Read Santali Aposkạmi 26 Bible Online

Aposkạmi 26 - Santali bible

Aposkạmi 26

¹Unre Agrippa do Pạule metadea, “Apnar reaṅ roroṛiń aṛakʼam kana.” Unre Pạul do ti tiạrkate acʼ reaṅ noa kathae roṛkeda,

²“E Agrippa raj, Jihudiko okako dusi akadiń ona birudre am samaṅre katha roṛ reakʼ ạtiń ńamketʼte bhạganiń bujhạukʼ kana,

³am do Jihudikoakʼ cạliko ar reṭe peṭekʼkan reaṅakʼko bes okocʼtegem baḍae kana. Onate jiwi hataṛkate ińakʼ kathako ańjom lạgitʼ biseskaeteń nehõram kana.

⁴“Iń do gidrạ khonge, metakʼme ińakʼ jion reakʼ pạhil khon ińakʼ disạmre ar tayomte Jerusalemren hoṛko talare cetʼlekan jioniń khemaoetʼ tahẽkan ona do sanam Jihudikoko baḍaegea.

⁵Onko do ḍher din khonge ińko orom akadińạ ar goha emokʼko menle khan noako emdaṛeakʼa je, iń do aleakʼ dhoromre Phạrusiko ńutuman okaṭakʼ dol menakʼ ona Phạrusi dhorom leka jioniń khemaoetʼ tahẽkana.

⁶Isor do aboren hapṛamko ṭhen okaṭakʼe gokʼletʼ tahẽkan onareń asokʼkante ńitokʼ ińakʼ bicạr hoyokʼkantińạ.

⁷Aleren gelbar khũṭren hoṛko do siń-ńindạ mon ar ontorte Isor sewawaete ona gokʼakʼ reakʼ purạukʼtetʼ ńel reakʼ asre menakʼkoa. E maharaj, ona as iạtege Jihudiko do ińko dusiyediń kana.

⁸Isor gocʼkoe jiwetʼ beretʼko noa katha do cedakʼ bape pạtiạuakʼ kana?

⁹“Iń do apnargeń pạtiạukʼkan tahẽkana, Nasaretren Jisu birudre okań daṛeakʼ ona jotoge kạmi lek tińạ mente,

¹⁰ar ṭhik onkage Jerusalemre hõń kạmiletʼgea. Maraṅ naekeko ṭhen khon ektiạri ńamkate Mạsire pạtiạukʼkan ḍherkoge hajotreń bhoraoletʼkoa ar onko gocʼ ocokore hõ rạjigeń tahẽkana.

¹¹Onko sạjạiko lạgitʼ mitʼ sunạgog khon eṭakʼ sunạgog hạbicʼ iń calakʼkan tahẽkana ar Jisu birudre katha roṛ lạgitʼ iń jormoṭetʼko tahẽkana. Onko cetanre nunạkʼ ãṭ raṅgao tahẽkantińạ je, onko khedko lạgitʼ bides reakʼ nagrahako hạbicʼ hõń calakʼkan tahẽkana.

¹²“Nonkage mitʼ dhao maraṅ naekeko ṭhen khon ektiạri ar hukum ńamkate Damesekteń calakʼkan tahẽkana.

¹³Menkhan E maharaj, unre tikin okte tahẽkana. Ar horre siń cando khon hõ bạ̃ṛti jhak jhak mitʼṭen marsal serma khon iń ar iń sãotenko beṛhaete bamberena.

¹⁴Unre ale sanamkoge otrele bhindạṛena ar iń do mitʼṭen aṛaṅ Ibri pạrsite mitạń kaniń ańjomkeda, ‘E Sạul, E Sạul, cedakʼem khedeń kana? Jạnum bạisạu akatʼ ṭheṅgare kolsaete apnarakʼge cetʼ bam loksaneda?’

¹⁵“Unreń menkeda, ‘E Probhu okoe kanam?’

¹⁶“Probhui menkeda, ‘iń doń Jisu kana, onem khedeńkan. Ma ńitokʼ do beretʼme ar amakʼ jaṅgate teṅgokʼme. Sapʼ sosoricʼ ar goha lekate bahalme lạgitʼge iń do am ṭheniń ńelocoyena. Ar cetʼlekam ńelkedeń ar okaṭakʼ iń udukʼ am ona do eṭakʼko ṭhenem lạiya.

¹⁷Iń do amren hoṛko ar boṅgan hoṛ jạtrenkoakʼ ti khoniń rukhiyạmea. Onkoakʼ mẽtʼ saṛ ocoetako lạgitʼ ar ńut khon marsal secʼ ar Soetanakʼ ektiạri khon Isor secʼ ruạṛko lạgitʼ onko ṭheniń koletʼmea, jemon ińreko pạtiạukʼte kại reakʼ ikạko ńam ar Isor lạgitʼ okoeko begar ocoakan onko talare bakhrako ńam.’

¹⁹“E Agrippa raj, onate serma khon noa dorson hotete okakoń men ocoakan ona doń batao ạguakada.

²⁰Damesekre okoe menakʼko pạhilre onko ṭhen, ar ona tayom do Jerusalemrenko ar goṭa Jihudirenko ar boṅgan hoṛ jạtrenko ṭhen hõń porcar akada je, onko do kại khon mon ạcurkate Isor secʼ ruạṛokʼ lek takoa, ar nonkan kạmi lek takoa one okaṭakʼte sạbudokʼ baṅma onko do monko ạcur akada mente.

²¹Onatege Jihudiko do mundilre sapʼkate gojeń reakʼko kurumuṭuyetʼ tahẽkana.

²²Menkhan Isor do teheń hạbicʼe goṛo akawạdińa ar onate nonḍe teṅgokate kạṭicʼ lạṭu sanamko ṭhen gohań emeda. Nạbiko ar Mose hõ okaṭakʼ hoyokʼgea menteko roṛakatʼ ona bahre do cetʼ hõ bạń roṛeda.

²³Ar ona katha do hoyokʼkana, Mạsi do duk jojom hoyokʼtaea ar unige pạhilre gocʼko khone jewetʼ beredokʼte acʼ jạtrenko ar boṅgan hoṛ jạtrenko ṭhen marsalakʼ rajosṭi reaṅ lại jạhir hoyokʼtaea.”

²⁴Ado Pạul nonkae roṛ dogokʼkan tahẽkanre Phestus do tạkicʼ daramkedete ãṭ aṛaṅteye menkeda, “E Pạul, am dom pagla akana. Ente ḍher bidiyạm hameṭ akada ar ona bidiyạgeye pagla oco akatʼmea.”

²⁵Unre Pạule menkeda, “Manotan Phestus, iń do bạń pagla akana. Okań roṛetʼkan ona do sạriakʼ ar soteteakʼ kathageń roṛeda.

²⁶Ente raj do noakoe baḍaegea ar iń do uni sãote sohosateń roṛ daṛeakʼa. Noa katha do khạṭigeń baḍaea je, noako mod khon okaṭakʼ hõ uni khon do baṅ okoakana, ente danaṅre noako do baṅ hoeakan.

²⁷E Agrippa raj, am do cetʼ nạbikoakʼ katha rem pạtiạukʼ kangea? Ińiń baḍaea pạtiạuatako kangeam.”

²⁸Khange Agrippa do Pạule metadea, “Am do cetʼ thoṛa okterege Isạiyiń lạgitʼem kurumuṭuyeda?”

²⁹Pạule menkeda, “Thoṛare hõ se ḍherre hõ, iń do Isor ṭheniń koejoṅ kana, eken am eskar do baṅ bickom teheń tinạkʼ do ińakʼ kathako ańjometʼkan onko sanamko jemon iń lekako hoyokʼ, eken noa sikṛi chaḍa.”

³⁰Unre raj doe beretʼena ar uni sãote disạm cakʼlaoicʼ Phestus ar Bernike ar onko sãote okoeko duṛupʼ akan tahẽkan onko sanamko hõko teṅgoyena.

³¹Ona tayom onko do ona oṛakʼ bạgikateko calaoena ar ako ako talare memenko ehopʼena, “Nui hoṛ do gocʼ ocokʼ se hajot ocokʼ leka cetʼ hõ bae ceka akada.”

³²Ar Agrippa do Phestuse metadea, “Nui hoṛ do Kạisạr aloe dohaeae khane aṛakʼ ocokokʼgea.”