Read Santali Aposkạmi 5 Bible Online

Aposkạmi 5 - Santali bible

Aposkạmi 5

¹Unre Ananiạs ńutuman mitʼṭen hoṛ ar uniren bạhu Sạphira do mitʼṭen sompottikin ạkhrińkeda.

²Ar uniren bạhu baḍae tulucʼge ạkhriń akatʼ ṭaka reakʼ thoṛa hạṭiń do apnar lạgitʼ dohokate sarecʼ ṭaka do apostolkoe ematʼkoa.

³Unre Patrase menkeda, “Henda Ananiạs, Soetan do amakʼ mon cekate nonkae perecʼketʼ tamte, sonot Jiu ṭhen eṛe katham roṛkeda ar jumi ạkhriń reakʼ ṭaka khon thoṛa do am lạgitʼem dohokeda?

⁴Ạkhriń lahare jumi do cetʼ amakʼge baṅ tahẽkana? Ar ạkhriń tayom hõ ṭaka do cetʼ amakʼ tirege baṅ tahẽkana? Enḍekhan cedakʼ nonkan kạmi dom kạmikeda? Am do manwa ṭhen eṛe do bam roṛakada, menkhan Isor ṭhengem roṛakada.”

⁵Ananiạs do noa kathae ańjomketʼ torage otre bhindạṛenteye gocʼena. Ar noa ghoṭna reakʼ katha okoeko ańjomketʼ onko sanamkoge ạḍi botor caṛhaoatʼkoa.

⁶Ado juạn hoṛko do beretʼente uniakʼ hoṛmoko oyo poṭomketʼtaea ar bahrete idikateko topakadea.

⁷Inạ pe ghonṭa gan tayom Ananiạs ren bạhu do onḍeye hecʼ boloyena, menkhan cetʼ hoeakana ona do bae baḍaekan tahẽkana.

⁸Unre Patras do uniye kulikedea, “Mase lạime, am ar Ananiạs do cetʼ ona jumi inạkʼ tegeben ạkhriń akada?” Uniye menkeda, “Hẽ, inạkʼ ṭakatege.”

⁹Unre Patras do uniye metadea, “Probhuren Jiu biḍạue lạgitʼ cedakʼ ben mitʼ mot akana? Ńelme, okoeko hoṛ amren jãwãeko topakede onko do duạr ṭhenko hecʼ seṭerakana, ar amhõ bahreteko oḍok idimea.”

¹⁰Ar Sạphira do unrege Patrasakʼ jaṅga ṭhene bhindạṛena are gocʼena. Ar onko juạn hoṛko do bhitrite bolokate uni hõ gocʼgeko ńelkede khan bahrete idikate uniren jãwãetetʼ pantereko topakadea.

¹¹Unre manḍerrenko ar eṭakʼ okoe do onako ańjomketʼ onko sanam hoṛge ạḍi botor caṛhaoatʼkoa.

¹²Apostolko do hoṛko talare ạḍi lekan cinhạko ar hahaṛa kạmiko kạmikan tahẽkana; ar sanam biswạsikoge mundil reakʼ Solomonakʼ pinḍạre mitʼ ṭhenko jarwakʼkan tahẽkana.

¹³Ar hoṛko do ạḍiko manotetʼko tahẽkanre hõ onko tulucʼ midokʼ do bako diletʼ tahẽkana.

¹⁴Ar enrehõ ạḍi utạr herel ar maejiuko Probhureko pạtiạuena ar biswạsiko tulucʼko juṭucʼ idiyena.

¹⁵Ado apostolko okako cekayetʼkan tahẽkan ona ńelte hoṛko do parkom ar cạukikote rugiko ạguketʼkoa ar hor horteko dohoketʼkoa, jemon Patrase parom calakʼ jokhecʼ uniakʼ umul do onkore paṛaokʼ.

¹⁶Ar Jerusalem reakʼ aḍe pase atoko khon ḍher hoṛ do akoren rugiko ar bạṛicʼ jiute sasetokʼkan hoṛkoko ạgu daraketʼkoa, ar onko sanamkogeko bogeyena.

¹⁷Unre maraṅ naeke ar acʼ sãoten Sạdukiko do ạḍi bạṛicʼko edreyena.

¹⁸Onko do apostolko sapʼkate hajotreko bhoraokatʼkoa.

¹⁹Menkhan ńindạ jokhecʼ Probhuren mitʼṭen goḍet do hajot reakʼ silpińkoe jhicʼkeda ar bahrete oḍok ạguketʼkoteye metatʼkoa,

²⁰“Do calakʼpe, ar mundilre teṅgokate disạm hoṛko ṭhen jaejug jion reakʼ katha lại jạhirpe.”

²¹Onko do ona katha lekage ạḍi setakʼre mundilteko boloyena ar hoṛko lại cetʼkoko ehopʼena. Ar maraṅ naeke ar acʼ sãoten Sạdukiko do maraṅ bạisiko hohokeda, metakʼme Israelren murubiko dolren jotogeko hoho jarwaketʼkoa. Ona tayom apostolko ạguko lạgitʼ adom kạmiạkoko kolketʼkoa.

²²Menkhan onko kạmiyạko do hajot oṛakʼte senkate apostolko bako ńamletʼkoa.

²³Unre onko do ruạṛ hecʼkate noako lạikeda, “Ale dole ńelkeda hajot reakʼ duạr do kulup kajakge menakʼa ar duạr duạrkore pahradarko hõko teṅgo akana, menkhan duạrle jhicʼketʼ khan bhitrire do celege bale ńamletʼkoa.”

²⁴Noa katha ańjomkate mundilren maraṅ kạmiạyicʼ ar maraṅ naekeko doko andesaleyena ar cetʼ coṅ hoyokʼa nahakʼ mente hudisokʼko ehopʼena.

²⁵Unre mitʼṭen hoṛ do hecʼkateye menkeda, “Ńelpe, okoe hoṛko hajotrepe bhoraoletʼko onko do mundilre teṅgokate hoṛkoko cetʼako kana.”

²⁶Unre maraṅ kạmiạyicʼ do acʼren kạmiạkoe idiketʼkote apostolkoe sapʼ ạguketʼkoa. Menkhan hoṛko do kạmiyạko dhiriteko tiń botecʼko botorte apostolko ạḍi bako jormoṭletʼkoa.

²⁷Onko do apostolkoko ạguketʼko khan maraṅ bạisi samaṅreko teṅgoketʼkoa. Unre maraṅ naeke do apostolkoe metatʼkoa,

²⁸“Uni hoṛ reaṅ alo cetʼako lạgitʼ kajaktele hukumatʼpe tahẽkana, menkhan ape do apeakʼ cecetʼakʼte Jerusalempe perecʼ akada ar uni hoṛakʼ mãyãm alere paṛao ocoepe mone akada.”

²⁹Unre Patras ar eṭakʼ apostolkoko roṛ ruạṛkeda, “Manwakoakʼ hukum batao khon Isorakʼ hukumkoge batao lek tabona.

³⁰Ape do okoeṭakʼ kaṭre aka katepe gocʼlede aboren hapṛamkoren Isor do uni Jisuge gocʼko khone jiwetʼ beretʼakadea.

³¹Isor do unige raj ar babańcaoicʼ menkate acʼakʼ jojomsa aṛere duṛube lạgitʼ ṭhonoke dan akawadea, jemon Israelkoakʼ mon ạcurtako lạgitʼ ạte emakote kại reakʼ ikại emako.

³²Ale do noaren gohako kanale ar okoe Isorakʼko bataoetʼkan, ar okoe do sonot Jiue emakatʼko uni sonot Jiu hõ ona reaṅ goha kanae.”

³³Noa katha ańjomkate mukhiyạko do ạḍiko raṅgaoena ar apostolko gocʼko lạgitʼko khojkeda,

³⁴menkhan Gamaliel ńutuman Phạrusi dolren mitʼṭen hoṛ do maraṅ bạisi talareye teṅgoyena. Uni do mitʼṭen sostor baḍae hoṛe tahẽkana ar sanamkoge uniko manotedekan tahẽkana. Uni do apostolko thoṛa ghạṛicʼ bahrere dohoko lạgitʼe hukumkeda.

³⁵Ona tayom maraṅ bạisiren hoṛkoe metatʼkoa, “E Israelko, men sontorokʼpe, noko hoṛko cetanre okaṭakʼ kạmipe menjoṅkan.

³⁶Ente niạko din lahare Theudase ńutuman mitʼṭen hoṛ do hecʼkate apnarte mitʼṭen bises hoṛkanae menteye dạbileda, ar pon sae gan hoṛ uni tulucʼko seletʼlena. Uni doe gocʼ ocoyena ar uniren sanam soṅgetenko doko chir chạturena. Ar noate uni do joto ạuṛiakʼentaea.

³⁷Ona tayom hoṛ lekhako jokhecʼ Gạlilren Jihudạ hõ hecʼkate hoṛko acʼ secʼe ạcurketʼkoa. Ar uni hõe gocʼena, ar uniren sãotenko hõ sanamko chir chạturena.

³⁸Onateń metapekana, noko hoṛko cetanre cetʼge alope cekaya. Noko do aṛakʼkakope, ente nokoakʼ monsubạ ar kạmiko manwa secʼ khonakʼkan khan ona do maraokʼa.

³⁹Menkhan Isor secʼ khonakʼ kan khan ohope thir ocodaṛelekoa. Ente hoedaṛeakʼa ape do Isor birudregepe lạṛhại kan.”

⁴⁰Unre Gamalielakʼ katha leka mukhiyạko doko mitʼ motena. Onko do apostolko bhitrite hoho idikate dalko lạgitʼko hukumkeda. Ar ona tayom doko aṛakʼkatʼkoa arko hukumatʼkoa Jisu reaṅ jemon jãhãnakʼ ar aloko roṛ baṛae.

⁴¹Apostolko do Jisu ńutumte bemanot ocokʼ lek kanako menteko bujhạuketʼ khan rạskạte maraṅ bạisi khonko oḍok calaoena.

⁴²Onko do jaoge mundilre ar oṛakʼ oṛakʼ senkate cetʼakoko ehopʼena ar Jisuge Mạsi kanae mente noa bhage sombat porcar iditegeko tahẽyena.