Read Santali Aposkạmi 7 Bible Online

Aposkạmi 7 - Santali bible

Aposkạmi 7

¹Unre maraṅ naeke do Stephane kulikedea, “Noako katha do cetʼ sạrikangea?”

²Stephan do roṛ ruạṛketʼteye menkeda, “E boehako ar babako ińakʼ katha ańjompe. Aboren hapṛam Abraham do Haran nagrahare ạuriye berelokʼre Mesopotamiạ disạmreye tahẽkana ar unre ṭhonokren Isor do uni ṭhen ńel ocoyenteye metade tahẽkana,

³‘am do amakʼ disạm ar peṛa pạrbhạko bạgikate okaṭakʼ disạmiń udukʼam ona disạmte calakʼme.’

⁴“Onate uni do Kạldiakoakʼ disạm bạgikate Haran naṅgarhare senkateye berelena. Ar ńit oka disạmrepe girobasokʼkan Isor do Abraham nonḍegeye kolledea uniren apattetʼe gocʼen tayom.

⁵Ar acʼakʼ ạidạri lạgitʼ Isor do Abraham cetʼge bae emadea, jaṅga lebedokʼ leka jaega hõ baṅ. Menkhan Isor doe gokʼade tahẽkana je, uni ar uniren bõsko do ạidạrilekate ona disạme emakoa. Menkhan unhõ Abrahamren do cele gidrạge bako tahẽkantaea.

⁶Isor do uniye metadea, ‘amren bõsko do upriạko hoyokʼa. Hoṛko do golamko khaṭaokoa ar pon sae bochor hạbicʼko santaokoa.’

⁷Isor do arhõe metadea, ‘okoe onko golamko khaṭaoko onko jạt doń sạjạikoa. Ar onko do ona disạm khonko oḍok hijukʼte noa jaegare ińko sewawạńạ.’

⁸Ona tayom Isor do acʼakʼ bondobos reakʼ cinhạ lekate khatna reakʼ niạme emena. Inạ tayom Abrahamren hopon Isạhake janamena ar irạl din hilokʼreye khatna ocokedea. Ar Isahak do Jakobe khatna ocokedea ar Jakob do onko gelbar khũṭren hapṛamkoe khatna ocoketʼkoa.

⁹“Onko khũṭren hapṛamko do Josephko hiskạwadete golam lekate Misor disạmteko ạkhrińgotʼkadea. Menkhan Isor do Joseph sãote tahẽkate joto lekan duk ar kosṭo khone rukhiyạkedea. Ona chaḍa Isor do Joseph akele danadea ar Misorren raj Pharao samaṅre daya ar dulạṛe ńamkeda. Onate Pharao do Misorren disạm cakʼlaoicʼ ar acʼakʼ oṛakʼren mạlik hõe benaokedea.

¹⁰

¹¹“Inạ tayom goṭa Misor ar Kanan disạmre akal hoyena. Onate ạḍi haron kosṭo hecʼ paṛaoena ar aboren hapṛamko do jomakʼ bako ńamleda.

¹²Menkhan Jakob do Misorre jomakʼ menakʼa menteye ańjomketʼ khan aboren hapṛamko pạhil dhao onḍeye kolletʼkoa.

¹³Ar dosar dhaore Joseph do boehakoe baḍae ocoketʼkoa acʼ doe okoe kana mente. Unre Pharao do Josephakʼ gharońj reaṅe baḍaekeda.

¹⁴Ona tayom Joseph do acʼren apat Jakob ar gharońjren eṭakʼ sanamkoe hoho ạgu ocoketʼkoa. Onko do lekhare eaegel mõṛẽ hoṛko tahẽkana.

¹⁵Ado Jakob hõ Misorteye calaoena, ar onḍe do uni ar aboren hapṛamko hõko gocʼena.

¹⁶Ar onkoakʼ mạ̃ṛĩko do Sikemre idikateko topakada. Noa mạ̃ṛĩ poḍa Abraham do Sikem nagraharen Hamorren hoponko ṭhen khone kirińleda.

¹⁷“Abraham ṭhen Isor okaṭakʼe gokʼletʼ tahẽkan ona purạukʼ reakʼ okte seṭeren khan Misorre aboren hoṛko doko saṅge idiyena.

¹⁸Inạ tayom Misorre ar mitʼ hoṛe rajena. Uni do Joseph reaṅ cetʼge bae baḍaekan tahẽkana.

¹⁹Uni raj do aboren hoṛkoe ṭhokayetʼko tahẽkana ar aboren hapṛamko hõ ạḍiye santaoketʼkoa. Ar onkoren bale gidrạkoko janamokʼkan tahẽkanre onko do gocʼko lạgitʼ bahreteye giḍi ocoketʼkoa.

²⁰“Ona jokhecʼ Moseye janamena. Uni do ńelokʼte ạḍi mońje tahẽkana. Ar pe cando hạbicʼ acʼren apatakʼ oṛakʼreye ạsul ocoyena.

²¹Ar tinre bahreteye giḍi ocoyena unre Pharaoren hoponera do uniye hạr sãohãkedea ar acʼren gidrạ lekae joton harakedea.

²²Mose do Misorrenkoakʼ sanamakʼ akelte akelanicʼe hoyena, ar acʼakʼ katha ar kạmikote uni do daṛeanicʼe tahẽkana.

²³“Moseakʼ umer pongel bochor hoyentae khan uni do acʼren Israel boehako sãote ńapamokʼe menjoṅana.

²⁴Unre mitʼṭen Misri hoṛ do mitʼṭen Israel hoṛ cetanre bạṛicʼ beoharetʼkane ńelkede khan uni Israel goṛowae lạgitʼe calaoena ar Misri hoṛe gocʼkedete uniakʼe hala ruạṛkeda.

²⁵Mose doe hudisetʼ tahẽkana, acʼren hoṛkoko bujhạu daṛeakʼa Isor do acʼ hotete onkoe bańcaokoa mente, menkhan onko do bako bujhạu daṛeada.

²⁶Dosar hilokʼ Mose do barea Israel hoṛ lạṛhạikane ńelketʼkinạ. Unre sulukokʼ lạgitʼe metatʼkinạ, ‘Henda ho, boehakan coṅ ben, enḍekhan aben talare cedakʼ nonka bạṛicʼ do ben beohareda?’

²⁷“Menkhan okoe bạṛicʼe beboharetʼ tahẽkan uni do Mose ṭhelao ocokʼkedeteye metadea, ‘okoe baṅ ạliń talare mukhiyạ ar bicạricʼe dohoakatʼme?

²⁸Holanokʼ cetʼleka uni Misri hoṛem gocʼkede, onkage cetʼ iń hõ gojeńem menetʼkana?’

²⁹Ado Mose noa kathae ańjomketʼ khan Midiạn disạmteye dạṛkeda ar onḍegeye berelena. Ar onḍege uni do barea koṛa gidrại gidrạwana.

³⁰“Ona tayom pongel bochor paromena. Ar Sinại buru ṭhen oka hahaṅkar jaega menakʼ onḍe mitʼṭen jạnum jhạwạre jolokʼkan seṅgelre mitʼṭen serma goḍet do Mose ṭhene ńelocoyena.

³¹Ona ńelte Mose doe hahaṛayena. Ar mońj okocʼte ńel lạgitʼe sen soren khan Probhuakʼ noa kathae ańjomkeda,

³²‘Iń do amren hapṛamkoren Isor kanạń, Abraham, Isahak ar Jakobren Isorge.’ Unre Mose do botorteye thar tharaoena; ar ńel lạgitʼ dil hõ bae dilleda.

³³“Unre Probhu do uniye metadea, ‘amakʼ jaṅga khon panahi bojtam, ente onem teṅgo akan jaega do sonotgea.

³⁴Misor disạmre ińren hoṛko cetanre oka santao hoyokʼkan ona doń ńelakada. Iń do onkoakʼ rakʼ iń ańjomakada ar onko chaḍaoko lạgitʼ iń pheḍ hecʼakana. Iń do ńitokʼ Misor disomteń kol ruạrmea.’

³⁵“Nui doe uni Mose kana one okoe do Israelkoko baṅlede, oneko menletʼ ‘okoe baṅ am do mukhiyạ ar bicạricʼe doho akatʼme?’ Ar okoeṭakʼ serma goḍet ona jhạwạ talare Mose ṭhene ńel ocolen uni hotete Isor acʼge Israelkoren Mukhiyạ ar chaḍaoicʼ menkate Misorte Moseye kolledea.

³⁶Ar nui Mosege Misor disạm khon Israelkoe oḍok ạguletʼkoa ar Misor disạmre, arakʼ doreãore ar pongel bochor hạbicʼ hahaṅkarre ạḍi utạr hahaṛa kạmi ar cinhạkoe kạmileda.

³⁷Nui kangea uni Mose one okoe do Israelkoe metatʼko tahẽkan, ‘aperen Isor do aperen Israel boehako mod khon iń lekanicʼ mitʼṭen nạbiye teṅgoapea.’

³⁸Nui Mosege hahaṅkarre Israelkoren ona dol modre aboren hapṛamko sãoteye tahẽkana. Ar okoeṭakʼ serma goḍet do sinại burure kathae roṛletʼ tahẽkan, onḍe do nui Mosege serma goḍet sãoteye tahẽkana. Ar abo emabon lạgitʼ jiwetʼ kathako do nui Mosege onḍegeye ńamleda.

³⁹“Menkhan aboren hapṛamko do uniakʼ bataotae bako rebenlena. Ona bodol onko do Mose bạgikate Misor disạm secʼ monko ạcur ruạṛketʼtakote Aronko metadea, ‘abo laha lahate hor udukʼ abon lạgitʼ boṅgako benao abonme. Ente Misor disạm khon okoeye oḍok ạguketʼbon uniakʼ cetʼ hoeakana ona do babon baḍaea.’

⁴⁰

⁴¹Unre onko do mitʼṭen mĩhũ muṭhạn leka boṅgako benaoana. Ar ona muṭhạn ṭhen janwar dãṛẽko samaṅkeda ar akoakʼ titeko tearakatʼ kạmiko iạteko onko doko hesecʼ sekrecʼena.

⁴²Menkhan Isor do ạcurente onkoe alae giḍikatʼkoa sermaren siń cando, ńindạ cando ar ipilko sewawako lạgitʼ. Ar inạ kathage nạbikoakʼ puthire olakana: E Israel hoponko, hahaṅkarre pongel bochor ape do cetʼ iń lạgitʼ janwar se eṭakʼ jãhãn dãṛẽkope samaṅleda?

⁴³Baṅa, bickom ape do sewae lạgitʼ oka muṭhạnpe benaoletʼ tahẽkan uni Molok boṅga reakʼ muṭhạn ar Rophan boṅgaren ipilge ape dope gokʼ idiledea. Onatege iń do Babel disạmte bondi lekateń kolpea.

⁴⁴“Goha reakʼ tạmbu do hahaṅkarre aboren hapṛamko sãote tahẽkana. Isor do Mose cetʼlekae hukumade tahẽkan ar Mose okaṭakʼ nạmunae ńelletʼ onkage noa tạmbu hõ tear akan tahẽkana.

⁴⁵Aboren hapṛamko do ona tạmbu ńamkate akoren ạyuricʼ Josuạ tabere tahẽkate ako sãote aboakʼ noa disạmteko ạguleda. Un johkecʼ Isor do onko samaṅ khon eṭakʼ jạtkoe laga ńirketʼkoa ar onko do noa disạmko ạidạriana. Ar Dạud hạbicʼ ona tạmbu do noa disạmrege tahẽkana.

⁴⁶Dạud do Isorakʼ daya ńamkate Jakobren Isorakʼ tahen jaega benao lạgitʼe koean tahẽkana;

⁴⁷menkhan Solomonge uni lạgitʼ oṛakʼ doe benaoleda.

⁴⁸“Menkhan maraṅ Isor do manwakoakʼ benaoakʼ oṛakʼre bae tahenkana. Nạbiye menetʼ leka,

⁴⁹Probhui meneda, ‘serma do ińakʼ siṅghạson kana ar ot do ińakʼ jaṅga lebedokʼakʼ ganḍo kana; am do iń lạgitʼ cetʼlekan oṛakʼem benaoa? Ar ińakʼ jirạukʼ ṭhạ̃i do okare hoyokʼa?

⁵⁰Noako jinis do cetʼ ińakʼ nij tite bạń benao akada?’

⁵¹E keṭecʼ hoṭokʼanko! Be-Jihudiko lekage apeakʼ lutur ar ontor do, ar apehõ ṭhik aperen hapṛamko leka kanape. Ape do jaoge sonot Jiupe tạkicʼ daramedekana.

⁵²Nonkan jãhãe nạbi menakʼkoa, one okoe do aperen hapṛamko bako santao akatʼko? Se uni dhoromicʼ hoṛ, metakʼme Mạsiakʼ hijukʼ reakʼ katha okoe doko lại lahaletʼ, onko hõko gocʼketʼkoa. Ar ńitokʼ ape do bạirikoakʼ tire Jisupe sapʼ ocokedete uni hõpe khũn ocokedea.

⁵³Serma goḍetko hotete ape ṭhenge coṅ ạn-ạriko ma emlen, menkhan ape do ona bape manao akada.”

⁵⁴Noako katha ańjomkate onko mukhiyạko do Stephan birudre ạḍi bạṛicʼko raṅgaoena ar uni birudreko togocʼ ḍaṭakeda.

⁵⁵Menkhan Stephan do sonot Jiuteye perecʼen khan serma secʼe beṅgetʼkeda ar Isorakʼ ṭhonoke ńel ńamkeda. Uni do Isorakʼ jojomsa aṛere Jisu teṅgo akane ńelkede khane menkeda,

⁵⁶“Ńelpe, iń do serma jhicʼ akan ar Manwa Hopon Isorakʼ jojomsa aṛere teṅgo akaniń ńelekana.”

⁵⁷Noa iạte onko do akoakʼ luturko tubạtʼketʼtakoa ar ãṭ aṛaṅte hohoate mitʼ dhaote Stephanko jhapṭaokedea.

⁵⁸Onko do dhirite tińe lạgitʼ nagraha bahreteko or oḍokkedea, ar gohako do akoakʼ kicricʼ totʼkate Sạul ńutuman mitʼṭen juạn hoṛakʼ jaṅga ṭhenko dohokeda.

⁵⁹Arko tińekan tahẽkanre uni do nonkae koekeda, “E Probhu Jisu, ińakʼ jiwi ataṅ tińme baṛe.”

⁶⁰Ar ikhṛumente ãṭ aṛaṅteye menkeda, “E Probhu, nokoakʼ noa kại do alom lekhawakoa,” Ar noa menkate uni doe gocʼena.