Read Santali Aposkạmi 28 Bible Online

Aposkạmi 28 - Santali bible

Aposkạmi 28

¹Ado nirạite ghuṭutele rakapʼen khan ona do Malṭa dip kana mentele baḍaekeda.

²Ona dipren hoṛko do ale sãote ạḍi mońjko beoharkeda. Unreye dakʼetʼkan tahẽkana ar rabaṅkan tahẽkante onko do seṅgel jolkate sanamkoko hohoatʼlea.

³Pạul do mitʼ bojha rohoṛ jhuriko samṭaokate seṅgelreye khadleketʼ khan seṅgel reakʼ lolote mitʼṭen bisan biń do ona bojha khone oḍokena ar Pạulakʼ tireye gerbitʼena.

⁴Ado Pạulakʼ tire uni biń ḍhilwạṅ akanko ńelkede khan ona dipren hoṛ doko menana, “Nui hoṛ doe khũniạhi kana ente doreão khone bańcaoenre hõ hokren bicạricʼ do jiwetʼ bae tahẽ ocoaekana.”

⁵Menkhan Pạul do uni biń seṅgelreye irci giḍikadea ar cetʼ hõ bae hạnlena.

⁶Hoṛko doko hudisetʼ tahẽkana uniakʼ hoṛmo do phulạkʼtaea se ackageye gocʼ bhindạṛokʼa nahakʼ. Menkhan ḍher ghạṛicʼre hõ unire cetʼge baṅ hoyokʼkanko ńelketʼ khan hudis ạcurenteko menkeda, “Uni doe deb kana.”

⁷Ona jaegare sorre Publius ńutuman mitʼṭen napṛakʼ hoṛ do jumidari tahẽkantaea. Uni do acʼakʼ oṛakʼteye idiketʼlea ar pe din hạbicʼ ạḍi mońjteye peṛaketʼlea.

⁸Unre Publiusren apattetʼ do ruạ ar amasateye jaṛao akan tahẽkana. Pạul do bhitrite uni ṭhene boloyena are koeadea ar capokedeteye bogekedea.

⁹Ado noa ghoṭna tayom ona dipren sarecʼ sanam rugiko hecʼkateko boge ocoyena.

¹⁰Onko do ạḍi lekateko manotketʼlea ar tayomte jahaj laṛao jokhecʼ aleakʼ jạruṛokʼakʼko bojha gotʼatʼlea.

¹¹Niạ pe cando tayom ale do mitʼṭen jahajtele mohnḍayena. Ona jahaj do inạ diprege rabaṅ dine ṭalao akatʼ tahẽkana. Ona do Alekasndriạ nagraha reakʼ jahaj tahẽkana ar ona reakʼ bohokʼre jawa debakʼ muṭhạn tahẽkana.

¹²Ale do Surạkusre jahajle teṅgoketʼte onḍe pe dinle tahẽyena.

¹³Ar onḍe khonle monḍhayente Regiumrele seṭerena. Ar dosar hilokʼ dạkhin secʼ khone hoeyetʼ tahẽkante tesar hilokʼ do Puteolitele seṭerena.

¹⁴Onḍe do thoṛa biswạsi boehakole ńamketʼkoa. Onko do ako sãote mitʼ hapta tahen lạgitʼko nehõratʼlea. Nonkate ale do Romtele hecʼena.

¹⁵Onḍenko biswạsi boehako do aleakʼ hijukʼ reaṅko ańjom akatʼ tahẽkana. Ar horte ale sãote soṅgekʼ lạgitʼ onkoren adomko do Appius Haṭ, ar adomko do Pe Sạrại ato hạbicʼ ale daramko oḍok hecʼena. Khan noko hoṛko ńelte Pạul do Isore sarhaokedea ar acʼ hõ monre udgạue ńamkeda.

¹⁶Ar Romtele seṭeren khan Pạul do acʼ eskar mitʼṭen oṛakʼre tahen lạgitʼ hukume ńamkeda. Ar mitʼṭen palṭon do uniye pahrayede kan tahẽkana.

¹⁷Pe din tayom Pạul do onḍenko Jihudiko mukhiyạko mitʼ ṭhene hoho jarwaketʼkoa. Adoko jarwayen khan Pạul do onkoe metatʼkoa, “E ińren boehako, iń do abo jạtrenko se hapṛamkoakʼ cạli birudre cetʼge bạń ceka akada, enhõ Jerusalemre sapʼ ocokate Romikoakʼ tireń jimạ ocoakana.

¹⁸Arko kuli baṛakediń khan onko do aṛakʼkạńgeko menleda, ente gocʼ ocokʼ lek jãhãn cetʼ dosge bạń kạmi akada.

¹⁹Menkhan Jihudikoko roṛ daramketʼ khan maharaj Kạisạr dohaeae lạgitʼ jạruṛ hoyentińạ. Menkhan iń jạtren hoṛko jãhãnakʼ dusiko lạgitʼ do bạń hecʼakana.

²⁰Onate iń do apeko sãote ńapamokʼ ar galmarao lạgitʼ iń khojkeda. Ar Israel jạtkoakʼ oka as menakʼ ona lạgitʼge iń do noa sikṛiteń tol ocoakana.”

²¹Unre Jihudi mukhiyạkoko metadea, “Jihudạ khon am reaṅ do jãhãn ciṭhige bale ńam akada. Ar boehako modren okoe hõ onḍe hecʼkate am reaṅ cetʼge bako baḍae ocoakatʼlea se jãhãn bạṛicʼ do bako roṛakada.

²²Menkhan ale do amakʼ mon reakʼ kathakole ańjomtama, ente alele baḍaea joto jaegarege hoṛko do ona dol reakʼ birudre kathako roṛeda.”

²³Onko do Pạul são ńapamokʼ lạgitʼ mitʼṭen dinko goṭakeda. Ar Pạul okareye tahẽkan onḍe do onko chaḍa arhõ aema hoṛko hecʼena. Unre Pạul do setakʼ khon ạyupʼ hạbicʼ Isorakʼ raj reaṅe galmaraoatʼkoa are bujhạuatʼkoa. Uni do Moseakʼ ạn-ạri ar nạbikoakʼ puthi khon hõ Jisu reaṅe bujhạu akokan tahẽkana.

²⁴Ar uni okakoe roṛketʼ onate adomko doko pạtiạuena ar adomko do bako pạtiạulena.

²⁵Pạulakʼ kathate ako talare katha baṅ jurilente onko do onḍe khonko calaoena. Adoko calakʼ lahare Pạule menkeda, “Sonot Jiu do Jesaea nạbi hotete aperen hapṛamko ṭhen ṭhikgeye roṛlakʼa,

²⁶Noko hoṛ senkate metakom, ańjom dope ańjomgea, menkhan bape bujhạua, ńeńel dope ńeńelgea menkhan bape oroma.

²⁷Noko hoṛakʼ ontor do goṛdhoyentakoa, lutur hõ tepetʼ akan takoa, ar mẽtʼ doko jạpitʼ akatʼtakoa, jemon mẽtʼte aloko ńeńel, luturte aloko ańjom, ar ontorte aloko bujhạu, ar bogekʼ lạgitʼ iń ṭhen aloko ruạṛ hijukʼ.

²⁸“Onate baḍae joṅpe, Isorakʼ noa bańcao do boṅgan hoṛ jạtrenko ṭhen kol akana; onkoge ańjom hõko ańjoma.”

³⁰Ar Pạul do purạ bar bochor acʼakʼ bhaṛa oṛakʼreye tahẽkana ar acʼ ṭhen bolokʼ sanamkogeye ataṅetʼko kan tahẽkana.

³¹Uni do sohosate ar bin akoṭte Isorakʼ raj reakʼe porcaretʼ tahẽkana ar Probhu Jisu Mạsi reaṅe cetʼakokan tahẽkana.