Read Santali Aposkạmi 6 Bible Online

Aposkạmi 6 - Santali bible

Aposkạmi 6

¹Inạko dinre celako doko saṅge idikʼkan tahẽkana. Unre celako modre okoe Jihudiko Junạni pạrsiteko roṛetʼkan tahẽkana onko do Ibri pạrsite roroṛkan Jihudiko nonka mente dusikoko ehopʼena je, dinạmge jomakʼ emokʼ jokhecʼ onkoren rạnḍi maejiuko do cetʼge bako ńametʼa.

²Onate onko gelbar apostolko do joto cela mitʼ jaegare hoho jarwakateko metatʼkoa, “Isorakʼ katha porcar ḍhilạukate, jom ńũ reakʼ sapʼ dapʼ do baṅ ṭhika.

³E boehako, ape modkhon Jiu ar akelte perecʼ akan ar sanam hoṛko manotko nonkan eae goṭen hoṛ bachao joṅpe. Ale do onkoge noa sapʼ dapʼ kạmi reakʼ dạyikle emakoa ar ale do koejoṅ ar Isorakʼ katha porcar lạgitʼ jamaṛ akanle tahena.”

⁵Ado dolren sanamkoge noa katha do mońjko metatʼa. Onko do biswạs ar sonot Jiute perecʼakan Stephanko bachaokedea. Ona chaḍa Philip, Prokhorus, Nikanor, Timon, Parmenas ar Antiokiạren Nikolas hõko bachaokedea. Nui Nikolas do boṅgan jạtrene tahẽkanre hõ Jihudi dhorome pańjayetʼkan tahẽkana.

⁶Onko do apostol ṭhenko idiketʼkoa. Ar apostolko do onko lạgitʼko koekeda ar kạmire bahalko lạgitʼ capokateko bhoratʼkoa.

⁷Nonkate Isorakʼ katha do pasnao idiyena, ar Jerusalemre celako do lekhare ạḍi usạrako saṅge idiyena ar ạḍi utạr naekeko hõ Mạsiakʼ dhoromreko pạtiạuena.

⁸Stephan do Isorakʼ daya ar daṛeteye perecʼente hoṛko talare ạḍi lekan cinhạko ar hahaṛa kạmiko kạmiye ehopʼena.

⁹Ar okaṭakʼ sunạgog do sạdhin hoṛkoakʼ sunạgogko metakʼkan tahẽkan ona sunạgogren adom hoṛko do Stephan birudreko teṅgoyena. Onko do Kureni ar Alekasndriạ nagraharen ar Kilikiạ ar Asiạ disạmren Jihudikoko tahẽkana.

¹⁰Onko do Stephan sãote reṭepeṭekʼko ehopʼena, menkhan Stephan do sonot Jiu hotete akel salakʼe galmaraoatʼkoa. Onate onko do uni birudre bako teṅgo daṛeada.

¹¹Unre onko Jihudiko do hape hapete adom hoṛko noa menkateko uskạuketʼkoa, “Stephan do Mose ar Isor birudre opoman reakʼ katha roroṛle ańjomakadea.”

¹²Nonkate onko do disạm hoṛko, murubiko ar sostor baḍaekoko ạulạuketʼkoa ar Stephanko sapʼkedete maraṅ bạisi samaṅreko ạgukedea.

¹³Onko do adom eṛe gohakoko teṅgoketʼkoa. Eṛe gohakoko menkeda, “Nui hoṛ do jaoge mundil birudre ar Moseakʼ ạn-ạri birudre kathae roṛeda.

¹⁴Ale do noa katha roroṛle ańjomakadea, Nasaretren uni Jisu do noa mundile rạputʼ giḍia ar Mose oka ạn-ạrikoe emakatʼbon onako hõe pheraoa.”

¹⁵Ado ona maraṅ bạisire okoeko duṛupʼ akan tahẽkan onko sanamkoge Stephanko beṅgetʼ uricʼade khan uniakʼ mẽtʼãhã do sermaren mitʼṭen goḍetakʼ mẽtʼãhã lekako ńelketʼtaea.