Read Santali Romiko lạgitʼ Pạul Apostolakʼ ciṭhi 14 Bible Online

Romiko lạgitʼ Pạul Apostolakʼ ciṭhi 14 - Santali bible

Romiko lạgitʼ Pạul Apostolakʼ ciṭhi 14

¹Pạtiạure okoeye nijorge uni do ataṅ sãohãyepe; uniakʼ hudis bundis joṅre uni tulucʼ alope reṭe peṭekʼa.

²Jãhãeye hudiskea uni do jotowakʼe jom daṛeakʼa, menkhan okoe pạtiạureye nijorge uni do eken aṛakʼ sakamgeye jomeda.

³Jel jojom hoṛ do jel baṅ jojomicʼ hoṛ aloe nisṛạuema ar jel jojomicʼ hõ jel baṅ jojomicʼakʼ dos aloe sabtaema, ente Isor do unkin bana hoṛgeye ataṅ sãohã akatʼkinạ.

⁴Am dom celekante, eṭakʼ hoṛren gutim bicạrede kana? Uni doe teṅgo ṭahraokʼa, seye ńurocokʼa, ona do uniren kisạ̃ṛgeye bujhạua. Menkhan uni doe teṅgo ṭahraokʼa, Probhuge uni doe teṅgo ṭahrao ocoyea.

⁵Mitʼ hoṛ do mitʼ din eṭakʼ din khon sorose bujhạueda. Arhõ eṭakʼ hoṛ do joto dinge somangeye bujhạueda. Noa babotre okoe cetʼe cekae ar bae cekae, ona do monreye khạṭi joṅma.

⁶Din okoeye manaoetʼkan uni do Probhu kusi ocoye lạgitʼgeye onkayeda. Ar okoe sanamakʼe jometʼkan uni do Probhu kusi ocoye lạgitʼgeye jomeda, ente uni do Isore gunmanao joharae kana. Okoe sanamakʼ bae jometʼkan uni hõ Probhu kusi ocoye lạgitʼge bae jomeda, ar uni hõ Isore gun manao joharae kana.

⁷Aboko modre okoe hõ apnar lạgitʼ jiwetʼ babon tahenkana ar apnar lạgitʼ okoe hõ babon gujukʼ kana.

⁸Abo jiwetʼ bon tahen khan abo do Probhu lạgitʼge jiwetʼ bon tahenkana, ar bon gujukʼ kan khan Probhu lạgitʼge bon gujukʼ kana. Enḍekhan jiwetʼ bon tahen se bon gujukʼ, abo do Probhuren kangea bon.

⁹Mạsi doe gocʼlena are jiwetʼ beretʼena jemon uni do jiwetʼko ar gocʼkoren Probhui hoedaṛeakʼ.

¹⁰Enḍekhan cedakʼ am do amren boehamakʼ dosem sapʼeda? Ar cedakʼ amren boeha dom nihạtede kana? Bicạr lạgitʼ ma sanamkoge coṅ Isor samaṅre teṅgokʼ hoyokʼ tabon.

¹¹Sonot sostorre olakana, “Probhui meneda, ‘ińiń jiwetʼgete mitʼke mitʼ gunṭhi do iń samaṅre ikhṛumokʼa, ar mitʼke mitʼ alaṅ do Isore sarhaoea.’ ”

¹²Enḍekhan ńelokʼ kana, abo mimitʼ hoṛ do apnar reaṅ lekha jokha Isor emae hoyokʼ tabona.

¹³Onate abo do mimitʼ hoṛakʼ dosko alo bon sabtakoma, ar nonkanakʼ alo bon kạmi ma one ona ńelte jãhãe boeha monreye tạkijokʼ se kạireye ńur botecʼkokʼ.

¹⁴Probhu Jisu tulucʼ bon kolom mitʼ akante iń do bes okocʼteń baḍaea je, okaṭakʼ jomakʼ hõ besaphawakʼ do baṅkana, menkhan jãhãe jãhãn jomakʼ besaphagea menteye hudisetʼ khan enḍekhan uni lạgitʼ ona jomakʼ do besaphagea.

¹⁵Jãhãn jomakʼ iạte amren boeham duk ocoyedekan khan am do bam dulạṛede kana. Okoe lạgitʼ Mạsiye gocʼlen, jomakʼ karonte uni do alom nasao ocoyea.

¹⁶Apeakʼ bhageakʼ do okoe hõ alo jemonko neṅghaotape.

¹⁷Isorakʼ rajre jom ar ńũ do maraṅakʼ do baṅkana; maraṅ katha do hoyokʼ kana, dhorom ar suluk ar rạskạge Sonot Jiure.

¹⁸Okoe nonkate Mạsi ṭhen golame khaṭaokʼkan, Isor do unireye kusikʼkana ar hoṛko hõ uni do bhageko metaekana.

¹⁹Onate okaṭakʼ kạmile khan suluk hoyokʼ ar okaṭakʼte sanamko bon gopoṛo daṛeakʼ, ona reakʼ bon kurumuṭuima.

²⁰Jãhãn jomakʼ khạtirte Isorakʼ kạmiko do alope nosṭoea. Joto jomakʼge sonotgea, menkhan jãhãe jãhãnakʼ jomte eṭagicʼakʼ monre tạkicʼakʼe janam ocoyetʼ khan uni lạgitʼ ona jom do baṅ ṭhika.

²¹Jel jom, se darkha rasa ńũi se nonkanakʼ kạmi lek do baṅkana one okaṭakʼte amren boehae tạkicʼ botecʼkokʼ.

²²Noa reaṅ am okaṭakʼ bhage mentem pạtiạukʼkan ona do Isor ar am talarege dohoeme. Ar bhageakʼ menkate jãhãnakʼ kạmi jokhecʼ jãhãeakʼ bibek hõ uni bako dusiye khan enḍekhan uni doe bhạgangea.

²³Menkhan jãhãe digdhạkate jãhãnakʼe jom khan enḍekhan uni do dusiye hoyokʼa, ente uni do acʼakʼ biswạs leka bae kạmiyeda. Ente biswạs birudre jãhãnakʼ kạmige kại kana.