Read Santali Aposkạmi 27 Bible Online

Aposkạmi 27 - Santali bible

Aposkạmi 27

¹Ado jahajte Itạliạte idileko goṭaketʼ khan Pạul ar eṭakʼ adom kạidiko do Julius ńutuman mitʼṭen subedarakʼ tireko jimạkatʼlea. Julius do maharaj Agustus palṭonko modren mitʼṭen subedare tahẽkana.

²Ale do Adramuttium bondorre mitʼṭen jahajre decʼkatele mohnḍayena. Ona do Asiạ reakʼ eṭakʼ eṭakʼ bondorkote calakʼ lạgitʼ sapṛaoge tahẽkana. Makedoniạ disạmren Thessalonikiạ nagraharen Aristarkhos hõ ale sãoteye tahẽkana.

³Dosar hilokʼ aleakʼ jahaj do Sidonrele teṅgokeda. Julius do Pạul sãote ạḍi mońje beoharkeda ar cerṭhakʼ lạgitʼ uniren gateko ṭhene sen ocoadea jemon acʼren gateko jạruṛokʼakʼ jiniskoko emdaṛeae.

⁴Ado onḍe khon arhõ jahajko laṛaoketʼtalea. Menkhan samaṅ secʼ khone hoyetʼ tahẽkante ale do Kupros dip aṛetele calao idiyena.

⁵Tayomte Kilikiạ ar Pamphuliạ aṛeteakʼ doreão paromkate Lukiạ Prodes reakʼ Murạ nagrahatele seṭerena.

⁶Onḍe Subedar do Alekasandriạ reakʼ mitʼṭen jahaje ńamkeda. Ona jahaj do Itạliạ disạmte calakʼkan tahẽkante uni do ona jahajre aleye decʼketʼlea.

⁷Aleakʼ jahaj do ḍher din hạbicʼ bại bạite calao idiyente ạḍi kosṭote Knidos nagraha sorle seṭerena, menkhan hoe do ar bae laha ocoatʼlea. Unre ale do Krete dip aṛete Salmone muhạ muhile calao idiyena.

⁸Ar doreão aṛe aṛetele calao idiyente bhage bondorko metakʼ mitʼṭen jaegarele hecʼena. Ona sorrege Lassaea nagraha do tahẽkana.

⁹Ado nonkate ḍher din parom calaoena. Ar upạs dinko paromente rabaṅ din hõ sor akan tahẽkana. Unre jahajte dãṛãn do muskilge hoyentalea. Onate Pạul do jahajren hoṛko sontorko lạgitʼe metatʼkoa,

¹⁰“E ho ńelpe, ińiń ńeletʼkana noa dãṛãnre ạḍi loksan hoyokʼ tabona. Ona loksan do eken jahaj ar mal-jal reakʼ do baṅ, aboakʼ jiwi hõ loksanokʼ tabona.”

¹¹Menkhan subedar do Pạulakʼ katha bae luturatʼte jahaj calaoicʼ ar mạlikakʼ kathae ańjomkeda.

¹²Ona bondorre rabaṅ din khemao lạgitʼ lek lekan jaega baṅkante ḍher hoṛgeko goṭakeda je, onḍe khon mohnḍakate hoedaṛeakʼ khan Phoenikiạte senkate rabaṅ dinko khemaoa. Phoenikiạ do Krete dipre jahaj teṅgoe reakʼ jaega tahẽkana. Noa jaegare dạkhin pạchim ar utạr pạchim secʼ do phaelaoge tahẽkana.

¹³Ado tinre dạkhin khon hisitʼ hisitʼ hoeye ehopʼkeda unre onko doko hudiskeda ako okako khojkan tahẽkan onage hoeakana mente. Onate jahaj reakʼ loṅgorko rakapʼkeda ar Krete dip aṛe aṛeteko laha idiyena.

¹⁴Menkhan thoṛa tayom khange ona dip khon Eurakolonko metakʼ mitʼṭen kajak hoe ehopʼena, ar jahaj do ona hoere paṛaoena.

¹⁵Hoe iạte samaṅ secʼ do bale laha daṛeada; onate laha idikʼ kurumuṭu baṅkate jahaj do hoe rele ḍombol ocoada.

¹⁶Ar Klạudako metakʼ mitʼṭen kạṭicʼ dip oka secʼ do hoe baṅ tahẽkan ontele calao idiyena ar jahajre okaṭakʼ lạukạ tahen ona do ạḍi kosṭote rạpudokʼ khonle rukhiyạkeda.

¹⁷Hoṛko do jahajre onako or rakapʼketʼ khan barahikote jahaj reakʼ kholko tolkeda jemon ona reakʼ toktako alo begarokʼ. Ar Surtisko metakʼ doreão reakʼ bạl gadare gạḍiạukʼ botorte badamko raṛa pheḍketʼte jahaj do hoere ḍombolokʼ lạgitʼko aṛakʼada.

¹⁸Ar birbãote aleakʼ jahaj do nonka sokojokʼ ehopʼena je, dosar hilokʼ hoṛko do jahaj reakʼ bojhako dakʼreko giḍikada.

¹⁹Tesar hilokʼ hõ onko do akoakʼ tite jahaj reakʼ jisinkoko giḍikada.

²⁰Ar ḍher din hạbicʼ siń cando se ipilko celege bako ńel ńamlena ar botorgeye hoe idiyetʼ tahẽyena. Ar mucạtʼre bańcaokʼ reakʼ as do cabayentalea.

²¹Hoṛko ḍher din khon cetʼge bako jomakatʼ tahẽkante Pạul do onko samaṅre teṅgoyenteye menkeda, “E ho, ape do ińakʼ katha ańjomkate Krete dip khon jahaj baṅ laṛaoge boge tahẽkantapea. Enḍekhan noa muskil ar loksanre do ohope paṛaolena.

²²Menkhan ńitokʼ iń nehõrapekana, monre dil dohojoṅpe, ente ape modren okoe hõ bape gujukʼa; eken noa jahaj chaḍa.

²³Ente ińiń okoeren kan ar okoeyiń sewawaekan uni Isorren mitʼṭen goḍet do ńindạ iń pheḍre teṅgoyenteye metadińạ,

²⁴‘E Pạul, alom botorokʼa. Am do Kạisạr samaṅre teṅgokʼ hoyokʼtama. Ar noa jahajre tinạkʼ do am sãoteko calakʼkan onko sanamkoakʼ jiwi Isor do dayateye dan akawatʼmea.’

²⁵Onate monre dil joṅpe. Isorre noa pạtiạu menakʼtińạ je, uni okae menakawạdiń ona do hoyokʼgea.

²⁶Ar abo do oka dipre coṅ bon ḍhaṅokʼa.”

²⁷Ale do Adriạ doreão cetante onkage calakʼtegele tahẽyena. Ar gelpon mãhã hilokʼ tala ńindạ okte jahaj calaoko doko onmankeda je, ghuṭu sorko hecʼakana mente.

²⁸Onko do soṅkateko ńelkeda onḍe do irạlgel moka khạndri dakʼ tahẽkana. Arhõ thoṛa tayomko soṅkeda, onḍe do turui gel moka khạndri dakʼko ńamkeda.

²⁹Ado dhirire bajaokʼ botorte jahaj reakʼ tayom secʼ khon ponea loṅgorko caḍokeda ar siń marsal lạgitʼ koejoṅko ehopʼena.

³⁰Ar jahajren nạbiko do jahaj khon dạṛ reakʼko kurumuṭuketʼte samaṅ secʼ khon loṅgor caḍoea mente jahaj reakʼ lạukạ doreãoreko pheḍkeda.

³¹Unre Pạul do subedar ar palṭonkoe metatʼkoa, “Noko nạbiko jahajre bako tahen khan rukhiyạ ohope ńamlea.”

³²Khan palṭonko do lạukạ reakʼ barahikoko samakʼ topakʼketʼte dakʼreko aṛakʼgotʼkada.

³³Ado ạuri marsalokʼre Pạul do sanamko thoṛa jom lạgitʼ nehõratʼkoteye metatʼkoa, “Teheń gelpon din hoyokʼ kana, ar cetʼ hoyokʼa baṅ hoyokʼa ona reakʼ bhabnate upạsge menakʼpea ar cetʼge bape jom akada.

³⁴Menkhan ńitokʼ do thoṛa jom reakʼ iń nehõrape kana. Ente bańcao tahen lạgitʼ jojom jạruṛtapea. Ente, apeakʼ bohokʼ reakʼ mitʼṭen upʼ hõ baṅ nosṭokʼtapea.”

³⁵Ado noa katha menkate Pạul do piṭhạ hataokate onko samaṅre Isore gun manao joharadea ar ona kecakʼkate jojome ehopʼena.

³⁶Unre onko sanamko dilko ńamketʼ khan jojomko dhurạuena.

³⁷Jahajre jotote ale do bar sae eae gel turui hoṛle tahẽkana.

³⁸Ar sanamkoko jom biyen khan jahaj reakʼ hamal komao lạgitʼ joto guhum do doreãoreko giḍikada.

³⁹Ado setakʼ bela ona jaega do bako ńel orom daṛeada, menkhan onko do mitʼṭen huḍiń macha doreãoko ńel ńamkeda one ona reakʼ aṛe do gitilte perecʼge tahẽkan. Unreko goṭakeda jahaj do ona aṛere idikateko ḍhaṅkakʼa.

⁴⁰Onate onko do jahaj reakʼ loṅgorko getʼkate doreãoreko giḍikada ar hạl reakʼ tonol doko raṛakada. Inạ tayom hoe ńam lạgitʼ laha reakʼ badomko rakapʼkeda ar aṛe secʼ laha idiyente ona do gitilre ḍhaṅena.

⁴¹Ar jahaj reakʼ samaṅ secʼ gạḍiạu uricʼente teṅgo hapeyena ar ḍheoko reakʼ tạpiste jahaj reakʼ tayom secʼ do rạpudokʼ ehopʼena.

⁴²Unre palṭonko do kạidiko gocʼko reakʼko goṭakeda jemon onko modre okoe hõ paera oḍokokʼte aloko dạṛ daṛeakʼ.

⁴³Menkhan subedar do Pạul bańcaoe lạgitʼ mon tahẽkantaete palṭonko akoakʼ sana leka bae kạmi ocoatʼkoa. Uni doe hukumkeda okoe paerakʼko baḍae onko do pạhilre jahaj khon don pheḍokʼte guṭuteko rakabokʼma,

⁴⁴ar sarecʼko do jahaj reakʼ tokta se eṭakʼ jãhãnakʼ kaṭ kuṭrạ sapʼkateko paera rakabokʼma. Ar nonkate sanamko nirạite ghuṭuteko rakapʼena.