Read Santali Romiko lạgitʼ Pạul Apostolakʼ ciṭhi 4 Bible Online

Romiko lạgitʼ Pạul Apostolakʼ ciṭhi 4 - Santali bible

Romiko lạgitʼ Pạul Apostolakʼ ciṭhi 4

¹Enḍekhan aboren mare hapṛam Abraham reaṅ do cetʼ bon menkea? Noa babotre uni do cetʼe ńelleda?

²Abraham do kạmiko iạte dhorom menteye ataṅ ocoakan khan enḍekhan uniakʼ gorbokʼ reakʼ do menakʼgetaea. Menkhan Isor samaṅre acʼakʼ gorbokʼ reaṅ cetʼge bạnukʼtaea.

³Sonot sostorre olakana; “Abraham do Isorakʼ kathareye pạtiạuena ar onate Isor do dhorom menteye ataṅkedea.”

⁴Kạmikate okaṭakʼ kuṛại ńamokʼ, ona do dan do baṅkana, menkhan paona kana.

⁵Menkhan okoe acʼakʼ kạmire bhorsa baṅkate eken Isorreye pạtiạukʼkan, Isor do uniakʼ biswạs iạte dhorom menteye lekhayea, ente unige kại hoṛ do dhorom menteye lekha daṛeaea.

⁶Dạud hõ onkan hoṛ do bhạganicʼe metaekana one okoe Isor do begor kạmitege dhorom menteye lekhayede; enkathae,

⁷bhạgangeako onko do, one okoekoakʼ bedhoromakʼko ikạ akantako, ar okoeakʼ kạiko dapal akantako.

⁸Bhạgangeae uni hoṛ do, one okoeakʼ kạiko Probhui ikạ akatʼtae.

⁹Nonḍe do cetʼ eken khatna ocoakankoge bhạganko men ocoakana? Ar bin khatna akanko lạgitʼ hõ cetʼ baṅ men akana? Hẽ, onko hõ bhạgankoko men ocoakangea, ente bon meneda, “Abraham do biswạs iạte dhorom menteye lekha akana.”

¹⁰Oka obostare lekhayentaea? Khatna tayom se khatna ạurire? Khatna tayom do baṅ menkhan ạuriye khatnakʼrege.

¹¹Khatna ạurire biswạs iạtege Isor do dhorom menteye lekhakedea ar onage tahẽkana uniakʼ sạbudokʼ reakʼ cinhạ. Enḍekhan ńelokʼkana, khatna begorte okoe do eken biswạs hotete dhorom menteko ataṅ ocokʼkan, onko sanamkoren hõ Abraham deo baba kana.

¹²Ona chaḍa, khatnakʼ lahare Abraham do cetʼleka biswạs reakʼ horreye taṛametʼ tahẽkan, onkage khatna akan okoe doko calakʼkan onkoren hõ Abraham doe baba kana.

¹³Abraham ar uniren bõsko ṭhen Isor doe gokʼleda je, noa dhạrti do Abrahamakʼge hoyokʼa. Ạn-ạriko pańjaete do baṅ, menkhan biswạs hotete uni do dhorom menteye lekhayena ar onatege ona gokʼakʼ do doholena.

¹⁴Ạn-ạriko pańjaete jãhãe dhạrti reakʼ ạidạriye ńam khan, enḍekhan pạtiạu do okạjuạgea ar Isorakʼ ona gokʼakʼ reakʼ hõ jãhãn damge baṅ tahena.

¹⁵Ente ạn-ạri do Isorakʼ sạjạiye ạguea. Sạri katha do noage, okare ạnko baṅ tahen onḍe do ạn bemanot reakʼ kukli hõ oho rakapʼlena.

¹⁶Onate manwakoakʼ biswạste noa gokʼakʼ do purạu akana, jemon noa do Isorakʼ daya reakʼ dan hoyokʼ. Onate Abraham bõsrenko lạgitʼ noa gokʼakʼ do khạṭige purạukʼa. Noa gokʼakʼ do eken ạn-tạriren hoṛko lạgitʼ purạukʼa ona do baṅ, menkhan okoeko hoṛ do Abraham leka inạ mitʼ pạtiạureko pạtiạu akan onko lạgitʼ hõ noa gokʼakʼ do khạṭige purạukʼa.

¹⁷Sonot sostorre olakan leka, “Iń do ạḍi utạr jạtkoren babageń hoe ocoakatʼmea,” Ona lekate Isor samaṅre Abraham do abo sanamkoren baba kanae. Okoe gocʼkoe jiwetʼetʼko ar bạnukʼakʼko hõ menakʼakʼko lekae metakʼkan uni Isorrege Abraham doe pạtiạulena.

¹⁸Abraham do baba hoyokʼ reakʼ jãhãn asge baṅ tahẽkantaere hõ uni do Isorre askate pạtiạu akane tahẽkana. Isor do uniye metade tahẽkana, “Amren bõsko do sermaren ipil leka saṅgeko hoyokʼa.” Ar ona katha lekage Abraham do ạḍi utạr jạtkoren babae hoelena.

¹⁹Mitʼ sae umerren haṛam Abraham doe bujhạu daṛeakʼ tahẽkana je, hoṛmo do okạjuạ akantaea ar Sara hõ gidrạ hoyokʼ reakʼ umer do bạnukʼtaea, ar enrehõ uni do biswạsre nijor bae tahẽkana.

²⁰Isorakʼ gokʼakʼre uniakʼ monre tis hõ jãhãn digdhạ baṅ hecʼ akawade tahẽkana, bickom pạtiạure arhõ keṭecʼ tahente uni do Isore sarhaoedekan tahẽkana.

²¹Abraham do purạte noae pạtiạukʼkan tahẽkana je, Isor okaṭakʼe gokʼakawade ona purạu lạgitʼ daṛe do menakʼgetaea mente.

²²Onate Abrahamakʼ biswạs do dhorom mente lekhayentaea.

²³“Dhorom menteye lekhayena,” Noa katha do eken Abraham moto lạgitʼ do baṅ olakana,

²⁴aboko lạgitʼ hõ olakana. Biswạs iạte Isor do abo hõ dhorom menteye lekha bona, ente aboren Probhu Jisu gocʼko khon okoeye jiwetʼ beretʼkede, abo do unirege bon pạtiạu akana.

²⁵Aboakʼ kạiko iạte Jisu do gujukʼ tireye soprotʼlena ar dhorom mente ataṅ bon lạgitʼ uni do gocʼko khone jiwetʼ beretʼ ocoyena.