Read Santali Aposkạmi 3 Bible Online

Aposkạmi 3 - Santali bible

Aposkạmi 3

¹Mitʼ din Patras ar Johan do tarasiń okte reakʼ koejoṅre mundiltekin rakapʼ calakʼkan tahẽkana.

²Onḍe hoṛko do mundil reakʼ mońjko metakʼ duạr ṭhen dinạmge mitʼṭen hoṛ gokʼ ạgukateko dohokaekan tahẽkana. Uni do janam khonge leḍhageye tahẽkana. Ar mundilte bolokʼkanko ṭhen khon koe ńam lạgitʼ onḍeye doho ocokʼkan tahẽkana.

³Uni do Patras ar Johan mundilte bolokʼkane ńelketʼkin khan unkin ṭhene koekeda.

⁴Unre Patras ar Johan do unikin beṅgetʼ uricʼadea. Ona tayom Patrase menkeda, “Ạliń secʼ beṅgedme.”

⁵Unre uni hoṛ do jãhãnakʼe ńama aste unkin secʼe beṅgetʼkeda.

⁶Unre Patrase menkeda, “Sona ar rupạ do bạnukʼtińạ, menkhan okaṭakʼ menakʼtiń onageń emamkana. Nasaretren Jisu Mạsiakʼ ńutumte beretʼme ar taṛamme.”

⁷Ado jojom ti sapʼkateye beretʼkedea ar unrege uniakʼ jaṅga ar iḍi do keṭecʼentaea.

⁸Uni doe don beretʼena ar taṛam baṛaye ehopʼena. Tayomte uni do taṛam ar don donte Isor sarhao sarhaoete unkin sãote mundilteye boloyena.

⁹Ar hoṛko do uni taṛamkan ar Isor sarhaoedekanko ńelkede khanko oromkedea je, nui doe uni hoṛ kana, one okoe do mundil reakʼ mońjko metakʼ duạrre duṛupʼkateye kokoekan tahẽkan. Ar unire oka hoyen onate hoṛko doko ṭhak cabayena.

¹¹Uni kokoe hoṛ do Patras ar Johan tạkin bae bạgiatʼkinạ. Ar hoṛko do Patrasakʼ kạmi iạteko hahaṛayente unkin ṭhenko ńir hecʼena.

¹²Unre onko do Solomonakʼ pinḍạreko tahẽkana. Ar Patras do onae ńelketʼ khan hoṛkoe metatʼkoa, “E Israelko, noa iạte cedakʼpe hahaṛakʼ kana? Ạlińakʼ daṛete se Isorakʼ bhoktite nui liń taṛam daṛe ocokedete cedakʼpe beṅgetʼ uricʼ ạliń kana?

¹³Abraham, Isạhak ar Jakobren Isor, metakʼme aboren hapṛamkoren Isorge noa kạmi hotete acʼren golam Jisuakʼ ṭhonoke sodor akada. Ape ma goje lạgitʼ mukhiyạkoakʼ tirepe soprotlede. Pilạt do aṛakʼkaegeye menleda, menkhan Pilạt samaṅre unipe baṅkedea.

¹⁴Ape do uni sonoticʼ ar dhoromicʼpe baṅkedete mitʼṭen khũniạhi aṛakʼape lạgitʼpe khojleda.

¹⁵Okoe doe jionren mạlik kan unigepe gocʼkedea, menkhan Isor do gocʼko khon uniye jiwetʼ beretʼakadea; ar ale do onaren gohako kanale.

¹⁶Nuipe ńelekan arpe baḍaeyede kan hoṛ do, Jisureye pạtiạuente, uniakʼ ńutumte daṛeye ńamkeda. Ar Jisu hotete oka pạtiạu hijukʼkan ona pạtiạuge uni do sanamko samaṅreye bogekedea.

¹⁷“E boehako, ńitokʼ ińiń baḍaea aperen murubiko leka ape hõ begor bujhạutege Jisupe krusledea.

¹⁸Menkhan Isor do ḍher din lahare sanam nạbiko hoteteye roṛleda Mạsi do duk jojom hoyokʼtaea; ar Isor do ona katha nonkageye purạukeda.

¹⁹Onate kại khon mon ạcurtape ar Isor secʼ ruạṛokʼpe jemon apeakʼ kạiko meṭaokʼtape;

²⁰Ar ona iạte jemon Isor do uni Mạsi, metakʼme Jisui kol apeteye cerṭha ocope. Ente ape lạgitʼge uni doe bachao ocoakana.

²¹Isor do lahate leka sanamakʼ arhõe beretʼ ruạṛa mente ḍher laha khonge sonot nạbiko hoteteye roṛletʼa. Ar tin hạbicʼ acʼakʼ onako katha bae purạu unạkʼ hạbicʼ Jisu do sermare tahen hoyokʼtaea.

²²Moseye menleda; ‘Aperen Probhu Isor do aperen boehako mod khon iń leka mitʼṭen nạbiye teṅgoapea. Ar uniakʼ katha leka ape do calakʼ hoyokʼtapea.

²³Ar okoe uniakʼ katha bae ańjom uni do acʼren hoṛko khone marao giḍiyea.’

²⁴“Ona chaḍa Sạmuel khon ehopʼkate tinạkʼ nạbikoko roṛakatʼ, onko hõ niạ okte reakʼ katha lahareko lại oṭoakada,

²⁵ar ape ma onko nạbikoren bõsko kanpe. Aperen hapṛamko lạgitʼ Isor okae bondobos akatʼ tahẽkan, ape hõ coṅ onaren bhạgiạdarko kanpe. Isor do Abraham noa kathateye bondobos akawade tahẽkana, ‘am bõsren hotete dhạrtiren sanam jạtkoge bhorko ńama.’

²⁶Ar ape mimitʼko apeakʼ bạṛicʼ hor khon ạcurokʼte bhorape lạgitʼge Isor do ape ṭhen acʼren Guti Jisui kolledea.”