Read Santali Aposkạmi 21 Bible Online

Aposkạmi 21 - Santali bible

Aposkạmi 21

¹Ado Ephesusren mukhiyạko ṭhen khon bidạ hataokate ale do jahajte mitʼ mohnḍa Kos diptele calaoena. Ar dosar hilokʼ do Rhodos diptele hecʼena. Ona tayom onḍe khon Patara nagrahatele calaoena. Onḍe do Phoenikiạte calakʼ lạgitʼ mitʼṭen jahajle ńamkeda.

²Unre ale do ona jahajre decʼkatele mohnḍayena.

³Kupros diple ńel ńamketʼ khan ona dạkhin secʼte ạcurkate Siriạ Prodes reakʼ Tur nagrahate senkate jahaj khonle pheḍena. Onḍege aleakʼ jahaj reakʼ bojha do pheḍ reakʼ katha tahẽkantalea.

⁴Ado onḍenko celale sendra ńamketʼko khan onko sãote eae dinle tahẽyena. Onko do sonot Jiu hotete Pạulko nehõradea jemon Jerusalemte aloe calakʼ.

⁵Onako din paromen khan ale do onkole bạgiatʼkote aleakʼ hortele mohnḍayena. Unre sanam celako ar onkoren bạhuko ar gidrạko do ale sãote nagraha bahre hạbicʼko oḍok hecʼena. Ar doreão aṛere ikhṛumentele koeyana.

⁶Ona tayom ale do bidạ hataokate jahajrele decʼena ar onko do akoakʼ oṛakʼkoteko ruạṛ calaoena.

⁷Ado Tur khonle mohnḍayente Ptolemaisrele seṭerena. Onḍe do biswạsi boehakole joharatʼkote onko sãote mitʼ dinle tahẽyena.

⁸Dosar hilokʼ dole oḍokente Kạisạriạtele hecʼena ar bhage sombat poporcaricʼ Philipakʼ oṛakʼrele tahẽyena. Uni do Jerusalem manḍerren eae goṭen sapʼ dapʼko modren mitʼ hoṛe tahẽkana.

⁹Uniren do ponea kũạ̃ri kuṛiko tahẽkantaea. Ar onko doko nạbi baṛayetʼ tahẽkana.

¹⁰Ale do thoṛa din onḍele tahẽyen khan Jihudạ khon Agabus ńutuman mitʼṭen nạbiye hecʼena.

¹¹Uni do ale ṭhen hecʼkate Pạulakʼ ḍanḍa paṭheakʼe raṛaketʼtaea ar onate acʼakʼ ti jaṅga tolketʼtaeteye menkeda, “Sonot Jiue meneda, “Jerusalemren Jihudiko do noa paṭheakʼren mạlik hõ nonkageko tolea ar boṅgan hoṛ jạtrenkoakʼ tireko jimạyea.”

¹²Noa kathale ańjomketʼ khan onḍenko hoṛko ar ale hõ Pạul ạḍile nehõradea jemon uni do Jerusalemte aloe calakʼ.

¹³Unre Pạule menkeda, “Rakʼ rakʼte monre cedakʼ dukpe imạń kana? Probhu Jisu lạgitʼ iń do Jerusalemre eken bondi ocokʼ do baṅ, bickom gocʼ ocokʼ hõń sapṛaogea.”

¹⁴Ado bae rebenlente ale dole thir hapeyena ar tayomtele menkeda, “Probhuakʼ sana lekage baṛe hoyokʼma.”

¹⁵Niạ tayom moṭra jhoṭra tolkate ale do Jerusalemtele calaoena.

¹⁶Kạisạriạren adom celako hõ ale sãoteko calaoena ar Manason ńutuman Kupros dipren mitʼ hoṛakʼ oṛakʼteko idiketʼlea. Ar aleakʼ tahen reakʼ katha do uniakʼ oṛakʼrege tahẽkantalea. Uni do pạhil celako modren mitʼ hoṛe tahẽkana.

¹⁷Ado Jerusalemtele seṭeren khan biswạsi boehako do kusiteko ataṅ daramketʼlea.

¹⁸Ar dosar hilokʼ Pạul do ale sãote Jakob ńeńele senena. Onḍe do manḍerren sanam murubikoko tahẽkana.

¹⁹Pạul do onkoe joharatʼkoa ar acʼakʼ porcar talate cetʼleka Isor do boṅgan hoṛ jạtrenko talareye kạmi akada ona sanamakʼe lạiatʼkoa.

²⁰Noa kathako ańjomketʼ khan onko murubiko do Isorko sarhaokedea ar Pạulko metadea, “E boeha, am mam ńeletʼkokange, tinạkʼ hajar hajar Jihudiko do Jisureko pạtiạu akana, ar onko sanamkoge Moseakʼ ạn-ạri pańja lạgitʼ ạḍiko ahkaokʼ kana.

²¹Onko do khoborko ańjomakada, boṅgan hoṛ jạtrenko talare okoe Jihudiko menakʼko onko do Mose reakʼ ạn-ạri bạgikate senokʼ reakʼ sikhnạtem memako kana, metakʼme am do onkoren gidrạko bam khatna ocoako kana ar Jihudikoakʼ cạli leka senokʼ hom baronetʼkoa. Ńitokʼ ale do cetʼle cekaya?

²²Onko do khạṭigeko ańjoma amem hecʼ akana mente.

²³Onate ńitokʼ okale metam, ona baṛe onkaeme. Ale talare nonkan pon hoṛ menakʼkoa one okoe do mitʼṭenko khạṭi akawan.

²⁴Noko hoṛ am sãote iditorakom ar onko soṅgete am hõ saphakʼme ar onkoakʼ bohokʼ upʼ hoyo giḍikatako reakʼ khoroc emokʼme. Unre sanam hoṛko baḍaea daṛeakʼa je, am reaṅ oka khoborko ańjomakatʼ ona do ạuṛiakʼgea ar ạn-ạriko hõ ṭhik lekam manaoetʼkana mente.

²⁵Menkhan boṅgan hoṛ jạtren biswạsiko lạgitʼ okale goṭa akatʼ ona reaṅ do nonka ol katele baḍae ocoakatʼkoa je, onko do boṅga ṭhen samaṅakʼ bako joma, mãyãm hõ baṅ, limbạtʼ gocʼ janwarakʼ jel hõ bako joma ar jãhãlekan loṭghuṭi hõ bako kạmiya.”

²⁶Unre Pạul do onko hoṛe iditoraketʼkote acʼhõ onko sãoteye saphayena. Ar dosar hilokʼ uni do mundilteye calaoena, ar onkoakʼ saphakʼ reakʼ kạmi tis cabakʼa mente ar mimitʼko lạgitʼ tis janwar teṅgenko hoyokʼa onakoe baḍae ocoketʼkoa.

²⁷Ado saphakʼ lạgitʼ ona eae din purạu lạgidokʼ kan tahẽkanre Asiạ Prodesren adom Jihudiko do mundilre Pạulko ńelkedea. Onko do onḍe sanam hoṛko ạulạuketʼkoa ar Pạulko sapʼkedea.

²⁸Ar ãṭ aṛaṅte nonka memenko ehopʼena, “E Israelko, dela hijukʼpe. Sanam jaegaren hoṛko ṭhen aboakʼ jạt ar aboakʼ ạn-ạri ar mundil birudre okoe doe cetʼakokan uni hoṛ doe nui kangea. Ona chaḍa mundilre Junạnikoe aderetʼkote uni do noa sonot jaegaye bhõnḍ akada.”

²⁹Onko do noa iạtegeko menkeda, ente noa lahare Ephesusren Trophimus hõ Pạul sãote nagrahareko ńelledea. Onateko hudiskeda, Pạul do Trophimus hõ mundilteye ạguakadea.

³⁰Unre goṭa nagrahare gulmal ehopʼena. Hoṛko do mitʼ sãoteko ńir hecʼente Pạulko sapʼkedea ar mundil khonko or oḍok kedea ar ona são sãote mundil reakʼ duạrkoko sińkada.

³¹Hoṛko do Pạul gojeko kurumuṭu kan tahẽkanre, Romi palṭonkoren maraṅ subedar ṭhen khobor calaoena je, goṭa Jerusalem nagrahare gulmal hoyokʼkana.

³²Unre Maraṅ subedar do adom subedarko ar palṭonko soṅgekate bhiṛ akatʼ ṭhene ńir calaoena. Ar hoṛko do maraṅ subedar ar palṭonkoko ńelketʼko khan Pạul dadalko thirena.

³³Unre maraṅ subedar do senkate Pạule giriptarkedea ar barea sikṛite tole lạgitʼe hukumkeda. Ona tayom uni doe kuliketʼkoa, “Nui hoṛ doe okoe kana? Ar cetʼe ceka akada?”

³⁴Unre hoṛko modre adomko do mitʼlekako arhõ adomko do eṭakʼ lekako hohoyetʼkan tahẽkana. Onate maraṅ subedar do sạri ghoṭna bae baḍae daṛeatʼte palṭon gaṛte Pạul idiye lạgitʼe hukumkeda.

³⁵Ado Pạul siṛhi hạbicʼe seṭeren khan hoṛkoakʼ ti khon bańcaoe lạgitʼ palṭonko do gokʼ idiye hoyen takoa.

³⁶Ar hoṛko do tayom tayomte ãṭ aṛaṅte hohoateko menkeda, “Uni do goje me.”

³⁷Ado palṭon gaṛteko adere lạgidokʼkan tahẽkanre Pạul do maraṅ subedare metadea, “Am sãote thoṛa kathań roṛ daṛekea?” Maraṅ subedare menkeda, “Junạni pạrsim baḍaegea?

³⁸Misor disạmren uni hoṛ okoe do thoṛa din lahare hulkate pon hajar dạkuko hahaṅkarteye idiletʼko am do cetʼ uni hoṛ dom baṅkana?”

³⁹Unre Pạule roṛ ruạṛkeda, “Iń do Kilikiạ Prodes reakʼ Tạrsus nagraharen mitʼṭen Jihudi hoṛ kạnạń. Jãhãlekan nagraharen hoṛ doń baṅkana. Dayakate onko hoṛ sãote katha roṛ ocoạńme.”

⁴⁰Ado maraṅ subedarakʼ hukume ńamketʼ khan Pạul do siṛhi cetanreye teṅgoyena ar ti tulkate hoṛko thirokʼ lạgitʼe isạrawatʼkoa. Arko thiren khan Pạul do Ibri pạrsiteye metatʼkoa.