍi ghạṛicʼ aṅga marsalokʼ hạbicʼe galmaraoatʼko tayom uni doe calaoena.

¹²Ar hoṛko do uni koṛa jiwetʼge oṛakʼteko idikedea ar ạḍi jiwi raṛecʼko ńamkeda.

¹³Ale do lahare senkate jahajre decʼkate Assos bondor secʼle monḍhayena. Onḍe khon ale do Pạul deje reakʼ katha tahẽkantalea. Uni do onkageye metatʼle tahẽkana, ente taṛam horte onḍe calakʼe goṭawan tahẽkana.

¹⁴Ado Assosrele ńapamkede khan uni do jahajrele decʼkedea ar Mitulenetele hecʼena.

¹⁵Dosar hilokʼ ale do onḍe khon mohnḍakate Khios diprele seṭerena. Ar tesar hilokʼ do doreão paromkate Samos diptele calaoena. Inạ tayom din do Miletus bondortele seṭerena.

¹⁶Asiạ Prodeshre Pạul jemon aloe bilomokʼ onate uni do Ephesusre teṅgo baṅkate ona aṛete parom calakʼe goṭa akatʼ tahẽkana. Uni do Jerusalemte seṭerokʼ lạgitʼe usạrayetʼ tahẽkana jemon hoedaṛeakʼ khan penṭekosṭ hilokʼ do onḍeye tahẽdaṛeakʼ.

¹⁷Pạul do Miletus khon Ephesuste hoṛ kolkate ona manḍerren murubikoe hoho ạgu ocoketʼkoa.

¹⁸Ado onko onḍeko seṭeren khan Pạul do onkoe metatʼkoa, “Asiạ disạmreń hecʼen pạhil din khon ape sãote jaoge cetʼ lekań khemaoletʼ ona dope baḍaegea.

¹⁹Jihudikoakʼ ạḍi lekan phor phundi iạte bạṛicʼ biḍạukoreń paṛaolena, menkhan iń do nindhạn monte mẽtʼ dakʼ joro jorote Probhuren sapʼ dapʼicʼiń hoeakana.

²⁰Apeakʼ okaṭakʼte porhoanakʼ hoyokʼ nonkan jãhãnakʼge ape baḍae ocope lạgitʼ do bạń pạclena, bickom bahrere sodorte apeakʼ oṛakʼreń cetʼakawatʼpea ariń porcar akada.

²¹Jihudi ar Junạniko ṭhen iń do jorkateń lại akada je, kại khon mon ạcurkate onko do Isor secʼ ruạṛokʼ hoyokʼtakoa ar Probhu Jisure biswạsokʼ jạruṛtakoa.

²²“Sonot Jiureń tolakante iń do ńitokʼ Jerusalemiń calakʼ kana. Onḍe iń cetanre cetʼ hoyokʼa ona do bạń baḍaea.

²³Eken niạ kathań baḍaea, sonot Jiu do sanam nagrahare noa kathae baḍae ocoyediń kana je, hajotokʼ ar duk jojom hoyokʼtińạ.

²⁴Menkhan iń ṭhen do ińakʼ jiwi reakʼ jãhãn dam bạnukʼa. Ińakʼ sana do noage, jemon mucạtʼ hạbicʼ iń ṭarhao daṛeakʼ, metakʼme Probhu Jisu oka kạmi lạgitʼ dạyike emakawạdiń ona jemoniń purạu daṛeakʼ. Ona kạmi do hoyokʼ kana Isorakʼ daya reaṅ bhage sombat reakʼ goha emokʼge.

²⁵“Iń do ńitokʼ noa kathań baḍaea je, ape okoeko ṭhen senkate Isorakʼ rajosṭi reakʼ iń porcar akatʼ onko okoege iń do ar bako ńeleńa.

²⁶Onate teheń pusṭạuteń lạiape kana, iń do okoeakʼ mãyãm reakʼ hõ dạyik doń baṅkana,

²⁷ente Isor okae khojkan ona baḍae ocope do tishõ bạń pạc akana.

²⁸Ape do apnar lạgitʼ sontor akae tahenpe, ar okoe sonot Jiu biswạsikoren horhoyicʼ lekate ape cetanreye emakan onko lạgitʼ hõ sontor akae tahenpe. Gupiyicʼ do cetʼleka acʼakʼ palren bhiḍikoe ńel todarotetʼko onkage ape hõ Isorakʼ manḍerko ńel todarotpe. Ente Isor do acʼakʼ mãyãmte onako manḍerre kirińakada.

²⁹Ińiń baḍaea je, iń sen tayom hoṛko do hunḍạr leka ape talareko hijukʼa ar palren bhiḍikoko loksankoa.

³⁰Ape bhitriko khon hõ hoṛko teṅgonte Isorakʼ sạriakʼtetʼ do eṛeteakʼ benaoko kurumuṭuya jemon pạtiạu akanko ako secʼko or idi daṛeako.

³¹Onate ape do sontor akae tahenpe. Disạipe, pe bochor khon siń ńindạ mẽtʼ dakʼ joro joroteń sontor akatʼpea, ar tisge bạń thirakana.

³²‘‘Menkhan ńitokʼ do Isor ar uniakʼ kathareń jimạkape kana. Isorakʼ katha do uniakʼ daya reaṅe roṛa, ar apeko benao rakapʼpe reakʼ daṛe hõ ona katharege menakʼa. Ona chaḍa Isor do acʼren hoṛko lạgitʼ okae dohoakatʼ ona katha do apeko hõe em daṛeapea.

³³Jãhãekoakʼ sona, rupạ se kicricʼ khạnḍwạkʼ cetanre iń do bạń lalocakana.

³⁴Ape dope baḍaegea, noa banar ti do ińakʼ ar ińren sãotenkoakʼ sanam jạruṛokʼakʼe meṭao akada.

³⁵Iń okań ceka akatʼ ona sanamakʼge ape koń udukʼakatʼpea je, nonkan kajak khaṭao hotete nijorko goṛowako do lek kana ar Probhu Jisuakʼ noa katha jemon disạ dohokʼ baṅma, ‘hatao khon emokʼrege bickom ḍher bhor do ńamokʼa.’”

³⁶Noa katha menkate Pạul do sanamko sãote ikhṛumenteye koekeda.

³⁷Ar manḍerren sanam mukhiyạko do Pạul hạṛupʼ kedeteko cokʼadea ar rarakʼko ehopʼena.

³⁸Pạulakʼ mẽtʼãhã ar bako ńel ńam iạte ạḍitetʼko bhabnayena. Ar noa tayom onko do jahaj hạbicʼko koyokʼ gotʼkadea.